Etenyi 8
Tona Ɔtɛmwɛlɔ wa Kashi ndo Ɔtɔ l’Ɔtɛmwɛlɔ wa Mɛtɛ
1. Lo kɛnɛ kendana l’ɔtɛmwɛlɔ, ɔsɔnwɛlɔ akɔna wele la ntondo k’anto ɛlɔ kɛnɛ?
YESO akate ate: ‘Ɔnɛ lele bu lo wedi ami ekɔ otunyi ami.’ (Mateu 12:30) Naka sho bu lo wedi wa Jehowa, kete tekɔ lo wedi waki Satana. Anto efula fɔnyaka dia wekɔ lo kambɛ Nzambi lo yoho yetawɔnde, koko Bible mbutaka dia Satana ekɔ “ukeshi a wa la kete tshe.” (Enyelo 12:9) Miliyɔ y’anto fɔnyaka dia Nzambi mbatɛmɔlawɔ, ko tete wekɔ lo kambɛ Satana Diabolo! Ɛlɔ kɛnɛ anto wekɔ la ntondo k’ɔsɔnwɛlɔ ɔmɔtshi: Vɔ pombaka kambɛ Jehowa, “[Nzambi k]a mete,” kana Satana “shi kashi.”—Osambu 31:5; Joani 8:44.
Kakitɔna l’Ɔtɛmwɛlɔ wa Kashi
2. Naa yoho mɔtshi yahemba Satana dia shimba anto di’aha vɔ tɛmɔla Jehowa na?
2 Mbɔsa yɛdikɔ ya kambɛ Jehowa ekɔ ɔsɔnwɛlɔ wa lomba, wakonya onto dia mbetawɔma le nde. Koko Satana hangɛnangɛna onto tshɛ lakambɛ Nzambi; nde mbelaka ekakatanu le wanɛ wasala dikambo sɔ. Yoho mɔtshi yasalande dikambo sɔ ele mbaela lɔsɔkɔ kana ɔlɔshamelo oma le anto akina, kânga oma le angɛnyi kana ase nkumbo. Yeso akate ate: “Wane weli lu luudu wayuyala atunyi wa kanga luudu.”—Mateu 10:36.
3. Naka nkumbo kana angɛnyi ayɛ wambotona ɔtɛmwɛlɔ watɛmɔlayɛ Nzambi, ayoyosala na?
3 Naka dikambo dia ngasɔ diambokokomɛ, ayoyosala na? Anto efula mbeyaka dia yoho yatɛmɔlawɔ yekɔ kɔlɔ, koko vɔ mengengaka dia kakitɔna l’ɔtɛmwɛlɔ akɔ. Vɔ fɔnyaka dia naka vɔ sala ngasɔ, kete wayɛnya dia vɔ bu la kɔlamelo otsha le nkumbo kawɔ. Onde ekanelo kɛsɔ kekɔ ɔlɔlɔ? Naka wɛ ambeya di’ase nkumbo kayɛ wekɔ lo nnɔ nɔnɔ dimɔtshi dia wâle, onde wɛ hatowaewola dia diangɔ diakɔ diayowasalɛ kɔlɔ? Onde wɛ ayoyakimɔ lo nnɔ diangɔ sɔ wɛ lawɔ, nɛ dia vɔ wekɔ lo dinɔ?
4. Kakɔna kakatɛ Jashua ase Isariyɛlɛ lo kɛnɛ kendana l’ɔtɛmwɛlɔ wa lo nshi yande?
4 Jashua akakeketsha ase Isariyɛlɛ dia kakitɔna la ditshelo dia kɔlɔ ndo l’awui w’ashidi wa kɔlɔ waki l’ɔtɛmwɛlɔ wa watshɛwɔ. Nde akate ate: “Nyukaki [Jehowa] woma. Nyûkambelaki ulimu lu mete ndu la kolamelu. Nyunya ditemolatemola diakatemolaka washenyu la wedi wa Efarate, ndu l’Edjibitu. Nyukambelaki [Jehowa] ulimu.” (Jashua 24:14) Jashua aki la kɔlamelo otsha le Jehowa ndo Jehowa akɔtshɔkɔla. Naka tekɔ la kɔlamelo otsha le Jehowa, kete nde ayotɔtshɔkɔla sho la wɔ.—2 Samuele 22:26.
