Ndo Pasaka, Ndo Eohwelo Ka Nyɔi Ka Yeso
Ahombayɛ Nɛmiya?
LAM’AYOHOTƆ wonya lo Mɔmbi 7, miliyɔ y’anto wayɔngɛnangɛna eyelo ka lushi lawɔ loleki woke tshɛ l’ɔnɔnyi—Pasaka. L’etena kɛmɔtshi, Pasaka akɔsamaka oko eleko ka nshi 120 kele la tena di’afɛstɔ ndo di’ekilelo ka mbo ya ndɛ, eleko kakɔ kakamɛka la difɛstɔ diakawelɛka ɔnɛ Septuagésime ndo kakakomɛka la nɛ diakawelɛka ɔnɛ Lushi la Losato l’Osanto. Ɛlɔ kɛnɛ, Pasaka ɔ̂samaka oko lushi ɔtɔi la eohwelo k’eolwelo ka Yeso—Lushi la Lomingu la Pasaka.
Koko, la dikɔlɔ dia lomingu lakɔ lâmɛ, lo Mɔmbi 2, miliyɔ kina y’anto wayosangana dia sala Eohwelo ka nyɔi ka Kristo, kɛnɛ kelɛwɔ nto ɔnɛ: Dambo dia Dikɔlɔ dia Nkumadiɔndjɔ. Yeso ndamɛ mbakatâtate nɛmiya lushi lɔsɔ l’otsho wa komelo wakinde lanɛ la nkɛtɛ. L’etena kakɔ, nde akatɛ ambeki ande ate: “Kanyutshaki okone, dia mbuhomi.”—Luka 22:19.
Lo nshi shɔ hiende, lakɔna lahombayɛ nɛmiya?
Ntatelo ka Pasaka
Lokombo Pasaka, latɛkɛtama lo wedja efula, kema lo Bible. Dibuku dimɔtshi (Medieval Holidays and Festivals) totɛka ɔnɛ: “Difɛstɔ sɔ diakɔlamɛ lokombo la Eostre, Jambizambi ya Omoto y’apanganu ya Lɔkɛsɛ ndo y’Eleko Kamɔnga Akatshi.” Ko jambizambi ya omoto shɔ âkiyɔ na? Dibuku dimɔtshi (The American Book of Days) diekɔ lo nkadimola ɔnɛ: “Oko watawɔ lo shimu, Eostre mbakadihola nkuke ya [luudu lelɛwɔ ɔnɛ] Valhalla dia nongola Baldur, ɔnɛ lakelamɛka ɔnɛ Nzambi ka Wɛma, l’ɔtɛ wa pudipudi kande, ndo Nzambi Wonya, nɛ dia mfumu kande kakahɛtshiyɛka anto osase.” Dibuku diakɔ mbutaka nto ɔnɛ: “Aha la tamu, oma l’etatelo kawɔ, Ɛkɛlɛsia akɔsɛ ditshelo di’apanganu ko disha kitshimudi ya lo Lokristo. Lam’ele difɛstɔ dia Eostre diaki lushi lakawalɛmiyaka ekalwelo ka lɔsɛnɔ l’eleko kamɔnga akatshi, aki wɔdu kadimola difɛstɔ sɔ dia diɔ ndjâla lushi lôhɔwɔ eolwelo ka Yeso oma lo nyɔi, ɔnɛ lakanga evanjiliyɔ wakawasambishaka.”
Wɔsɛlɔ ɔsɔ wa ditshelo di’apanganu mɛnyaka woho wakatɔngɔ ditshelo dimɔtshi dia Pasaka lo wedja ɛmɔtshi, ɛnyɛlɔ oko: ekele wa Pasaka, otomba wa Pasaka ndo mapa wa totshitshɛ wa dja wosangiwɔ kurusɛ lâdiko. Lo kɛnɛ k’endana la mbekelo ka nkatɛ mapa wa totshitshɛ wa dja wa kurusɛ, kâmɛ la “tɔsɔdi tawɔ tambelɔ tosangiwɔ . . . kurusɛ,” dibuku dimɔtshi (Easter and Its Customs) mbutaka ɔnɛ: “Kurusɛ aki djembelo y’apanganu la ntondo ka tɔ ndjonga la kitshimudi ya pondjo oma lo akambo wakasalema lushi la ntondo la Tanu l’Osanto, ndo wakasangaka kurusɛ lo mapa la ekate mbala mɔtshi lo nshi yakete la ntondo ka Kristo ndja lanɛ la nkɛtɛ.”
