Tshapita 83

Ofarisɛ ɔmɔtshi ambowelɛ

YESO êke laka owandji w’Afarisɛ, ndo nde oma la nkɔnɔla pami kɛmɔtshi kaki la hemɔ ka kuta. Oko wambondɛna ɔnɛ wanɛ wakelame kâmɛ lande lo dambo wekɔ lo sɔna ahole woleki nɛmɔ, nde ambosha wetshelo ɔmɔtshi lo dikambo dia ndjakitshakitsha.

Yeso ambolembetshiya ate: “Lam’aketa untu lu dambu dia diwala, tudjaseki lu edie ka nemo, ne dia, undu, ndi aketshi untu omotshi lukuleki nemo. Ku one lakaketshi we la ndi, ayukutela ati: Utshikeli untu one dihuli, ku we ayuleka mbosa dihuli diuleki nkitakita la sonyi.”

Diɔ diakɔ diambosha Yeso dako nɛ ate: “Lam’aketawo, utshu, utudjase lu dihuli diuleki nkitakita. Ku lam’ayuya one lakaketshi, ndi mbeyaka nkutela ati: Ongenyi, umbeli. Ku we ayuyala la lutumbu lu ashu w’antu tshe wudjashi la ye wale ma.” Dia nde kumiya, Yeso ate: ‘Nɛ dia onto tshɛ layambiya ayokitshakitshama, ɔnɛ layakitshakitsha ayombiyama.’

L’ɔkɔngɔ diko, Yeso ambotatɛ mbutɛ Ofarisɛ wakawele ndo ambowɛnya woho wakokande salɛ anto dambo diele la nɛmɔ lo asho wa Nzambi. “Lam’ayuyukate ma dia midi kana dia dikolo, tetaki engenyi aye, ananyo, kana asi khumbu kaye, kana asukanyi weli akanga w’engonyi, vo watukuyuketa ndu vo, ndu watukuyulemanya la ye. Keli lam’ayuyukatela antu dambu, keti akanga a weula, dikomo, tshumbi, la tutshungu. Ku we ayotshokwama, ne dia vo kema la diango dia nemanya la ye.”

Yeso ambolembetshiya ɔnɛ lakawelɛ lakande ate: ɔnɛ lakatɛ ase weola dambo ekɔ la ɔngɛnɔngɛnɔ nɛ dia: “Vo wayukukaluyadio lu eulwelu k’antu w’ololo uma lu nyoi.” Woho watɛkɛta Yeso dia dambo sɔ diasungana mandɔma ambodja lo yimba ya onyande okina lakelame lo dambo, kanyi ya dambo dia woho okina. Nde ambota ate: “One layole ma lu diulelu dia [Nzambi, NW], eko la [ɔngɛnɔngɛnɔ, NW].” Koko, oko wayangadiɛnya Yeso lo wɛɛla ɔmɔtshi, aha anto tshɛ mbɔ̂sa elongamelo kɛsɔ k’ɔngɛnɔngɛnɔ la nɛmɔ diasungana.

“Untu omotshi akakate [dambo dia woke dia dikɔlɔ, NW], ndi aketi antu efula. . . . , ndi akatumi ekambi andi, dia ntutela wane wakandeti ati: Nyuyi, kakiane diango tshe diambolongoswama. Keli vo tshe wakatatela nsakosako: untu l’untu akalombe edimanyelu. La ntundu akawutela ati: Dimi lambusumba ekambo. Dimi mpumbaka ntsho dia ntukiena, mbakolombami nti: Unyimanyia. Ukina akati ati: Dimi lambusumba ngombe dikumi, hyendi hyendi lu lokoho. Dimi nangaka ntuyenda, mbakolombami nti: Unyimanyia. Ukina akati ati: Dimi lambutshuka wadi, okone haleyi ntsho.”

Ɔsɔ mɛtɛ ekɔ paka tɛ̂kɛ nɛndɛ! Nshi tshɛ, onto tasɛdingolaki ekambɔ kana nyama la ntondo ka nde kisomba, ɔnkɔnɛ, osombi hahombe ntshɔ esadi eto dia tênda kɛnɛ kamondoshila la somba. Woho akɔ wâmɛ mbele, diwala kema ɔkɔkɔ wasekɛ onto dia nde mbetawɔ leeta la ngasɔ l’ohomba. Ɔnkɔnɛ, lam’okinde anto walɔmba edimanyielo woho ɔsɔ, owandji ambodunganela la kɛlɛ ko ambotɛ ose olimu ande ate:

“Utshu lu esese la lu tuwuka ta l’usumba, kuyi la akanga a weula, la dikomo, la tutshungu, la tshumbi. Ukambi akati ati: Khumadiondjo, ambutshama uku utshiye, keli luudu lekiko hwe. Uwandji akatela ukambi ako ati: Utshu lu esese la kumbu y’etamba, kututshutshiya antu la wulu dia vo mboto, luudu lami laluli. . . . : Nduku otoi w’apami aku wakametshi, ayunganela ma dia dikolo.”

Wɛɛla ɔsɔ alembetshiyawɔ na? “Uwandji” wakatɛ dambo ele Jehowa Nzambi; “ukambi” welɛ anto ele Yeso Kristo; ndo “dambo dia woke dia dikɔlɔ” kɛdikɛdi diaaso dia ndjâla ɔtɔi ɔmɔtshi wa lo Diolelo dia l’olongo.

Ewandji w’ɛtɛmwɛlɔ w’Ase Juda wa lo nshi yaki Yeso mbakelamɛ ntondo dia ndjâla atɔi amɔtshi wa lo Diolelo diakɔ sɔ. Koko vɔ kombetawɔ leeta lɔsɔ. Diɔ diakɔ diakayokimwamaka leeta la hende, mbala kɛsɔ le Ase Juda wakɔnywamaka ndo waki la ndjakitshakitsha, djekoleko tatɛ oma lo Pɛntɛkɔsta ka l’ɔnɔnyi 33 T.D. Koko wanɛ waketawɔ leeta lakɔ komonga efula dia ndodja ahole 144 000 wa lo Diolelo diaki Nzambi dia l’olongo. Ɔnkɔnɛ, l’ɔkɔngɔ w’ɛnɔnyi esato, l’ɔnɔnyi 36 T.D., leeta la sato ndo la komelo lakayokimwamaka le wanɛ waha Ase Juda, wanɛ waki kombahema ohekele, ndo otshumanyelo w’anto asɔ wekɔ lo tatetemala salema polo ndo lo nshi yaso nyɛ. Luka 14:1-24.

▪ Wetshelo akɔna wambosha Yeso lo dikambo dia monga la ndjakitshakitsha?

▪ Woho akɔna wakoka onto mbahɛ anto akina dambo diele la nɛmɔ mɛtɛ lo asho wa Nzambi, ndo lande na kayondokondja ɔngɛnɔngɛnɔ oma lo dikambo sɔ?

▪ Lande na kakokaso mbuta ɔnɛ wanɛ welewɔ lo dambo wekɔ lo nyanga paka tɛ̂kɛ nɛndɛ?

▪ Kakɔna kɛnya Yeso lo wɛɛla wa “dambo dia woke dia dikɔlɔ”?