Kasha Diangɔ dia l’Ɔtɛmwɛlɔ wa Kashi
5. Lande na kahombaso mbikasha diangɔ dia maji?
5 Kakitɔna l’ɔtɛmwɛlɔ wa kashi nembetshiyaka nto dia sho pombaka nanya oseka ɛngɔ tshɛ ka maji kele laso, ɛnyɛlɔ oko ekanga, pako, pɛtɛ kana ɛkɔma wa maji, ndo diangɔ dikina dia woho ɔsɔ. Dikambo sɔ diekɔ ohomba efula nɛ dia diɔ mɛnyaka dia tamboyaɛkɛ tshɛ le Jehowa.
6. Kakɔna kakasale Akristo wa ntondo l’abuku awɔ wa maji?
6 Tɔsɛdingole kɛnɛ kakasale Akristo amɔtshi wa ntondo etena kakawɔshi yɛdikɔ ya monga l’ɔtɛmwɛlɔ wa mɛtɛ. Bible mbutaka ɔnɛ: “Akanga w’aloho efula wakasanganya abuku awo, wakâtshumbi lu ashu w’antu tshe.”—Etsha 19:19.
7. Akokaso sala naka ɛdiɛngɛ wotɔhɛnyahɛnya?
7 Anto amɔtshi wambotatɛ kambɛ Jehowa koko wakasalaka awui wele oko ekanga, dɔka kana maji koka pɛnyahɛnyama oma le ɛdiɛngɛ. Naka dikambo dia ngasɔ diambokokomɛ, kete lɔmba Jehowa la dui dia wolo lo kamba la lokombo lande. Nde ayokokimanyiya.—Tukedi 18:10; Jakoba 4:7.
8. Ngande wɔsa Akristo okambelo wa la dikishi, l’esato ndo l’alɛdi l’ɔtɛmwɛlɔ?
8 Wanɛ wakombola kambɛ Jehowa hawohombe monga kana kamba la woho tshɛ w’ekishi, w’osato kana alɛdi wa l’ɔtɛmwɛlɔ wa kashi. Akristo wa mɛtɛ ‘kɛndakɛndaka la mbetawɔ koko aha la kɛnɛ kɛnama.’ (2 Koreto 5:7) Vɔ kitanyiyaka ɔlɛmbɛ waki Nzambi washimba dia kamba la woho tshɛ w’efanelo l’ɔtɛmwɛlɔ.—Etumbelu 20:4, 5.
Onga Kâmɛ l’Ekambi wa Jehowa
9. Naa dako diasha Bible dia monga la lomba?
9 Bible mbutaka ɔnɛ: “One latengolaka kame la akanga a yimba, atuyalaka kanga yimba.” (Tukedi 13:20) Naka sho nangaka monga la lomba, kete sho pombaka kɛndakɛnda kana monga kâmɛ l’Ɛmɛnyi wa Jehowa. Vɔ wekɔ anto watakɛndakɛnda lo mboka k’otsha lo lɔsɛnɔ.—Mateu 7:14.
10. Ngande wakoka Ɛmɛnyi wa Jehowa kokimanyiya dia kambɛ Nzambi?
10 Ɛmɛnyi wa Jehowa ndjakiyanyaka mɛtɛ dikambo di’anto. Olimu awɔ ekɔ wa kimanyiya anto wele l’etema w’ɛlɔlɔ dia shihodia akambo wa mɛtɛ wa lo Bible watɔla otsha lo lɔsɛnɔ la pondjo. Vɔ koka kokimanyiya lo mbeka la yɛ Bible aha la wɛ futa. Vɔ wayokadimola wembola ayɛ ndo wayokɛnya woho wa kamba olimu l’ewo ka lo Bible lo lɔsɛnɔ layɛ.—Joani 17:3.
11. Ngande wayokokimanyiya nsanganya y’Akristo?
11 Lo nsanganya yawɔ, yasalema mbala efula lo Mbalasa ka Diolelo, wɛ ayeka akambo efula lo kɛnɛ kendana la mboka yaki Jehowa. Saki kayɛ ka monga l’ɔtɛmwɛlɔ wa mɛtɛ kayokeketshama. Ndo wɛ ayokondja nto wetshelo lo woho wakokayɛ kimanyiya anto akina dia mbeka akambo wa mɛtɛ wa lo Bible.—Heberu 10:24, 25.
