Etenyi 7
Waa Na Wele l’Ɔtɛmwɛlɔ wa Mɛtɛ?
1. Kakɔna kahombaso sala dia ngɛnyangɛnya Nzambi?
DIA monga la diɔtɔnganelo di’oshika ndo dioludi tɔ la ngandji lam’asaso la Nzambi, sho pombaka ndjakakitola l’ɔtɛmwɛlɔ wa kashi ndo mbɔtɔ l’ɔtɛmwɛlɔ wa mɛtɛ. Ɛlɔ kɛnɛ, miliyɔ y’anto wekɔ lo sala dikambo sɔ l’andja w’otondo.
2. Lende atanema Ɛmɛnyi wa Jehowa ndo naa olimu wakambawɔ?
2 Oko wakadite Bible, atɛmɔdi wa mɛtɛ mbakenga “ului a wuki w’antu” w’oma lo “wauhu tshe ndu uma lu weuhu w’antu tshe, ndu w’eteketa tshe.” (Enyelo 7:9) Lo wedja 235, miliyɔ y’Ɛmɛnyi wa Jehowa wekɔ lo sala tshɛ dia kimanyiya anto akina dia mbishola mboka yaki Jehowa yoludi la ngandji ndo ɛlɛmbɛ ande.
Woho wa Mbeya Atɛmɔdi wa Mɛtɛ
3. Ɛmɛnyi wa Jehowa onto akɔna atɛmɔlawɔ, ndo weho akɔna w’ɛtɛmwɛlɔ wahawetawɔ?
3 Ɛmɛnyi wa Jehowa mbeyaka dia paka Jehowa oto mbahomba tɛmɔma. Vɔ tonaka dia nkusamɛ dikishi kana esato wa l’ɔtɛmwɛlɔ. (1 Joani 5:21) Vɔ hawɔtɛmɔla edo lo ndala engondo l’etanda kana lo sala sɛlɛmɔnyi kina ya kɔlɔ y’ɔtɛmwɛlɔ wa kashi kana ndjela “wetshelu w’edienge.” (1 Timote 4:1) Koko, vɔ sambaka wanɛ wambovusha wakiwɔ wa ngandji lo mbalembetshiya daka diaki Nzambi dia mbolola anto oma lo nyɔi lo paradiso ka la nkɛtɛ.—Joani 5:28, 29; Etsha 24:15.
4. Ngande wɔsa ekambi waki Nzambi awui wa maji?
4 Ɛmɛnyi wa Jehowa hawosale maji ndo vɔ bu wa wetshi kana alɔka, nɛ dia vɔ mbeyaka ɔnɛ akambo asɔ ndja oma le Diabolo. Vɔ hawoyaɛkɛ l’awui wa maji dia kondja ekokelo koko wɛkamu awɔ wekɔ le Jehowa.—Tukedi 18:10.
5. Lo woho akɔna wele Ɛmɛnyi wa Jehowa “kema wa la kete” nyɛ?
5 Yeso akate dia ambeki ande ‘hawotoyatambiya l’akambo wa l’andja ɔnɛ.’ (Joani 17:16) Yeso ndamɛ akatone dia ndjatambiya l’awui wa pɔlitikɛ wa lo nshi yande. (Joani 6:15) L’ɛnyɛlɔ kande, Ɛmɛnyi wa Jehowa hawoyatambiya l’awui wa pɔlitikɛ, l’awui wɛnya ngandji k’otamanya ka wodja ndo l’osusanelo w’ahole wa weke wa l’andja ɔnɛ. Koko, vɔ futaka elambo ndo kitanyiyaka ɛlɛmbɛ wa lo wodja wasɛnawɔ.—Joani 15:19; Romo 13:1, 7.
6. Ɛlɛmbɛ waki na wayela ekambi waki Nzambi lo kɛnɛ kendana la diwala ndo l’odiakelo adiɔ?
6 Lam’ele vɔ nɛmiyaka ɛlɛmbɛ wa wodja, Ɛmɛnyi wa Jehowa mbidjaka awala awɔ l’abuku wa lɛɛta. (Tito 3:1) Vɔ kitanyiyaka ɛlɛmbɛ waki Nzambi, diakɔ diahawetawɔ diwala di’ɔsɛngɛ. (1 Timote 3:2) Lâdiko dia lâsɔ, lam’ele vɔ kitanyiyaka atɔndɔ wa lo Bible lo lɔsɛnɔ lawɔ, awala w’ekambi waki Nzambi hawoleke pandjɔ.
