Tshapita 106

Wambâtondja sɛkɛ oma lo wɛɛla w’ekambɔ ka vinyɔ

YESO ekɔ lo tɛmpɛlɔ. Nde oma la konya ewandji w’ɛtɛmwɛlɔ ewo lam’akawawombudi dia mbeya ɔnɛ lakawosha wolo wakandasalaka akambo amɔtshi. La ntondo ka timba tawɔ mbɔla yɔɔ oma l’ofukutanu awɔ, Yeso ambowaoka dimbola nɛ ate: “Ukundi akananyu na?” Ko, l’ekimanyielo ka wɛɛla ɔmɔtshi, nde ambowaɛnya weoho w’anto wewɔ mɛtɛ.

Yeso ambɔkɔndɔla ate: ‘Onto ɔmɔtshi aki l’ana ahende. Lam’akandatshu le ɔna la ntondo, nde akatowotɛ ate: Ɔnami, ntshɔka tôkambe ɛlɔ l’ekambɔ ka vinyɔ. Ko nde akôkadimola ate: Layotshɔ, owandji, koko nde kontshɔ. Nde akatshu le ɔna la hende ko akatowotɛ woho akɔ wâmɛ. Ɔna ɔsɔ akôkadimola ate: Hatshu. L’ɔkɔngɔ diko, nde akayondamaka la lonyangu ko akayotshɔ.’ Yeso mbawambolande ate: ‘L’atei w’ana asɔ ahende, akɔna akasale lolango la she?’

Atunyi ande mbakadimolawɔ vate: ‘Ɔna la hende.’

Yeso mbâlembetshiyande ate: “Mete kanyutelami nti: Elungudi w’elambu la amantu wa luseka wayunyumela mboto lu diulelu dia [Nzambi, NW].” Mɛtɛ, elongodi w’elambo la akanga a loseka wekɔ anto wakatonaka ntondo dia kambɛ Nzambi. Koko l’ɔkɔngɔ diko, oko ɔna la hende, vɔ wakayoyatshumuyaka ko wakayôkambɛka olimu. Koko ewandji w’ɛtɛmwɛlɔ, oko ɔna la ntondo, wakataka ɔnɛ Nzambi mbakambɛwɔ, koko Yeso ate: “Joani [Obatizanyi] akayi le nyu lu mbuka ka akambu w’ololo, ku nyu kumbêtawo. Keli elungudi w’elambu la amantu wa luseka wakawetawo. Lam’akanyenyi dikambu so, nyu kunkadimula etema l’okongo diku, dia nyu mbêtawo.”

Oma lâsɔ, Yeso ambɛnya ɔnɛ ewandji ɛsɔ w’ɛtɛmwɛlɔ kema la munga paka l’ɔtɛ watonawɔ kambɛ Nzambi oto. Koko, wekɔ anto w’etema mindo, anto wa kɔlɔ. Yeso ambotetemala mbuta ate: “[Aki pami kɛmɔtshi, kanga luudu, kakakambe ekambɔ ka vinyɔ, akakidinge la lokombo, akatshime difuku dimɔtshi dia mamulaka elowa wa vinyɔ, ndo akake luudu lɔmɔtshi l’etangelo, oma lâsɔ nde akakikimɔ l’ekambi w’ekambɔ ko akatshu lo wodja okina. Lam’akakoke eleko katshunda elowa, nde akatome ase olimu ande le ekambi w’ekambɔ dia vɔ towɔsɛ elowa ande. Koko, ekambi wa dikambɔ wakande ase olimu ande, wakakule ɔmɔtshi, wakadiake okina, ndo wakoke la sato ave. Ko nde ndjotoma nto ase olimu akina, woleki ndo wa ntondo efula, koko wakâtshelɛ woho akɔ wâmɛ, NW].”