12. Ngande wakoka dɔmbɛlɔ kokimanyiya dia kambɛ Nzambi?
12 Etena katayaleke mbeka akambo wendana la lolango ndo la sangwelo diaki Jehowa, mbayoyoleka shihodia mboka yande yoludi la ngandji. Wɛ ayohomba nto pamia saki ka sala kɛnɛ k’ɔngɛnyangɛnya ndo ka mbewɔ kɛnɛ kahɔngɛnyangɛnya. Ohɔ dia wɛ koka ndjasukanya la Jehowa lo dɔmbɛlɔ dia mbɔlɔmba woho wa nde kokimanyiya dia sala kɛnɛ kele ɔlɔlɔ ndo mbewɔ kɛnɛ kele kɔlɔ.—1 Koreto 6:9, 10; Filipi 4:6.
13. Ngande wakokayɛ ngɛnyangɛnya otema wa Jehowa?
13 L’edjedja ka wonya, lam’ayotahamaka lo nyuma, aha la tâmu wɛ ayoyɛna ohomba wa ndjakimɔ ndo wa koma Ɔmɛnyi wa Jehowa wambobatizama. Lam’ayoyɔtɔ l’ɔnɔngɔ w’ekambi wa Jehowa, wɛ ayɔngɛnyangɛnya otema ande. (Tukedi 27:11) Wɛ ayonga l’atei w’anto wele l’ɔngɛnɔngɛnɔ wata Nzambi dikambo diawɔ ate: “Dimi layuyala lu etema awo, layokendakenda lu etema awo. Dimi layuyala [Nzambi k]awo, ndu vo wayuyala antu ami.”—2 Koreto 6:16.
[Kiombo/Osato wa lo lɛkɛ 25]
Wetshelo Ɛmɔtshi wa l’Ɛtɛmwɛlɔ Wele Mɛtɛ ndo Kashi
● Losato l’Osanto: Ɛtɛmwɛlɔ efula mbetshaka dia Nzambi ekɔ Losato l’Osanto. Vɔ mbutaka ɔnɛ “Papa ekɔ Nzambi, Ɔna [Yeso] ekɔ Nzambi ndo Nyuma k’Ekila ekɔ Nzambi, koko aha Nzambi shato mbekɔ koko ɔtɔi.”
Tshɛkɛta “Losato l’Osanto” hayotanema ndoko dihole lo Bible, ndo Bible hetsha dia Jehowa ekɔ Nzambi kele l’etondo esato. Jehowa ekɔ tshɔyi ya Nzambi. Koreto ka Ntondo 8:6 mbutaka ɔnɛ: “Keli le su, eko [Nzambi] otoi.” Jehowa Kaheme Lâdiko dia Tshɛ. Yeso kema Nzambi koko “On’a [Nzambi].” (1 Joani 4:15) Woho akɔ wamɛ mbele, nyuma k’ekila kema Nzambi. Nyuma k’ekila bu kânga onto. Tɔ kekɔ wolo waki Nzambi wakamba olimu.—Etsha 1:8; Efeso 5:18.
● Anima: Ɛtɛmwɛlɔ efula mbetshaka dia anima ekɔ ɛngɔ kɛmɔtshi kele l’etei k’onto kahakoke mvɔ pondjo. Bible mbetshaka dia anima ekɔ tshondo y’onto ndo onto koka mɛtɛ mvɔ.—Etatelu 2:7; Ezekiyele 18:4.
● Dja y’Ifɛrnɔ: Ɛtɛmwɛlɔ wa kashi mbetshaka ɔnɛ anima w’anto wa kɔlɔ soyamaka pondjo l’ifɛrnɔ. Koko, Bible mbutaka dia wanɛ wambovɔ “haweyi nduku dikambu.” (Undaki 9:5) Bible mbetshaka nto dia “[Nzambi] eli ngandji.” (1 Joani 4:8) Jehowa, Nzambi ka ngandji hakoke nsoya anto pondjo la dja.
[Ambola wa wekelo]
Kiombo: Kakɔna ketsha Bible lo dikambo dia Losato l’Osanto, dia anima ndo dia dja y’ifɛrnɔ?
[Kiombo/Osato wa lo lɛkɛ 28]
Dimi Lakakakitɔna l’Ɛdiɛngɛ
L’otsho wa lushi lɔmɔtshi, lam’akimi lo djɔ dimi l’omɛmi, dimi lakoke dui dimɔtshi dieta lokombo lami mbala shato. Oma lâsɔ dimi lakɛnyi odiko wa luudu wakakitɔna ndo ɛngɔ kɛmɔtshi kele oko okama wa dja kakakwɛ lo dikundju. Omɛmi kɔmɛna ndoko ɛngɔ. Koko, asolo ami wakalongolaka, ndo dikambo sɔ diakaviya ngɔndɔ efula.