7. Ngande wɛnyana Ɛmɛnyi wa Jehowa ngandji lam’asawɔ?
7 Ɛmɛnyi wa Jehowa mbokanaka ngandji lam’asawɔ. Ngandji kɛsɔ ndo ngandji kokawɔ Nzambi mbatshumanyaka lo nkumbo ɔtɔi k’anto l’ɔnango kânga mbele vɔ tomba oma lo waoho la wedja wotshikitanyi. Lam’atomba mpokoso kɛmɔtshi kana ekakatanu wa wolo, Ɛmɛnyi wa Jehowa mongaka suke dia kimanyiyana. Ɛmɛnyi wa Jehowa mɛnyaka ngandji lo yoho yasɛnawɔ.—Joani 13:35.
8. Naa ditshelo dia kɔlɔ diatona ekambi waki Nzambi?
8 Ɛmɛnyi wa Jehowa salaka la wolo dia monga la lɔsɛnɔ losembwe ndo l’ɔlɔlɔ. Vɔ hawove, hawote kashi, hawoyakimɔ l’awui wa mindo, hawodjɔ wanu kana monga la lokeso l’awui w’okanda. Waomi hawɔkɔmɔla wadɛwɔ. La ntondo ka koma Ɛmɛnyi wa Jehowa, amɔtshi wakasalaka akambo asɔ, koko oma l’ekimanyielo ka Jehowa, vɔ wakayotshika. Vɔ ‘wakɛdiama’ lo washo waki Nzambi.—1 Koreto 6:9-11.
Vɔ Salaka Lolango la Nzambi
9. Kakɔna kakate dibuku dimɔtshi lo dikambo di’atshunda w’ɛtɛmwɛlɔ wa l’Afrikɛ?
9 Mɛtɛ, ɛtɛmwɛlɔ efula sɛmaka dia wekɔ lo mbuta mɛtɛ. Vɔ mbeyaka mɛnya akambo wa diambo dia shikikɛ kɛnɛ kasɛmawɔ. Ɛnyɛlɔ, lo dikambo dia kɛnɛ kelɛwɔ l’Afrikɛ ɔnɛ atshunda w’alɔmbɛlɔ, dibuku dimɔtshi mbutaka ɔnɛ: “[Atshunda w’Akristo w’eyoyo] wambɔsa olimu waki osadi wa maji kana w’osaki wa diwolo. . . . Vɔ sɛmaka dia wekɔ lo mbuta awui wahataye ndo sala ahindo. Amvutshi wa l’atei awɔ mɛnaka waɛnɛlɔ ndo sakolaka alɔ. Vɔ kambaka l’ashi welɛwɔ vate ashi wa Nzambi, l’esɔ k’ekila, l’otoko, la wa buji ndo la tshɔ dia kɔnɔya ndo dia mbewɔ wa hemɔ.”
10, 11. Lande na kele ahindo wasɛmawɔ ɛlɔ kɛnɛ bu djembetelo yɛnya di’ɔtɛmwɛlɔ mbetawɔmaka le Nzambi?
10 Anto wele l’ɛtɛmwɛlɔ ɛsɔ sɛmaka di’ahindo wekɔ djembetelo yɛnya di’ɔtɛmwɛlɔ awɔ wekɔ lo tshɔkwama oma le Nzambi. Koko ahindo asɔ kema djembetelo yɛnya ɔnɛ ɔtɛmwɛlɔ mbetawɔmaka le Jehowa. Satana mbishaka anto amɔtshi wa l’ɛtɛmwɛlɔ wa kashi wolo wa sala “akambu wa mamba.” (2 Tesalonika 2:9) Lâdiko wa lâsɔ, Bible akate dia weshasha w’oma le Nzambi wele oko: mbuta akambo wahataye, tɛkɛta ɛtɛkɛta ekina, ndo monga l’ewo ka lânde ‘wayoshishɔ.’—1 Koreto 13:8.
