Tshapita 79

Wodja wambânyema, koko aha tshɛ

YEMA l’ɔkɔngɔ wa Yeso sawola la wanɛ wakamɔtɛ l’andja wa luudu l’Ofarisɛ ɔmɔtshi, anto amɔtshi wamboyowotɛ ‘dikambo diokome Ase Ngalileya amɔtshi, [ɔlɔmbɔdi w’Ase Rɔmɔ, Pɔnsɔ] Pilato akasɔhanyisha dikila diawɔ la nɛ dia nyama yawɔ y’elambo.’ Ondo Ase Ngalileya asɔ wakadiakema lam’akatone nunu di’Ase Juda wokelo w’owoka wakahombe mbɔtshiyaka ashi oya la Jerusalɛma, nɛ dia Pilato akakambishaka olimu ɔsɔ la falanga y’oma lo tɛmpɛlɔ. Ondo wanɛ wakɔndɔlɛ Yeso dikambo sɔ wekɔ lo mɛnya di’oko Ase Ngalileya asɔ wakahomwe mpokoso kɛsɔ l’ɔtɛ w’etsha awɔ vamɛ wa kɔlɔ.

Koko Yeso ambosembola tokanyi tawɔ lam’amondowambola ate: “Nyu nkanaka nyati: Asi Ngalili aso waki antu wa kolo ndeka asi Ngalili tshe, ne dia vo wakasuwi wuhu oso uka?” Yeso ambokadimola ate: “Kema.” Ko nde ambɔsa diaaso nɛ dia nde mbewola Ase Juda ate: “Naka nyu hanyukadimula etema, nyu tshe nyayuvo wuhu ako.”

Oma lâsɔ, Yeso ambɔtɛkɛta ndo dia dikambo dikina dia wɔma diakatshama lo ngelo kakɔ, ondo lam’akahikamaka owoka akɔ ɔsɔ. Nde ambombola ate: “Ndu antu aku dikumi la enanei, ane wakavu lam’akânyukwela luudu l’etangelu la Siloama, nyu nkanaka nyati: Vo waki atshi wa kolo ndeka antu tshe watuyalaka la Jerusalema?” Yeso ambota ɔnɛ kema anto asɔ komvɔ l’ɔtɛ wa kɔlɔ kawɔ. Koko “tena la akambo waki kosangoyama” mbele l’onongo wa wâle wa ngasɔ. Koko, Yeso ambɔsa diaaso nɛ nto dia nde mbaewola, awatɛ ate: “Keli naka nyu hanyukadimula etema, nyu tshe nyayuvo wuhu ako.”

Oma lâsɔ, Yeso amboka wɛɛla ɔmɔtshi wasungana efula ate: “Untu omotshi aki la utamba a fingu l’ekambo kandi k’elua. Ndi akayi dia ndjuyanga elua loko, keli ndi kuntana. Ku ndi akatela ohehi w’ekodi ati: Enda, deku satu ne mbatumuyakaka dia ndjuyanga elua l’utamba one a fingu, keli halatani. Ôkote; ukundi osawo dihuli la kete wososa? Ndi akûkaluya diui ati: Khumadiondjo, ûtshiki ndu eleku kene, edja ndu dimi lambufunda kete la tshina, la [mbidja ɛtɛtɔ lɔkɔ, NW]. Naka vo ayoto elua eleku kayayi, ku kawo; keli naka hatwe, we mbeyaka ndjôkota.”

Yeso amboyatshutshuya l’edja k’ɛnɔnyi esato w’etondo dia monɛ mbetawɔ lo wodja w’Ase Juda. Koko, paka ambeki nkama mɔtshi tsho mbamondokondja oma l’olimu ande. Oko wende l’etena kɛnɛ l’ɔnɔnyi wa nɛi w’olimu ande, nde ambonyomofudia weolo ande, wate kana oko onto latshima ndo ladja ɛtɛtɔ l’otamba a fingu w’Ase Juda, lo yoho ya didjidji, lo sambisha ndo lo mbetsha l’ohetoheto tshɛ la Judeya la la Pereya. Koko lotumu la kombo mbakambande! Wodja ɔnɛ hawolange kadimola otema, ɔnkɔnɛ vɔ wamboyadja l’ɔnɔngɔ a wanɛ wakoka nanyema. Paka amɔtshi ato wa lo wodja ɔnɛ mbambetawɔ wetshelo ande.

Yema l’ɔkɔngɔ wa lâsɔ, Yeso ambotatɛ ndakanya anto lo luudu lɔmɔtshi la nsanganya lushi la Sabato. Lɛkɔ, nde ambɛna omoto ɔmɔtshi lele dikoto kota ɛnɔnyi 18 w’etondo, heye sembɔ kânga yema, nɛ dia ɔdiɛngɛ wekɔ lo mbɔhɛnyahɛnya. Yeso ambowotɛ la kɛtshi tshɛ ate: “Umuntu, we ambutshungo uma lu ekomo kaye!” Lam’otshinde ɔsɔku, nde ambowâhɛ anya, ko wonya akɔ, omoto akɔ ambosembɔ tɔɔ ko ambotatɛ tombola Nzambi.

Koko ɔlɔmbɔdi wa luudu l’ɔtɛmwɛlɔ amboka nkɛlɛ. Nde ate: “Nshi shamalu yeko, yahumba antu ntsha elimu awo. Okone lu nshi sho, kanyuyakaki, kanyuyokonwamaki, keli aha lushi la [sabato, NW].” Ɛtɛkɛta ɛsɔ mɛnyaka ɔnɛ ɔlɔmbɔdi akɔ mbetawɔka ɔnɛ Yeso ekɔ la wolo wa nkɔnɔla hemɔ, koko nde ekɔ lo pangwɛ anto nɛ dia vɔ ndjâka dia ndjɔkɔnɔyama lushi la Sabato!

Ko Yeso mbôkadimolande ate: “Nyu akanga a lukesu! untu akona l’atei anyu ahatshungula ngombe kana punda kandi uma l’elelu, la nkilombola utsha l’ashi lushi la [sabato, NW]? Umuntu one, kanula y’Abarahama, lakakeleka Satana deku ne dikumi la enanei, taki ololo ndi nkelekwama uma lu dimama ne lushi la [sabato, NW]?”

Lam’okiwɔ ɔsɔku, wanɛ walɔshana la Yeso wambɔlɔwa la nsɔnyi. Koko olui w’anto wekɔ lo ngɛnangɛna akambo tshɛ w’amɛna efula wɛnawɔ Yeso atsha. Omalɔkɔ, Yeso ambovusola wɛɛla ehende wa pɔlɔfɛsi w’endana la Diolelo diaki Nzambi wakandoke lam’akinde lo wâto, lo Ndjale ka Ngalileya, ambeta oko ɔnɔnyi w’otondo. Luka 13:1-21; Ondaki 9:11, NW; Mateu 13:31-33.

▪ Akambo akɔna a wɔma watɛkɛtama lanɛ, ndo wetshelo akɔna wambosha Yeso oma l’akambo akɔ?

▪ Kakɔna kalembetshiya wɛɛla w’otamba a fingu wahatɔ elowa, ndo weolo wambodjama dia mbɔtɔsha elowa?

▪ Woho akɔna wambɛnya ɔlɔmbɔdi wa luudu l’ɔtɛmwɛlɔ ɔnɛ Yeso ekɔ la wolo wa nkɔnɔla, ko ngande wambɛnya Yeso lokeso la pami kɛsɔ lo sɛkɛ?