Tshapita 110

Nde amboshidiya olimu ande lo Tɛmpɛlɔ

YESO ambɛnama lo tɛmpɛlɔ mbala ka komelo. Mɛtɛ, naka sho minya akambo wayoyosalema nshi shato l’ɔkɔngɔ diko, olomboyelo ndo odiakelo ande, kete wonya ɔnɛ mbayondoshidiya olimu ande lanɛ la nkɛtɛ. Koko l’etena kɛnɛ, nde âkatetemala mɛnya kɔlɔ k’afundji la Afarisɛ lo sɛkɛ.

Nde ambota nto mbala shato y’etondo ate: “Fono kayayi le nyu, afundji la Afarise, akanga a lukesu!” Ntondotondo, nde ambowadja mananu nɛ dia vɔ watɛdiaka “l’andja a dikoho la donga, keli l’etei awo ambulula too la dihotwanelu la dishi.” Diɔ diakɔ diambondowasha dako nɛ ate: “Utaotshisha l’etei a dikoho la donga, okone ndu l’andja ayuyala pudipudi.”

Oma lâsɔ ko nde ndjodja afundji la Afarisɛ mananu nɛ dia vɔ wamboshila pɔnda ndo ndana la ditshelo diashɛwɔ lo ndjaɛnyaka lo asho w’anto oko anto wamamema Nzambi. Nde lawɔ ate: “Nyu nyeko uku waumbu wediawo ladiku, weli amena l’andja, keli l’etei awo, vo wambulula la weka wa edu w’antu la mindu tshe.”

L’ɔkɔngɔ diko, lokeso lawɔ mɛnamaka lo ohetoheto awɔ wa mbika waombo w’amvutshi ndo mbalɛnga dia mɛnya ɔlɔlɔ awɔ lo asho w’anto. Koko, oko wadiɛnya Yeso, vɔ wekɔ “tukanula t’andjaki w’amvutshi.” Mɛtɛ, onto tshɛ lahemba tondja lokeso lawɔ lo sɛkɛ mbidjaka lɔsɛnɔ lande lo wâle!

Yeso ambaɛnya nto kɔlɔ yawɔ l’ɛtɛkɛta woleki tshɛ wolo, ata ate: “Nyu elui, ndu diuhu dia akhuha, ukundi ayunyuhanda elumbwelu ka [Ngɛhɛna, NW]?” Ngɛhɛna ekɔ okidi ɔmɔtshi, lɛnɛ akashawɔ mindo tshɛ ya la Jerusalɛma. Ɔnkɔnɛ, Yeso ambotɛ afundji la Afarisɛ ɔnɛ, nɛ dia vɔ wekɔ lo tetemala lo kɔlɔ kawɔ, vɔ wayolanyema pondjo.

Lo dikambo dia wanɛ watomande oko akɛndji ande, Yeso ate: “Nyu nyayudiaka amotshi udiakadiaka, akina lu utamba [w’asui, NW]. Nyayokomola akina emambu lu temwelo dianyu, nyayuwasuya lu usumba l’usumba. Okone dikila tshe dia antu w’ololo diakako la kete diayuyala le nyu, uma ka dikila dia Abele untu ololo edja ndu dikila dia Zekariya, on’a Barakiya, lakanyadiaki l’asa etemwelo la ediakelu. Mete kanyutelami nti: Akambu ane tshe wayuyala le wa lu lolonga lone.”

Nɛ dia Zekariya akahangwɛ ewandji wa l’Isariyɛlɛ, “vo wakûtshwela sheki, wakawuki ave uma lu diui dia khum’ekanga lu seke dia lukumbu dia luudu la [Jehowa].” Koko, oko wambotaditshi Yeso, Isariyɛlɛ ayoyofuta dikila tshɛ di’anto w’ɛlɔlɔ diakatshulwama. Vɔ wayoyodifuta l’ɔkɔngɔ w’ɛnɔnyi 37, l’ɔnɔnyi 70 T.D., lam’ayoya alembe w’Ase Rɔmɔ dia ndjolanya Jerusalɛma ndo ndjodiaka Ase Juda olekanyi miliyɔ.

