Tshapita 76

Yeso ambɔlɛ laka ofarisɛ ɔmɔtshi

L’ƆKƆNGƆ wa Yeso kadimola amɔnyɔdi ande, wanɛ wadja tamu lo kiɔkɔ ya wolo ande wakandakɔnɔya kanga lumi, Ofarisɛ ɔmɔtshi ambowelɛ dia ndjosanga lande lonya lo lokenga. La ntondo ka vɔ ndɛ, Afarisɛ wambɔtsha anya polo ndo lo wɛɔdu, lo ndjela mbekelo kawɔ. Vɔ salaka ɔsɔku la ntondo ndo l’ɔkɔngɔ w’olelo ndo kânga lam’ashidiyawɔ ndɛ ɛngɔ kɛmɔtshi dia tatɛ ndɛ kekina. Koyanga mbele mbekelo kɛsɔ k’ashidi halɔshana l’ɛlɛmbɛ wa Nzambi wakafundama, tɔ kambotamba olelo lo adjango wa Nzambi lo dikambo dia pudipudi.

Lam’ɛnyinde ɔnɛ ɔngɛndangɛnda ande ambosekola mbekelo kɛsɔ k’ashidi, Ofarisɛ ɔsɔ amamba. Kânga mbahandawote ndoko dui, Yeso amboshihodia tokanyi tande ko ambowotɛ ate: “Nyu, Afarise, nyatotshaka l’andja a dikoho la donga, keli l’etei anyu, ambulula too la dihotwanelu la akambu wa kolo. Nyu nyeko dinginya! Undi, one lakadikingi l’andja awo, ndi kunkinga ndu l’etei awo?”

Ɔsɔku mbambɛnya Yeso lokeso l’Afarisɛ lo sɛkɛ, vɔ wanɛ watɔtshaka anya awɔ lo ndjela mbekelo yawɔ, koko mbohɛka mbɔtsha etema awɔ oma l’akambo wa kɔlɔ. Nde ambowasha dako nɛ ate: “Lam’ayunyusha antu diango la ketshi, nyuwasha diango dieli l’etei. Nyendi, diango tshe diayela pudipudi le nyu.” Vɔ wakahombaka nkimɔ weshasha awɔ l’otema woludi la ngandji, koko aha la saki ka mambia anto akina la losembwe lawɔ la kashi.

Yeso ambotetemala mbuta ate: “Fono kayayi le nyu, Afarise! ne dia nyu nyatukimoka etenyi ka dikumi ka nyumba la luhuhu la akatshikatshi tshe, nyatulekanaka sambu k’ololo la ngandji ka [Nzambi, NW]. Aki ololo [nyu] ntsha akambu ane, la aha ntshika akambu wa la ntundu.” Ɛlɛmbɛ wa Nzambi wakandasha Isariyɛlɛ nɔmbaka dia vɔ futa etenyi ka dikumi ka diangɔ di’oma lo dikambɔ. Nyumba la djɛngɛ y’enyi ekɔ tombatomba dia totshitshɛ dia solo diadjawɔ lo diangɔ dia ndɛ. Afarisɛ mbidjaka yimba efula dia nkimɔ tombatomba sɔ di’anyanya oko etenyi ka dikumi, koko Yeso ambɛnya ɔnɛ vɔ wekɔ lo ntsha kɔlɔ nɛ dia vɔ hawokitanyiya adjango woleki ohomba wa mɛnya ngandji, mbokana kɛtshi, ndo monga la ndjakitshakitsha.

Yeso ambɛnya kɔlɔ kawɔ nto ate: “Fono kayayi le nyu, Afarise! ne dia nyu nangaka die dia ntundu lu temwelo, la waemu lu tuka. Fono kayayi le nyu! ne dia nyu nyeko uku waumbu wahene lu ashu, watokendakendaka antu ladiku diawo, ku vo haweyi.” Ɔnkɔnɛ, mindo k’Afarisɛ hɛnama lo sɛkɛ. Ɔtɛmwɛlɔ awɔ ekɔ paka oko dangi diakitawɔ lâdiko! Vɔ wekɔ ɔtɔmwɛlɔ wa dungi pende.

