Wekelo 2

Nzambi ekɔ ɔngɛnyi ayɛ woleki tshɛ dimɛna

Monga ɔngɛnyi wa Nzambi ndeka akambo akina tshɛ dimɛna. Nzambi ayoketsha woho wakokayɛ monga l’ɔngɛnɔngɛnɔ ndo la lotui tshitshi. Nde ayokotshungola oma l’awui wa kashi ndo oma l’etsha wakoka kela mpokoso. Nde ayoka alɔmbɛlɔ ayɛ. Nde ayokokimanyiya dia wɛ monga la wɔladi wa l’otema ndo dia wɛ kitsha wɛkamu ayɛ le nde. (Osambu 71:5; 73:28) Nzambi ayokosukɛ lo tena di’asui. (Osambu 18:18) Ndo Nzambi ekɔ lo kosha woshasha ande wa lɔsɛnɔ la pondjo.—Romo 6:23.

Naka wɛ mamasana la Nzambi, kete wɛ ayomamasana ndo l’angɛnyi ande. Ndo vɔ lawɔ wayokoma angɛnyi ayɛ. Vɔ wayonga oko ananyɔ la akadiyɛyɛ. Vɔ wayɔngɛnangɛna kêtsha awui wa Nzambi, kokimanyiya ndo kokeketsha.

Sho hatɛdimi la Nzambi. Lam’ayangayɛ monga ɔngɛnyi wa Nzambi, wɛ pombaka shihodia dui dimɔtshi di’ohomba. Monga ɔngɛnyi wa Nzambi hɛnya ɔnɛ tambɛdima la nde. Nde tôlɛ, toleka lomba ndo nkudu la fwa. Nde mbakoka monga Omboledi aso. Ɔnkɔnɛ, naka sho nangaka monga ɔngɛnyi ande, kete sho la dia mbohokamɛka ndo ntsha kɛnɛ katotɛnde. Ngasɔ mbayotohomɔka lokolo l’ɔlɔ loto nshi tshɛ.—Isaya 48:18.