Tshapita 77

Dikambo dia sango

ANTO wakoki ɔnɛ Yeso akatshwe dia tɔlɛ diangɔ laka Ofarisɛ. Diɔ diakɔ diambowɔmɔta nunu nunu l’andja dia kongɛ Yeso lam’ayondotomba. Otshikitanyi l’Afarisɛ walɔshana la Yeso ndo wayanga dia mbonda lo lolemi, anto asɔ wekɔ lo mbohokamɛ la saki k’efula ndo la lowando tshɛ.

Yeso ambosekesɔ ntondo otsha le ambeki ande ko ambowatɛ ate: “Nyewo edya ka Afarise, kako keli lukesu.” Oko wakadiɛnama lam’akawalɛka mma, ɔtɛmwɛlɔ w’Afarisɛ ndola la lokeso. Koko, kânga mbakoka Afarisɛ mbishɛ kɔlɔ kawɔ lo ndjaɛnya oko anto wamamema Nzambi, tɔ kayoyotomba sɛkɛ. Yeso ate: “Nduku kene kambukumbama, kahakumbwama. Nduku kene kambushama, kaheyama.”

Oma lâsɔ, Yeso ambovusola alako wakandasha apɔstɔlɔ ande 12 dia mbakeketsha lam’akandâtome dia tosambisha la Ngalileya. Nde ambota ate: “Tanyukaki wane wadiaka alimba woma, ku l’okongo haweyi ntsha dikambu dikina.” Yeso ambokeketsha ambeki ande ɔnɛ Nzambi hawaohɛki pondjo, lam’ele nde hohɛ kânga ɛsɔlɛ ɔtɔi. Nde ambowatɛ ate: ‘Lam’ayowɔnyɔtɔla la ntondo ka mvudu ya nsanganya, k’ɛlɔhɛ ndo k’ewandji wa wedja, . . . nyuma k’ekila ayonyolakanya ko wonya akɔ akambo wahombanyu mbuta.’

L’etena kɛnɛ, pami kɛmɔtshi ambohangɔhangɔ oma l’atei w’olui w’anto. Nde ate: “Umbetsha, uteli onalingu akahani la mi sangu.” Lo ndjela Ɛlɛmbɛ wa Mɔsɛ, enondo pombaka mbɔsa tenyi pende dia sango, ɔnkɔnɛ ndoko owanu wahomba tomba. Koko, ondo ɔlɔngɔ ɔsɔ nangaka kondja diangɔ efula oleki ndo kɛnɛ kende la dikimɔ dia kondja.

Yeso ambotona l’ɔlɔlɔ tshɛ dia mbɔtɔ l’atei w’osanyi ɔsɔ. Mbawombolande ate: “Pami, akankitsha umbadi kana ukahi ladiku dianyu?” Ko nde ambosha olui w’anto dako nɛ di’ohomba efula ate: “Nyendi, nyewo okomiya wa diango tshe; ne dia lumu la untu haluyala ne dia efula ka diango dieli la ndi.” Mɛtɛ, oyadi efula ka diangɔ diakoka onto ndjâla ladiɔ, edja l’edja nde la dia mvɔ ko ditshika tshɛ. Yeso amboka wɛɛla ɔmɔtshi dia nde mbika epole ɔsɛkɛ lo dikambo sɔ, ndo mɛnya ɔnɛ onto lahadje yimba dia ndjâla la lokumu l’ɔlɔlɔ la ntondo ka Nzambi ekɔ enginya. Wɛɛla akɔ v’ɔnɛ:

“Kete ya kanga ongonyi omotshi yakangonya diango efula. Ku ndi akakani yimba l’utema andi ati: Kayumutsha na, ne dia dimi kema la lama mumba diango diami dia dinela? Ku ndi akati ati: Dimi layutsha okone: layuhandjula apenge ami, layuhika akina wuleki waki. Ku dimi layumba diango diami dia dinela la diango diami tshe loko. Ku layutela [anima, NW] ami nti: [Anima, NW], we la diango efula diumbami dia deku efula. Ukaki olo, olekaki, onokaki, ongenangenaki. Keli [Nzambi, NW] akawutela ati: Enginya li! Wayolomba [anima, NW] aye l’utshu w’elo one. Ku diango diakayalongosola diayuyala diaki na?”

Dia nde kumiya, Yeso ambota ate: “Osoku mbeli untu layaumbela diango, laha la ukundji le [Nzambi, NW].” Koyanga mbele ambeki mbeyaka pandɔ lo djonga ya ndjâmɔtshɛ ekundji, vɔ kokaka ndjonya yimba esadi eto oma l’akambo wa lo nyuma l’ɔkɔkɔ w’ekiyanu wa lo lɔsɛnɔ, ko ndjoyala ko hawoyokambɛ Jehowa olimu l’anima awɔ tshɛ. Diɔ diakɔ diambɔsa Yeso diaaso nɛ dia nde mbohola dako dia dimɛna efula diakandasha lo Dako dia lo Dikona, ambeta oko ɔnɔnyi w’otondo l’etenyi. Nde ambosekesɔ otsha le ambeki ande ko ambowatɛ ate:

“Tanyuyakananyaki dia nyumu yanyu nyati: Ayutole na? kana dia alimba anyu nyati: Ayutolota na? . . . Nyendi angwangwa: vo hawutuneka, hawutunaka. Vo kema la eumbelu kana dipenge. [Nzambi, NW] atuwashaka mbu ya nde. . . . Nyendi alembo, uku wulawo; vo hawukambi ulimu, hawutshi ahondo. Keli dimi lambunyutela nti: Kuyanga Solomona lu lutumbu landi tshe, kondota uku dembo dimotshi l’atei awo. . . .

“Tanyuyangaki kene kayunyole kana kayonyono; tanyuyakananyaki. Ne dia wedja wa la kete watuyangaka diango so tshe [la lohehe], keli Shenyu mbeyaka ati: Nyu nyatudihumbaka. Keli nyutayangi diulelu diandi, ku ndu diango so tshe diayuyala dianyu.”

Sho pombaka kanaka yimba efula l’ɛtɛkɛta wa Yeso ɛsɔ, djekoleko l’etena kaya lɔsɛnɔ wolo. Ɔnɛ layakiyanya lo tshambandeko lo dikambo di’ehomba ande wa l’emunyi ko tatɛ mbɔladja weolo wadjande l’akambo wa lo nyuma, mɛnyaka ɔnɛ nde kema la mbetawɔ lo wolo wele la Nzambi dia kotsha ehomba w’ekambi Ande. Luka 12:1-31; Euhwelu k’Elembe 21:17.

▪ Ondo l’ɔkɔkɔ akɔna walɔmba ɔlɔngɔ ɔmɔtshi Yeso dia nde sambola dikambo dia sango, ko dako diakɔna diambosha Yeso?

▪ Wɛɛla akɔna wamboka Yeso, ndo l’oyango akɔna?

▪ Dako diakɔna diambosha Yeso nto, ndo lande na kasunganadiɔ?