ƆKƆNDƆ 112
Wambombɔ la wâto lo disɛnga
OHÊNDA! wâto wɛ̂ngɛnga! Wâtatɛ bɛtshi bɛtshi! Onde wɛ ekɔ lo mɛna anto ango wambɛ l’ashi? Amɔtshi wamboshila la koma l’okongo. Shi Paulo ongo ele l’atei awɔ? Tênde kɛnɛ kakôkomɛ.
Ohɔ dia Paulo akatshikala lo lokanu la Kayisariya ɛnɔnyi ehende. L’ɔkɔngɔ diko, nde l’ase lokanu amɔtshi wakadjama lo wâto ɔmɔtshi, ko wakatshu otsha la Rɔmɔ. Lam’akawete l’omamu wa disɛnga dia Kɛrɛtɛ, lɔpɛpɛ la mamba lakatatɛ pɛpa. Lɔpɛpɛ lakapɛpɛ wolo efula lo yɛdikɔ yele ase wâto kokoka sembola wâto. Vɔ kokoka mɛna wonya la yanyi kana tɔ̂tɔ l’otsho. Nshi efula yakete ko wanɛ waki lo wâto wakayɛnaka ɔnɛ diakiwɔ amboshila.
L’etena kakɔ, Paulo akemala, akawatɛ ate: ‘Ndoko ɔtɔi a l’atei anyu layoshisha lɔsɛnɔ; paka wâto oto mbayohandjɔ. Nɛ dia l’otsho w’etshi ɔnɛ, ondjelo ɔmɔtshi waki Nzambi akaye le mi ko akambute ate: “Paulu, tukaki woma; diele laye dia memala la ntundu ka Kayisa. Enda, [Nzambi ayokokɛ anto, NW] tshe watatshu laye lu watu.”’
Oya l’atei a deke wa lushi la 14, l’ɔkɔngɔ wa lɔpɛpɛ tatɛ la pɛpa, ase wâto wakɛnyi dia dingunda di’ashi diakatalekaka kitakita tsho! Lam’akawoke wɔma l’ɔtɛ w’ɔnɛ wâto atokatɛ l’ave l’otsho, vɔ wakatambiya nkongo l’ashi. La wedi a pindju vɔ wakɛnyi diɛngɔ dimɔtshi. Vɔ wakɔshi tɛdikɔ dia pemba dia kotola wâto otsha lo diɛngɔ diakɔ.
Lam’akawasukana suke la diɛngɔ diakɔ, wâto wakatɛtama lo lɔsɛnga ko wakemala su. Asuku wakatatɛ la kɔmɔla wâto, ko vɔ wakatatɛ mbatatɛ bɛtshi bɛtshi. Owandji w’alembe akate ate: ‘Onto tshɛ leya osale ambe l’ashi ntondo kele akome l’okongo. Akina wayonyoyela l’ɔkɔngɔ, wayalɛndalɛnda l’abaya w’oma lo wâto.’ Ko vɔ wakasale ngasɔ. Lo yoho shɔ mbakake anto 276 waki lo wâto oko wakadilake ondjelo.
Disɛnga diakɔ lokombo ladiɔ Malata. Anto wa lɛkɔ waki anto w’ɛlɔlɔ efula, ko vɔ wakakokɛka wanɛ waki oma lo wâto. Lam’akashile lɔpɛpɛ, Paulo akɔtɔ lo wâto okina ko akatshu otsha la Rɔmɔ.