“Ase olimu” wekɔ amvutshi wakatomama oma le Jehowa Nzambi, “kanga luudu” otsha le “ekambi w’ekambɔ” kande ka “vinyɔ.” Ekambi ɛsɔ w’ekambɔ wekɔ ewandji wa wodja w’Isariyɛlɛ, wodja welamɛ lo Bible ɔnɛ “ekambɔ ka vinyɔ” ka Nzambi.

Lam’ele “ekambi w’ekambɔ” wambosoya ndo wambodiaka “ase olimu,” Yeso ambota ate: “L’okongo diku, [kanga ekambɔ ka vinyɔ] akâtumela on’andi; akati ati: Wayolemia on’ami. Keli lam’akenyi ekambi w’ekambo ona, vo wakatanela vati: Ukito uku. Nyeso tûdiaki, katose sangu diandi. Ku vo wakawundi, wakûsukula uma l’ekambo, wakûdiaki.”

Yeso mbambolande ewandji w’ɛtɛmwɛlɔ ate: “Lam’ayuya kanga ekambo k’elua, ukundi ayundutshela ekambi w’ekambo eso?”

Ewandji w’ɛtɛmwɛlɔ vɔande vate: “Ndi ayudiaka antu wa kolo aso tshe, ayutshikela ekambi ekina ekambo, wane wayuwushaka elua lu deku diawo.”

Ɔsɔku mbambowoyahembolɛ onongo awɔ aha la vɔ mbeya, vɔ wamboyafundɛ dilanya nɛ dia ndo vɔ mbele l’atei w’Ase Isariyɛlɛ, wanɛ wele “ekambi” lo “ekambɔ ka vinyɔ” kaki Jehowa, wodja w’Isariyɛlɛ. Elowa walongamɛ Jehowa le ekambi ɛsɔ w’ekambɔ ele monga la mbetawɔ le Ɔnande, Mɛsiya wa mɛtɛ. Lam’ele vɔ hawɔtɔ elowa ɛsɔ, Yeso ambowaewola ate: “Nyu kumbala lu afundelu [lo Osambu 118:22, 23] ati: Dive diakatuni ambiki a luudu, mbakayala ote wa tshuku. Dikambu so diakayala uma le [Jehowa], ndu dio dieko dikambu dia mamba lu ashu asu? Okone dimi lambunyutela nti: Wayunyokosola diulelu dia [Nzambi, NW], ku wayudisha wudja watotokaka elua adio. One layoko lu dive ne, ayuhimbohimbo tenyi. Keli lam’ayudiokwela untu omotshi, diayûhandjula uku ditshu.”

Kakianɛ, afundji la ɛlɔmbɛdi a weke wamboyoshihodia ɔnɛ: Yeso sho mbatande, ko woyanga mbodiaka, nde lele “ukito” wakoka. Diɔ diakɔ diayoyoshisha wodja w’Isariyɛlɛ diɛsɛ dia mbolɛ lo Diolelo diaki Nzambi, ko wodja w’oyoyo w’‘ekambi w’ekambɔ ka vinyɔ’ wayoyotongama, ɔsɔ kele wodja wayoyɔtɔ elowa wasungana.

Nɛ dia vɔ wekɔ lo mboka elui w’anto wɔma, ewandji w’ɛtɛmwɛlɔ hawolange ndjaka Yeso wonya ɔnɛ, nɛ dia elui w’anto mbɔ̂saka oko omvutshi. Mateu 21:28-46; Mako 12:1-12; Luka 20:9-19; Isaya 5:1-7.

▪ Wa na walembetshiya ana ahende wa lo wɛɛla wa Yeso?

▪ Lo wɛɛla wa hende, ele “kanga luudu,” “ekambɔ ka vinyɔ,” “ekambi w’ekambɔ,” “ase olimu,” ndo “ukito” na?

▪ Kakɔna kayoyokomɛ ‘ekambi w’ekambɔ ka vinyɔ,’ ndo wa na wayoyɔsa dihole diawɔ?