Wekelo 12

Kakɔna keeta lam’avɔ onto?

Nyɔi ekɔ otshikitanu wa lɔsɛnɔ. Nyɔi ekɔ oko djɔ ya baku. (Joani 11:11-14) Wanɛ wambovɔ hawokoke mboka, mɛna, tɛkɛta, kana kanyiya dui dimɔtshi. (Undaki 9:5, 10) Ɛtɛmwɛlɔ wa kashi mbetshaka ɔnɛ wanɛ wambovɔ ntshɔka l’andja wa dimu dia tɔsɛna kâmɛ la watshɛwɔ. Koko Bible hate ngasɔ.

Wanɛ wambovɔ hawokoke tokimanyiya kana totshɛ kɔlɔ. Anto efula ntshaka sɛlɛmɔnyi mɔtshi kana nambola diangɔ dimɔtshi diafɔnyawɔ ɔnɛ diayɔngɛnyangɛnya wanɛ wambovɔ. Dui sɔ hadiɔngɛnyangɛnya Nzambi nɛ dia diɔ sukɛka Satana lo kashi kande. Diɔ hadiɔngɛnyangɛnya kânga wanɛ wambovɔ, nɛ dia waya bu la lɔsɛnɔ nto. Hatokoke tɛmɔla kana mboka edo wɔma. Tɔtɛmɔlake paka Nzambi.—Mateu 4:10.

Wanɛ wakavu wayonga la lɔsɛnɔ nto. Jehowa ayolola wanɛ wakavu dia vɔ ndjɔsɛna lo paradiso ka la nkɛtɛ. Lo nshi yayaye mbayosalema dui sɔ. (Joani 5:28, 29; Etsha 24:15) Oko wakokayɛ memula onto oma lo djɔ, mbakoka Nzambi memula wanɛ wakavu.—Mako 5:22, 23, 41, 42.

Kanyi y’ɔnɛ hatovu ekɔ kashi kakadianganya Satana Diabolo. Satana l’ɛdiɛngɛ ande tshutshuyaka anto dia vɔ fɔnya ɔnɛ dimu kana ekishi a wanɛ wavɔ wekɔ la lɔsɛnɔ ndo vɔ mbatatsha anto hemɔ ndo mbâsoya. Satana kesaka anto, tena dimɔtshi l’ekimanyielo k’alɔ kana ka waɛnɛlɔ. Jehowa hetawɔ wanɛ wayanga dia tɛkɛta la wanɛ wakavu.—Euhwelu k’Elembe 18:10-12.