Tewɔ akambo wekola yimba lo “lushi la lukumu l’ololo” lɔnɛ

AKANGA a sudi anɛi wakakane yimba lo dikambo di’ɛsɔnwɛlɔ wakawasale. Ndoko onto laki la soko di’osomba lakawashaka weshasha wa kɛtshi. Ase Suriya wakadinge osomba wa Samariya ndo ndoko onto lakɔtɔka la diangɔ dia ndɛ l’osomba, ɔnkɔnɛ diangɔ dia ndɛ diakadɛ oshinga. Lokumu lakekɔ ɔnɛ anto wɔlɛ wanyawɔ anto.​—2 Khum. 6:24-29.

Akanga a sudi wakakane yimba ɔnɛ: ‘Lande na kahatatshu otsha lo pango k’ase Suriya? Ndoko ɛngɔ kayotoshisha.’ Ko vɔ wakatshu la dikɔlɔ di’otsho. Etena kakawakome lo pango, tɔ kaki ki yɔɔ. Komonga kânga olami ɔtɔi. Ponda ndo kamɛlɔ yaki yambɔlɛmba, koko komonga ndoko ɔsɔlayi. Vɔ akɔ anɛi wakɔtɔ lo tshombotombo mɔtshi. Ndoko onto laki l’etei, koko vɔ wakatane mbo ya ndɛ l’ashi wa nnɔ woho w’anyanya, ko wakale ndo wakanɔ. Akanga a sudi asɔ wakatane ndo paonyi, fɛsa, ahɔndɔ ndo diangɔ dikina dia nɛmɔ. Vɔ wakɔshi diangɔ diakawalange, wakadishɛ ndo wakakalola dia ndjoyanga dikina. Ndoko onto laki lo pango k’otondo. Jehowa akasale lo yoho ya dihindo dia ase Suriya mboka londjo l’alembe wa ta. Lam’ele vɔ wakafɔnya dia woyaye ndjalɔsha, ase Suriya wakalawɔ. Vɔ wakatshike diangɔ tshɛ diaki la wɔ!

Akanga a sudi wakɔsaka ndo wakashɛka diangɔ dia nɛmɔ. Koko, vɔ wakayokana yimba dikambo dia anto waki la Samariya wakavɔka la ndjala, ko dui sɔ diakananda nkum’etema yawɔ. Vɔ wakatatɛ mbutanɛ ɔnɛ: “Wuhu watshasu one kema ololo! Lushi l’elo, leko lushi la lukumu l’ololo!” Akanga a sudi wakakalola otsha la Samariya ndo wakatosanya lokumu l’ɔlɔlɔ la kɛnɛ kakawɛnyi.​—2 Khum. 7:1-11.

Sho lawɔ tekɔ lo nsɛna l’etena kakokaso mbelɛ ɔnɛ “lushi la lukumu l’ololo.” Lam’akandatɛkɛtaka dia dikambo dimɔtshi diendana la “djimbitelu . . . y’ekumelu k’etena kene,” Yeso akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mat. 24:3, 14) Dui sɔ diekɔ la shɛngiya yakɔna le so?

Ekiyanu wa lo lɔsɛnɔ kokaka toyalɛ wotsho

Oko wakiwɔ l’ɔngɛnɔngɛnɔ efula lo diangɔ diakawashola, akanga a sudi wakatokohɛ ase Samariya lo tshanda mɔtshi. Vɔ wakaleke mbika washo lo kɛnɛ kakawakoke kondja. Onde dikambo dia ngasɔ kokaka tokomɛ sho lawɔ? “Ndjala ya kasha” yekɔ etenyi kɛmɔtshi ka djembetelo ya tenyi tenyi yɛnya dia tekɔ lo nsɛna lo etena k’ekomelo ka dikongɛ nɛ di’akambo. (Luka 21:7, 11) Yeso akahɛmɔla ambeki ande ɔnɛ: “Nyuyalamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone.” (Luka 21:34) Oko weso Akristo, sho pombaka mbewɔ diaha ekiyanu aso wa lo lɔsɛnɔ la lushi la lushi ndjotokonya lo sho mbohɛ dia tekɔ lo nsɛna lo “lushi la lukumu l’ololo.”

Okristo ɔmɔtshi welɛwɔ Blessing kombetawɔ dia ekiyanu ande hita monga wotsho le nde. Nde akakambaka oko ombatshi mboka, akashidiya kalasa ndo akatshukama oma le ose nkumbo ka Bɛtɛlɛ ndo akayetawɔma oko ose nkumbo ka Bɛtɛlɛ ka lo wodja wa Bénin. Nde mbutaka ɔnɛ: “Wakambisha ɔkɛndɛ wa solaka mvudu ya lo Bɛtɛlɛ ndo dimi nangaka ɔkɛndɛ ami efula.” L’ɔngɛnɔngɛnɔ tshɛ, kadiyɛsɔ Blessing mbohɔka ɛnɔnyi 12 wakandakambe oko okambi wa lo tena tshɛ ndo nde ekɔ l’ɔlɔ efula lo woho wakambande olimu efula lo “lushi la lokumu l’ololo” lasɛnaso nshi nyɛ.