Lam’okinde ɔsɔku, ombewi ɔmɔtshi w’ɛlɛmbɛ, onto lahotɔ Ɛlɛmbɛ wa Nzambi, ambokiyana ate: “Umbetsha, lam’ataye diui so, we ambutotenga ndu shu.”

Yeso ekɔ lo mɛna ɔnɛ ndo ambewi w’Ɛlɛmbɛ mbele l’onongo, diɔ diakɔ diamondôkadimola ate: “Fono kayayi ndu le nyu, embeyi w’elembe! ne dia nyu nyataheka wutshu weli wulu memba lu aheka w’antu, keli nyu nyame hanyunanda wetshu ako kuyanga la luhita. Fono kayayi le nyu! ne dia nyu nyatuhikaka waumbu w’amvutshi, keli watshenyu mbakâdiaki.”

Wetsho wata Yeso lanɛ kɛdikɛdi wetshelo w’ashidi watawatshikanɛ l’onyɔ, koko ambewi asɔ w’ɛlɛmbɛ hawolange mbakɔkɔla kânga yema dia mbaetɛ osadi le anto. Yeso ambɛnya ɔnɛ ambewi asɔ w’ɛlɛmbɛ wekɔ lo ngɛnangɛna ndo odiakelo w’amvutshi, diɔ diakɔ diamondowaewola ate: “Akila tshe wakatshulwama uma l’etatelu k’andja, [wayofutshama le] lolonga lone, umaka dikila dia Abele, edja ndu dikila dia Zekariya, lakawadiaki l’asa ediakelu la etemwelo. Mete kanyutelami nti: Ayuyala dikambu dia wa lu lolonga lone.”

Andja w’anto wakoka tshungwama wakatatɛ lam’akote Adama l’Eva ana; ɔnkɔnɛ, Abɛlɛ akasɛnaka “l’etatelu k’andja.” L’ɔkɔngɔ w’odiakelo wa kɔlɔ wakadiakema Zɛkariya, alembe w’Ase Suriya wakayolanya wodja wa Juda. Koko Yeso ambota ɔnɛ l’ɔtɛ wa kɔlɔ kawɔ kamboleka efula, lɔlɔnga la lo nshi yande wayɛna pâ koleki. Elanyelo kɛsɔ kakayosalema l’ɔkɔngɔ w’ɛnɔnyi oko 38, l’ɔnɔnyi 70 T.D.

Yeso ambotetemala mbâmia, ata ate: “Fono kayayi le nyu, embeyi w’elembe! ne dia nyu nyakakosola ona sapi k’akambu wa bewu. Nyu nyame komboto, keli nyu nyakashimbi wane wakayangi mboto.” Ambewi w’Ɛlɛmbɛ wekɔ l’ɔkɛndɛ wa nembetshiya anto Dui dia Nzambi, mbamanya kitshimudi yadiɔ fundo. Koko vɔ hawosale dikambo sɔ ndo wekɔ lo mpandjɛ anto diaaso dia vɔ dimana fundo.

Afarisɛ vɔ l’ambewi w’ɛlɛmbɛ wamboka nkɛlɛ nɛ dia Yeso ambâhangwɛ lo sɛkɛ. Lam’otumbinde oma lo luudu, vɔ wambotatɛ mbotshindjiya la wolo ndo wambɔ̂hɛnyahɛnya la wembola. Vɔ wowɔnga lo lolemi ɔnɛ kana ahɔsɔka dikambo dimɔtshi diakokawɔ mbonda. Luka 11:37-54; Euhwelu k’Elembe 14:22; Mika 6:8; 2 Ekondo 24:20-25.

▪ Lande na kambânya Yeso Afarisɛ la ambewi w’Ɛlɛmbɛ?

▪ Wetsho akɔna wâhɛ ambewi w’ɛlɛmbɛ l’ahɛka w’anto?

▪ Oma l’etena kakɔna kakatatɛ “etatelu k’andja”?