TSHAPITA 36

Anto Akɔna Wayolɔ? Ndo Lende Ayowɔsɛna?

LO TOTSHAPITA tohende t’ekomelo, anto angana wakatɛnyi wakawolola?. . . Aki anto atanu. Ana w’akɛnda angana?. . . Asato. Ndo vɔ mbetaka onto la nɛi ɔnɛ ɔlɔngɔ a pami. Oko le yɛ dikambo sɔ ɛnyadiɔ na?. . .

Dikambo sɔ mɛnyaka dia Nzambi nangaka ana w’akɛnda. Koko nde ayolola ndo anto akina efula. Onde Nzambi ayolola paka wanɛ wakasale kɛnɛ kele ɔlɔlɔ?. . . Sho koka fɔnya ngasɔ. Koko anto efula kombeka akambo wa mɛtɛ wendana la Jehowa Nzambi ndo l’Ɔnande ndoko lushi. Ɔnkɔnɛ, vɔ wakasale kɛnɛ kele kɔlɔ nɛ dia waketshama awui wa kɔlɔ. Onde wɛ fɔnyaka dia Jehowa ayolola anto wa woho ɔsɔ?. . .

Bible mbutaka ɔnɛ: “Eulwelu k’antu w’ololo la antu wa kolo uma lu nyoi kayuyala.” (Etsha 24:15) Lande na kayolɔ wanɛ waki komonga anto w’ɔlɔlɔ kana waki kosala kɛnɛ kaki ɔlɔlɔ na?. . . Vɔ wayolɔ nɛ dia ndoko lushi lakawakondja diaaso dia mbeka awui wendana la Jehowa ndo kɛnɛ kalangande di’anto sala.

Oko le yɛ, etena kakɔna kayolɔ anto na?. . . Ohokanyiya etena kakavu Lazaro ndo kakalake Yeso Mata wa kadiyɛnde ate: “Onanyo ayulo.” Mata akakadimola ate: “Dimi mbeyaka nti: ndi ayulo lu eulwelu ka lushi l’ekumelu.” (Joani 11:​23, 24) Mata akandalange mbuta lam’akandate ate Lazaro ayolɔ lo “lushi l’ekumelu” na?. . .

Mɛtɛ, Mata akoke daka diaki Yeso diata ɔnɛ: ‘Wanɛ tshɛ wele lo waombo wohɔma wayotomba.’ (Joani 5:​28, 29) Ɔnkɔnɛ, “lushi l’ekumelu” kɛdikɛdi etena kayolɔ anto tshɛ wele nkombo yawɔ yekɔ lo yimba yaki Nzambi. Lushi l’ekomelo lɔsɔ bu lushi la wenya wa tango 24. Lɔ layonga l’ɛnɔnyi kinunu. Lo lushi lɔsɔ, Bible mbutaka ɔnɛ: ‘Nzambi ayolombosha anto wa la nkɛtɛ.’ Ndo anto wayolɔ mbayondolombosha.​—⁠Etsha 17:31; 2 Petero 3:⁠8.

Ohokanyiya ɔngɛnɔngɛnɔ wayonga lushi lɔsɔ! L’edja k’ɛnɔnyi kinunu ɛsɔ, miliyɔ y’anto efula wakavu wayolɔ. Yeso mbetaka dihole diayowolɔ dia ndjɔsɛna sɔ ɔnɛ Paradiso. Tende lɛnɛ ayonga Paradiso ndo woho wayonga Paradiso kakɔ.

Suke la wenya esato la ntondo ka nyɔi ka Yeso l’otamba w’asui, nde akatɛ pami kɛmɔtshi kakawahanɛ suke la nde awui wendana la Paradiso. Pami kɛsɔ akahombe ndjakema l’ɔtɛ w’awui wa kɔlɔ wakandasale. Koko lam’akende pami kakasale awui wa kɔlɔ kɛsɔ Yeso ndo wakandoke kɛnɛ kakataka anto lo dikambo diande, nde akatatɛ monga la mbetawɔ le Yeso. Diakɔ diakate pami kɛsɔ ate: “Kumbuho lam’ayuyukuma lu diulelu diaye.” Yeso akokadimola ate: ‘Mɛtɛ kakutelami ɛlɔ nte, wɛ ayonga la mi lo Paradiso.’​—⁠Luka 23:​42, 43.

