Tshapita 84

Ɔkɛndɛ w’ombeki

L’ƆKƆNGƆ wa nde mumɔ oma lo luudu l’owandji w’Afarisɛ, ɔnɛ lele ondo ɔtɔi ɔmɔtshi wa l’atei w’Ase Sheke, Yeso ambotetemala la lɔkɛndɔ lande otsha la Jerusalɛma. Elui a weke w’anto wekɔ lo tawoyele. Ko kakɔna kâtshutshuya dia vɔ mboyela na? Ndjâla ombeki wa mɛtɛ waki Yeso kɛdikɛdi na?

Wonya wewɔ lo tatshu, Yeso ambosekesɔ otsha le elui w’anto ko ambowatɛ ɛtɛkɛta ɛnɛ wambâhumuya l’asolo ondo: “Naka untu ambuya le mi, ku ndi hahetsha shi, la nyangu, la wadi, la ana, la anangu, la akadiyendi, ee, ndu [anima ande hita, NW], keti ndi heyi ndjala umbeki ami.”

Yeso alangande mbuta na? Yeso hatshi ɔnɛ ambeki ande pombaka mpetsha wanɛ wôtɔ lawɔ lo mɛtɛ mɛtɛ. Koko, vɔ pombaka mbahetsha lo yoho yahombawɔ mbaoka ngandji kele l’ɛse ka kɛnɛ kawôkawɔ. Oko ɛnyɛlɔ, vɔ mbutaka ɔnɛ Jakɔbɔ, tshɛnde la Yeso, ‘akahetshaka’ Lea ko akalangaka Rashɛlɛ, kɛdikɛdi nde konangaka Lea efula oko akandalangaka koshɛnde Rashɛlɛ.

Tolembete nto dia Yeso ekɔ lo mbuta ɔnɛ ombeki ande pombaka mpetsha kânga “anima ande hita,” mbuta ate lɔsɛnɔ lande. Kɛnɛ kakalange Yeso mbuta nto lâsɔ ele ɔnɛ ombeki ande pombaka mbôka ngandji koleki kɛnɛ kokande lɔsɛnɔ lande hita. Ɔnkɔnɛ, Yeso ekɔ lo ntɛtɛ ɔnɛ: ndjâla ombeki ande ekɔ ɔkɛndɛ wa woke efula. Ɔsɔ ekɔ yɛdikɔ yahomba onto kana yimba ɔlɔlɔ la ntondo ka ndjiɔsa.

Ndjâla ombeki wa Yeso kɛdikɛdi mɛna pâ ndo pɛnyahɛnyama: “Untu tshe lahembe utamba andi [w’asui, NW] dia ndjelami, ndi heyi ndjala umbeki ami.” Ɔnkɔnɛ, ombeki wa mɛtɛ pombaka mbetawɔ dia mɛmba wotsho akɔ wâmɛ wa nsɔnyi wakɛmbɛ Yeso, polo ndo lo ndjakema l’anya w’atunyi wa Nzambi oko wakasale Yeso, naka ekɔ ohomba.

Ɔnkɔnɛ, elui w’anto watayele Kristo pombaka kana lomba ɔlɔlɔ dia mbeya elɛwɔ ndjâla ombeki wa Kristo. Yeso ekɔ lo tɔtɔmiya dikambo sɔ oma l’ekimanyielo ka wɛɛla ɔmɔtshi. Nde ambota ate: “Untu akona l’atei anyu, lam’alangandi mpika luudu l’etangelu, ku hatadjashi dia ntediki ushinga, kana ndi la diango dia nkuka lushidiya? Lam’ambunduhika etshina, ku ndi kema la wulu wa lushidiya, wane tshe wayenda, wayutatela mbôsoka. Vo wayuta vati: Pami kene akatatela mpika luudu, keli ndi kumbeya lushidiya.”

Ɔnkɔnɛ, oko wambolembetshiya Yeso elui w’anto watawoyele, la ntondo ka vɔ ndjâla ambeki ande, vɔ pombaka tɔ̂shi tɛdikɔ ta nge dia kotsha kɛnɛ tshɛ kalɔmbama, oko wahomba onto lalanga mbika luudu l’etangelo teyi la ntondo ka nde tatɛ mbika dia kana nde ekɔ la diangɔ dia ndjolishidiya. Oma lâsɔ, Yeso amboyoka wɛɛla okina ɔnɛ:

“Kana, khum’ekanga kakona, lam’ayundutsho dia ntolosha khum’ekanga kekina, hatadjashi dia ntakanyi yimba, kana ndi la antu andi nunu dikumi, weko la wulu wa mpumana la ukina layayi le ndi la antu nunu akumi ahendi? Kuku kana lam’eki ukina etali, ndi ayûtumela akendji la ntuwumbula akambu wa vo ndjala ki.”

Oma lâsɔ, Yeso ambosha wetshelo w’oma lo wɛɛla ande ɛsɔ, ata ate: “Okone untu tshe l’atei anyu lahaseke kene tshe keli la ndi, ndi heyi ndjala umbeki ami.” Kɛsɔ mɛtɛ mbahomba elui w’anto wayawoyele sala, ɛɛ, ndo onto tshɛ lamboyeya Kristo pombaka mbetawɔ dia sala dikambo sɔ. Vɔ pombaka mbetawɔ nshisha kɛnɛ tshɛ kele lawɔ—diangɔ diawɔ tshɛ, kânga ndo lɔsɛnɔ lawɔ—naka vɔ nangaka ndjâla ambeki ande. Onde wɛ mbetawɔka sala dikambo sɔ?

Yeso ambotetemala mbuta ate: “Leho leko ololo.” Lo Dako diande dia lo Dikona, nde akate ɔnɛ ambeki ande wekɔ “leho la la kete,” kɛdikɛdi vɔ wekɔ la shɛngiya yakokɛ anto, oko wakokɛ lɛhɔ la lɛhɔ diangɔ. Dia nde kumiya, Yeso ate: “Keli naka leho lambusuwo, la na ayunyulete mpe ntu? Lo kema ololo dia mbidja lu kete kana lu diala: wayulukadja l’andja. One leli la atui wa mbuka, uki.”

Ɔnkɔnɛ, Yeso ambɛnya ɔnɛ kânga wanɛ wamboyala ambeki ande lo tshanda mɔtshi hawokoke nɛmba lo tɛdikɔ takawɔshi dia tetemala lo mboka kɛsɔ. Naka vɔ nɛmba, kete vɔ hawotoyala ohomba nto, wayɔsɔkama oma le andja ɔnɛ ndo wayoyala anto wahasungana lo asho wa Nzambi, lo mɛtɛ, vɔ wayosha Nzambi nsɔnyi. Oko lɛhɔ lambosuwɔ ndo lambɔtɔ mindo, vɔ wayokadjema l’andja, eelo, wayolanyema. Luka 14:25-35; Etatelu 29:30-33; Mateu 5:13.

▪ ‘Mpetsha’ wanɛ wôtɔ layɛ ndo ‘ndjahetsha’ wɛmɛ kɛdikɛdi na?

▪ Naa wɛɛla ehende wôki Yeso, ndo alembetshiyawɔ?

▪ Wetshelo akɔna wakondjaso oma l’ɛtɛkɛta wa ndjihelo waki Yeso lo dikambo dia lɛhɔ?