Kambɛɛ Jehowa, koko aha Satana

Onto tshɛ la l’atei aso ekɔ l’ɔsɔnwɛlɔ ɔmɔtshi. Ɔsɔnwɛlɔ wa kambɛ Jehowa kana kambɛ Satana l’ɛdiɛngɛ ande. Hatokoke nsala ɛsɔnwɛlɔ akɔ ehende mbala kak’ɔtɔi. Koko dui dia lomba ele, kambɛ Jehowa!

Jehowa ekɔ ɔlɔlɔ

Oko wakatadiɛnyi, ɛdiɛngɛ ngɛnangɛnaka salɛ anto kɔlɔ ndo mbakesa. Koko, Jehowa bu ngasɔ. Nde nangaka anto oko ombutshi wa pami wa ngandji walanga anande. Nde mbele Ombishi wa “losha tshɛ l’ɔlɔlɔ ndo woshasha tshɛ wa kokele.” (Jakɔba 1:17) Nde hadime anto ɛngɔ tshɛ k’ɔlɔlɔ, oyadi ɛngɔ kakɔ kekɔ oshinga wolo efula le nde.—Ɛfɛsɔ 2:4-7.

Ohokanyiya awui wakasale Yeso Ɔna Nzambi lanɛ la nkɛtɛ. Nde akatɛkɛtsha akanga wa lomi ndo akasɛnya akanga wa totshungu. Nde akakɔnɔla ase sudi ndo akanga wa tshumbe. Nde akatondja ɛdiɛngɛ ndo akakɔnɔla weho tshɛ wa hemɔ. Yeso akolola ndo edo oma lo wolo wa Nzambi.—Mateo 9:32-35; 15:30, 31; Luka 7:11-15.

Lo dihole dia totɛ kashi dia tonganyiya, Nzambi totɛka nshi tshɛ mɛtɛ. Nde hakese pondjo.—Walelo 23:19.

Ewɔ ditshelo dia mindo

Oko watondaka ndo watokimɛka ɔtɛyi wa dihoha lotshingo latafumbɔ, woho akɔ waamɛ mbambokimamɛ miliyɔ y’anto lo tokanyi ta wɛngɛngɛ. Vɔ mbokaka wanɛ wavɔ ndo ɛdiɛngɛ wɔma. Vɔ ndjakiyanyaka l’akambo wa dɔki, diendja, mpako ndo ekanga. Vɔ wekɔ ɛhɔmbɔ wa dietawɔ ndo mbekelo yohikami lo kashi ya Satana Diabolo. Ekambi wa Nzambi hawondama lo djonga y’awui asɔ tshɛ.

Jehowa ndeka Satana wolo la fwa. Naka wɛ kambɛ Jehowa, kete nde ayokokokɛ oma le ɛdiɛngɛ. (Jakɔba 4:7) Ndooko sengi diayɔtɔ le yɛ. Ɛnyɛlɔ, la Nigéria, akanga w’alɔka ahende wakalange nsenga Ɔmɛnyi wa Jehowa ɔmɔtshi waki konanga monɔ oma lo ngelo. Lam’ele sengi diakɔ kɔtɔ, ɔmɔtshi l’atei awɔ akoke wɔma ndo akatshu le Ɔmɛnyi wa Jehowa akɔ ndo akatɔlɔmba edimanyielo.

Naka ɛdiɛngɛ kɛnyaka paa, wɛ koka mbelɛ Jehowa lo lokombo lande ko nde ayokokokɛ. (Tokedi 18:10) Koko dia Nzambi kokokɛ, wɛ pombaka ntshika tshɛ lo tshɛ ɛngɔ tshɛ kele la diɔtɔnganelo la ɛdiɛngɛ ndo ɔtɛmwɛlɔ w’ɛdiɛngɛ. Atɛmɔdi wa Nzambi waki l’Ɛfɛsɔ lo nshi y’edjedja wakasale ngasɔ. Vɔ wakatshumanya abuku awɔ tshɛ w’akambo wa maji ndo wakaatshumbe. (Etsha 19:19, 20) Ɛlɔ kɛnɛ, ekambi wa Nzambi pombaka nsala woho akɔ waamɛ. Yanganya l’ɛkɔma, mpako, ɛkɔdi watawɔ dia vɔ kokɛka, ekanga, abuku w’akambo wa maji ndo ɛngɔ tshɛ kele la diɔtɔnganelo l’ɛdiɛngɛ.

Ɔtɔ lo ɔtɛmwɛlɔ wa mɛtɛ

Naka wɛ nangaka ngɛnyangɛnya Nzambi, tokomɛke tsho lo ntomba oma l’ɔtɛmwɛlɔ wa kashi ndo ntshika nsala kɛnɛ kele kɔlɔ. Wɛ pombaka monga l’ɔtɛmwɛlɔ wa pudipudi. Bible mɛnyaka kɛnɛ kalɔmbama:

Ɔtɔnɛ l’Ɛmɛnyi wa Jehowa

Satana l’ɛdiɛngɛ wekɔ l’anto la nkɛtɛ nyɛ wetsha ndo wasala akambo wa kɔlɔ. Koko Jehowa nde la wɔ ekɔ l’anto ande. Anto akɔ ko, Ɛmɛnyi wa Jehowa. (Isaya 43:10) Lo nkɛtɛ k’otondo, Ɛmɛnyi wa Jehowa wekɔ ndekana miliyɔ enanɛi. Vɔ tshɛ salaka la wolo dia nsala akambo w’ɛlɔlɔ ndo mbetsha anto akambo wa mɛtɛ. Lo wedja efula, wɛ koka mbatana lo Mbalasa ka Diolelo ndo wayokolongola la wangasanu tshɛ.

Olimu awɔ ele wa nkimanyiya anto akina dia kambɛ Nzambi. Vɔ wayeka la yɛ Bible lakayɛ ndo wayokokimanyiya dia ntɛmɔla Jehowa lo yoho ya dimɛna. Wɛ hatofuta falanga lo dikambo sɔ. Ɛmɛnyi wa Jehowa wekɔ l’ɔngɛnɔngɛnɔ dia mbetsha akambo wa mɛtɛ nɛ dia vɔ mbokaka anto ndo Jehowa Nzambi ngandji.