Ɛdiɛngɛ keketshaka anto dia tɔmbɔkwɛ Nzambi

Lande na kasala Satana la ɛdiɛngɛ la wolo tshɛ dia nkesa anto? Nɛ dia vɔ nangaka dia ndo sho la wɔ ntɔmbɔkɔ oko vɔ. Vɔ nangaka sho mbatɛmɔla. Vɔ nangaka dia sho mbetawɔ kashi yawɔ ndo nsala akambo wahetsha Jehowa. Efula ka ditshelo sɔ mendanaka ndo la diɔtɔnganelo la wanɛ wavɔ.

Nyɔi ka lakiso ɔmɔtshi la ngandji mbishaka paa efula, ndo bu kɔlɔ sho monga l’ɔkɛyi. Yeso “akalele” lam’akavu ɔngɛnyi ande Lazaro.—Joani 11:35.

Ekɔ mbekelo efula yendana la nyɔi ndo yɔ ntshikitana efula l’andja w’otondo. Efula kayɔ hayɔlɔshana l’atɔndɔ wa lo Bible. Koko, mbekelo mɔtshi pikama lo kanyi y’ɔnɛ anto wakavu wekɔ lo nsɛna ndo wekɔ l’akoka wa mɛna wanɛ wasɛna. Ndala engondo, osalelo w’otanda wa lo tshamba ndeko, sɛlɛmɔnyi y’okundelo ya kawotake, ndja oma lo wɔma waha nyangiya nyuma ya wavɔ. Lam’ele wanɛ wavɔ “haweye ndooko dikambo,” wanɛ wasala awui asɔ keketshaka kashi ya Satana.—Ondaki 9:5.

Mbekelo kana sɛlɛmɔnyi kina tombaka oma lo dietawɔ di’ɔnɛ wanɛ wavɔ wekɔ l’ohomba w’ekimanyelo k’oma le wanɛ wasɛna ndo wayosalɛ wanɛ wasɛna kɔlɔ naka vɔ hawokotshisha mposa yawɔ. Lo wedja ɛmɔtshi, vɔ salaka fɛtɛ ndo nambolaka elambo l’ɔkɔngɔ w’onto mvɔ nshi 40 kana ɔnɔnyi w’otondo. Vɔ fɔnyaka dia dui sɔ kimanyiyaka ɔnɛ lovwe dia nde ‘mbeta polo’ l’andja wahɛnama. Mbekelo kekina kasalema efula ele nambola wanɛ wakavu diangɔ dia ndɛ ndo wanu.

Akambo asɔ wekɔ kɔlɔ nɛ dia vɔ keketshaka kashi ya Satana lo dikambo dia wanɛ wavɔ. Jehowa hetawɔ dia sho monga kaanga la mbekelo ɔtɔi kohikami lo wetshelo w’ɛdiɛngɛ!—2 Kɔrɛtɔ 6:14-18.

Ekambi wa Nzambi ka mɛtɛ hawoyasha lo ditshelo diasukɛ kashi ya Satana. Koko, vɔ ndjashaka lo nkimanyiya wanɛ wasɛna ndo mbaasamba. Vɔ mbeyaka dia naka onto ambovɔ, paka Jehowa mbakoka mbokimanyiya.—Jɔbɔ 14:14, 15.

Nzambi tonaka diɔtɔnganelo dia la ɛdiɛngɛ

Anto amɔtshi mongaka la diɔtɔnganelo la ɛdiɛngɛ mbala kak’ɔtɔi kana lo tshimbo ya wetshi. Ɔsɔ ekɔ ɔtɛmwɛlɔ w’ɛdiɛngɛ. Awui w’ɛdiɛngɛ, alɔka, alɔhɔ, diendja ndo nsawola la wanɛ wavɔ ekɔ ɔtɛmwɛlɔ w’ɛdiɛngɛ.

Bible manyaka onto lasala awui asɔ lo mbuta ɔnɛ: “Atotanemake l’atei anyu . . . onto lasala diendja, onto lasala awui wa maji, kanga alɔhɔ, kanga dɔka, onto lakeleka lɔsɛnɔ l’anto akina la sengi, onto latɛkɛtsha dimu, wetshi, kana onto latɛkɛta la wanɛ wakavu. Nɛ dia onto tshɛ lasala awui asɔ ekɔ wɔnɔnyi le Jehowa.”—Eohwelo k’Ɛlɛmbɛ 18:10-12.

Lande na kele Jehowa ekɔ lo tewola la wolo tshɛ diaha monga la ditshelo sɔ?

L’ɔtɛ w’ɔlɔlɔ aso, Jehowa ekɔ lo tewola diaha sho ndjasha lo weho tshɛ wa diɔtɔnganelo l’ɛdiɛngɛ. Nde nangaka anto ndo mbakokɛka ndo nde mbeyaka dia wanɛ wonga la diɔtɔnganelo la ɛdiɛngɛ wekɔ lo waale wa nsowa.

Tɔshi ɛnyɛlɔ ka Nilda laki wetshi la Brésil. Ɛdiɛngɛ wakawɛnyaka paa lo lɔsɛnɔ lande. Nde kɔndɔlaka ate: “Ɛdiɛngɛ . . . wakambɔtɔ lo demba, wakafundɛka awui wa nsala. Mbala mɔtshi lakashishaka lomba ndo nshi kina lakongaka dimɛna, lakɔtɔ lo lopitadi l’ɔtɛ wa hemɔ ka l’ɔtɛ. Ɛdiɛngɛ wakapɛnyɛhɛnya efula ndo eshisha wa l’ɔtɛ ami wakayofukutana. Lakanɔka ekanga dia nkitshakitsha kandji ndo lakayotatɛ nnɔ wanu la mfɔka mbala la mbala. Dui sɔ diakaviya l’edja k’ɛnɔnyi efula.”

L’edjedja ka wonya, l’ekimanyielo ka Jehowa ndo ka Ɛmɛnyi ande wa la nkɛtɛ, Nilda akayotshungɔ oma lo tɔsɛngiya ta ɛdiɛngɛ ndo aya la lɔsɛnɔ la dimɛna ndo la yoonge ya dimɛna. Nde mbutaka ate: “Dimi keketshaka anto tshɛ diaha monga la diɔtɔnganelo kaanga dia yema tshitshɛ la nyuma [ya kɔlɔ].”