Ndoko dihole ɔtɔi diatanema akambo asɔ l’Afundelo, koyanga djembetelo mɔtshi yɛnya ɔnɛ ambeki wa Yeso wa l’eleko ka ntondo waketawɔka akambo asɔ. Mɛtɛ, ɔpɔstɔlɔ Petero ekɔ lo totɛ ate: “[Nyoyale la saki ka wolo k’awɛlɛ wa mɛtɛ mɛtɛ wa dui, NW], dia [sho] mbula lu diui ne edja ndu [sho] tana panda.” (1 Petero 2:2) Ko lâsɔ, lande na kakɔshi ɛtɛmwɛlɔ wa lo Lokristokristo tolembetelo t’apanganu ko tidja lo wetshelo awɔ la lo ditshelo diawɔ na?
Dibuku dimɔtshi (Curiosities of Popular Customs) diekɔ lo nkadimola ɔnkɔnɛ: “Ɛkɛlɛsia wa nshi ya ntondo waki la pɔlɔtikɛ kahatshikitana ka mbishaka nsɛlɛmɔnyi y’apanganu yaki lo nshi shɔ kitshimudi ya lo Lokristo. Ɛnyɛlɔ oko difɛstɔ dia Pasaka takidiɔ wolo ditshikitanya. Ɔngɛnɔngɛnɔ w’ohotwelo wa wonya wakatongama, ndo eolwelo ka diangɔ diakatongama oma lo nyɔi ka l’eleko ka tshitshi, akayongaka ɔngɛnɔngɛnɔ w’ohotwelo wa Wonya wa losembwe, la wa eolwelo ka Kristo oma l’odimu. Ditshelo dimɔtshi di’apanganu diakalɛmiyamaka oya lo Yitshu 1, diakayotshikitanyemaka woho wa diɔ mbɔtɔnɛ la difɛstɔ dia Pasaka.” L’ɔtɛ wa vɔ mbewɔ ditshelo di’apanganu la ditshelo di’alɔhɔ, ewandji w’ɛtɛmwɛlɔ wakadietawɔ ko wakadisha “kitshimudi ya lo Lokristo.”
Wɛ mbeyaka ndjambola wate: ‘Ko na kɔlɔ kele lâsɔ na?’ Amɔtshi kanaka ɔnɛ ndoko kɔlɔ kele lâsɔ. Opiskɔpɔ Alan W. Watts akafunde ɔnkɔnɛ lo dibuku diande dielɛwɔ Easter—Its Story Meaning (Pasaka—Ɔkɔndɔ Atɔ la Kitshimudi Yatɔ): “Naka ɔtɛmwɛlɔ wele oko Lokristo amboya oma lo wodja okina oya lo ngelo kɛmɔtshi, vɔ mbɔsaka ndo ‘nsatoyaka’ mbekelo mɔtshi y’ashidi y’ase ngelo yoye oma l’ɛtɛmwɛlɔ w’edjedja. [Lokristokristo] nsɔtɔlaka mbekelo yɛnama oko adjango wa pondjo walakanya Ɛkɛlɛsia ko ndjidja l’atei w’ɔtɛmwɛlɔ w’ase ngelo kakɔ.” Anto efula mɛnaka ɔnɛ vɔ kokaka mbetawɔ ditshelo sɔ nɛ dia ɔtɛmwɛlɔ awɔ akadietawɔ ndo akadiɔsɛ oko ekila. Koko wembola w’ehomba wekɔ lo mbohamɛ. Kakɔna kakana Nzambi lo dikambo dia mbekelo shɔ na? Onde nde akatodjɛ ɛlɛmbɛ wahombaso ndjelaka lo dikambo sɔ?