Yeso akandalange mbuta lam’akandate dikambo sɔ na? Lende ele Paradiso?. . . Ohokanyiya dikambo sɔ. Lende ayohomba Paradiso tatɛ?. . . Ohɔ dia Nzambi akasha pami ka ntondo, Adama nde la wadɛnde Eva paradiso ka vɔ sɛna paka lanɛ la nkɛtɛ. Waketaka paradiso kɛsɔ ɔnɛ ekambɔ k’Ɛdɛna. Ekambɔ kɛsɔ kaki la waa nyama koko nyama shɔ kosalɛka ndoko onto kɔlɔ. Ndo ekambɔ kɛsɔ kaki nto l’esongo wakatɔka elowa w’amɛna efula ndo l’ɔkɛdi w’ashi wa woke. Paradiso kɛsɔ aki mɛtɛ dihole dia dimɛna efula dia sɛna!​—⁠Etatelu 2:​8-10.

Ɔnkɔnɛ, lam’adiaso dia pami ka kɔlɔ kɛsɔ ayonga lo Paradiso, sho pombaka kanyiya woho wayokadimɔ nkɛtɛ kɛnɛ dihole dia dimɛna efula di’anto sɛnaka. Onde Yeso ayonga lanɛ la nkɛtɛ nde la pami kaki kanga kɔlɔ kɛsɔ lo Paradiso?. . . Kema. Onde wɛ mbeyaka lande na kahatonga Yeso lanɛ la nkɛtɛ?. . .

Yeso hatonga la nkɛtɛ nɛ dia nde ayonga l’olongo oko Nkumekanga lâdiko dia Paradiso ka lanɛ la nkɛtɛ. Ɔnkɔnɛ, Yeso ayonga la pami kɛsɔ lo yoho nyɛ yele Yeso ayolola pami kakɔ oma lo nyɔi ndo ayokotsha ehomba ande. Ko lande na kayetawɔ Yeso dia pami kaki kanga kɔlɔ kɛsɔ sɛna lo Paradiso na?. . . Tende kana sho koka tana okadimwelo.

La ntondo ka kanga kɔlɔ ɔsɔ tɛkɛta la Yeso, onde nde akeyaka asangwelo waki Nzambi?. . . Kema, nde kombaeyaka. Nde akasalaka awui wa kɔlɔ nɛ dia nde kombeyaka akambo wa mɛtɛ wendana la Nzambi. Lo Paradiso, wayoyowetsha asangwelo waki Nzambi. L’etena kɛsɔ, nde ayokondja diaaso dia mɛnya dia kana nde mɛtɛ nangaka Nzambi lo sala lolango Lande.

Onde anto tshɛ wayolɔ wayɔsɛna lo Paradiso ka lanɛ la nkɛtɛ?. . . Kema aha vɔ tshɛ. Onde wɛ mbeyaka lande na?. . . Nɛ dia amɔtshi wayolɔ dia tɔsɛna kâmɛ la Yeso l’olongo. Vɔ wayolɛ oko nkumi ya dikanga kâmɛ la nde lâdiko dia Paradiso ka lanɛ la nkɛtɛ. Tende woho weyaso dikambo sɔ.

L’otsho waki la ntondo ka Yeso ndjakema, nde akatɛ ambeki ande ate: ‘Ahole efula wa mbidjasɛ wekɔ lo luudu laki Papa l’olongo, lambotshɔ dia tonyɔlɔngɔsɔlɛ dihole.’ Oma lâsɔ, Yeso akâlake ate: “Dimi layukalula dia ndjunyulungula, dia nyu ndjala lene ayumuyala.”​—⁠Joani 14:​2, 3.

