Tshapita 68

Yeso ambotetemala mbetsha lushi l’esambele

TEKƆ paka lo lushi l’esambele ndo la komelo ka Difɛstɔ dia Tabɛrnakɛlɛ. Yeso ekɔ lo ndakanya anto lo etenyi kɛmɔtshi ka tɛmpɛlɔ kelɛwɔ ɔnɛ: “Dihuli di’ekitshelu.” Ondo etenyi kɛsɔ kekɔ lo dihole dielɛwɔ ɔnɛ Sɛkɛ dia Amato, lɛnɛ akawakitsha tɔshɛtɛshɛtɛ tadja anto weshasha awɔ.

Otsho tshɛ wasalema difɛstɔ, osase wa mamba wekɔ lo ngamula lo sɛkɛ sɔ. Lɛkɔ, wakakitsha dikundji nɛi di’etale di’atala, ekundji l’ekundji ekɔ l’alɔnga anɛi a weke woludi l’esɔ. Diɛsɛ oma l’esɔ kadjawɔ l’alɔnga asɔ 16, atala asɔ mpɛtshaka osase wangamula etale efula l’otsho. Ondo ɛtɛkɛta wambota Yeso kakianɛ wambohola ampokami ande dikambo sɔ. Nde ambota ate: “[Osase w’andja mbemi, NW]. One landjela, hakendakenda lu udjima, keli ndi ayuyala la [osase wa, NW] lumu.”

Afarisɛ wambodja tamu, wata vate: “We ambuyata. Diui diaye kema mete.”

Ko Yeso ambâkaloya dui ate: “Naka dimi ndjataka, keti diui diami mete kedio; ne dia dimi mbeyaka uma lene uyemi, ndu utsha lene atamatshu. Keli nyu hanyeyi uma lene uyemi, ndu utsha lene atamatshu.” Nde ambota nto ate: “Dimi latuyataka, ndu Papa lakantumi atumvutaka.”

Afarisɛ mbawombolawɔ vate: “Lend’eli sho na?”

Yeso mbâkaloyande dui ate: “Nyu hanyumbeyi, hanye[y]i Papa. Utunyumbeya, tshiki nyu mbeyaka ndu Papa.” Kânga mbalanga Afarisɛ mundamisha Yeso, ndoko onto lawâhɛ lonya.

Yeso ambota nto ate: “Layutsho, . . . Nyu hanyeyi ndja lene atamatshu.”

Lam’okiwɔ ɔsɔku, Ase Juda wambotatɛ ndjambola ɔnɛ: “Ndi mvutaka ati: Nyu hanyeyi ndja lene atamatshu, undi, ndi ayuyadiaka?”

Ko Yeso ambâlembetshiya ate: “Nyu nyeko wa [l’ɛse, NW], dimi leko la l’ulungu. Nyu nyeko wa la kete nye, dimi kema la la kete nye.” Oma lâsɔ, nde ambota nto ate: “Naka nyu hanyumbetawo nyati: Dimi keli ndi, nyu nyayuvo lu kolo yanyu.”

Mɛtɛ, Yeso ekɔ lo tɛkɛta dia lɔsɛnɔ laki lande ntondo ka nde ndjoyala onto lanɛ la nkɛtɛ ndo dia woho wende Kristo, Mɛsiya wakalakema. Koko Ase Juda wambowombola la diɔnyɔ tshɛ vate: “Akona eye?”

Lo menda woho wahawawetawɔ, Yeso ambowatɛ ate: ‘Lakanyote l’etatelo, ambokoka, lande na atɛkɛtami lanyu nto na?’ Koko nde ambotetemala mbuta ate: “One lakantumi, eko mete. Akambu ako wakamuki mbatelami wa la kete.” Oma lâsɔ, nde ambota nto ate: “Lam’ayunyu[diya] On’a untu, nyayeya nyati: Dimi keli ndi. Ndu dimi dime halatshi dikambu, keli latutaka akambu wakambetsha Papa. One lakantumi eko la mi; ndi kuntshikami dime, ne dia dimi latutshaka akambu watôngenyangenyaka nshi tshe.”

Lam’okiwɔ awui asɔ, efula k’anto wambotatɛ mbetawɔ Yeso. Nde ambotɛ anto asɔ ate: “Naka nyu nyayutshikala lu diui diami, keti ambeki ami mete mbenyu. Nyu nyayeya akambu wa mete, ku akambu wa mete wayunyutshungula.”

Atunyi ande hawetawɔ dikambo sɔ, ko vɔ wambota vate: “Tukanula t’Abarahama mbesu. Shu kundjala fumbi y’untu edja ndu kakiane. Ukundi wataye wati: Nyu nyayutshungo?”

Kânga mbongawɔ mbala efula la tshina dia lowandji l’angɛndangɛnda, Ase Juda hawetawɔ ndoko lowandji l’otunyi awɔ tshɛ. Vɔ hawolange mbelamɛ ɔnɛ fumbe. Koko Yeso ambɛnya ɔnɛ vɔ wekɔ fumbe mɛtɛ. Lo yoho yakɔna? Nde ambowatɛ ate: “Mete, mete, kanyutelami nti: Untu tshe latutshaka kolo, eko fumbi ka kolo.”

Ase Juda wekɔ lo ndjadja lo wâle, nɛ dia vɔ hawetawɔ ɔnɛ tekɔ lo lɔhɔmbɔ la pɛkato. Yeso ambolembetshiya ate: “Fumbi hatuyalaka lu luudu pundju, keli Ona katuyalaka loko pundju.” Lam’ele fumbe kema la dikimɔ dia kondja sango, nshi tshɛ nde mbeyaka monga lo wâle wa mbitshanyema. Paka ɔna lakotɔ lo luudu kana lakodiama lɔkɔ mbatshikala “pundju,” mbuta ate lɔsɛnɔ lande l’otondo.

Yeso ambotetemala mbuta ate: “Okone naka Ona ayunyutshungula, mete nyu nyayutshungo.” Ɔnkɔnɛ, mɛtɛ katshungola anto ele mɛtɛ k’endana la Ɔna, Yeso Kristo. Paka olambo wa lɔsɛnɔ lande l’onto la kokele mbakoka tshungola onto oma lo pɛkato katɔla otsha lo nyɔi. Joani 8:12-36.

▪ Lende êtsha Yeso anto lushi l’esambele? Kakɔna kasalema l’otsho lo dihole sɔ, ndo ngande wɔ̂tɔnɛ dikambo sɔ la wetshelo waki Yeso?

▪ Kakɔna kambota Yeso lo dikambo di’ɔtɔngwɛlɔ ande, ndo dikambo sɔ ahombadiɔ mɛnya lo kɛnɛ k’endana la lonto lande?

▪ Lo yoho yakɔna yele Ase Juda fumbe, ko mɛtɛ kakɔna kayowatshungola?