Tshapita 121

La ntondo k’ase sheke ko la ntondo ka Pilato

WONYA ambohotɔ. Petero amboshila manguna Yeso mbala ka sato, ndo Ase Sheke wamboshila la sala diwandja diawɔ dia lokeso ko wambɔhandjɔ. Koko, la yosose ya Lushi la Tanu, vɔ wambɔtɔ losanganya nto, mbala kɛnɛ vɔ wambotshumana lo mbalasa kawɔ k’Ase Sheke. Oyango awɔ ele mɛtɛ dia vɔ mɛnya ɔnɛ elombwelo kakawasadi l’otsho hongi kɔlɔ. Wambela Yeso la ntondo kawɔ, ko wambowombola oko akawawumbudi l’otsho vate: “Naka Kristu keye, ututeli.”

Ko Yeso ambâkadimola ate: “Dimi kunyutelaka, nyu hanyetawo; kunyumbulaka, nyu hanyunkaluya diui.” Koko Yeso ambetawɔ lonto lande la dihonga tshɛ, ata ate: “Umaka kakiane, On’a untu ayudjase lu lunya la pami la [Nzambi, NW].”

Ko vɔ tshɛ wambowombola vate: “On’a [Nzambi, NW] keye?”

Yeso mbâkadimolande ate: “Tuku nyame aso wata, nyati: Dimi keli ndi.”

Le anto asɔ wele l’oyango wa mbodiaka, okadimwelo ɔsɔ oto ambokoka. Vɔ wambowɔsa oko onto lambɔtɛnga Nzambi. Ko wombwana vate: “Kakatahumbi emenyi ntu? Shu shame tambuka uma l’unyo andi.” Ko wambokeleka Yeso, wambotshɔ la nde, wambotôkimɔ l’anya wa Pɔnsɔ Pilato, ɔlɔmbɔdi w’Ose Rɔmɔ.

Judasɛ, ɔnɛ lakafunge Yeso, akɛnaki woho wambowôlomboyaka. Lam’ɛnyinde ɔnɛ wambosha Yeso onongo, nde ambondama la lɔkɔnyɔ. Ɔnkɔnɛ, nde ambotshɔ dia tɛnana l’ɛlɔmbɛdi wa weke ndo la dikumanyi, ko ambotâkaloyɛ ekenga 30 wa fɛsa, awatɛ ate: “Dimi lambutsha kolo, ne dia lambufunga untu laha la unungu.”

Vɔ hawowoke ndo kɛtshi kânga yema, ko wambôkadimola vate: “Akatatshi na? Dikambu diaye weme.” Ko Judasɛ ambokasha ekenga wa fɛsa lo tɛmpɛlɔ, ambotshɔ dia toyadja kɔdi. Koko ondo lotahe lokelekinde ɔkɔdi lambokomɔ, ko nde ambɔkɔ lâdiko di’ave, ko demba diande diambâtatɛ.

Ɛlɔmbɛdi a weke haweye kɛnɛ kahombawɔ ntsha mɛtɛ l’ekenga ɛsɔ wa fɛsa. Wambotanɛ vate: “Eko ekila dia nkitsha diango ne l’ekitshelu, ne dia dio dieko ushinga a dikila.” Ɔnkɔnɛ, l’ɔkɔngɔ wa vɔ sanga lolemi ɔtɔi, vɔ wambɔsa falanga yakɔ, wambosomba ekambɔ k’okengi a poke dia nkundɛka angɛndangɛnda. Diɔ diakɔ dielɛwɔ ekambɔ kɛsɔ ɔnɛ: “Ekambo ka Dikila.”

La pindju ka pɛ, wambɔtɔla Yeso otsha lo luudu laki ɔlɔmbɔdi. Koko Ase Juda wanɛ wotshwe la nde hawolange mbɔtɔ lo luudu, nɛ dia vɔ fɔnyaka ɔnɛ: tayotɔtɔ mindo naka sho mbidjasɛ dihole ɔtɔi l’Ase Wedja. Diɔ diakɔ diambotomba Pilato l’andja dia mbangɛnyangɛnya. Pilato ambowambola ate: “Dikambu diakona diasongwelanyu untu one?”

Ko vɔ wambôkaloya dui vate: “Untunduyala untu one aha utshi a kolo, tshiki shu hatûkimo l’anya aye.”

Pilato halange ndjatambiya l’atei a dikambo sɔ, diɔ diakɔ diambondowatɛ ate: “Nyuwose nyame, nyûlumbuya uku elembe anyu.”

Ase Juda wambɔkɛnɛmɔla kanyi yele lawɔ ya mbodiaka lam’ambowota ɔnɛ: “Eko ekila dia shu ndjaka untu.” Otowodiaka Yeso mɛtɛ lushi la difɛstɔ di’Elekanelo, tshike anto tshɛ wotodja londjo efula, nɛ dia efula mbɔsaka Yeso la nɛmɔ efula. Koko naka vɔ mbodiakisha lo tshimbo y’Ase Rɔmɔ, lo mbomamatanyɛ akambo wa pɔlitikɛ, kete vɔ hawotoyala l’onongo lo asho w’anto.

Ɔnkɔnɛ, ɛlɔmbɛdi wa lâdiko hawotshi di’onongo wamamatanyɛwɔ Yeso ɔnɛ hai nde kambɔtɛnga Nzambi, koko wambômamatanyɛ akambo akina. Akambo asato anɛ mbasɔngwɛlawɔ Yeso: “Takatani untu one [1] angayula wudja asu, [2] asike antu nambula Kayisa; [3] ata ati: Dime keli Kristu, khum’ekanga.”

Dikambo diambowɔsɔngwɛ Yeso ɔnɛ nde kayata ate: dimi keli nkumekanga, mbambokotola yambalo ya Pilato. Ɔnkɔnɛ, nde ambɔtɔ nto lo luudu lande ko ambelɛ Yeso, ambowombola ate: “Khum’ekanga k’asi Juda keye?” Kɛdikɛdi, nde ekɔ lo mombola ɔnɛ onde wɛ ambosekola ɛlɛmbɛ lo ndjaelɛ wɛmɛ ɔnɛ nkumekanga kemi dia ndɔshana la Kayisa?

Yeso nangaka mbeya kɛnɛ kakoki Pilato lo dikambo diande, diɔ diakɔ diambondowombola ate: “Weme kamumbula osoku, kana akina mbakakutela dikambu diami?”

Pilato ambetawɔ ɔnɛ nde heye ndoko dikambo di’endana la nde ndo nde nangaka mbeya akambo akɔ oko wewɔ mɛtɛ. Diɔ diakɔ diambondôkadimola ate: “Usi Juda kemi uka? Wudja aye hita la elombedi a waki mbakakukimo le mi. Kakayatshi na?”

Yeso hayangi dia mbishɛshɛ dikambo di’endana la lowandji lande. Pilato ayamba heyama lam’ayondoka kɛnɛ kayangande nkadimola. Luka 22:66–23:3; Mateu 27:1-11; Mako 15:1; Joani 18:28-35; Etsha 1:16-20.

▪ L’oyango akɔna wamboyɔtɔ Ase Sheke losanganya nto la pindju?

▪ Ngande wovwe Judasɛ, ndo kakɔna kambowosala l’ekenga 30 wa fɛsa?

▪ Lande na kalanga Ase Juda ndjakisha Yeso lo tshimbo y’Ase Rɔmɔ lo dihole dia vɔ mbodiaka vamɛ?

▪ Ase Juda wambɔsɔngwɛ Yeso akambo akɔna?