Wekelo 2

Ele Nzambi?

Ele Nzambi ka mɛtɛ, ndo naa lokombo lande? (1, 2)

Demba diakɔna diele lande? (3)

Naa waonga ande woleki weke? (4)

Onde sho kokaka kamba l’esato kana dikishi ndo pingu lam’awɔtɛmɔlaso oka? (5)

Naa weoho ehende wa tokimanyiya dia sho mbeka akambo wa Nzambi? (6)

1. Anto tɛmɔlaka diangɔ efula. Koko, Bible totɛka ɔnɛ Nzambi ɔtɔi ka MƐTƐ keto mbêkɔ. Nde mbakatonge diangɔ tshɛ, oyadi dia l’olongo kana dia la nkɛtɛ. Lam’ele nde mbakatosha lɔsɛnɔ, Nde oto mbahombaso tɛmɔlaka.​—1 Koreto 8:5, 6; Enyelo 4:11.

2. Nzambi ekɔ la nkombo efula yalɔtɛtɛmɔla, koko nde ekɔ paka la lokombo ɔtɔi. Lokombo lakɔ ko JEHOWA. Wakanya lokombo la Nzambi oma l’atei wa Bible efula ko wakalihɛnya la nkombo ya lɔtɛtɛmɔla nyɛ: NKUMADIƆNDJƆ kana NZAMBI. Koko, lam’akafundama Bible, lokombo Jehowa lakatanemaka mbala oko 7 000 lɔkɔ!​—Etumbelu 3:15; Osambu 83:18.

3. Jehowa ekɔ la demba, koko aha oko diakiso. Bible mbutaka ɔnɛ: “[Nzambi, NW] eko [n]yuma.” (Joani 4:24) Nyuma ekɔ woho ɔmɔtshi wa lɔsɛnɔ loleki lɔsɛnɔ laso fwa. Ndoko onto lambɛnaka Nzambi. Jehowa ekɔ l’olongo, koko nde kokaka mɛna diangɔ tshɛ. (Osambu 11:4, 5; Joani 1:18) Ko etawɔ nyuma k’ekila na? Tɔ kema onto oko Nzambi. Koko, tɔ kekɔ wolo waki Nzambi wakamba olimu.​—Osambu 104:30.

4. Bible tɔkɛnɛmɔlɛka lonto la Nzambi. Tɔ tɛnyaka ɔnɛ waonga ande woleki weke wekɔ ngandji, losembwe, lomba ndo wolo. (Euhwelu k’Elembe 32:4; Jobo 12:13; Isaya 40:26; 1 Joani 4:8) Bible totɛka nto ɔnɛ nde mbokanaka kɛtshi, onto ɔlɔlɔ, dimanyiyanaka, kanga lokaho ndo lotutsha. Oko ana w’okitanyiya, sho pombaka pemba dia mbokoya.​—Efeso 5:​1, 2.

5. Onde sho pombaka nkusamɛ dikishi, esato kana mpingu l’atei w’ɔtɛmwɛlɔ aso? Kema! (Etumbelu 20:4, 5) Jehowa mbutaka dia sho pombaka mbɔtɛmɔla paka ndamɛ oto. Nde hakahanaki lotombo lande l’onto okina kana l’ɛngɔ kekina. Dikishi kema la wolo wa tokimanyiya.​—Osambu 115:4-8; Isaya 42:8.

6. Woho akɔna wayotokoka mbeya Nzambi ɔlɔlɔ na? Yoho mɔtshi ele menda diangɔ diakandatonge ndo kana yimba ɔlɔlɔ lo kɛnɛ katɛnyadiɔ. Diangɔ diakatonge Nzambi tɛnyaka ɔnɛ nde ekɔ la wolo ndo la lomba l’efula. Tekɔ lo mɛna ngandji kande oma lo kɛnɛ tshɛ kakandasale. (Osambu 19:1-6; Romo 1:20) Yoho kina yakokaso mbeya Nzambi ele wekelo wa Bible. Lɔkɔ mbatotelande awui efula w’endana la woho wa Nzambi wende. Nde totɛka nto akambo w’endana la sangwelo diande ndo kɛnɛ kalangande dia sho sala.​—Amose 3:7; 2 Timote 3:16, 17.

[Diombwɛlo di’osato wa lo lɛkɛ 5]

Sho mbeyaka awui wa Nzambi l’ekimanyielo ka Bible la k’etongelo