Lende akatshu Yeso l’ɔkɔngɔ wa eolwelo kande na?. . . Eelo, nde akakawola otsha l’olongo dia tonga kâmɛ la She. (Joani 17:​4, 5) Ɔnkɔnɛ, Yeso akalake apɔstɔlɔ ndo ambeki ande akina dia nde ayowaolola dia vɔ tonga kâmɛ la nde l’olongo. Ambeki ande ayowotosala lɛkɔ vɔ la Yeso na?. . . Bible mbutaka di’ambeki ande wayonga la diɛsɛ dia monga lo “elwelu ka ntundu,” wayɔsɛna l’olongo ndo wayolɛ nkɛtɛ kɛnɛ oko ‘nkumi ya dikanga l’edja k’ɛnɔnyi kinunu.’​—⁠Enyelo 5:10; 20:6; 2 Timote 2:⁠12.

Anto angana wayolɔ lo “elwelu ka ntundu” ndo wayolɛ la Yeso oko nkumi ya dikanga na?. . . Yeso akatɛ ambeki ande ate: “Tanyukaki woma, nyu limba la tshitshe l’ekoko, ne dia Shenyu nangaka nyusha diulelu.” (Luka 12:​32, sho mbɛnganyisha alɛta ango.) “Limba la tshitshe l’ekoko” layolɔ dia tonga kâmɛ la Yeso l’olongo lo Diolelo diande lɔsɔ lekɔ la lofulo la shikaa. Bible mɛnyaka dia “antu nunu lukama la akumi anei la nei” mbayolɔ oma la nkɛtɛ otsha l’olongo.​—⁠Enyelo 14:​1, 3.

Anto angana wayɔsɛna lo Paradiso ka lanɛ la nkɛtɛ na?. . . Bible hate lofulo. Koko Nzambi akatɛ Adama nde l’Eva lam’akiwɔ l’ekambɔ k’Ɛdɛna dia vɔ mbota ana ndo ndodia nkɛtɛ. Mɛtɛ vɔ kokotsha dikambo sɔ. Koko Nzambi ayosala tshɛ dia sangwelo diande dia nkɛtɛ ndola l’anto w’ɛlɔlɔ kotshama.​—⁠Etatelu 1:28; Isaya 45:18; 55:⁠11.

Ohokanyiya ɔngɛnɔngɛnɔ wayonga dia sɛna lo Paradiso! Nkɛtɛ k’otondo kayonga dihole dia dimɛna efula. Tɔ kayolola la tofudu, la waa nyama ndo kayɔlɛngama l’esongo ndo l’alɛmbɔlɛmbɔ wa weho tshɛ. Ndoko onto layonga la pâ l’ɔtɛ wa hemɔ ndo ndoko onto layovɔ nto. Anto tshɛ wayonga angɛnyi lam’asawɔ. Naka sho nangaka sɛna lo Paradiso, kete ɔnɛ mbele etena ka sho ndjalɔngɔsɔla dia dikambo sɔ.

Adia awui efula wendana la sangwelo diaki Nzambi lo dikambo dia nkɛtɛ lo Tukedi 2:​21, 22; Undaki 1:4; Isaya 2:4; 11:​6-9; 35:​5, 6; ndo 65:​21-24.

[Osato wa lo lɛkɛ 187]

Bonde kayolola Nzambi wanɛ waki kosala kɛnɛ kele ɔlɔlɔ?

[Osato wa lo lɛkɛ 188]

Lende ayonga Paradiso kakalake Yeso Pami kɛnɛ?

[Osato wa lo lɛkɛ 189]

Lam’adiaso dikambo dia Paradiso, kakɔna kahomba monga lo timba taso?

[Esato wa lo lɛkɛ 190]

Lende ayɔsɛna wanɛ wayowolola ndo ayowosala?