Têye Kanyi ya Nzambi
Lo dibuku diande dietawɔ ɔnɛ Easter and Its Customs (Pasaka la Ditshelo Diatɔ), Christina Hole akafunde ɔnɛ: “Lushi la Pasaka, Difɛstɔ di’Eolwelo ka Nkumɛso, diekɔ difɛstɔ dioleki afɛstɔ tshɛ wa l’Ɔtɛmwɛlɔ w’Akristo.” Afundji akina mbetawɔka awui ande asɔ. Robert J. Myers akafunde ɔnkɔnɛ lo dibuku diande (Celebrations): “Ndoko lushi la woke koyanga difɛstɔ dimɔtshi di’Akristo dia l’ɔnɔnyi diele la nɛmɔ oko Lomingu la Pasaka.” Koko, dikambo sɔ munyiyaka wembola ɛmɔtshi. Naka difɛstɔ dia Pasaka diekɔ la nɛmɔ, ko lande na kele ndoko ɔlɛmbɛ wa lo Bible watotɛ ɔnɛ: kanyɔlɛmiyake lushi lɔsɔ? Onde ekɔ ɔkɔndɔ ɔmɔtshi wɛnya ɔnɛ ambeki wa Yeso wa l’eleko ka ntondo wakalɛmiyaka Lushi la Lomingu la Pasaka?
Bible tɛnyaka nshi yahombaso nɛmiya la nyɛ yahatahombe nɛmiya. Nzambi kombishɛ ndoko dui lam’akandatɛka Isariyɛlɛ w’edjedja dikambo sɔ, ndo oko womiso la mɛna, Akristo wakalongola alako wokɛma hwe dia vɔ ntetemala mbohɔka nyɔi ka Kristo. (1 Koreto 11:23-26; Kolosai 2:16, 17) Efundelo ka ntondo ka The Encyclopædia Britannica totɛka ɔnɛ: “Ndoko hiole yɛnya ɔnɛ wakasalaka difɛstɔ dia Pasaka lo Dikelemba di’Oyoyo oko difɛstɔ di’Akristo, koyanga l’afundelo w’Ewandji w’ɛkɛlɛsia. Akristo wa ntondo takiwɔ kânga la kanyi mɔtshi ya mbetɛ nshi mɔtshi oko nshi y’ekila. . . . Oyadi Nkumadiɔndjɔ koyanga apɔstɔlɔ ande, ndoko lakadje ɔlɛmbɛ wa nɛmiyaka difɛstɔ nɛ kana dia woho okina tshɛ.”
Anto amɔtshi fɔnyaka ɔnɛ ɔngɛnɔngɛnɔ wonga l’afɛstɔ asɔ ndo ɔlɔ watoyalaka nshi yakɔ mɛnyaka ɔnɛ ndoko kɔlɔ sala afɛstɔ akɔ. Koko, sho kokaka kondja wetshelo ɔmɔtshi lo menda etena kakatatɛ Ase Isariyɛlɛ mbɔsa mbekelo ka l’ɔtɛmwɛlɔ w’Ase Edjibito ko vɔ ndjokiɔlɛ lokombo ɔnɛ: “Lushi la wuki le [Jehowa].” Ndo vɔ lawɔ “wakadjase dia nde la no” ndo “wakemala dia no wenye.” Koko akambo asɔ wakawasale wakasha Jehowa Nzambi nkɛlɛ ka mamba, ko nde akawasha dilanya dia wolo.—Etumbelu 32:1-10, 25-28, 35.
Dui dia Nzambi hadioshɛ ndoko dikambo. Ndoko diokanelo diakoka monga l’asa “[osase, NW]” wa wetshelo wa mɛtɛ la “udjimba” w’andja wa Satana; ndoko “ekesanelu” kakoka monga l’asa Kristo l’ɔtɛmwɛlɔ w’apanganu. Bible totɛka ɔnɛ: “Okone nyumo uma l’atei awo, nyuyatuli uma le wo, mbata [Jehowa], tanyunandaki engo ka kolo; ku dimi layunyulungula.”—2 Koreto 6:14-18.
Lam’ele Bible mbutɛka Akristo dia vɔ salaka paka Eohwelo ka Nyɔi ka Yeso keto—koko aha Pasaka—lâsɔ lushi lɔsɔ pombaka nɛmiyama. Ko lâsɔ, ngande wakokaso sala Eohwelo kakɔ lo woho wasungana na?
[Caption on page 5]
[Diombwɛlo di’osato wa lo lɛkɛ 5]
Difɛstɔ diakelɛ Ase Isariyɛlɛ ɔnɛ: “Lushi la wuki le [Jehowa]” diakasha Nzambi nkɛlɛ ka mamba