Tshapita 129

Yeso ambɛnama esangɔ ekina

AMBEKI weke paka l’otshutshumalo. Vɔ haweye kɛnɛ kakokawɔ mbuta lo dikambo dia diombo diɛnyiwɔ hwe, ndo vɔ hawetawɔ awui wowate amato. Ɔnkɔnɛ, Lushi lakɔ la Lomingu l’ɔkɔngɔ diko, Kleɔpasɛ nde la ombeki okina wambomɔ oma la Jerusalɛma ko wambotshɔ l’Emayo, ngielongelo yanganyi la Jerusalɛma suke la kilɔmɛtɛlɛ 11.

L’atei a mboka, lam’atawasawola akambo wakatshami lushi lakɔ, onto ɔmɔtshi lahaweye ambowanda ko ambosamba la wɔ. Nde ambowambola ate: “Aui akona watanyasawula lam’atanyakendakenda?”

Ambeki wambemala, la dungi di’otshutshumalo, ko Kleɔpasɛ ambôkadimola ate: “We untu luhangi la Jerusalema, ku heyi akambu wambuyala leko nshi nye?” Onto akɔ mbawambolande ate: “Akambu akona aso?”

Ko vɔ wambôkaloya dui vate: “Lu dikambu dia Jesu y’usi Nazareta, . . . elombedi a waki la embuledi asu wakûkimo dia mbamia dia ndi mvo, ku wakûdiaki l’utamba . . . Keli shu takalungamela shati: Ndi kayutshungula Isariyele.”

Kleɔpasɛ nde la onyande wambɔkɔndɔla akambo wa mamba wakatshami lushi lakɔ—ɛnɛlɔ ka diambo k’andjelo ndo woho wakawatane diombo hwe—koko vɔ wambowotɛ ɔnɛ: hatoshihodia akambo asɔ. Ko onto akɔ lahaweye ambâhangwɛ ate: “Nyu akanga a dinginya, nyu nyatutshimbatshimbaka l’etema dia mbetawo aui tshe wakati amvutshi! Undi, taki ololo Kristu nsuwa lu akambu aso, la mboto lu lutumbu landi?” Nde ambâlembetshiya avɛsa wa l’afundelo w’ekila watɛkɛta dikambo dia Kristo.

L’ɔkɔngɔ diko, vɔ wambokoma suke la ngelo ka Emayo, ko onto ɔsɔ lahaweye ambosala oko onto layanga mbeta la mboka. Oko walangawɔ nyomoka akambo efula, ambeki wambɔ̂sɛngasɛnga vate: “Uhangi la su, ne dia aya dikolo, unya ambeta.” Ko onto akɔ ambodjasɛ dia konga mma. Nde ambɔlɔmba, ambohembola mapa, ambotatɛ mbasha, ko vɔ wambeya vate ɔnɛ mɛtɛ Yeso lo demba dia l’emunyi. Koko nde amboshishɔ l’etena kakɔ.

Kakianɛ mbambowoyoshihodia bonde kambeyaka onto akɔ akambo efula! Wombwana vate: “Undi, etema asu kompeta lam’akandateketaki la su lu mbuka, ndu lam’akandatumanyaki afundelu fundu?” Aha la tshimbatshimba, vɔ wambonyiya ekolo ko wambokalola esadi eto la Jerusalɛma, lɛnɛ ambowototana apɔstɔlɔ la wanɛ wotshumanyi kâmɛ la wɔ. La ntondo ka Kleɔpasɛ nde la onyande mbufola onyɔ, akina wambota l’ohetoheto tshɛ vate: “Mete, Khumadiondjo ambulo, ndi akene le Simona.” Ko Kleɔpasɛ nde la onyande wamboyɔkɔndɔla ndo vɔ lawɔ woho wakɛnami Yeso le wɔ. Edja ndo wonya ɔnɛ ko nde ambɛnama mbala nyɛi le ambeki wotshikitanyi ɛlɔ oto.

