Tshapita 92
Ase sudi dikumi wambɔkɔnɔ lo lɔkɛndɔ la Yeso la komelo la Jerusalɛma
ASE sheke wamboyanga ndjaka Yeso, koko nde ambɔtshiya sangwelo diawɔ l’ashi: nde ambomɔ la Jerusalɛma ko ambotshɔ etale, lo nɔrdɛ-ɛsta, l’osomba w’Efarayima wanganyi la Jerusalɛma ondo kilɔmɛtɛlɛ 25 tsho. Nde l’ambeki ande wambotodjasɛ lɛkɔ, mangana l’atunyi ande etale.
Koko, difɛstɔ di’Elekanelo dia l’ɔnɔnyi 33 T.D. diaya suke, ɔnkɔnɛ Yeso haviyisha dia nkimɛ lɔkɛndɔ nto. Nde ambotenyanya Samariya ko ambodɛ la Ngalileya. Ɔnɛ mbele mbala ka komelo kamondotshɔ lo lɛtshi lɔsɔ la nkɛtɛ la ntondo ka nyɔi kande. Lam’ewɔ la Ngalileya, ondo nde l’ambeki ande wambosamba vɔ l’anto akina watatshu la Jerusalɛma dia tosala difɛstɔ di’Elekanelo. Vɔ wambodjɛ lo mboka katenyanya lɛtshi la nkɛtɛ la Pereya, lo lɛkɛ l’ehotwelo ka wonya k’Ɔkɛdi wa Jɔrɔdana.
L’etatelo ka lɔkɛndɔ lawɔ, wonya wɔ̂twɛ Yeso lo ngelo kɛmɔtshi ka la Samariya kana ka la Ngalileya, nde ambohomana l’apami dikumi wele la hemɔ ka sudi. Hemɔ kɛsɔ ka kɔlɔ efula pembolaka tenyi dia demba di’onto yema yema—mpita ya l’anya, ya l’ekolo, atui, ɔhɛmbɛ, ndo ɛlɔmɔ. Di’aha anto akina sambiyama hemɔ kɛsɔ, Ɔlɛmbɛ wa Nzambi mbutaka lo dikambo dia kanga sudi ɔnɛ: “Kanga sudi, . . . kalote ahondo wa betshi betshi, . . . ku ndi ntahangohangoka ati: Mindu, mindu! Etena tshe kayunduyala la puta, ndi ayuyala mindu. . . . Luudu landi layuyala l’andja a pangu.”
Ase sudi asɔ dikumi wambɔlɛmiya Ɔlɛmbɛ akɔ wakawadjɛ ase sudi, ko wambangana tshalola la Yeso. Koko wekɔ lo pangɔhangɔ vate: “Jesu, Uwandji, utuki ketshi!”
Yeso ambowaɛna lo tshalola, ko nde lawɔ ate: “Nyutshu, nyutuyaenya le elombedi.” Yeso ambowatɛ ɔsɔku nɛ dia Ɛlɛmbɛ wa Nzambi mbishaka ɛlɔmbɛdi dikimɔ dia vɔ mbuta ɔnɛ ase sudi wambɔkɔnɔ waya pudipudi. Ɔsɔku mbetawɔmawɔ dia vɔ mbidjasɛ nto l’anto wele kema la hemɔ.
Ase sudi asɔ dikumi wekɔ la mbetawɔ lo wolo wele la Yeso wa sala ahindo. Diɔ diakɔ diambowosamanya dia tɛnana l’ɛlɔmbɛdi kânga mbewɔ watakɔnɔ. Wêke l’atei a mboka ko mbetawɔ kawɔ le Yeso kambofutama. Vɔ wambomɛ mɛna ndo ndjaoka ɔnɛ: tambɔkɔnɔ!
Divwa l’atei w’ase sudi dikumi wambɛdiama wambɔkɔlamɛ la lɔkɛndɔ, koko ose sudi okina, Ose Samariya, ambokalola dia ndjoyanga Yeso. Lande na kamondokalola na? Nɛ dia nde ekɔ la lowando efula lo kɛnɛ kambowosalɛ. Nde ambotatɛ ntombola Nzambi la dui dia wolo, ko lam’ɛnyinde Yeso, nde ambɔkɔ l’ekolo ande, ambowosha losaka.
Yeso mbôkadimolande ate: “Aha antu dikumi mbokonwe, keli, lend’eli divwa? Nduku untu ukina lukaludi dia ndjutumbula [Nzambi, NW], tshikima ongendangenda one?”
Ko Yeso ambotɛ pami kɛsɔ k’Ose Samariya ate: “Eto, utshu. Mbetawo kaye kambukokonoya.”
Lam’alaso ɔkɔndɔ w’ɛkɔnwɛlɔ k’ase sudi dikumi, sho pombaka mbidja wetshelo w’oma lo dimbola dia Yeso nɛ l’otema: “Lend’eli divwa?” Lɔhɛndɛ laki l’akina divwa lekɔ tshondo ya munga ka woke. Lo ndjela ɛnyɛlɔ k’Ose Samariya, onde tayoyala la lowando lo kɛnɛ kalongolaso oma le Nzambi, ndo lo daka dia mɛtɛ dia lɔsɛnɔ la pondjo l’andja w’oyoyo waki Nzambi? Joani 11:54, 55; Luka 17:11-19; Akambu w’Asi Lewi 13:16, 17, 45, 46; Enyelo 21:3, 4.
▪ Woho akɔna wambɔkɔsha Yeso sheke yɔ̂twɛwɔ dia mbodiaka?
▪ Lende ambeta Yeso oma lâsɔ, ndo otsha lende amondotshɔ?
▪ Lande na kemadi ase sudi tshalola, ndo kambowatɛ Yeso dia vɔ ntshɔ le ɛlɔmbɛdi?
▪ Wetshelo akɔna wakondjaso oma l’ɔkɔndɔ ɔnɛ?