Tshapita 71
Afarisɛ hawolange mbetawɔ
AMBUTSHI w’ɔlɔmbi waki tshungu wamboka wɔma lam’owaelewɔ la ntondo k’Afarisɛ. Vɔ mbeyaka ɔnɛ, lo ndjela tɛdikɔ takawɔshi, onto tshɛ layetawɔ Yeso ayotshanyema oma lo luudu l’ɔtɛmwɛlɔ. Ekɔ pâ efula, djekoleko le nkumbo ka wola, dia losambi lasawɔ l’anto akina pembɔ. Diɔ diakɔ diele ambutshi la kɛsɔ efula.
Afarisɛ wambowambola vate: “On’anyu latanyu nyati: Akuto tshungu one? Ukundi ambundosena kakiane?”
Ambutshi wamboshikikɛ vate: “Shu mbeyaka shati: Ndi eko on’asu, lakuto tshungu. Keli shu hateyi okone ambondosena kakiane. Hateyi lakôsenyisha.” Mɛtɛ, ɔnawɔ akashidi mbatɛ akambo tshɛ wakatshama, koko ambutshi wambokadimola dui la yewo ɔnɛ: “Nyuwumbuli, ndi aya ekumanyi, ndame ayunyutela.”
Ɔnkɔnɛ, Afarisɛ wambelɛ ɔlɔngɔ akɔ nto. Mbala kɛnɛ, vɔ wamboyanga dia mbôkiya wɔma lo mbotɛ ɔnɛ wakatshumanyisha tolembetelo ta kɔlɔ lo dikambo dia Yeso. Vɔ lande vate: “Utumbuli [Nzambi, NW]. Shu mbeyaka shati: Pami kene eko untu a kolo.”
Ɔlɔngɔ ɔsɔ hâmi awui awɔ, koko ambota ate: “Kana untu a kolo kendi, dimi haleyi. Dikambu otoi mbeyami nti: Dimi laki tshungu, kakiane lambosena.”
Afarisɛ wekɔ lo nyanga dia monda l’ɛkɔmɔ l’ɛtɛkɛta ande, diɔ diakɔ diambowowombola nto vate: “Akandakutshedi na? Ukundi akandakosenyisha?”
Ɔlɔngɔ akɔ ambokawana ate: “Lakanyutedi ayi, keli nyu hanyuki.” Oma lâsɔ, ɔnɛ awambolande oko lo lɔsɔkɔ ate: “Undi, ndu nyu mbalanga ndjala ambeki andi?”
Okadimwelo ɔsɔ wambokiya Afarisɛ nkɛlɛ. Ko vɔ wambɔ̂tɛnga vate: “We keli umbeki andi, keli shu ambeki wa Mose mbesu. Shu mbeyaka shati: [Nzambi, NW] akateketa la Mose, keli untu one hateyi lene uyendi.”
Lam’okinde awui asɔ, ɔlɔmbi ɔsɔ amamba efula ko ambowatɛ ate: “Oso eko dikambu dia mamba, ne dia ndi akasenyisha, keli nyu hanyeyi uma lene uyendi.” Kakɔna kahomba pembola dikambo sɔ na? Ɔlɔmbi ɔsɔ ambɛnya dikambo dietawɔma le anto tshe ate: “Shu mbeyaka shati: [Nzambi, NW] hukela untu a kolo. Keli naka untu ambôtemola ndu ambutsha lulangu landi, ndi atukelaka untu oso. Umak’etatelu k’andja, watuki dikambu dia untu lakasenya ashu wa untu lakuto tshungu.” Dikambo sɔ pombaka pembɔ ɔnkɔnɛ: “Utunduyala untu one kema uma le [Nzambi, NW], tshiki ndi heyi ntsha nduku dikambu.”
Afarisɛ wambotshikala enyɔ ku lam’okiwɔ awui wa mɛtɛ wa ngasɔ, w’eshika ndo wahakoke mbidjama tamu. Oko ahawalange mbetawɔ dikambo dia mɛtɛ, vɔ wambɔtɛnga ɔlɔngɔ ɔsɔ vate: “We akuto paka lu akambu wa kolo atu, ku we ambutetsha uka?” Ko vɔ wambôtondja l’andja, onde wambowotshanya oma lo luudu l’ɔtɛmwɛlɔ.
Lam’oki Yeso kɛnɛ kotshewɔ, nde ambotshɔ dia tɛnana l’onto lakandakɔnɔya ko ambowotɛ ate: “We ambetawo On’a [onto, NW]?”
Ɔlɔmbi waki tshungu mbawombolande ate: ‘Nkumadiɔndjɔ, ênde kele mbêtawɔ?’
Yeso mbôkadimolande ate: “We uku awena. Ndi kateketa la ye.”
Ko wonya akɔ, pami kakɔ ambokusama la ntondo ka Yeso ko ambowotɛ ate: “Khumadiondjo, dimi lambetawo.”
Ko Yeso ambolembetshiya ate: “Dimi lakayi la kete dia ndjulumbuya, dia wane wahasene wasene, dia wane wasena wayali tutshungu.”
Lam’okiwɔ ɔsɔku, Afarisɛ wele lâwɔ wambowombola vate: “Ndu shu mbeli tutshungu?” Otowetawɔ ɔnɛ vɔ wekɔ totshungu lo timba, tshike wotokondja edimanyielo lo kɛnɛ kalɔshanawɔ la Yeso. Diɔ diakɔ diambowatɛ Yeso ate: “Utunduyala nyu nyaki tutshungu, tshiki nyu kema la kolo.” Koko, vɔ wambotetemala shikikɛ ɔnɛ vɔ kema totshungu ndo kema l’ohomba w’osase wa lo nyuma. Omalɔkɔ, Yeso ambota ate: “Keli kakiane, nyu mvutaka nyati: Shu menaka. Ku kolo kanyu kambutshikala.” Joani 9:19-41.
▪ Lande na koka ambutshi w’ɔlɔmbi waki tshungu wɔma lam’owaelewɔ la ntondo k’Afarisɛ, ndo woho akɔna wokaloyishawɔ dui la yewo tshɛ?
▪ Woho akɔna wambohemba Afarisɛ dia mbokiya ɔlɔngɔ waki tshungu wɔma?
▪ Awui akɔna w’eshika wambota ɔlɔngɔ akɔ wambokiya Afarisɛ nkɛlɛ?
▪ Lande na kele Afarisɛ bu l’edimanyielo lo kɛnɛ kalɔshanawɔ la Yeso?