Wekelo 11

Wetshelo la Mbekelo Yatona Nzambi

Woho akɔna wa wetshelo la mbekelo yele kɔlɔ? (1)

Onde Akristo pombaka mbetawɔ wetshelo w’ɔnɛ Nzambi ekɔ Losato l’Osanto? (2)

Lande na kahasale Akristo wa mɛtɛ difɛstɔ dia Nɔɛlɛ, Pasaka, kana dia lushi l’eotwelo na? (3, 4)

Onde anto wambovɔ kokaka salɛ wanɛ wasɛna kɔlɔ? (5)

Onde Yeso akavu lo kurusɛ? (6)

Ohomba a na wa ngɛnyangɛnya Nzambi? (7)

1. Aha wetshelo tshɛ la mbekelo tshɛ mbele kɔlɔ. Koko Nzambi hetawɔ wetshelo la mbekelo y’oma l’ɔtɛmwɛlɔ wa kashi kana yalɔshana la wetshelo wa lo Bible.​—Mateu 15:6.

2. Losato l’Osanto: Onde Jehowa ekɔ Losato l’Osanto​—⁠Nzambi ɔtɔi etondo esato? Kema! Jehowa, Shɛso, ekɔ “Nzambi ɔtɔi ka mɛtɛ.” (Joani 17:3, NW; Mako 12:29) Yeso ekɔ Ɔnande l’enondo, ndo Nzambi ekɔ owandji ande. (1 Koreto 11:3) Papa ndeka Ɔna. (Joani 14:28) Nyuma k’ekila kema onto; tɔ kekɔ wolo wa Nzambi wakamba olimu​—Etatelu 1:2; Etsha 2:18.

3. Nɔɛlɛ la Pasaka: Yeso kombotɔ lo ngɔndɔ ka Diɛla Woke 25. Nde akotɔ oya lo Kɔlɛkɔlɛ 1, ngɔndɔ katohotoyaka elami w’ɛkɔkɔ l’ɛkɔkɔ awɔ l’andja. (Luka 2:8-12) Ndoko lushi lakasha Yeso ambeki ande dikimɔ dia vɔ mbohɔka lushi lakandotɔ. Koko, nde akatɛ ambeki ande dia vɔ mbohɔka lushi lakandavu. (Luka 22:19, 20) Difɛstɔ dia Nɔɛlɛ la mbekelo yadiɔ tshɛ ndja oma l’ɛtɛmwɛlɔ wa kashi w’edjedja. Woho akɔ wâmɛ mbele ndo mbekelo y’endana la Pasaka, ɛnyɛlɔ oko okambelo wa la ekele ndo l’etomba. Akristo wa ntondo kosalaka difɛstɔ dia Nɔɛlɛ kana dia Pasaka, ndo Akristo wa mɛtɛ wa nshi nyɛ hawosale afɛstɔ akɔ.

4. Afɛstɔ wa Nshi y’Eotwelo: Afɛstɔ ahende wa nshi y’eotwelo wakasalema ndo wakɔndwama lo Bible wekɔ wanɛ wakasale anto waki kɔtɛmɔlaka Jehowa. (Etatelu 40:20-22; Mako 6:21, 22, 24-27) Akristo wa ntondo kombohɔka nshi ya eotwelo. Mbekelo ya mbohɔka nshi ya eotwelo yakaye oma l’ɛtɛmwɛlɔ wa kashi w’edjedja. Akristo wa mɛtɛ mbishanaka weshasha ndo ngɛnangɛnaka kâmɛ lo tena dikina tshɛ dia l’ɔnɔnyi.

5. Wɔma w’Anto Wambovɔ: Anto wambovɔ hawokoke sala ndoko dui ndo haweye ndoko ɛngɔ. Sho hatokoke mbakimanyiya, ndo vɔ hawokoke tosalɛ kɔlɔ. (Osambu 146:4; Undaki 9:5, 10) Anima mvɔkaka, ndo hawotetemala la sɛna l’ɔkɔngɔ wa nyɔi. (Ezekiyele 18:4) Koko mbala mɔtshi, andjelo wa kɔlɔ welɛwɔ ɔnɛ ɛdiɛngɛ ndjasɛmaka ɔnɛ vɔ mbele ekishi w’anto wambovɔ. Mbekelo tshɛ ka mbokaka anto wambovɔ wɔma kana mbatɛmɔlaka kema dimɛna.​—Isaya 8:19.

6. Kurusɛ: Yeso komvɔ lo kurusɛ. Nde akavu l’otamba kana l’ekundji kosembwe. Tshɛkɛta ya lo Grɛkɛ yokadimwami ɔnɛ “kurusɛ” lo Bible efula nembetshiyaka etenyi ɔtɔi k’otamba. Djembetelo ya kurusɛ ndja oma l’ɛtɛmwɛlɔ wa kashi w’edjedja. Akristo wa ntondo kokambaka la kurusɛ kana kitɛmɔla. Ko lâsɔ, wɛ fɔnyaka ɔnɛ ekɔ ɔlɔlɔ sho kamba olimu la kurusɛ l’atei w’ɔtɛmwɛlɔ oka?​—Euhwelu k’Elembe 7:26; 1 Koreto 10:14.

7. Mbeyaka monga wolo efula dia kakitɔna la wetshelo ndo la mbekelo mɔtshi ya ngasɔ. Ewotɔ ayɛ l’angɛnyi ayɛ mbeyaka kotshutshuya di’aha wɛ mangana la wetshelo wokoyêtawɔka. Koko, kɛnɛ koleki ohomba ele ngɛnyangɛnya Nzambi koko aha anto.​—Tukedi 29:25; Mateu 10:36, 37.

[Diombwɛlo di’osato wa lo lɛkɛ 22]

Nzambi kema Losato l’Osanto

[Diombwɛlo di’osato wa lo lɛkɛ 23]

Afɛstɔ wa Nɔɛlɛ la Pasaka ndja oma l’ɛtɛmwɛlɔ wa kashi w’edjedja

[Diombwɛlo di’osato wa lo lɛkɛ 23]

Sho kema ndoko l’ɔkɔkɔ ɔmɔtshi wa tɛmɔla anto wambovɔ kana mbaoka wɔma