Tewɔ akambo watomanɛ wenya

Etena kakandatome ambeki ande 70 dia tosambisha, Yeso akawatɛ ate: “Dinela dieko efula, keli ekambi mbele tshitshe; okone nyolombe uwandji a dinela, dia nyutumela ekambi lu dinela diandi.” (Luka 10:2) Oko watɔhɔndaka diangɔ dia dinela naka anto hawodinyi esadi, mbele ndo kamba olimu w’esambishelo ɔkɔkɛ mbeyaka shisha nsɛnɔ y’anto efula. Ɔnkɔnɛ, Yeso akakotsha ate: “Tanyemulaki untu lu mbuka.” (Luka 10:4) Tshɛkɛta yokadimɔmi ɔnɛ “memula” lo ɛtɛkɛta wakafundama Bible ntondo kokaka nembetshiya akambo efula wele oko “akemwe!” kana “lushi l’ɔlɔlɔ!” Yɔ kokaka nembetshiya nto okumbatanelo ndo sawo di’otale diakoka mɔtsha angɛnyi etena kahomanawɔ. Ɔnkɔnɛ, Yeso akadjangɛka ambeki ande dia vɔ mbewɔ akambo wekola yimba woho wa vɔ kamba la wenya awɔ dimɛna. Losango lakawahombe sambisha aki losango l’ohomba efula.

Ohokana yimba lo yɛdikɔ ya wenya watomanɛ akambo efula wekola yimba. Aya ɛnɔnyi efula wele televiziɔ mbele ehomɔ kaleka manɛ anto wa lo ahole efula wenya awɔ. Ko kayotota dia telefɔnɛ ndo dia ɔrdinatɛrɛ wa totshitshɛ? Lo ndjela kɛnɛ kakate epalanga 1000 wa la Grande-Bretagne wakawakɔnya, “lofulo la l’atei atei l’ase Grande-Bretagne mbetshaka minitɛ 88 lo lushi lo asawo wa lo telefɔnɛ ya lo mvudu, minitɛ 62 lo telefɔnɛ ya l’anya, minitɛ 53 lo fundanɛka mikanda lo Ɛtɛrnɛtɛ ndo minitɛ 22 lo fundanɛka lo telefɔnɛ.” Lofulo la wenya wetshawɔ ndekaka ndo lofulo la wenya wetsha ombatshi mboka wa tshanda l’esambishelo lushi tshɛ ndodja l’ahende! Wenya engana wetshayɛ lo asawo wa lo telefɔnɛ, lo fundanɛka mikanda lo Ɛtɛrnɛtɛ ndo lo fundanɛka lo telefɔnɛ?

Ernst nde la Hildegard Seliger wakakambaka la wenya awɔ dimɛna. Vɔ akɔ ahende waketsha ɛnɔnyi ndekana 40 lo mpango ya nkanu y’ase Nazi ndo lo nkanu ya waa Kɔministɛ. L’ɔkɔngɔ wa vɔ mbakimɔ, vɔ wakakambe oko ambatshi mboka edja ndo etena kakawashidiya esakelo kawɔ ka lowango ka la nkɛtɛ.

Anto efula wakalangaka sawola la Seliger nde la wadɛnde. Atshukanyi asɔ wakakokaka mbetsha wenya awɔ lo mbadia ndo lo funda mikanda. Koko akambo wa lo nyuma mbakɔsaka dihole dia ntondo lo lɔsɛnɔ lawɔ.

Lo mɛtɛ, sho tshɛ ngɛnangɛnaka sawola la wakiso wa ngandji ndo ndoko kɔlɔ kele la dikambo sɔ. Tshikitanya akambo watotosalaka lushi la lushi ekɔ ohomba. Koko, ayonga dui dia lomba dia sho mbewɔ akambo wakoka tomanɛ wenya lo nshi nyɛ yasambishaso lokumu l’ɔlɔlɔ.

Tosambisha lokumu l’ɔlɔlɔ dimɛna dimɛna

Ekɔ mɛtɛ diɛsɛ dia woke dia nsɛna lo “lushi la lukumu l’ololo.” Nyɛsɔ tosale la wolo diaha mbekola timba taso oko wakasale akanga a sudi ntondo. Tohɔ dia vɔ wakayotaka ɔnɛ: “Wuhu watshasu one kema ololo.” Woho akɔ wâmɛ mbele, kema dimɛna dia sho mbetawɔ dia eyango aso kana akambo watɔsɛ wenya toshimba dia sho ndjasha tshɛ l’esambishelo.

Lo kɛnɛ kendana la dui sɔ, tekɔ la ɛnyɛlɔ ka dimɛna ka ndjela. L’ɔkɔngɔ wa nde kanyiya ɛnɔnyi 20 wa ntondo wakandetsha l’esambishelo, ɔpɔstɔlɔ Paulo akafunde ate: ‘Dimi lakasambisha lokumu l’ɔlɔlɔ lendana la Kristo dimɛna dimɛna.’ (Romo 15:19) Paulo kombetawɔ dia ɛngɔ kɛmɔtshi kitshakitsha ohetoheto ande. Nyɛsɔ tonge la ohetoheto wa woho waki la nde etena kewoyaso lokumu l’ɔlɔlɔ la Diolelo lo “lushi la lukumu l’ololo.”

[Osato wa lo lɛkɛ 28]

Blessing kombetawɔ dia eyango ande hita mbɔ̂sɛ wenya wakandahombaka mbetsha l’olimu wa lo tena tshɛ

[Osato wa lo lɛkɛ 29]

Ɔnangɛso Seliger nde la wadɛnde wakakambaka la wenya awɔ dimɛna