Tshapita 61
Ɔkɔnwɛlɔ wa dikɛnda dia pami diaki l’ɔdiɛngɛ
L’ETENA kɛnɛ, ondo Yeso nde la Petero, Jakɔba la Joani wakatshwe lo shɔdi mɔtshi ya Dikona dia Hɛrɛmɔna, ko ambeki akina wambohomana l’okakatanu ɔmɔtshi. L’okalwelo ande, Yeso ambɛna ɔnɛ lɛnɛ djembi ambolemba. Olui w’anto wambodinga ambeki ande, ndo afundji wekɔ lo mbidjana lawɔ tamu ta mamba. Lam’ɛnyiwɔ Yeso, anto wamamba heyama ko wambokongotɔnɛ otsha le nde dia towosha mɔyɔ. Yeso mbawambolande ate: “Dikambu diakona diamanyu la wo?”
Ko pami kɛmɔtshi ambotomba oma l’atei w’olui w’anto, amboyoka adwe la ntondo ka Yeso, ko ambôlembetshiya ate: “Umbetsha, dimi lakayi la on’ami a pami one le ye. Ndi eko la odienge watuweteka lumi. Lu ahuli tshe watuwahemaka odienge ako, vo watuhumanyaka lu kete. Ona atutumbaka lolodu, atokeketanyaka anyu, atusinitalaka sina. Dimi lakasengisengi ambeki aye dia mbutundja odienge, keli vo haweyi ntsha.”
Ondo afundji wekɔ lo nsɔka ambeki woho w’anyanya l’ɔtɛ w’ɔnɛ vɔ wambohekɔ kɔnɔla dikɛnda dia pami sɔ. L’etena kɛnɛ kalemba djembi mbambokoma Yeso. Nde ambota ate: “Yee, nyu wa lolonga lone laha la mbetawo, edja ndu kaandi ayumukimo ntshikala la nyu? Edja ndu kaandi ayumukimo ndjala la memakana le nyu?”
Yeso ekɔ lo mbutɛ anto tshɛ wele lâwɔ ɛtɛkɛta ɛsɔ, koko aha la tamu, nde ekɔ lo mbatɔlɔnganya djekoleko le afundji, wanɛ wahɛnyahɛnya ambeki ande. Oma lâsɔ, Yeso ambota lo dikambo di’ɔna akɔ la pami ate: “Nyuyi la ndi le mi.” Ko lam’ayawaye l’ɔna akɔ oya le Yeso, ɔdiɛngɛ wowâhemi ambɔ̂kɔsha lo nkɛtɛ, ambôhohanya efula. Dikɛnda dia pami sɔ ambongitɔ lo nkɛtɛ ndo ambotomba lɔlɔdu.
Yeso mbambolande ate: “Umaka etena kakona kakayala ona la dikambu ne?”
Ko she ɔna ambôkadimola ate: “Umaka dikenda. Tena efula, odienge ako atôkoshaka lu dja ndu lu ashi dia mbudiaka.” Oma lâsɔ, ɔnɛ awɔsɛngasɛngande ate: “Naka we mbeyaka ntsha, utuki ketshi, utukimanyia.”
Ondo ambeta ɛnɔnyi efula wamboyanga ombutshi ɔsɔ ekimanyielo. L’etena kɛnɛ, nde bu ndoko l’elongamelo nto lam’ɛnyinde ambeki wa Yeso wambohekɔ. Koko Yeso ambôkeketsha, awotɛ ate: “Naka we mbeyaka ntsha, akambu tshe mbeyaka ntshama le untu letawo.”
Aha la tshimbatshimba, she ɔna akɔ ambohangɔhangɔ ate: “Dimi lambetawo! Unkimanyia [lânɛ wemi l’ohomba wa mbetawɔ, NW].”
Lam’ɛnyinde elui w’anto woyakongotɔnɛ oya le wɔ, Yeso ambohangwɛ ɔdiɛngɛ akɔ ate: “We odienge wateteka ona one lumi la luhuki, dimi lambukutela nti: Utumbi uma le ndi! Tuwahemaki ntu.” Lam’atatombe ɔdiɛngɛ akɔ, vɔ wambowawanya, wambôhohanya mbala efula. Oma lâsɔ, ɔna pami akɔ ambosenela lo nkɛtɛ, ko anto wotatɛ mbuta ɔnɛ: “Ndi ambuvo.” Koko Yeso ambôkimɛ lo lonya ko ambowemadia.
Yema la ntondo, lam’akatomama ambeki dia tosambisha, vɔ wakatondjaka ɛdiɛngɛ. Diɔ diakɔ diambowombola Yeso lo sheke lam’ɔtwɛwɔ lo luudu vate: “Ukundi akisu kumbeya mbutundja?”
Yeso ambɛnya ɔnɛ nɛ dia vɔ bu la mbetawɔ, diɔ diakɔ diambondâkadimola ate: “Wuhu one mbeyaka ntumba tshikima la dombelo.” Mɛtɛ, akahombama ndjalɔngɔsɔla ntondo ka mbitshanya ɔdiɛngɛ ɔsɔ waki la wolo efula. Akahombama onto monga la mbetawɔ ka nge ndo sɛngasɛnga Nzambi dia nde mbosha wolo wahombama.
L’ɔkɔngɔ diko, Yeso ambonyomoyota nto ate: “Mete kanyutelami nti: Naka nyu la mbetawo uku lotongo la lohodia, nyu nyayutela ukungu one nyati: Umo uma laku, utshu lene, ku vo wayumo.” Ande wolo wakoka monga la mbetawɔ lee!
Wekamu la ekakatanu wakoka têkamɛ di’aha sho pama l’olimu wa Jehowa kokaka mɛnama oko dikona di’otale efula ndo diahakoke sɛkɔ. Koko, Yeso ambɛnya ɔnɛ naka sho monga la mbetawɔ l’etema aso, kitɛka ashi ndo kikeketshaka dia tɔ mbola, kete tɔ kayotshunda ndo kayotokimanyiyaka dia sho mbekola wekamu wa ngasɔ la kandola ekakatanu wele oko akona. Mako 9:14-29; Mateu 17:19, 20; Luka 9:37-43.
▪ Dikambo diakɔna diamboyohomana la Yeso lam’okaludinde oma lo Dikona dia Hɛrɛmɔna?
▪ Woho akɔna wambokeketsha Yeso she ɔna pami lele l’ɔdiɛngɛ?
▪ Lande na kele ambeki kokoka tondja ɔdiɛngɛ ɔsɔ?
▪ Lo ndjela kɛnɛ kɛnyisha Yeso, wolo akɔna wakoka ndjâla la mbetawɔ?