Tshapita 53

Wambokombola owandji woleki anto

ANTO wamamba heyama lam’ɛnyiwɔ Yeso ambolesha nunu di’anto. Wota vate: ‘Mɛtɛ, ɔnɛ mbele omvutshi waki la dia ndja l’andja.’ Vɔ wambɛna ɔnɛ Yeso pombaka ndjâla omvutshi akɔ woleki Mɔsɛ woke ndo ayoyala owandji w’ɔlɔlɔ efula. Ɔnkɔnɛ, vɔ wambodja sheke dia monda ko mbodja nkumekanga.

Koko Yeso ekɔ lo mbeya tokanyi tawɔ. Diɔ diakɔ diamondɔngɔ esadi eto ɔnɛ watokoyomunda la wolo. Nde ambɔkɛndja elui w’anto ndo ambotɛ ambeki ande dia vɔ mbɔtɔ lo wâto ko ntshɔ otsha la Kapɛrɛnauma. Oma lâsɔ, nde ambotshɔ otsha lo dikona dia tɔlɔmba. Wonya ambodja, koko Yeso ekɔ paka ndamɛ lɛkɔ.

Yema la ntondo ka wonya mpotɔ, Yeso ambenda oma lo dikona diende ko ambɛna ndjale kasutshasutshama la lɔpɛpɛ la wolo. Lo wɛdi wa bwe, l’etena kɛnɛ ko ngɔndɔ aya suke la monga emuma nɛ dia difɛstɔ di’Elekanelo diaya suke, Yeso ambɛna ambeki ande lo wâto wayahetetala la nduka lâdiko di’asuku w’ashi. Vɔ wamboduka la wolo awɔ tshɛ.

Lam’ɛnyinde dikambo sɔ, Yeso amboholɔ oma lo dikona ko ambotatɛ kɛndakɛnda l’atei w’asuku w’ashi otsha lo wâto. Wâto ambɔsɛkɔ oko kilɔmɛtɛlɛ tshanu kana shamalo ko Yeso ambokoma lalewɔ. Koko, nde ambotetemala ntshɔ wate kana oko onto layanga mbalekana. Lam’owɛnyiwɔ, ambeki wamboda ekoko vate: ‘He edimu!’

Ko Yeso ambâtutsha asolo, awatɛ ate: ‘Toko dimi; tanyokake wɔma.’

Koko Petero ate: “Khumadiondjo, naka we, umvuteli keli ndji le ye ladiku dia ashi.”

Yeso mbôkadimolande ate: “Yaka!”

Petero ɔnɛ aholɔnde oma lo wâto, ko ambotatɛ kɛndakɛnda lâdiko di’ashi otsha le Yeso. Koko lam’ɛnyinde lɔpɛpɛ la wolo, nde ambôka wɔma, ambotatɛ ndjita, ko nde ambâwana ate: ‘Nkumadiɔndjɔ, nda ombitsha!’

Yeso mbasembolande lonya lande esadi, ko nde mbokimɛ, awotɛ ate: ‘Wɛ kanga mbetawɔ ka tshitshɛ, lande na akayadji tamu?’

Lam’ɔtwɛ Yeso nde la Petero lo wâto, lɔpɛpɛ lambɔlama, ko ambeki wamamba heyama. Ko onde vɔ kokaka mamba? Otondoyala vɔ wakalembetɛ “[kitshimudi ya mapa, NW]” lo shihodia dihindo dia woke diaki Yeso oma la sala lam’akandalesha nunu di’anto la mapa etanu la tosese tohende, tshike tôtowamba dia mbɛ̂na ayakɛndakɛnda lâdiko di’ashi ko ambɔladia lɔpɛpɛ. Koko, l’etena kɛnɛ, ambeki wambotatɛ tombola Yeso wata vate: ‘Wɛ mɛtɛ ekɔ Ɔna Nzambi.’

Yema l’ɔkɔngɔ diko, vɔ wambokoma la Ngɛnɛsarɛta, oswe wa dimɛna efula ndo w’ɛtɛtɔ wosukanyi la Kapɛrɛnauma. Vɔ wambemɛ wâto lâwɔ. Koko lam’otumbiwɔ l’okongo, anto wambeya Yeso ko wambotshɔ otsha lo ngelo ya l’emamu dia toyanga ase hemɔ. Lam’awaelawɔ lo tange yawɔ ndo lam’anandawɔ ohembo oto wa dihɔndɔ diande, hemɔ yawɔ tshɛ shilaka.

L’etena kɛnɛ, nunu di’anto diakalesha Yeso lo dihindo wambɛna ɔnɛ nde ambotshɔ. Ɔnkɔnɛ, lam’oye wâto wa totshitshɛ oma la Tibɛriyadɛ, vɔ wambɔtɔ lɔkɔ ko wambotshɔ otsha la Kapɛrɛnauma dia tayangaka Yeso. Vɔ wambotowɛna ko wambowombola vate: “Umbetsha, unya [akɔna] akayayi lindu?” Oko wayangaso diɛna, Yeso ayowahangwɛ. Joani 6:14-25; Mateu 14:22-36; Mako 6:45-56.

▪ L’ɔkɔngɔ wa Yeso ndesha nunu di’anto lo dihindo, anto alangawɔ sala lande?

▪ Kakɔna kambɛna Yeso oma lo dikona diende, ndo kakɔna kamondosala?

▪ Lande na kahakoke ambeki mamba akambo wambosala Yeso?

▪ Kakɔna kotshami lam’otumbiwɔ oma l’ashi?