Tshapita 73

Ose Samariya l’otema ɔlɔlɔ

ONDO Yeso ekɔ suke la Bɛtaniya, ngelo kânganyi la Jerusalɛma suke la kilɔmɛtɛlɛ shato. Pami kɛmɔtshi kahotɔ Ɛlɛmbɛ wa Mɔsɛ ambosukana oya le nde ko ambowombola ate: ‘Ombetsha, ahombami ntsha dia kondja lɔsɛnɔ la pondjo?’

Yeso ekɔ lo mbeya ate pami kakɔ, ombewi w’ɛlɛmbɛ, hawumbudi paka dia mbeya tsho, koko dia mbohemba. Oyango w’ombewi ɔsɔ w’ɛlɛmbɛ ekɔ ondo dia Yeso kadimola lo yoho yayosha Ase Juda nkɛlɛ. Ɔnkɔnɛ, Yeso ambosala di’ombewi w’ɛlɛmbɛ kadimola ndamɛ lam’amondowombola ate: “Kufundami l’elembe na? Ukundi atuyalaka na?”

Ombewi w’ɛlɛmbɛ ambokadimola la yimba ya mamba lo shila kɛnɛ kofundami l’Euhwelu k’Elembe 6:5 la lo Akambu w’Asi Lewi 19:18, ata ate: “Ulangi [Jehowa Nzambi kayɛ, NW], l’utema aye tshe, ndu la [anima ayɛ, NW] tshe, ndu la wulu aye tshe, ndu la yimba yaye tshe; la ulangi unyaye, uku ayalangaye.”

Ko Yeso ambôkaloya dui ate: “Kawo kataye. Utshaki osoku, ku we ayuyala la lumu.”

Koko ombewi w’ɛlɛmbɛ hangɛnyingɛnyi. Okadimwelo wa Yeso kema mɛtɛ mɛtɛ shikaa le nde. Nde nangaka dia Yeso ndamɛ shikikɛ ɔnɛ kanyi yande hita yekɔ ɔlɔlɔ ndo ɔnɛ nde ekɔ ɔlɔlɔ oma lo kɛnɛ kasalɛnde anto akina. Diɔ diakɔ diambondowombola ate: “Akona eli unyami ako?”

Ase Juda fɔnyaka ɔnɛ tshɛkɛta “unyaye” mendanaka paka l’anyawɔ Ase Juda ato, oko wakokadiɔ mɛnama lo avɛsa wosukanyi l’Akambu w’Asi Lewi 19:18. Kânga l’ɔkɔngɔ diko, ɔpɔstɔlɔ Petero akayota ate: “Nyu mbeyaka nyati: Dikambu dia usi Juda mbekesanela la usi wudja ukina, eko ekila.” Ɔnkɔnɛ, ombewi w’ɛlɛmbɛ, ondo ndo ambeki wa Yeso, fɔnyaka ɔnɛ vɔ wekɔ anto wa losembwe naka vɔ salɛka paka anyawɔ Ase Juda ato ɔlɔlɔ, nɛ dia lo ndjela tokanyi tawɔ, wanɛ wele kema Ase Juda kema anyawɔ mɛtɛ.

Woho akɔna wakoka Yeso mingola kanyi shɔ, aha la nyangiya ampokami ande na? Nde ambɔkɔndɔla ɔkɔndɔ ɔmɔtshi, ondo ɔkɔndɔ akɔ wɔsami oma lo dikambo dimɔtshi diakatshama mɛtɛ. Yeso ambota ate: “[Ose Juda] omotshi akatatshokaka uma la Jerusalema utsha la Jeriko. Ndi akoto lu anya w’apotodi. Vo wakûkulula ahondo, wakôkomola, wakatshu, wakûtshiki afunda las’eku la nyoi.”

Yeso ambotetemala mbuta ate: “Olombedi omotshi akatatshokaka lu mbuka keso, lam’akandawenyi, ndi aketi l’okenge ukina. Ndu usi Lewi pupu, lam’akandakumi lu dihuli so, lam’akandawenyi, ndi aketi l’okenge ukina. Keli usi Samariya omotshi, lakatatshokaka lu lokendo, akakumi lu dihuli diakindi. Lam’akandawenyi, ndi akangasana la ketshi.”

Ɛlɔmbɛdi efula kâmɛ l’Ase Lɛwi wâkimanyiya lo tɛmpɛlɔ ka la Jerusalɛma mbidjasɛ la Jeriko, ɔnkɔnɛ lam’aholɔwɔ otsha lakawɔ, l’oholola wa mɛtɛlɛ 900, vɔ pombaka sala kilɔmɛtɛlɛ akumi asato la mɔtshi l’otadimbo wa wâle efula. Ɔlɔmbɛdi ɔsɔ nde l’Ose Lɛwi mbotohomba kimanyiya onyawɔ Ose Juda lakawakawa. Koko hawotshe ndoko dikambo. Ose Samariya mbamboyôkimanyiya. Ase Juda mpetshaka Ase Samariya heyama, diɔ diakɔ diakawatɛngɛ Yeso, atete ndoko edja, ɔnɛ “usi Samariya,” lɔtɛngɔ la kandji efula.

Kakɔna kambosala Ose Samariya dia nde kimanyiya Ose Juda na? Yeso ate: “Ndi akasukana la le ndi, akawombe puta, akatela iso la wanu loko. Ku ndi akawahe lu nyama kandi, akayi la ndi lu pangu k’angendangenda. La wedi a pindju, ndi akatundja denariyo pendi, akasha kanga pangu, akati ati: Ûlamaki. Lam’ayumukalula, dimi layukufuta kene tshe kayuyushisha lu dikambu diandi.”

L’ɔkɔngɔ wa nde kɔndɔla ɔkɔndɔ ɔsɔ, Yeso amombola ombewi w’ɛlɛmbɛ ate: “Le untu lakoto lu anya w’apotodi, akona akanaye, akayala unyandi l’atei w’antu aso asatu?”

Ombewi w’ɛlɛmbɛ hangɛnangɛna dia mandola Ose Samariya, diɔ diakɔ diamondokadimola tsho ate: “One lakawuki ketshi.”

Ko Yeso mbadihiyande ate: “Utshu, ututshi pupu.”

Otondoyala Yeso akahonole ombewi ɔsɔ w’ɛlɛmbɛ mbala kakɔ ɔtɔi ɔnɛ ndo wanɛ waha Ase Juda mbele anyande, tshike nde hawetawe, ndo tshike efula k’ampokami wele lâwɔ wakɔtwɛ lo lɛkɛ lande dia manya Yeso. Koko, ɔkɔndɔ ɔsɔ wa mɛtɛ mɛtɛ mɛnyaka lo yoho yahakoke anto mbidja tamu ɔnɛ anyaso tanemaka ndo l’atei w’anto wele kema lo dioho diaso kana lo wodja aso. Yeso mɛtɛ ekɔ ombetsha wa mamba! Luka 10:25-37; Etsha 10:28; Joani 4:9; 8:48.

▪ Ombewi w’ɛlɛmbɛ amboka Yeso wembola akɔna, ndo oyango akɔna wele lande mɛtɛ?

▪ Lo ndjela kɛnɛ kafɔnya Ase Juda, wa na wele anyawɔ, ndo ɔkɔkɔ akɔna wakokaso mbetawɔ ɔnɛ kânga ambeki wa Yeso wekɔ la kanyi shɔ?

▪ Woho akɔna wambɛnya Yeso kanyi y’oshika yahakoke ombewi w’ɛlɛmbɛ mbidja tamu?