Yeso ambɛnama mbala ka tanu la shashimuya. Kânga mbodihami nkuke nɛ dia ambeki wekɔ la wɔma w’Ase Juda, nde ambɔtɔ, ko ambemala l’atei awɔ, awatɛ ate: “Ki kayali la nyu.” Ko vɔ wamboka wɔma, wɔ̂fɔnya ɔnɛ: tambɛna edimu. Ɔnkɔnɛ, Yeso ambowatɛ ɔnɛ: dimi kema edimu, ko nde ambowambola ate: “Okoko wana wadidimanyu? Dikambu kuna diambuyala ekandukandu l’etema anyu? Nyendi anya ami la ekulu ami, nyeyi nyati: Dime. Nyumunandi, nyeyi, ne dia edimu aha la emunyi la weka uku amenanyu la wo.” Koko vɔ wâkakandakanda oto.

Dia nde mbakimanyiya woho wa vɔ shihodia ɔnɛ tshondo ya Yeso ndamɛ ɔnɛ, nde ambowambola ate: “Nyu la engo ka nde lane?” L’ɔkɔngɔ wa nde mbɔsa tshenyi ya lose la lofumba ndo ndjilɛ, nde ambowatɛ ate: “Lam’akimi la nyu, dimi lakanyutela awui ane nti: Dieli la akambu tshe wakafundama lu dikambu diami lu elembe a Mose, ndu lu aui w’amvutshi ndu lu esambu wa Davidi nshidiyama.”

Lam’atetemalande mbatɛ awui, oko onto lawaetsha Bible, Yeso ambowaetsha ate: “Ambufundama ati: Dieli la Kristu dia nsuwa, la dia ndi mbulo uma lu nyoi lushi la satu; la dia nsambisha wedja tshe dikambu dia ekadimwelu k’etema la edimanyielu ka kolo lu lukumbu landi, [tatɛ] uma la Jerusalema. Nyu nyeli emenyi w’akambu ane.”

Hateye bonde kele Tɔmasɛ bu lâwɔ lo losanganya lɔnɛ l’ohomba efula lambosalema Lushi la Lomingu la dikɔlɔ. Ɔnkɔnɛ, lo nshi yakayoyela, akina wamboyowotɛ l’ɔngɛnɔngɛnɔ tshɛ vate: “Shu takenyi Khumadiondjo.”

Koko Tɔmasɛ hetawɔ, nde ate: “Naka dimi hamenyi fu [ya sɛti], l’anya andi, hambidji luhita lu fu [ya sɛti], la lunya lu luhandju landi, ku haletawo.”

L’ɔkɔngɔ wa nshi enanɛi, ambeki wambosangana nto l’etei ka luudu lɔmɔtshi. Ndo Tɔmasɛ mbele kâmɛ la wɔ l’etena kɛnɛ. Koyanga mbodihami nkuke tshɛ ku, Yeso ambemala nto l’atei awɔ ko ambowatɛ ate: “Ki kayali la nyu!” Ko nde ambosekesɔ otsha le Tɔmasɛ, ambowotɛ ate: “Udji luhita laye lane, enda anya ami. Usimbuli lunya, uludji lu luhandju lami. Tuyalaki la tamu, keli etawo.”

Ko Tɔmasɛ amamba, ata ate: “Khumemi, la [Nzambi kami, NW]!”

Ko Yeso ambowombola ate: ‘Wɛ ambetawɔ nɛ dia wɛ ambɔmɛna? Diɛsɛ le wanɛ wahɛnyi koko mbetawɔka.’ Luka 24:11, 13-48; Joani 20:19-29.

▪ Lam’atatshu ambeki ahende l’Emayo, dimbola diakɔna diambowaoka onto ɔmɔtshi lahaweye?

▪ Kakɔna kambota onto akɔ kambɔhɛtshahɛtsha etema w’ambeki?

▪ Ambeki woho akɔna wambowoyomana pami kakɔ fundo?

▪ Lam’okaludi Kleɔpasɛ nde la onyande la Jerusalɛma, losango lakɔna l’ɔngɛnɔngɛnɔ lambowoyoka?

▪ Naa ɛnamelo ka tanu kambɛnama Yeso le ambeki ande, ndo ambotshama l’etena kakɔ?

▪ Ambotshama nshi enanɛi l’ɔkɔngɔ wa ɛnamelo ka tanu kaki Yeso, ndo woho akɔna wamboyetawɔ Tɔmasɛ ɔnɛ Yeso ambolɔ?