Tshapita 107

Wɛɛla wa dambo dia diwala

OMA l’ekimanyielo ka wɛɛla ehende, Yeso ambotondja ditshelo dia kɔlɔ di’afundji la di’ɛlɔmbɛdi a weke lo sɛkɛ, ko wolanga mbodiaka. Koko Yeso atashidiya la wɔ. Nde ambowaokɛ wɛɛla okina nto, ata ate:

“Diulelu dia l’ulungu diambufana la khum’ekanga kemotshi, lakakatela on’andi la pami dambu dia tshuki. Ndi akatumi ekambi andi dia nteta wane wakandaladiya lu dambu dia tshuki, keli vo kunanga ndja.”

Jehowa Nzambi mbele Nkumekanga kakatɛ Ɔnande Yeso Kristo dambo dia diwala. Mɛtɛ, otshukami, kana olui w’ambeki 144 000 w’akitami, wayosangana la Kristo l’olongo l’ɔkɔngɔ diko. Ambolami wa Nkumekanga ele ase wodja w’Isariyɛlɛ, wanɛ wakakondja diaaso dia ndjâla “diulelu di’elombedi” lam’akawɔtɔ lo sheke y’Ɛlɛmbɛ l’ɔnɔnyi 1513 N.T.D. Ɔnkɔnɛ, l’etena kɛsɔ mbakawelamɛ lo dambo dia diwala.

Koko, leeta la ntondo la wanɛ wakelamɛ lo dambo kombokɛma la ntondo ka ngɔndɔ ya l’ekomelo k’ɔnɔnyi 29 T.D., etena kakamɛ Yeso l’ambeki ande (ase olimu wa nkumekanga) sala olimu w’esambishelo ka Diolelo. Koko Ase Isariyɛlɛ wa l’emunyi, wanɛ wakalongola leeta lɔsɔ le ase olimu tatɛ oma l’ɔnɔnyi 29 T.D. polo ndo l’ɔnɔnyi 33 T.D., konanga ndja. Ɔnkɔnɛ, Nzambi akasha wodja ɔsɔ wakelamɛ diaaso dikina nto, oko wata Yeso ate:

“Ndi akatumi ekambi andi ekina ntu ati: Nyututeli wane wakamaladiya lu dambu nyati: Nyulungi, dimi lambolongosola ma diami dia dikolo: ngombe yami la esongo wa ngombe wununyi wambudiakema, la diango tshe diambolongoswama. Nyuyi lu dambu dia tshuki.” Leeta lɔsɔ la hende ndo la komelo la wanɛ wakelamɛ lo dambo lakamɛ lo Pɛntɛkɔsta ka l’ɔnɔnyi 33 T.D., lam’akatshulwama nyuma k’ekila le ambeki wa Yeso. Lɔ lakatetemala polo ndo l’ɔnɔnyi 36 T.D.

Koko efula k’Ase Isariyɛlɛ wakɔnyɔla ndo leeta lɔsɔ. Yeso ate: “Vo wakonyola dikambu diako, wakatshu lu akambu awo: omotshi akatshu l’ekambo kandi, ukina l’ukanda andi. Akina wakandi ekambi andi, wakâtshela kolo, wakâdiaki.” Yeso ambota nto ate: “Khum’ekanga akumala kele. Ndi akatumi alimbi andi, ku vo wakatulanya andjakanyi aso, ndu wakatutshumba usumba awo.” Dikambo sɔ diakatshama l’ɔnɔnyi 70 T.D., lam’akashilama Jerusalɛma oshiki oma le Ase Rɔmɔ, ko andjakanyi wa lɔkɔ wakadiakema.

Oma lâsɔ, Yeso amboyolembetshiya kɛnɛ kakatshamaka la ntondo k’anto akɔ ndjakema, ata ate: “Ku [nkumekanga] akatela ekambi andi ati: Diango dia tshuki diambolongoswama, keli antu wakamaladiya, tawaki ololo. Okone nyutshu lu asanga wa mbuka, nyuteti wane wayunyutana, wayi lu dambu dia tshuki.” Ase olimu wakatshe ɔsɔku, ko “luudu la tshuki lakaluli too l’ambetami wa dambu.”

Olimu ɔsɔ wa tshumanya anto wa lo ɛsɛsɛ, l’andja w’osomba w’anto wakelamɛ lo dambo, wakamɛ salema l’ɔnɔnyi 36 T.D. Kɔnɛliyɔ, owandji w’alembe w’Ose Rɔmɔ, nde la nkumbo kande mbaki Ase Wedja wa ntondo wakatshumanyema. Otshumanyelo ɔsɔ w’anto wele kema Ase Juda, wahomba mbɔsa dihole dia wanɛ wakelamɛ ntondo ko wakɔnyɔla leeta, wekɔ lo tatetemala polo ndo l’eleko kɛnɛ ka 20.

L’eleko kɛnɛ ka 20 mbambolola luudu lasalema nsɛlɛmɔnyi ka diwala. Yeso ambɔkɔndɔla kɛnɛ kayoyosalema l’ɔkɔngɔ diko, ata ate: “Lam’akoto khum’ekanga dia ndjenda ambetami wa lu dambu, ndi akenyi untu omotshi laki kundja la dihondo dia tshuki loko. Ndi akawumbula ati: Ongenyi, ukundi akayotwe lone aha la dihondo dia tshuki? Untu ako akatewala. Ku khum’ekanga akatela ekambi andi ati: Nyûkeleki l’anya ndu l’ekulu, nyuwukadja lu udjima wa l’andja. Delu diayuyala leko ndu ekeketanyelu ka anyu.”

Pami kele kema l’ahɔndɔ wa diwala ekɔ didjidji di’Akristo wa kashi wa lo Lokristokristo. Nzambi kombaetawɔ kânga yema oko Ase Isariyɛlɛ wa lo nyuma wa mɛtɛ mɛtɛ. Nde kombakita nyuma k’ekila kânga yema dia vɔ ndjâla ekitɔ wa Diolelo. Diɔ diakɔ diambowokadjema l’andja, lo wodjima, lɛnɛ ayowotolanyema.

Yeso ambodihiya wɛɛla ande ata ate: ‘Nɛ dia efula mbakelamɛ, kele yema tshitshɛ mbɔsɔnami.’ Eelo, efula k’Ase Isariyɛlɛ wa l’emunyi wakelamɛ dia vɔ ndjâla atɔi amɔtshi wa l’olui wakenga wadi aki Kristo, koko yema tshitshɛ tsho ya l’atei awɔ mbakasɔnama. Efula ka l’atei w’anto 144 000, wanɛ wakelamɛ dia nongola difuto dia l’olongo, kema Ase Isariyɛlɛ. Mateu 22:1-14; Etumbelu 19:1-6; Enyelo 14:1-3.

▪ Oma l’etatelo, wa na wakelamɛ lo dambo dia diwala, ndo etena kakɔna kakawalongola leeta lakɔ?

▪ Etena kakɔna kakokɛma leeta la ntondo le wanɛ wakelamɛ, ndo wa na wele ase olimu wakatakokolaka leeta lakɔ?

▪ Etena kakɔna kakatatɛ leeta la hende, ndo l’ɔkɔngɔ wa dikambo sɔ, wa na wakelamɛ?

▪ Alembetshiya pami kele kema l’ahɔndɔ wa diwala?

▪ Wa na wakelamɛ efula ndo wa na wakasɔnama yema tshitshɛ?