Wekelo 15

Tâkimanyiya dia Vɔ Sala Lolango la Nzambi

Lande na mbutɛ anto akina awui weyɛ lo mbeka? (1)

Akɔna akokayɛ sambisha lokumu l’ɔlɔlɔ? (2)

Shɛngiya yakɔna yakoka lɔkɛwɔ layɛ monga layɔ le anto akina? (2)

Lushi lakɔna layoyosambisha kâmɛ l’etshumanelo ka lo ngelo kanyu? (3)

1. Polo ndo kakianɛ, wɛ ambeka akambo efula w’amɛna oma lo Bible. Ewo kɛsɔ pombaka kosokoya dia wɛ mɛnya waonga wa lonto l’Okristo. (Efeso 4:22-24) Ewo kɛsɔ kekɔ ohomba dia wɛ kondja lɔsɛnɔ la pondjo. (Joani 17:3) Koko, anto akina wekɔ l’ohomba wa mboka lokumu l’ɔlɔlɔ woho wa ndo vɔ lawɔ kondja panda. Akristo tshɛ wa mɛtɛ pombaka sambisha anto akina. Ɔsɔ ekɔ dui diatofundɛ Nzambi.​—Romo 10:10; 1 Koreto 9:16; 1 Timote 4:16.

2. Wɛ kokaka tatɛ sambisha lo sawolaka l’asukanyi ayɛ awui w’ɛlɔlɔ weyɛ lo mbeka. Tɛ̂ nkumbo kayɛ, angɛnyi ayɛ, anyayɛ wa la kalasa, la anyayɛ wakamba la yɛ awui w’ɛlɔlɔ weyɛ lo mbeka. Onga onto ɔlɔlɔ ndo la lotutsha lam’awatɛyɛ awui akɔ asɔ. (2 Timote 2:24, 25) Ohɔ dia anto sɛdingolaka lɔkɛwɔ l’onto oleki nonga kɛnɛ kawatɛnde. Omalɔkɔ, lɔkɛwɔ layɛ l’ɔlɔlɔ mbeyaka kotola anto akina dia vɔ nonga losango lawatɛyɛ.​—Mateu 5:16; 1 Petero 3:​1, 2, 16.

3. L’edjedja ka wonya, wɛ mbeyaka ndjokotsha waonga walɔmbama dia tatɛ sambisha l’etshumanelo k’Ɛmɛnyi wa Jehowa ka lo ngelo kanyu. Ɔsɔ ekɔ nna di’ohomba efula lo ehamelo kayɛ. (Mateu 24:14) Ande ɔngɛnɔngɛnɔ wayonga la yɛ lam’ayoyokoka kimanyiya onto okina dia nde lawɔ koma okambi wa Jehowa ndo ndjokondja lɔsɛnɔ la pondjo lee!​—1 Tesalonika 2:19, 20.