TSHAPITA 33

Yeso Koka Tokokɛ

ETENA kakakome Yeso opalanga ndo kakawawotɛ woho wakawokokɛka lam’akinde eke dikɛnda, onde wɛ fɔnyaka dia nde akalɔmbɛ Jehowa ndo akawosha losaka?. . . Oko le yɛ, kakɔna kele ondo Yeso akayotɛka Mariya nde la Yɔfɛsu l’ɔkɔngɔ lam’akandayeyaka dia vɔ wakakokɛ lɔsɛnɔ lande lo ndawɔ la nde otsha l’Edjibito na?. . .

Lo mɛtɛ, Yeso aya bu nto ɔn’ashashi. Ndo nde hayɔsɛna nto lanɛ la nkɛtɛ oko wakandasɛnaka. Ko onde wɛ hɛnyi dia polo ndo nshi nyɛ, anto amɔtshi fɔnyaka ɔnɛ Yeso eke paka oko ɔn’ashashi letanyishawɔ lo dihole dialeshawɔ waa nyama diangɔ?. . . Sho mɛnaka dikambo sɔ lo nshi ya fɛtɛ ka Nɔɛlɛ yɛnyawɔ Yeso l’ahole efula l’esato oko ɔn’ashashi.

Kânga mbele Yeso hayɔsɛna lanɛ la nkɛtɛ, onde wɛ mbetawɔka dia nde ekɔ la lɔsɛnɔ?. . . Eelo, nde akolwama oma lo nyɔi ndo nde ekɔ kakianɛ Nkumekanga kele la nkudu efula l’olongo. Oko le yɛ, Yeso akokande sala dia kokɛ wanɛ wôkambɛ na?. . . Lam’aki Yeso lanɛ la nkɛtɛ, nde akɛnya woho wakokande kokɛ wanɛ wawoka ngandji. Tende woho wakandasale dikambo sɔ lushi lɔmɔtshi lam’akinde lo masuwa nde l’ambeki ande.

Wonya aya dikɔlɔ dia yɔɔ l’ɔkɔngɔ wa Yeso ndakanya lushi l’otondo suke la Ndjale ka Ngalileya, mbut’ate l’oduwa wa woke efula wele l’otale wa kilɔmɛtɛlɛ oko 20 ndo kilɔmɛtɛlɛ 12 lo wekeke. Nde akatɛ ambeki ande l’etena kɛsɔ ate: “Tuteho la wedi w’uduwa.” Ɔnkɔnɛ, vɔ wakɔtɔ lo masuwa ndo wakatatɛ tenyanya oduwa akɔ. Yeso akalɛmbɛ efula, ɔnkɔnɛ nde akatshu lo dihole dia l’ɛse ka waato a woke ndo nde aketama lo okengete ɔmɔtshi. Kombeta edja nde akalale djɔ ya wolo.

Ambeki ande kondala djɔ nɛ dia vɔ wakahombe tadukaka waato akɔ wa woke. Lo tshanda mɔtshi, vɔ wakatatshɔka tshɛ dimɛna efula, koko oma lâsɔ lɔpɛpɛ la wolo lakatatɛ la fufa. Lɔpɛpɛ lɔsɔ lakaleke fufa wolo efula ndo asuku w’ashi wakatalekaka monga wolo. Asuku w’ashi asɔ wakatatɛ mbɔtɔ lo waato wa woke ɔsɔ ndo waato akɔ wa woke wakatatɛ ndola l’ashi.

Ambeki waki la wɔma ɔnɛ wayanga mumbɔ. Koko Yeso komboka wɔma. Nde aki paka lo djɔ l’etenyi ka l’ɛse ka waato a woke ɔsɔ. L’ekomelo, ambeki wakemula Yeso ndo wakawotɛ vate: ‘Ombetsha, Ombetsha, otokoke; tekɔ suke la mvɔ la lɔpɛpɛ lɔnɛ.’ Yeso akemala ndo akatɛ lɔpɛpɛ ndo asuku w’ashi ate: ‘Nyolɛmbɔhale.’

Ko wonya akɔ wâmɛ, lɔpɛpɛ lɔsɔ kofufa nto ndo oduwa wakɔlama ki. Ambeki wakâmbe efula. Ndoko lushi lakawɛnyi dikambo dia woho ɔsɔ. Wakatatɛ mbutanɛ ɔnɛ: “Akona one latela ndu ngimbi ndu ashi, ku vo nkitanyia diui diandi?”​—⁠Luka 8:​22-25; Mako 4:​35-41.

Onde wɛ mbeyaka ele Yeso?. . . Onde wɛ mbeyaka oma lɛnɛ akandakondja nkudu k’efula kele lande?. . . Ambeki takawahombe mboka wɔma lam’aki Yeso kâmɛ la wɔ nɛ dia nde aki onto lotshikitanyi l’anto akina. Nde akakokaka sala awui wa diambo efula waki kokokaka onto okina sala. Lotsha kotɛ dikambo dikina diakandasale mbala kɛmɔtshi lo ndjale kaki l’asuku efula.

Dikambo sɔ diakayosalema l’ɔkɔngɔ lushi lokina. La dikɔlɔ dia lushi lɔmɔtshi, Yeso akatɛ ambeki ande dia vɔ mbɔtɔ lo waato ɔmɔtshi wa woke woho wa vɔ ntshɔ ntondo kande otsha lo wedi okina wa ndjale. Oma lâsɔ Yeso akatshu otsha lo dikona ndamɛ. Ɔsɔ aki dihole dia ki diakandakoke nɔmba Jehowa Nzambi, She.

