ƆKƆNDƆ 111
Ɔlɔngɔlɔngɔ wakanyingɔnyingɔka djɔ
YEE! Maama! Kakɔna kambotomba lanɛ na? Onde ɔlɔngɔlɔngɔ ɔnɛ wetami lo kɛtɛ ambohomɔ wolo? Ohênda! pami kɛmɔtshi kayatombe oma lo luudu lokombo lande Paulo! Hɛnyi ndo Timɔtɛ lâwɔ? Shi ɔlɔngɔlɔngɔ akɔ akakwɛ oma lo didishi?
Eelo, kɛsɔ kakasalema. Paulo aki lo mbisha ambeki waki la Tɔrɔa dako. Nde akeyaka dia nde ayetsha edja efula dia ndjɛnana lawɔ nɛ dia la wedi a pindju nde akahombe mbɔtɔ lo wâto otsha lo dihole dimɔtshi. Diɔ diakɔ diakandatalola dako diande edja ndo l’atei a deke.
Ɔlɔngɔlɔngɔ ɔnɛ lakawelɛka Eutukɔ akadjasɛ lo didishi, ndo nde aki lo nyingɔnyingɔ djɔ. Nde akakɔ oma lo didishi, oma lo luudu la sato la la diko oya la kɛtɛ! Diɔ diakɔ diɛnayɛ anto ango wanyanga efula. Etena kakawatɔngɔna ɔlɔngɔlɔngɔ akɔ, dui diakawokaka wɔma mbakatshama. Nde akashile la mvɔ!
Lam’akɛnyi Paulo dia ɔlɔngɔlɔngɔ amboshila la mvɔ, nde aketama lâdiko diande ko akokumbatɛ. Ko nde akate ate: ‘Tanyoyakiyanyake. Nde ekɔ ki!’ Ko nde akasɛnɛ! Aki dihindo! Paulo akawolola! Anto tshɛ wakangɛnangɛna efula.
Vɔ tshɛ wakadɛ otsha la diko ko wakatosalaka dambo. Paulo akakɔlamela la mbisha dako diande edja ndo la lɔkɛsɛ. Koko wɛ kokaka ndjashikikɛ dia Eutukɔ kôndjolala djɔ nto! L’ɔkɔngɔ diko, Paulo, Timɔtɛ la wanɛ wakatɛngɔlaka kâmɛ lawɔ wakatshu dia tɔtɔ lo wâto. Onde wɛ mbeyaka otsha lɛnɛ akawatatshɔka?
Paulo oma la shidiya lɔkɛndɔ lande la sato l’esambishelo, ndo nde ambɔtɔ mboka otsha lakawɔ. Lo lɔkɛndɔ lɔsɔ, Paulo akadjasɛ ɛnɔnyi esato l’osomba w’Ɛfɛsɔ. Diɔ diakɔ diele, lɔkɛndɔ lɔsɔ lakaleke lɔkɛndɔ la hende otale.
L’ɔkɔngɔ wa vɔ mumɔ oma la Tɔrɔa, wâto akemala yema la Milɛtɔ. Milɛtɔ la Ɛfɛsɔ hawanganyi etale efula, omalɔkɔ, Paulo akatome anto otsha l’etshumanelo ka l’Ɛfɛsɔ dia dikumanyi ndja oya la Milɛtɔ dia nde tâsawodi lawɔ mbala ka komelo. L’ɔkɔngɔ w’akambo asɔ, lam’akakoke etena ka wâto monɛ, vɔ wakanyange efula dia mɛna Paulo otatshu!
L’ɔkɔngɔ diko, wâto wakakome la Kayisariya. Etena kakadjasɛka Paulo lɛkɔ lo luudu lɔmɔtshi laki ombeki welɛwɔ ɔnɛ Filipɔ, omvutshi Angabo akawewola. Nde akawotɛ dia nde ayotodjama lo lokanu lam’ayondokoma la Jerusalɛma. Ko dikambo sɔ diakatokotshama. L’ɔkɔngɔ wa nde tshikala lo lokanu ɛnɔnyi ehende la Kayisariya, Paulo akatomama otsha la Rɔmɔ dia tosamba la ntondo k’ɔnɔmbɔdi w’Ose Rɔmɔ wakawelɛka Kayisa. Tênde kɛnɛ kakatombe lo lɔkɛndɔ lɔsɔ l’otsha la Rɔmɔ.