Tshapita 70

Ɔkɔnwɛlɔ wa pami kakotɔ tshungu

KÂNGA mbayanga Ase Juda mbôka ave, Yeso hamɔ oma la Jerusalɛma. Lushi lakɔ lâmɛ la Sabato l’ɔkɔngɔ diko, nde l’ambeki ande wekɔ lo ntɛngɔla l’osomba ko wambɛna onto ɔmɔtshi lakotɔ tshungu. Ambeki wambombola Yeso vate: “Umbetsha, akona akatshi dikambu dia kolo, untu one kana ambutshi andi, dia ndi mbuto tshungu?”

Ondo ambeki fɔnyaka woho akɔ wâmɛ l’ewandji w’Ase Juda ɔnɛ onto kokaka sala pɛkato lam’ende l’otema a nyango. Koko Yeso ambâkadimola ate: “Untu one kuntsha dikambu dia kolo, kuyanga ambutshi andi. Keli dikambu ne diakayala, dia akambu watsha [Nzambi, NW] wenami le ndi.” Tshungu ya pami kɛsɔ haye oma lo munga kana pɛkato kɛmɔtshi kakandasale kana kakasale ambutshi ande. Pɛkato kakasale Adama, onto la ntondo, mbaketɛ anto tshɛ ekokele ndo mbasha dikɔmɔ, ɛnyɛlɔ oko tshungu ya lôtɔ. Kakianɛ, ɛkɔmɔ kambondɛna le pami kɛnɛ ambosha Yeso diaaso dia nde mɛnya etsha wa Nzambi lo sɛkɛ.

Yeso ambɛnya ohomba wa sala akambo asɔ aha la tshimbatshimba. Nde ambota ate: “Dieli la su dia ntsha elimu wa lakantumi lam’eki yanyi. Utshu ayuya, etena kaheyi untu ntsha ulimu. Lam’ekimi [l’andja, dimi mbele osase w’andja, NW].” Hateta ndoko edja, Yeso ayovɔ ndo ayokundɛma lo diombo dia wodjima, lɛnɛ ahandatokoka ntsha ndoko dikambo. Koko l’etena kɛnɛ, la ntondo ka nde mvɔ, nde ekɔ lo ngamulɛ andja osase.

L’ɔkɔngɔ wa nde mbuta ɛtɛkɛta ɛsɔ, Yeso ambohɔngɔla nsɔi la nkɛtɛ, amboyisɔha la nkɛtɛ. Nde ambɔsa lɔmɔtɔ lakɔ ko ambolidisa lo asho wa kanga tshungu, awotɛ ate: “Tshoka, toke l’ungunda wa Siloama.” Pami kakɔ ambokitanyiya dui diande. Nde ambɔka, ko asho ande wambodihɔ! Nde ekɔ l’ɔlɔ woho w’anyanya lam’ayandakalola, nɛ dia ɔsɔ mbele mbala kande ka ntondo ka mɛna lo lɔsɛnɔ lande l’otondo!

Asukanyi la anto akina waweya wamamba hakoke. Vɔ woyambola vate: “Aha nd’ako lakadjaseka alomba one?” Amɔtshi vate: “Nd’uku.” Koko akina hawokoke mbetawɔ, ko wota vate: ‘Aha nde mɛ, ɔfɔnya mɛtɛ.’ Koko pami kakɔ ambota ate: ‘Toko dimi akɔ ɔnɛ.’

Ko anto mbawombolawɔ vate: “Ukundi ambuyosena?”

“Untu letawo vati: Jesu kakasohanyisha kete, ku ndi akandjishiyo lu ashu ami. Ndi akamvutedi ati: Utshu l’ungunda wa Siloama, utoke. Ku dimi lakatshwi, lakatoka, lakasenyi.”

Mbawombolawɔ vate: “Lend’endi na?”

Ko nde lawɔ ate: “Haleyi.”

Anto asɔ wambɔsa pami kakɔ kaki tshungu ntondo ko wambɔ̂tɔla otsha le Afarisɛ, ewandji awɔ w’ɛtɛmwɛlɔ. Afarisɛ ndo vɔ lawɔ wambotatɛ mombola woho akɔna wɔsɛnyi asho ande. Pami kakɔ ambâlembetshiya ate: “Ndi aka[n]djishi kete ya losohanya lu ashu, lakoki, ku lambosena.”

Mɛtɛ, Afarisɛ wotohomba ngɛnangɛna kâmɛ la ɔlɔmbi ɔsɔ wambɔkɔnɔ! Koko, vɔ wambotatɛ manya Yeso. Wota ɔnɛ: “Untu one hayi uma le [Nzambi, NW].” Lande na katawɔ ɔsɔku na? “Ne dia ndi hatulamaka lushi la [Sabato, NW].” Koko Afarisɛ akina wekɔ lo ndjambola ɔnɛ: “Ukundi eya untu a kolo ntsha tulimbitelu tone?” Ko vɔ wambatwana.

Ɔnkɔnɛ, vɔ wambombola pami kakɔ ɔnɛ: “Ataye dia untu one lu dikambu diakandakosenyisha?”

Nde ambokadimola ate: “Umvutshi mbendi.”

Afarisɛ hawolange mbetawɔ dikambo sɔ. Vɔ wekɔ lo fɔnya ɔnɛ pami kɛsɔ nde la Yeso wakatokanyi lo yishɛshɛ ɔnɛ kele toyokese anto. Ɔnkɔnɛ, dia vɔ kandola dikambo sɔ, vɔ wambelɛ ambutshi w’ɔlɔmbi akɔ dia vɔ ndjowambola. Joani 8:59; 9:1-18.

▪ Kakɔna kele kiɔkɔ ya tshungu ya pami kɛsɔ, ndo kakɔna kele bu kiɔkɔ yakɔ?

▪ Ele otsho wahakoke onto kamba olimu?

▪ Lam’ɔkɔnwɛ pami kakotɔ tshungu, kakɔna kosadi wanɛ waweya ntondo?

▪ Woho akɔna wambokakitwana Afarisɛ lo dikambo di’ɔkɔnwɛlɔ wa pami kakotɔ tshungu?