Tshapita 65

Lɔkɛndɔ la woshɛshɛ otsha la Jerusalɛma

TEKƆ l’eleko kɔ̂lɔ akatshi ka l’ɔnɔnyi 32 T.D., ndo Difɛstɔ dia Tabɛrnakɛlɛ diaya suke. Yeso akaleke sala olimu la Ngalileya, tatɛ lo Elekanelo ka l’ɔnɔnyi 31 T.D., lam’akayange Ase Juda mbodiaka. Ondo Yeso ambokalola la Jerusalɛma paka dia tosala afɛstɔ asato w’Ase Juda wasalema ɔnɔnyi tshɛ.

Kakianɛ, anango Yeso wambotatɛ mbotshutshuya ɔnɛ: “Umo lindu, utshu la Judiya.” Jerusalɛma mbele osomba woleki woke wa la Judeya ndo dihole diaya anto tshɛ wa lo wodja dia ndjɔtɛmɔla Nzambi. Anango wekɔ lo ndjatɛ ɔnɛ: “Nduku untu latutshaka akambu lu usheshe lam’ayalangandi ndjaenyanya lu seke.”

Kânga mbahawetawɔ ɔnɛ Yeso mbele Mɛsiya mɛtɛ, Jakɔba, Simɔna, Yɔsɛfu la Judasi nangaka ɔnɛ ɔnangɛwɔ atshu dia tɛnya wolo wele lande wa sala ahindo le anto tshɛ wayotshɔ lo difɛstɔ. Koko Yeso mbeyaka wâle wakoka mbokomɛ. Nde lawɔ ate: ‘Andja hawokoke nyohetsha, koko dimi vɔ mpetshakami dikambo dimi mbohonwɛka akambo awɔ wa kɔlɔ.’ Diɔ diakɔ diambondotɛ anango ate: “Nyutshu lu dambu. Dimi [tâtshu] lu dambu diako, ne dia etena kami atakuki.”

Difɛstɔ dia Tabɛrnakɛlɛ salemaka nshi esambele. Lushi l’enanɛi mbakomɛdiɔ. Difɛstɔ diakɔ sɔ mbakomiya ɔnɔnyi w’akambi wa dikambɔ ndo diɔ diekɔ etena k’ɔngɛnɔngɛnɔ wa mamba ndo ka eokelo ka losaka. Nshi efula yambeta l’ɔkɔngɔ w’anango ntshɔ kâmɛ l’elui w’anto efula wakatshɔka lo lɔkɛndɔ, Yeso l’ambeki ande wambotshɔ lo woshɛshɛ, anto hawowaɛnyi. Vɔ wambodjɛ l’otadimbo watenyanya Samariya, koko vɔ hawodje l’otadimbo wadjɛ anto efula l’omamu w’Ɔkɛdi wa Jɔrɔdana.

Oko wahombawɔ memala lo ngelo kɛmɔtshi k’Ase Samariya, Yeso ambotoma akɛndji la ntondo dia vɔ tâlɔngɔsɔlɛ pango. Koko, anto wa lɛkɔ hawolange salɛ Yeso oseka dikambo tshɛ lam’okiwɔ ɔnɛ otsha la Jerusalɛma mbatawatshu. Jakɔba nde la Joani wamboka kɛlɛ ko wambowombola vate: “Khumadiondjo, we nangaka shu mvuta diui, dia dja mpulo uma l’ulungu la mbatshumba?” Yeso ambâhangwɛ l’ɔtɛ wa kanyi ya ngasɔ, ko vɔ wambotshɔ otsha lo ngelo kekina.

Lam’atawatshu, ofundji ɔmɔtshi ambombola Yeso ate: “Umbetsha, dimi layukuyela lu ahuli tshe wayuyutsho.”

Koko Yeso nd’ande ate: “Mbulu yeko la afuku, fudu ya l’ulungu yeko la kefu, keli On’a untu kema la lama mbetamia ote andi.” Yeso ekɔ lo nembetshiya ɔnɛ ofundji ɔsɔ ayoyala l’asui naka nde ndjâla ombeki Ande. Ndo mbokɛmaka di’ɔnɛ ondo ofundji ɔsɔ ekɔ la lotamanya efula ko ekɔ wolo nde mbetawɔ yoho ya lɔsɛnɔ la ngasɔ.

Yeso ambotɛ pami kekina ate: “Undjeli.”

Koko nde ambôkadimola ate: “Khumadiondjo, etawo dia dimi ntatshwi la ntukhunde papa.”

Yeso nde lande ate: “Utshiki edu, wakhunde anyawo edu. Keli we, utshu, utadianganyaka dikambu dia diulelu dia [Nzambi, NW].” Mɛtɛ, l’etena kɛsɔ ko she pami kɛsɔ atâvu, nɛ dia otondoyala nde akavu, tshike ɔnande totondonga lo dihole sɔ dia nongamɛka awui wa Yeso. Mbokɛmaka hwe dia, pami kɛsɔ ekɔ lo nɔmba dia konga edja ndo lam’ayovɔ she. Nde bu suke dia mbidja Diolelo diaki Nzambi lo dihole dia ntondo lo lɔsɛnɔ lande.

Lam’atawatetemala la lɔkɛndɔ otsha la Jerusalɛma, pami kekina ambotɛ Yeso ate: “Khumadiondjo, layukuyela, keli etawo dia dimi ntalakanyi la wane weli lakami.”

Yeso nde lande ate: “Naka untu ayudja lunya lu lungu la nkutula ngombe, naka ndi ayewo, ku ndi hakuki mboto lu diulelu dia [Nzambi, NW].” Wanɛ walanga ndjâla ambeki wa Yeso pombaka shikikɛ asho awɔ l’olimu wa Diolelo. Oko wakoka okambi wa dikambɔ mbata omunda wa wɛngɛngɛ naka nde ambonya asho oma la ntondo kande, woho akɔ wâmɛ mbele, ɔnɛ lɛ̂wɔ l’ɔkɔngɔ, otsha l’andja ɔnɛ w’omusu, kokaka takɔ esadi eto oma lo mboka katɔla otsha lo lɔsɛnɔ la pondjo. Joani 7:2-10; Luka 9:51-62; Mateu 8:19-22.

▪ Wa na wele anango Yeso, ndo kakɔna kakanawɔ lo dikambo diande?

▪ Bonde kahalangi Ase Samariya nongola Yeso, ndo kakɔna kalanga Jakɔba la Joani sala?

▪ Naa asawo asato wosadi Yeso lam’ewɔ lo mboka, ndo woho akɔna wambondoka epole ɔsɛkɛ dia mɛnya ohomba wa monga la yimba ya ndjâsɛka l’olimu wa Nzambi?