L’ɔkɔngɔ wa ngɔndɔ shamalo, dui diakɔ diamɛ diakambete nto. Wonya akɔ wamɛ, luudu l’otondo lakɛnama di’oko lotehanɛ lâdiko di’ashi. Mɔma ka woke kakatombe oma l’ashi asɔ ndo kakaningama lo lonya. Lakasale tshɛ dia kikakitola, koko dimi kokoka. Lakoke wɔma efula. Oma lâsɔ ashi ndo olui ɔsɔ wakashishɔ ko lakakɔ la nkɛtɛ la wolo tshɛ. Lakatshikala la nkɛtɛ wenya efula aha la mbeya kânga dikambo. Oma lâsɔ, dui diakɔ sɔ diakambutɛ dia dimi tshɔ otsha lo tɛmpɛlɔ kɛmɔtshi k’ɛdiɛngɛ ka lo ngelo lɛnɛ akawakɔnɔlaka anto. Lam’akamambola ɔdiɛngɛ ɔsɔ lokombo lande, nde akambisha lokombo lɔmɔtshi lalembetshiya ɔnɛ “kanga ɔngɔnyi l’aha l’ɔna.” Nde akandake dia konyami kanga ɔngɔnyi lo mbishami wolo wa kɔnɔlaka anto.
Akanga wa hemɔ wakayaka le mi oyadi wanɛ waki suke kana w’oma lo tale. La ntondo ka vɔ koma lo luudu lami, vɔ wakɛnamaka lo talatala kami ka lânde. Oma lâsɔ, etena kakakomaka onto, dimi lakotshumaka lonya dia mbosha mɔyɔ ndo kam’akamashaka onto mɔyɔ, ɔdiɛngɛ akambisholɛka ko wonya akɔ wamɛ hemɔ kana okakatanu wele lande ndo okanga wa hemɔ kana woho wa kandola okakatanu akɔ. Ɔdiɛngɛ ɔsɔ akambutɛka nto lofulo l’akuta lakahombaka onto futa.
Akuta ndo weshasha wakakimɔmaka heyama lo menda wolo w’ɛkɔnwɛlɔ. Dimi lakakome “kanga ɔngɔnyi,” koko dimi lakeye nto kitshimudi ya tshɛkɛta “aha l’ɔna.” Etena tshɛ naka lambotshɔ diemi, kete ɔna lakamote ntondo mvɔ. Dikambo sɔ diakanyangiyaka efula. Lo ɛnɔnyi 12 wakamakambɛ ɔdiɛngɛ ɔsɔ, lakavusha ana asamalo.
Lakatatɛ nɔmba Nzambi dia nde kimanyiyami. Lakatetemala la nɔmba. Lushi lɔmɔtshi, Ɛmɛnyi wa Jehowa wakakɔkɔla lo lokuke lami. Kânga mbele mbala tshɛ dimi towatshanyaka, lushi lɔsɔ, lakɔshi yɛdikɔ ya mbahokamɛ. Lo asawo wa mbala kina, dimi lakeye dia lakakambɛka ɔdiɛngɛ! Lakɔshi yɛdikɔ ya pembola diɔtɔnganelo dia l’ɛdiɛngɛ.
Lam’akamatɛ ɔdiɛngɛ ɔsɔ dikambo sɔ, nde akamanɛ. Koko dimi lakate nte: “Lambohembola la yɛ.”
Lakatshumbe diangɔ tshɛ diakakambaka lami dia sala alɔhɔ. Lakeke Bible l’Ɛmɛnyi wa Jehowa, lakakome okambi waki Jehowa ndo lakalongola batismu l’ɔnɔnyi 1973. Kakianɛ laya l’ana atanu wele l’alemba w’amɛna ndo omɛmi nto akakome Ɔmɛnyi wa Jehowa.—Ɔkɔndɔ wakate Joséphine Ikezu.
[Ambola wa wekelo]
Kiombo: Ngande wakakakitɔna womoto ɔmɔtshi l’ɛdiɛngɛ?
[Esato wa lo lɛkɛ 26]
Ngande wakokayɛ monga l’ɔtɛmwɛlɔ wa mɛtɛ?