Yeso ekɔ lo kanyiya dikambo sɔ dia wɔma efula, ko otema ande wambolola la lonyangu. Mbatande nto ate: “Ndi tena efula diakamalangi nsanganya an’aye, uku atusanganyaka wali a koko ana ato la tshina dia ahafu ato, keli nyu kunanga li! Enda, wambunyutshikela [luudu lanyu, NW] anyanya.”

Yeso amboyota nto ate: “Nyu hanyuyomena edja ndu lam’ayunyuta nyati: One layayi lu lukumbu la [Jehowa] eli la otshoko.” Lushi lɔsɔ layoyala lo wôngelo wa Kristo, lam’ayondɔtɔ lo Diolelo diande dia l’olongo ndo lam’ayowɛna anto la asho wa mbetawɔ.

Kakianɛ, Yeso ambomɔ oma lâsɔ ko ambotshɔ lɛnɛ akokande tɛna tɔshɛtɛshɛtɛ ta eombelo ka lo tɛmpɛlɔ ndo elui w’anto wadja falanga lɔkɔ. Akanga w’ɛngɔnyi wekɔ lo mbidja falanga efula. Koko wadi aki odo ɔmɔtshi amboya, ko amboyodja paka ekenga ehende w’akuta wele bu la nɛmɔ efula.

Yeso mbelɛnde ambeki ko nde lawɔ ate: “Mete kanyutelami nti: Wadi aki udu one, kanga wula, ambudja ushasha wuleki wudjisha akina tshe lu ekitshelu.” Vɔ pombaka ndjambola woho wakoka dui sɔ salema. Diɔ diambâlembetshiya Yeso ate: “Vo tshe wakadjisha eshasha uma l’efula ka diango dieli la wo; keli ndi, uma lu wula andi, mbudjishandi kene tshe kaki la ndi, kakandahumbi ndjakimanyia.” L’ɔkɔngɔ wa nde mbuta akambo asɔ, Yeso ambomɔ oma lo tɛmpɛlɔ mbala ka komelo.

Ambeki ande wamamba lo mɛna wokewoke ndo dimɛna dia tɛmpɛlɔ, ko ombeki ɔmɔtshi ate: “Umbetsha, enda ave wa mamba ndu mvudu ya mamba!” Mɛtɛ, anto mbutaka ɔnɛ ave asɔ wekɔ l’otale wa mɛtɛlɛ ndekana dikumi l’ɔtɔi ndo woke wa mɛtɛlɛ tshanu la tanga dia mɛtɛlɛ shato!

Yeso mbakadimolande ate: “Nyu hanyenyi diango ne tshe? Mete kanyutelami nti: Nduku dive diayutshikala ladiku dia dikina lane, diahokoshama.”

L’ɔkɔngɔ wa nde mbuta akambo asɔ, Yeso l’apɔstɔlɔ ande wambotenyanya Okidi wa Kidirɔna ko wambodɛ lo Dikona di’Ɔlivɛ. Lɛkɔ, vɔ kokaka mɛna tɛmpɛlɔ dimɛna dimɛna. Mateu 23:25–24:3; Mako 12:41–13:3; Luka 21:1-6; 2 Ekondo 24:20-22.

▪ Asala Yeso lam’ɔtwɛnde lo tɛmpɛlɔ mbala ka komelo?

▪ Woho akɔna wambɛnama lokeso l’afundji la Afarisɛ?

▪ “Elumbwelu ka [Ngɛhɛna, NW]” kɛdikɛdi na?

▪ Bonde kotshi Yeso ɔnɛ wadi aki odo ambokimɔ efula ndeka ndo akanga w’ɛngɔnyi?