Wekelo 11

Oka ɛtɛmwɛlɔ wa kashi ɔkɔngɔ!

Satana l’ɛdiɛngɛ ande hawolange wɛ kambɛ Nzambi. Vɔ ntshaka tshɛ dia mbɛkɔla anto tshɛ oma le Nzambi. Ngande wahembawɔ ntsha dui sɔ na? Yoho mɔtshi ele oma l’ekimanyielo k’ɛtɛmwɛlɔ wa kashi. (2 Koreto 11:13-15) Ɔtɛmwɛlɔ wa kashi ele ɔtɛmwɛlɔ ɔnɛ wahetsha akambo wa mɛtɛ w’oma lo Bible. Ɔtɛmwɛlɔ wa kashi ekɔ oko falanga ya kɔlɔ—yɔ kokaka mɛnama oko ɛngɔ kele mɛtɛ dimɛna, ko tete bu la nɛmɔ. Vɔ kokaka kosalɛ kɔlɔ k’efula.

Awui wa kashi wa l’ɛtɛmwɛlɔ hawokokaki ngɛnyangɛnya Jehowa pondjo, nde ekɔ Nzambi k’akambo wa mɛtɛ. Lam’aki Yeso lanɛ la nkɛtɛ, aki djui mɔtshi y’ɔtɛmwɛlɔ yakalange mbodiaka. Vɔ wakafɔnyaka ɔnɛ ɔtɛmwɛlɔ awɔ waki dimɛna. Vɔ wakate vate: “Teko la Shesu otoi, ee, [Nzambi].” Onde Yeso aketawɔ dui sɔ? Kema! Nde akawatɛ ate: “Ana wa uhimbanyi shenyu mbenyu.” (Joani 8:41, 44) Ɛlɔ kɛnɛ, anto efula fɔnyaka ɔnɛ Nzambi mbatɛmɔlawɔ, ko tete mɛtɛ Satana l’ɛdiɛngɛ ande mbakambɛwɔ!—1 Koreto 10:20.

Oko watɔtɔka osongo wa kɔlɔ elowa wa kɔlɔ, ɔtɛmwɛlɔ wa kɔlɔ watotondjaka anto watsha awui wa kɔlɔ. Andja ɔnɛ wambolola l’efukutanu l’ɔtɛ w’akambo wa kɔlɔ watsha anto. Ɛnyɛlɔ oko: loseka kana monanyi, ata, wovi, ɛhɛnyɔhɛnyɔ, diyakatanelo, dihɔtwanelo la etshelo ka mbeyanaka la wamato la wolo. Efula ka wanɛ watsha akambo asɔ wekɔ l’ɔtɛmwɛlɔ ɔmɔtshi, koko ɔtɛmwɛlɔ awɔ hâtshutshuya dia ntsha awui w’ɔlɔlɔ. Hawokoke monga angɛnyi wa Nzambi naka watatshike ntsha awui wa kɔlɔ.—Mateu 7:17, 18.

Ɛtɛmwɛlɔ wa kashi mbetshaka anto dia vɔ nɔmbɛka dikishi. Nzambi toshimbaka dia sho nɔmbɛ dikishi. Ɔsɔ ekɔ dui dia yimba. Onde wɛ ayɔngɛnangɛna, naka onto ɔmɔtshi lahatɛkɛta la yɛ, ɔtɛkɛta l’osato ayɛ? Onde onto ɔsɔ kokaka monga ɔngɛnyi ayɛ w’oshika? Kema. Jehowa nangaka anto tɛkɛtaka la nde, koko aha la dikishi kana esato, wɛnɛ wele bu la lɔsɛnɔ.—Etumbelu 20:4, 5.

Ɛtɛmwɛlɔ wa kashi mbetshaka ɔnɛ ekɔ dimɛna efula ndjaka anto akina wonya wa ta. Yeso akate ate angɛnyi wa Nzambi pombaka mbokana ngandji lam’asawɔ. Hatokoke ndjaka anto wokaso ngandji. (Joani 13:35) Bu ndo dimɛna sho ndjaka anto wa kɔlɔ. Lam’akaye atunyi wa Yeso dia ndjowonda, nde kombitɛ ambeki ande dia ndɔ la wɔ dia mbokokɛ.—Mateu 26:51, 52.

Ɛtɛmwɛlɔ wa kashi mbetshaka ɔnɛ anto wa kɔlɔ wayotosowa lo lowenga la dja. Koko Bible mbetshaka ɔnɛ pɛkato konyaka onto lo nyɔi. (Romo 6:23) Jehowa ekɔ Nzambi ka ngandji. Onde Nzambi ka ngandji kokaka soya anto pondjo pondjo? Ndooko! Lo Paradiso, ayonga paka ɔtɛmwɛlɔ ɔtɔi, wɔnɛ wetawɔma oma le Jehowa. (Enyelo 15:4) Ɛtɛmwɛlɔ wayela kashi kaki Satana hawotoyala nto.