WEKELO 29

Ngande wayalaso etena kavɔso?

Okanda wa l'akatshi

Onde wɛ atavushaka onto ɔmɔtshi lokayɛ ngandji? Lo etena ka paa kɛsɔ, wɛ mbeyaka ndjambola ɔnɛ: ‘Ngande wayalaso etena kavɔso? Onde tekɔ l’elongamelo ka tayɛna wakiso wa ngandji wakavu lushi lɔmɔtshi?’ Lo wekelo ɔnɛ ndo wayela, tayɔsɛdingola ekadimwelo wakeketsha washa Bible.

1. Ngande wayalaso etena kavɔso?

Yeso akɛdika nyɔi la djɔ ya baku. Onto lele lo djɔ ya baku heye akambo weta lo dihole diende. Ngande wafɔna nyɔi la djɔ? Naka onto ambovɔ, nde hoke nto kandji. Nde hayaoke opoko, oyadi ngandji ka ngande kakandokaka angɛnyi ande ndo nkumbo kande. Bible mbutaka ɔnɛ: “Wanɛ wambovɔ haweye ndooko dikambo.”—Adia Ondaki 9:5.

2. Wahɔ akɔna wakondjaso lo mbeya kɛnɛ kele mɛtɛ lo dikambo dia nyɔi?

Anto efula mbokaka nyɔi ndo edo wɔma! Koko wɛ kokaka nkondja ekeketshelo oma lo kɛnɛ kata Bible lo dikambo dia nyɔi. Yeso akate ate: “Akambo wa mɛtɛ wayonyotshungola.” (Joani 8:32) Otshikitanyi la kɛnɛ ketsha ɛtɛmwɛlɔ ɛmɔtshi, Bible hetsha di’onto ekɔ l’anima wahavu wasɛna l’ɔkɔngɔ wa nyɔi. Laasɔ, ndooko onto lasowa l’ɔkɔngɔ wa nyɔi kande. Ndo nto, lam’ele wanɛ wavɔ haweye ndooko dikambo, vɔ hawokoke tosalɛ kɔlɔ. Ɔnkɔnɛ, ndooko ohomba nsala akambo amɔtshi dia tutsha nkɛlɛ kawɔ oya le so, kana mbaatɛmɔla ndo hatohombe nɔmba lo dikambo diawɔ.

Anto amɔtshi mbutaka dia vɔ kokaka nsawola la wanɛ wavɔ. Koko dui sɔ hadiokoke salema. Oko wodiɛnyiso, wanɛ wavɔ “haweye ndooko dikambo.” Wanɛ wafɔnya dia vɔ sawolaka la wakiwɔ wa ngandji wakavu, wekɔ lo nsawola ondo l’ɛdiɛngɛ walɔta alemba wa wanɛ wakavu. Ɔnkɔnɛ, mbeya kɛnɛ kele mɛtɛ lo dikambo dia nyɔi tokokɛka oma le ɛdiɛngɛ. Jehowa tewolaka diaha sho nsawola la wanɛ wakavu nɛ dia nde mbeyaka dia diɔtɔnganelo dia l’ɛdiɛngɛ diayotosalɛ kɔlɔ.—Eohwelo k’Ɛlɛmbɛ 18:10-12.

NYOMOTSHIMOLA

Eka awui akina wendana la kɛnɛ ketsha Bible lo dikambo dia nyɔi, ndo nkeketsha mbetawɔ kayɛ le Nzambi ka ngandji kahasoya wanɛ wavɔ.

Pami kɛmɔtshi nde l’anande ahende wodjashi l’okala l’otanda wa wadɛnde. Angɛnyi ndo ase nkumbo wamboya dia ndjakeketsha ndo dia ndjasukɛ.

3. Yanga dia mbeya nganɛ wele wanɛ wavɔ

L’andja w’otondo, anto wekɔ la waetawɔ wotshikitanyi lo kɛnɛ kendana la woho wayalaso etena kavɔso. Lo mɛtɛ, aha waetawɔ asɔ tshɛ mbakoka monga mɛtɛ.

Ko waetawɔ akɔna wele l’anto efula wa l’ɛtshi kayɛ ka nkɛtɛ lo kɛnɛ kendana la eongelo ka wanɛ wavɔ?

Dia mbeya kɛnɛ ketsha Bible, nyende VIDƐO.

VIDƐO: Ngande wele wanɛ wavɔ?—Etenyi (1:19)

Osato w’oma lo vidɛo yata ɔnɛ: ‘Ngande wonga anto wavɔ?—Etenyi.’ Esato womamatanyi: 1. Wakalashisha odo lo mbeto ka lopitadi. 2. Pami kɛmɔtshi oladi djɔ lam’asa anto ahende etena katawatshu lo kawolo.

