Tshapita 97

Ase olimu l’ekambɔ ka vinyɔ

YESO oma la mbuta ate: “Efula weli la ntundu, wayuyala l’okongo; la efula weli l’okongo, wayuyala la ntundu.” Kakianɛ, nde ambɔkɔndɔla ɔkɔndɔ ɔmɔtshi dia nembetshiya ɛtɛkɛta akɔ. Nde ambotatɛ mbuta ate: “Diulelu dia l’ulungu dieli uku kanga luudu, lakatshu k’olomo la pindju dia ntuyanga asi ulimu, dia vo ndjukambela lu ekambo kandi k’elua.”

Yeso ambotetemala ate: “[Kanga luudu] akukana la wo dia mbâfuta denariyo otoi lu lushi otoi, akâtumi l’ekambo kandi k’elua. Ndi akatshu ntu uku l’eshidi divwa, akenyi akina wemadi wemalemala lu kituka. Ndi akawatela ati: Ndu nyu, nyutshu l’ekambo k’elua, layunyusha kene tshe keli ololo. Ku vo wakatshu. Ndi akatshu ntu uku l’eshidi dikumi l’ehendi, ndu l’eshidi esatu, akatshi pupu. Lam’akakuki unya l’eshidi etanu, ndi akatshu, akatani akina wemadi. Ndi akawambula ati: Ukundi wemalanyu lane unya tshe wemalemala? Vo wakawutela vati: Ne dia nduku untu lutosengodi ulimu. Ndi akawatela ati: Ndu nyu, nyutshu l’ekambo k’elua.”

Kanga luudu, mbuta ate kanga ekambɔ ka vinyɔ, ele Jehowa Nzambi, ndo ekambɔ ka vinyɔ ele wodja w’Isariyɛlɛ. Ekambi wambotomama l’ekambɔ ka vinyɔ ele anto wakɔtɔ lo sheke y’Ɛlɛmbɛ; djekoleko Ase Juda wa lo nshi y’apɔstɔlɔ. Paka l’ekambi wahomba kamba olimu lushi l’otondo mbambowokana difuto. Difuto diakɔ ele dɛnariyo ɔtɔi lo olimu wa lushi l’otondo. Lam’ele “eshidi esatu” mbɛdima l’eshidi divwa wa pindju, wanɛ wambelamɛ l’eshidi esato, esamalo, divwa, ndo l’eshidi dikumi l’ɔtɔi, wayokamba onto l’onto paka eshidi divwa, esamalo, esato la oshidi ɔtɔi.

Ekambi wakakambe eshidi dikumi l’ehende, kana lushi l’otondo, ele ewandji w’ɛtɛmwɛlɔ w’Ase Juda, wanɛ wasala olimu wa l’ɔtɛmwɛlɔ nshi tshɛ. Vɔ tshikitana l’ambeki wa Yeso, nɛ dia etena koleki woke lo nsɛnɔ yawɔ, ambeki wakakambaka olimu wa munda nse la elimu ekina wa l’emunyi. Paka oya l’ekomelo k’ɔnɔnyi 29 T.D. mbayotoma “kanga luudu” Yeso Kristo dia mbatshumanya woho wa vɔ ndjâla ambeki ande. Ɔsɔku mbakawayala anto wa “l’okongo,” ase olimu wakɔsama l’eshidi dikumi l’ɔtɔi.