Ambeki wakɔtɔ lo waato wa woke ɔsɔ ndo wakatatɛ tenyanya ndjale. Koko kombeta edja, lɔpɛpɛ lakatatɛ fufa. Lɔ lakafufe wolo efula. Etena kɛsɔ ko wonya ambodja. Apami asɔ wakɔshi kahi yawɔ ndo wakamɛ duka. Koko vɔ kɔsɛmɛ etale nɛ dia lɔpɛpɛ lakafufaka wolo oma lɛnɛ akawatatshɔkaka. Waato a woke ɔsɔ wakatakalolaka ɛkɔngɔkɔngɔ otsha l’asuku wa weke efula ndo ashi wakatɔtɔka lɔkɔ. Apami asɔ wakasale tshɛ dia koma l’omamu koko takawakoke.

Yeso aki paka ndamɛ lo dikona. Nde akaviya lɛkɔ. Koko etena kɛsɔ nde akakoke mɛna di’ambeki ande waya lo wâle l’atei w’asuku wa wolo. Ɔnkɔnɛ, nde akaholɔ oma lo dikona oya l’omamu wa ndjale. Yeso akalange kimanyiya ambeki ande, ɔnkɔnɛ, nde akatatɛ la kɛndakɛnda otsha le wɔ lâdiko w’asuku w’ashi!

Kakɔna kakoka kokomɛ naka wɛ mona dia kɛndakɛnda lâdiko di’ashi na?. . . Wɛ ayodinda ndo wɛ mbeyaka mvɔ. Koko Yeso tshikitana l’anto akina. Nde ekɔ la wolo wa lânde. Yeso akakɛndakɛnda etenyi k’otale efula dia koma lɛnɛ aki waato a woke ɔsɔ. Ndo waato ɔsɔ waki suke la mumbɔ lam’akɛnyi ambeki Yeso ayaye oya le wɔ lâdiko di’ashi. Koko takawakoke mbetawɔ kɛnɛ kakawɛnaka kɛsɔ. Vɔ wakandama la wɔma w’efula ndo wakatatɛ mbida ekoko wa wɔma. Koko Yeso akawatɛ ate: ‘Nyonge la dihonga, tanyokake wɔma, dimi mbayaye.’

Kam’akɔtɔ Yeso lo waato ɔsɔ, lɔpɛpɛ lakɔlala. Ambeki wakambe nto efula. Vɔ wakakusama la ntondo ka Yeso ndo wakate ɔnɛ: ‘Wɛ mɛtɛ ekɔ Ɔna Nzambi.’​—⁠Mateu 14:​22-33; Joani 6:​16-21.

Kema sɛna l’etena kɛsɔ ndo mɛna Yeso asala awui wa ngasɔ otonga dikambo dia dimɛna efula?. . . Onde wɛ mbeyaka lande na kakasale Yeso ahindo asɔ?. . . Nde akasale awui asɔ nɛ dia nde akokaka ambeki ande ngandji ndo nde akalange mbâkimanyiya. Koko nde akasale ahindo asɔ dia mɛnya nto nkudu k’efula kaki lande ndo kayokamba lande lo nshi yayaye oko Omboledi wa lo Diolelo diaki Nzambi.

Kânga nshi nyɛ, Yeso kambaka mbala efula la nkudu kande dia kokɛ ambeki ande oma lo welo wadja Satana dia mbâshimba di’aha vɔ mbewoya anto akina awui wendana la Diolelo diaki Nzambi. Koko Yeso hakambe la nkudu kande dia kokɛ ambeki ande di’aha vɔ mboka hemɔ kana dia mbakɔnɔya lam’ewɔ la hemɔ. Kânga apɔstɔlɔ waki Yeso tshɛ wakayokomɛka la mvɔ. Jakɔba y’ɔnango Joani akadiakema ndo Joani ndamɛ akadjama lo lokanu.​—⁠Etsha 12:2; Enyelo 1:⁠9.

Ngasɔ mbediɔ ndo ɛlɔ kɛnɛ. Kânga anto wakambɛ Jehowa kana wanɛ wahokambɛ tshɛ tataka hemɔ ndo mvɔka. Koko kem’edja, lam’ayolɛ Yeso oko Nkumekanga ka lo lowandji laki Nzambi, awui wayotshikitana. Etena kɛsɔ ndoko onto layohomba mboka wɔma nɛ dia Yeso ayokamba la nkudu kande lo wahɔ w’anto tshɛ wele l’okitanyiya otsha le nde.​—⁠Isaya 9:​6, 7.

Avɛsa akina wɛnya nkudu k’efula kele la Yeso, ɔnɛ lele Nzambi ambowodja Omboledi wa lo Diolelo diakinde vɔanɛ: Danyele 7:​13, 14; Mateu 28:18; ndo Efeso 1:​20-22.

[Esato wa lo lɛkɛ 172]

Ngande wɛnayɛ Yeso, oko Nkumekanga kele la nkudu kana oko ɔn’ashashi lele bu l’ekimanyielo?

[Osato wa lo lɛkɛ 173]

Kakɔna katɛ Yeso lɔpɛpɛ ndo asuku?

[Osato wa lo lɛkɛ 174]

Lande na kakasale Yeso ahindo?

[Osato wa lo lɛkɛ 176]

Ngande wakokɛ Yeso ekambi ande ɛlɔ kɛnɛ?