Nyadia Ondaki 3:20, ndo oma laasɔ, nyɔkɛtshanya ambola anɛ:

Lo ndjela divɛsa nɛ, ngande wayala onto etena kavɔnde?
Onde etenyi kɛmɔtshi ka demba diande tetemalaka nsɛna l’ɔkɔngɔ wa nyɔi?

Bible totɛka awui wendana la nyɔi ka Lazaro, ɔngɛnyi ɔmɔtshi w’oshika waki Yeso. Etena kadianyu Joani 11:11-14, nyolembete kɛnɛ kakate Yeso lo dikambo dia woho waki Lazaro. Oma laasɔ, nyɔkɛtshanya ambola anɛ:

Yeso akɛdika nyɔi la na?
Wɛdikelo ɔsɔ atotɛwɔ lo kɛnɛ kendana la eongelo k’anto wavɔ?
Ngande wayaokayɛ lo kɛnɛ kata Bible lo dikambo dia nyɔi?

4. Sho kondjaka wahɔ lo mbeya kɛnɛ kele mɛtɛ lo dikambo dia nyɔi

Mbeya kɛnɛ kele mɛtɛ lo dikambo dia nyɔi totshungolaka oma lo wɔma wa wanɛ wavɔ. Nyadia Ondaki 9:10, ndo oma laasɔ, nyɔkɛtshanya dimbola nɛ:

Onde onto lambovɔ koka tosalɛ kɔlɔ?

Akambo wa mɛtɛ wa lo Bible koka tokokɛ oma lo dietawɔ di’ɔnɛ pombaka tutsha nkɛlɛ ka wanɛ wavɔ kana mbaatɛmɔla. Nyadia Isaya 8:19 ndo Ɛnyɛlɔ 4:11, ndo oma laasɔ, nyɔkɛtshanya dimbola nɛ:

Oko le yɛ, ngande wɔsa Jehowa onto latɛmɔla kana layanga ekimanyielo oma le onto ɔmɔtshi lakavu?

Esato womamatanyi: Mbekelo yendana la ntɛmɔla wanɛ wakavu. 1. Pami kɛmɔtshi mbika adwe ndo ekɔ lo nɔmba la ntondo ka dombo ndo ekɔ lo nambola mbo ya ndɛ. 2. Apami asato wanɔ lokombo l’ashidi. 3. Olui w’anto watakɛndakɛnda, vɔ wakalɔtshi waa maskɛ ndo watɛmbɛ akandja w’ɛtɛ w’anto lo Lushi la wanɛ wakavu. — Akambo wa mɛtɛ wendana la nyɔi totshungolaka oma lo mbekelo y’ashidi yahangɛnyangɛnya Jehowa

5. Mbeya kɛnɛ kele mɛtɛ lo dikambo dia nyɔi tokeketshaka

Anto efula waketshama dia etena kayowovɔ, vɔ wayosowa l’ɔtɛ w’awui wa kɔlɔ wakawasale nshi yakiwɔ la lɔsɛnɔ. Koko ekɔ dui di’ekeketshelo dia mbeya dia ndooko onto lasowa l’ɔkɔngɔ wa nyɔi kande, oyadi kaanga onto lakasale awui wa kɔlɔ efula. Nyadia Rɔmɔ 6:7, ndo oma laasɔ, nyɔkɛtshanya dimbola nɛ:

Naka nyɔi tshungolaka onto oma lo pɛkato, oko wadishaso lo Bible, onde wɛ fɔnyaka di’ekɔ onto ɔmɔtshi lasowa l’ɔtɛ wa munga yakandasale lo nshi yakete?

Lo yɛdikɔ yayotoleka mbeya Jehowa, mbayotoleka nshihodia dia nde hasoya pondjo wanɛ wakavu. Nyadia Eohwelo k’Ɛlɛmbɛ 32:4 ndo 1 Joani 4:8, ndo oma laasɔ, nyɔkɛtshanya ambola anɛ:

Onde Nzambi kele la waonga woshilami l’avɛsa anɛ koka mbetawɔ dia nsoya wanɛ wakavu?
Onde wɛ ambɛna dia kɛnɛ kele mɛtɛ lo dikambo dia nyɔi keketshaka? Lande na?

ANTO AMƆTSHI MBUTAKA ƆNƐ: “Lekɔ la wɔma wa kɛnɛ kayokomɛ lam’ayomovɔ.”