L’ɔkɔngɔ diko, lushi l’olimu la didjidji lambokomɛ lo nyɔi ka Yeso, ndo etena ka futa ase olimu kambokoka. Otshikitanyi la woho watosalemaka nshi tshɛ, wambotatɛ futa wanɛ woyokoma l’ɔkɔngɔ, enda nganɛ wakawâfute: “La dikolo, kanga ekambo k’elua akatela [kapita kande, NW] ati: Eta asi ulimu, uwasha difutu, utateli le wane wakayi l’okongo edja ndu wa ntundu. Lam’akayi wane wakayutatela nkamba l’eshidi etanu, vo wakalungula denariyo otoi. Lam’akayi wa ntundu, vo wakakani vati: Shu tayulungula yediko yuleki. Keli ndu vo tshe, wakalungula denariyo otoi otoi. Lam’akawalungula difutu diawo, vo wakangunangunela kanga luudu. Vo wakati vati: Wane wa l’okongo, wakakambi ushidi otoi utu, keli we ambuwaedimia la su, shu ane wakakambi unya tshe lu yanyi ya wulu! Keli ndi akakaluya otoi awo diui ati: Ongenyi, dimi hankutshedi kolo. We hukanyi la mi dia denariyo otoi? Osa kene keli kaye, utshu; dimi nangaka mbisha wane wa l’okongo uku [wokoshami]. Undi, olembe mbeko dia dimi ntsha uku alangami la diango diami? Kuku kana we ambumbuka kandjema ne dia lukahu lami?” Dia nde kumiya, Yeso ambota kɛnɛ kakandate ntondo ate: “Okone wa l’okongo, wayuyala wa la ntundu; ku wa la ntundu, wayuyala wa l’okongo.”

Ase olimu hawolongodi dɛnariyo lo nyɔi ka Yeso, koko wayodilongola lo Pɛntɛkɔsta ka l’ɔnɔnyi 33 T.D., l’etena kayotshulola Kristo, “kapita,” nyuma k’ekila le ambeki ande. Ambeki wa Yeso asɔ wekɔ oko ase olimu wamboyokoma “l’okongo,” mbuta ate l’eshidi dikumi l’ɔtɔi. Dɛnariyo kema losha la nyuma k’ekila lwamɛ. Diɔ diekɔ ɛngɔ kɛmɔtshi kakamba ambeki latɔ olimu lanɛ la nkɛtɛ. Ekɔ yangɔ mɔtshi yâkimanyiya dia vɔ kondja lɔsɛnɔ lawɔ, lɔsɛnɔ lawɔ la pondjo. Ɔsɔ ekɔ diɛsɛ dia ndjâla Ose Isariyɛlɛ wa lo nyuma, wambokitama dia sambisha Diolelo diaki Nzambi.

Kem’edja, wanɛ wakatatɛ kamba olimu ntondo wayoyɛna ɔnɛ ambeki wa Yeso wambofutama ndo wayoyowaɛna wakamba la dɛnariyo sɔ dia didjidji. Koko vɔ kombolaka kondja diangɔ efula oleki nyuma k’ekila la waɛsɛ wa Diolelo w’oma lɔkɔ. Engunungunu awɔ la lohetsho lawɔ layokadimɔ ɛhɛnyɔhɛnyɔ le ambeki wa Kristo, ase olimu wakatomama “l’okongo” l’ekambɔ ka vinyɔ.

Onde wɛɛla ɔsɔ wa Yeso wakakotshama paka l’eleko ka ntondo? Kema, l’eleko ka 20, ewandji w’ɛtɛmwɛlɔ wa Lokristokristo mbakikɔ, oma lo ahole awɔ la ɛkɛndɛ awɔ, ase olimu wa “ntundu” wakatatɛ kamba l’ekambɔ ka vinyɔ ka didjidji ka Nzambi. Vɔ wakɔsaka esambisha waki l’ohetoheto, wanɛ wakakambaka kâmɛ la Société Watch Tower oko ase olimu wakayolongolaka ɔkɛndɛ “l’okongo” l’olimu wa Nzambi. Koko mɛtɛ, anto asɔ wakɔnywamaka oma le ewandji w’ɛtɛmwɛlɔ mbakayolongolaka dɛnariyo—nɛmɔ dia kamba oko akɛndji wa Diolelo dia Nzambi dia l’olongo. Mateu 19:30–20:16.

▪ Ekambɔ ka vinyɔ alembetshiyatɔ? Ele kanga ekambɔ ka vinyɔ, ndo ase olimu wakakambe eshidi dikumi l’ehende la wanɛ wakakambe oshidi ɔtɔi alembetshiyawɔ?

▪ Etena kakɔna kakakomɛ lushi l’olimu la didjidji, ndo etena kakɔna kakalongola ase olimu difuto?

▪ Ofutelo wa dɛnariyo alembetshiyawɔ?