Wekelo 3

Ekɔ ohomba wɛ mbeka awui wa Nzambi

Dia monga ɔngɛnyi wa Nzambi, wɛ la dia mbeka awui ande. Onde angɛnyi ayɛ mbeyaka lokombo layɛ ndo kêtakalɔ? Eelo. Nzambi lawɔ nangaka wɛ mbeya lokombo lande ndo wɛ mbêtakalɔ. Lokombo la Nzambi ko Jehowa. (Osambo 83:18, NW; Mateu 6:9) Wɛ pombaka nto mbeya awui walangande la wahandalange. Ekɔ ohomba wɛ mbeya angɛnyi ande l’atunyi ande. Dia ndjêya onto, paka nshi mɔtshi yambeta. Bible totɛka ɔnɛ kanga lomba ndjâtshungolɛka etena ka mbeka awui wa Jehowa.—Efeso 5:15, 16.

Angɛnyi wa Nzambi ntshaka awui wɔngɛnyangɛnya. Ohokanyiya yema dikambo di’angɛnyi ayɛ. Naka wɛ hasɛnɛ la wɔ dimɛna ndo ntshaka awui wahetshawɔ, onde vɔ wayotetemala monga layɛ angɛnyi? Kema! Lo yoho yakɔ yâmɛ, naka wɛ nangaka monga ɔngɛnyi wa Nzambi, kete ekɔ ohomba wɛ ntshaka awui wɔngɛnyangɛnya.—Joani 4:24.

Aha ɛtɛmwɛlɔ tshɛ mbokanya anto la Nzambi. Yeso, ɔnɛ lele ɔngɛnyi wa Nzambi woleki tshɛ, akatɛkɛta dia mboka hiende. Kɛmɔtshi kekɔ enanɔnanɔ ndo anto wekɔ tɔɔ lɔkɔ. Tɔ tɔlaka l’elanyelo. Mboka kekina kekɔ ka mpika, ndo anto yema tshitshɛ tsho mbele lɔkɔ. Tɔ tɔlaka lo lɔsɛnɔ la pondjo. Kɛsɔ mɛnyaka ɔnɛ, naka wɛ nangaka monga ɔngɛnyi wa Nzambi, kete wɛ pombaka mbeka yoho y’ɔlɔlɔ ya mbɔtɛmɔlaka.—Mateu 7:13, 14.