Nshi yayaye ya diambo
Keema edja, Satana la ɛdiɛngɛ ande hawotɔhɛnyahɛnyaka anto nto
Satana la ɛdiɛngɛ ande hawototetemala kesa anto. Jehowa ambowakashaka oma l’olongo. (Ɛnyɛlɔ 12:9) Keema edja nto, Nzambi ayolanya Satana la ɛdiɛngɛ ande. Lo tshimbo y’ɛnɛlɔ k’oma le Nzambi, ɔpɔstɔlɔ Joani akate ate: “Ko dimi lakɛnyi ondjelo ɔmɔtshi ayaholɔ oma l’olongo okime nsapi ka difuku diaha l’ekomelo la mɔlɔla wa woke lo lonya lande. Nde akande dragɔ, oloyi w’edjedja akɔ wele Diabolo ndo Satana, ko akookeleka l’edja k’ɛnɔnyi kinunu. Nde akawokasha lo difuku diaha l’ekomelo ndo akoodihe lo difuku diakɔ la nsapi diaha nde minganyiya wedja nto polo l’ekomelo k’ɛnɔnyi kinunu.” (Ɛnyɛlɔ 20:1-3) L’ɔkɔngɔ diko, Diabolo nde l’ɛdiɛngɛ ande wayolanyema pondjo.—Ɛnyɛlɔ 20:10.
Anto wa kɔlɔ wa la nkɛtɛ vɔ lawɔ wayolanyema.—Osambo 37:9, 10; Luka 13:5.
Wanɛ wavɔ wayɔsɛna nto!
Wanɛ wavɔ wayonga la lɔsɛnɔ nto lanɛ la nkɛtɛ
L’ɔkɔngɔ wa Satana l’ɛdiɛngɛ ande ndanyema, Jehowa ayɔtshɔkɔla anto lo yɛdikɔ y’efula. Wɛ mbohɔka dia wanɛ wavɔ keema la lɔsɛnɔ ndo hawɔsɛnɛ ndooko dihole. Koko Yeso akɛdika nyɔi la djɔ, mbuta ate, djɔ ya baku aha la mɛna alɔ. (Joani 11:11-14) Nde akate ngasɔ nɛ dia nde akeyaka etena kayemɔ wanɛ wele lo djɔ ya nyɔi ndo nsɛna nto. Nde akate ate: “Wonya wekɔ lo ndjaye wele wanɛ tshɛ wele lo waombo wohɔma . . . wayotomba.”—Joani 5:28, 29; ɛdika la Etsha 24:15.
Vɔ wayonga la lɔsɛnɔ lanɛ la nkɛtɛ. Lo dihole dia nsango yɔnɛ anto wekɔ lo mvɔ, tayonga la nsango y’ɔngɛnɔngɛnɔ yɔnɛ wanɛ wakavu wolɔ oma lo nyɔi! Ayonga ɔngɛnɔngɛnɔ wa mamba dia nongola wakiso wa ngandji wayolɔ oma lo waombo!