Tshapita 67

Hawokuki munda Yeso

LAM’ASALEMA Difɛstɔ dia Tabɛrnakɛlɛ, ewandji w’ɛtɛmwɛlɔ w’Ase Juda wambotoma apulushi dia vɔ tonda Yeso. Yeso hayange dia ndjashɛ. Koko, nde ekɔ lo tetemala mbetsha anto lo sɛkɛ, ata ate: “Dimi layutshikala la nyu etenyi ka tshitshe, ku layutsho le one lakantumi. Nyu nyayunyanga, ku hanyomena. Nyu hanyeya nkuma lu dihuli diayumuyala.”

Ase Juda hawomane ɛtɛkɛta ɛsɔ fundo, diɔ diakɔ diambowotatɛ ndjambola lam’asawɔ vate: “Lendi ayutsho untu one, ahateya mbêna? Ndi ayutsho le wane wakadiangana l’atei w’asi Ngirika, ndu ayutetsha asi Ngirika? Kitshimudi yakona ya diui diutshindi ati: Nyayunyanga, ku hanyomena? ndu ati: Nyu hanyeya nkuma lene ayumuyala?” Mɛtɛ, Yeso ekɔ lo tɛkɛta dikambo dia nyɔi kande kele suke ndo dia eolwelo kande k’otsha lo lɔsɛnɔ la l’olongo, lɛnɛ ahakoke atunyi ande mboyela.

Lushi l’esambele ndo la komelo ka difɛstɔ lambokoka. Oseka pindju tshɛ, l’etena kasalema difɛstɔ diakɔ, ɔlɔmbɛdi ɔmɔtshi mbɔsa ashi wakawataholaka l’Oduwa wa Silɔamɛ ko nde mbatshola la tshina di’ediakelo. Ondo dia nde mbohola ampokami ande nsɛlɛmɔnyi kɛsɔ, Yeso ambohangɔhangɔ ate: “Naka untu la pusa, ayi le mi, ayono. Ekedi w’ashi a lumu wayokela l’utema wa one lambêtawo, uku wata afundelu.”

Mɛtɛ, Yeso ekɔ lo tɛkɛta lânɛ dia kɛnɛ k’endana l’akambo wa diambo wahomba ndjosalema oma l’otshulwelo wa nyuma k’ekila. Otshulwelo akɔ wa nyuma k’ekila wayosalema lo Pɛntɛkɔsta ka l’ɔnɔnyi wayaye. Lam’ayomɛ ambeki 120 kamba olimu awɔ, ɛkɛdi w’ashi wa lɔsɛnɔ wayotatɛ nkɛla. Koko polo ndo l’etena kɛnɛ, nyuma katayala, nɛ dia ndoko ombeki wa Kristo wambokitama nyuma k’ekila ndo wambokondja leeta l’otsha l’olongo.

Etema w’anto amɔtshi wambonandema oma lo wetshelo wa Yeso, ko vɔ wambotatɛ mbuta vate: “[Ɔnɛ mɛtɛ mbele Omvutshi akɔ, NW],” lam’otshiwɔ ɔsɔku, ondo mɛtɛ vɔ wekɔ lo kanyiya dikambo di’omvutshi woleki Mɔsɛ woke wakalakema dia ndja. Akina vate: “One eko Kristu.” Koko amɔtshi wekɔ lo mbidja tamu ɔnɛ: “Kristu mbeyaka ndja uma la Ngalili uka? Undi, efundelu hati ati: Kristu ayuyala kanula ya Davidi, ayuya uma la Betelehema, lu ngelu kaki Davidi?”

Ɔnkɔnɛ, olui w’anto wambotatɛ mbatana. Amɔtshi nangaka vɔ munda Yeso, koko ndoko onto lawâhɛ lonya. Lam’okaludi apulushi anyanya aha la munda Yeso, ɛlɔmbɛdi a weke kâmɛ l’Afarisɛ wambowambola ɔnɛ: “Ukundi ahanyayi la ndi?”

Apulushi wambokadimola vate: ‘Bu, tatokaka onto atɛkɛta oko ɔlɔngɔ ɔsɔ.’

Ewandji w’ɛtɛmwɛlɔ wambodunganela la nkɛlɛ, ko wambotatɛ mbaɔnyɔla ndo la mbatɛnga. Vɔ wambâhɛla ɔnɛ: “Undi, ndu nyu mbambunganyiama? Embuledi kana Afarise wambuwetawo uka? Keli ului w’antu ako waheyi elembe, wambudjama mananu.”

Kam’okinde ɔsɔku, Nikɔdɛmo, Ofarisɛ ɔmɔtshi ndo owandji ɔmɔtshi w’Ase Juda (kɛdikɛdi, ɔmɔtshi a l’atei w’Ase Sheke), ambokeketsha otema dia tɛkɛtɛ Yeso. Ondo wɛ mbohɔka ɔnɛ, ambeta ɛnɔnyi ehende l’etenyi, Nikɔdɛmo akaye oya le Yeso l’otsho dia ndjowɛnya mbetawɔ kande. Kakianɛ, Nikɔdɛmo ambota ate: “Undi, elembe asu mamiaka untu la ntundu watuki aui andi, ndu wateyi dikambu diutshindi?”

Afarisɛ wamboleka mbudunganela la nkɛlɛ lam’okiwɔ ɔmɔtshi la l’atei awɔ aswɛlɛ Yeso. Vɔ wambôkaloya dui la nkɛlɛ tshɛ vate: “Ndu we keli usi Ngalili? Uyangiayangia wulu, ku we ayena wati: Umvutshi hatuyakaka uma la Ngalili.”

Koyanga mbahahonola Afundelo ɔnɛ omvutshi ɔmɔtshi ayotomba oma la Ngalileya, vɔ mɛnyaka ɔnɛ Kristo ayoya oma lɛkɔ, lam’atawɔ ɔnɛ “usasi a wuki” wayɛnama lo lɛtshi lɔsɔ la nkɛtɛ. Lâdiko dia lâsɔ, Yeso akotɔ la Bɛtɛlɛhɛma, ndo nde ekɔ kanula ya Davidi. Koyanga mbeyawɔ akambo asɔ mɛtɛ, ondo Afarisɛ mbambodianganya tokanyi ta kashi taki l’anto lo dikambo dia Yeso. Joani 7:32-52; Isaya 9:1, 2; Mateu 4:13-17.

▪ Kakɔna kasalema la pindju tshɛ l’edja ka difɛstɔ, ndo ngande wambokotola Yeso yambalo y’anto oya lo dikambo sɔ?

▪ Lande na kahakuki apulushi munda Yeso, ndo kakɔna kambosala ewandji w’ɛtɛmwɛlɔ?

▪ Nikɔdɛmo ênde, kakɔna kakanyiyande lo dikambo dia Yeso, ndo Afarisɛ akina wa anyande woho akɔna wambowowɔ̂sa?

▪ Kakɔna kɛnya ɔnɛ Kristo pombaka ndja oma la Ngalileya?