Tshapita 62

Wetshelo wa monga la ndjakitshakitsha

L’ƆKƆNGƆ wa nde kɔnɔla dikɛnda dia pami diaki l’ɔdiɛngɛ lo lɛtshi la nkɛtɛ la Kayisariya Filipɛ, Yeso ambolanga kalola lakande la Kapɛrɛnauma. Koko, nde nangaka munda lɔkɛndɔ lɔsɔ paka nde l’ambeki ande ato ate kele mbalɔngɔsɔlɛ dimɛna dimɛna lo dikambo dia nyɔi kande ndo di’ɛkɛndɛ wayowoyonga lawɔ l’ɔkɔngɔ diko. Nde ambâlembetshiya ate: “On’a untu ayukimwama lu anya w’antu. Vo wayûdiaka, ku lam’ayeta nshi shatu umak’etena kayuwûdiaka, ndi ayulo.”

Kânga mbakatɛkɛta Yeso dikambo sɔ yema la ntondo, ndo mbakɛnyi apɔstɔlɔ asato ohilwelo ndo mbakawoke watɛkɛta dikambo dia “[lɔkɛndɔ, NW]” lande lo wonya akɔ wakandahilɔ, ambeki ande watamane dikambo sɔ fundo polo ndo l’etena kɛnɛ. Kânga mbele ndoko ɔtɔi a l’atei awɔ lambohemba mbuta ɔnɛ nde hatodiakema, oko wakate Petero yema la ntondo, vɔ wekɔ lo mboka wɔma mombola efula lo dikambo sɔ.

L’ɔkɔngɔ diko, vɔ wamboyokoma la Kapɛrɛnauma, osomba wele oko ngelo kodjashi Yeso lam’asalande olimu ande. Petero nde l’apɔstɔlɔ amɔtshi wekɔ ase osomba ɔsɔ. Lam’ewɔ lɛkɔ, apami watɔkɔngɔlaka elambo wamboya oya le Petero. Ondo dia vɔ munda Yeso l’ɛkɔmɔ lo mbekelo ketawɔma le anto, vɔ wambowombola vate: “Umbetsha anyu hatufutaka ulambu [wa tɛmpɛlɔ]?”

Ko Petero ambâkadimola ate: “Kema; ndi nfutaka.”

Lam’ɔtwɛnde lo luudu, ondo yema l’ɔkɔngɔ diko, Yeso ambeya dikambo diakɔ. Ɔnkɔnɛ, la ntondo ka Petero tɛkɛta, Yeso ambowombola ate: “Simona, akanaye na? Khumi ya dikanga ya la kete watulungulaka ulambu, kana ulambu a wudja uma le wa na? Uma le ana, kana uma le antu k’antu?”

Petero mbôkadimolande ate: “Uma le antu k’antu.”

Ko Yeso nde lande ate: “Laso ana weko la ndjadjasela.” Lam’ele She Yeso ekɔ Nkumekanga k’andja w’otondo, Ɔnɛ latɛmɔlama lo tɛmpɛlɔ, Ɔna Nzambi mɛtɛ kema l’ɔkɛndɛ wa futa olambo wa tɛmpɛlɔ. Yeso ambota ate: “Keli shu tatuwatakanyaki: utshu l’uduwa, kutuki yodi, kutundi lusi layuya ntundu. Lam’ayuyufula unyo alo, we ayutana shekele [darika nɛi]. Kuyose, kuyuwashayo dikambu diami la dikambu diaye.”

Lam’otshumanyi ambeki, ondo laka Petero, l’ɔkɔngɔ wa vɔ kalola la Kapɛrɛnauma, vɔ wambombola vate: “Akona uleki wuki lu diulelu dia l’ulungu?” Yeso mbeyaka kɛnɛ kâtshutshuya dia vɔ mumbola dimbola sɔ, nɛ dia nde mbeyaka kɛnɛ kambowoyakɛtshanyaka l’ɔkɔngɔ ande lam’akawayakalolaka oma la Kayisariya Filipi. Diɔ diakɔ diambondowambola ate: ‘Tamu takɔna tambonyoyadjanaka lo mboka?’ Ambeki wambokandakanda ko vɔ wambɔlama ki, nɛ dia vɔ wakayamanyaka dia mbeya ɔnɛ loleki woke l’atei awɔ.

Onde sho fɔnyaka ɔnɛ owanu wa ngasɔ takawakoke tomba l’atei w’ambeki, wanɛ wakalongolaka wetshelo w’oma le Yeso, lâsɔ ko aya oko ɛnɔnyi esato w’etondo? Mɛtɛ, dikambo sɔ kɛnɛmɔlaka shɛngiya ya wolo yele l’ekokele k’onto, ndo la tokanyi ta l’ɔtɛmwɛlɔ ande w’edjedja. Ambeki wa Yeso wakole l’ɔtɛmwɛlɔ w’Ase Juda wadja lokumu l’onto lo dihole dia ntondo l’atei w’akambo tshɛ. Lâdiko dia lâsɔ, ondo Petero akakanyiyaka ɔnɛ nde ekɔ lâdiko di’asekande nɛ dia Yeso akôlake dia mbosha “sapi” ya Diolelo. Ondo ndo Jakɔba nde la Joani waki la tokanyi ta ngasɔ nɛ dia wakakondja diɛsɛ dia mɛna ohilwelo wa Yeso.

Oyadi akambo akɔna tshɛ wakawakoke monga lawɔ, Yeso ambosala dikambo dimɔtshi diananda otema woho wa nde mingola tokanyi tawɔ. Nde ambelɛ ɔna dikɛnda, ambowemɛ l’atei awɔ, ambodinga lonya ko ambowatɛ ate: “Nyu hanyeyi mboto lu diulelu dia l’ulungu, tshikima nyu nyambukadimula etema, ndu nyambuyala uku tokendakenda. Okone untu tshe layakitshakitsha uku kiendakenda nye, ndi kuleki wuki lu diulelu dia l’ulungu. Untu tshe lalungula kiendakenda uku nye lu lukumbu lami, ndi ambumbetawo.”

Ande yoho ya dimɛna efula yambondosala dia mingola ambeki ande lee! Yeso hawaoke kɛlɛ ndo hawaele ɔnɛ akanga a lotamanya, akanga a lokaki, kana akanga a ndjambiya. Kema, koko nde ambowasha wetshelo oma l’ɛnyɛlɔ k’ana w’akɛnda, wanɛ wele nshi tshɛ la ndjakitshakitsha ndo kema la lotamanya ndo hawokanyiya kânga yema lo dikambo dia woho wâhɔnawɔ lo lowandji l’atei awɔ. Ɔnkɔnɛ, Yeso ambɛnya ɔnɛ ambeki ande pombaka monga la waonga w’ana w’akɛnda wele la ndjakitshakitsha. Yeso ambodihiya l’ɛtɛkɛta ɛnɛ ate: “One luleki tshitshe l’atei anyu, ndi keli wuki.” Mateu 17:22-27; 18:1-5; Mako 9:30-37; Luka 9:43-48.

▪ Lam’okaludiwɔ la Kapɛrɛnauma, dikambo diakɔna diotshi Yeso nto, ndo etombelo akɔna wamboyala oma l’ɛtɛkɛta ande?

▪ Lande na kele Yeso bu l’ɔkɛndɛ wa futa elambo wa tɛmpɛlɔ, ko lande na kamondofuta?

▪ Kakɔna kambotshutshuya ambeki dia vɔ mbidjana tâmu lam’asawɔ ondo, ndo Yeso ambondotsha dia mbangola?