11 Yeso akewola ate: “Aha untu tshe latumbetaka ati: Khumadiondjo, Khumadiondjo, kayoto lu diulelu dia l’ulungu. Keli paka one latutshaka lulangu la Papa leli l’ulungu. Lushi loso, antu efula wayumvutela vati: Khumadiondjo, Khumadiondjo, shu kumvutaka akambu wahatayi lu lukumbu laye, shu kuntundjaka edienge lu lukumbu laye, shu kuntshaka akambu wa mamba efula lu lukumbu laye? Ku dimi layâhunwela nti: Dimi halanyeyi nduku yema. Nyumanganeli, nyu atshi wa kolo.”—Mateu 7:21-23.
12. Akɔna ayɔtɔ lo Diolelo dia l’olongo?
12 Lâsɔ, akɔna ayɔtɔ lo Diolelo dia l’olongo na? Ekɔ paka wanɛ wasala lolango laki Jehowa.
Esambisha wa Diolelo Diaki Nzambi
13. Naa olimu walɔmba Nzambi ekambi ande ɛlɔ kɛnɛ dia kamba ndo waa na wakamba olimu akɔ?
13 Naa lolango laki Nzambi lo kɛnɛ kendana l’ekambi ande ɛlɔ kɛnɛ? Yeso akate ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Olimu ɔsɔ mbakamba Ɛmɛnyi wa Jehowa l’ohetoheto tshɛ.
14. Diolelo diaki Nzambi kɛdikɛdi na, ndo waa na wayolɛ lo Diolelo diakɔ?
14 Lo “kete tshe,” Ɛmɛnyi wa Jehowa wekɔ lo sambisha ɔnɛ Diolelo diaki Nzambi ekɔ ɛlɔmbwɛlɔ k’oma l’olongo kayolɛ nkɛtɛ k’otondo la losembwe. Vɔ mbetshaka dia Jehowa akadje Kristo Yeso Nkumekanga ka Diolelo sɔ, ndo anto 144000 wayolɛ kamɛ la nde wakasɔnama oma l’atei w’anto.—Danyele 7:14, 18; Enyelo 14:1, 4.
15. Diolelo ayodiolanya?
15 Ɛmɛnyi wa Jehowa kambaka la Bible dia mɛnya anyawɔ anto ɔnɛ Diolelo diaki Nzambi diayolanya dikongɛ nɛ diaki Satana di’otondo. Ɔtɛmwɛlɔ wa kashi la wetshelo wɔnyɔla Nzambi ndo watombola Diabolo hawotonga nto! (Enyelo 18:8) Ndo nto, mandji y’ana w’anto tshɛ yasɛmanɛ la Nzambi hayotonga nto!—Danyele 2:44.
16. Waa na wayonga l’ɛse k’ɛlɔmbwɛlɔ kaki Kristo Yeso ndo lende ayowɔsɛna?
16 Lâdiko wa lâsɔ, Ɛmɛnyi wa Jehowa mbewoyaka dia Kristo Yeso ayela anto tshɛ wasala kɛnɛ kalɔmba Nzambi ɛtshɔkɔ wa diambo. Vɔ wayonga l’ɛse k’ɛlɔmbwɛlɔ kande lanɛ la nkɛtɛ. Bible ndakaka ɔnɛ: ‘Nde ayotshungola uhumbi layanga ekimanyielo, ndo ɔmɛnyi fɔnu ndo onto tshɛ lele bu l’onto lakoka mbokimanyiya. Nde ayoka ɔnɛ lɔnyɔma kɛtshi ndo ayotsha kanga wola.’—Osambu 72:12, 13.
17. Naa olui ɔtɔi w’anto wasambisha Diolelo diaki Nzambi?
17 Ndoko olui okina w’anto wasala lolango laki Nzambi lo sambisha lokumu l’ɔlɔlɔ la Diolelo. Paka Ɛmɛnyi wa Jehowa ato mbewoya Diolelo dia Nzambi lo nkɛtɛ k’otondo.
[Esato wa lo lɛkɛ 23]
Ɛmɛnyi wa Jehowa tshumana kâmɛ lo nkumbo k’anto l’ɔnango ka l’andja w’otondo