Woho wa ntetemala nsɛna l’ewotɔ anyu lo wɔladi

Etena katshukananyu, nyu kengaka nkumbo k’oyoyo. Kaanga mbahombayɛ ntetemala nanga ndo nɛmiya ambutshi ayɛ, olonganyi ayɛ mbele onto loleki ohomba lo nkɛtɛ k’otondo le yɛ. Ewotɔ ayɛ efula koka monga l’okakatanu dia mbetawɔ dui sɔ. Koko atɔndɔ wa lo Bible koka kokimanyiya dia wɛ monga la wɛdimo dia mbidja ki lam’asayɛ l’ewotɔ ayɛ, etena kasalayɛ la wolo dia monga la diɔtɔnganelo di’ɔlɔlɔ l’olonganyi ayɛ.

1 ONGA L’EKANELO K’ƆLƆLƆ LO DIKAMBO DI’EWOTƆ AYƐ

KƐNƐ KETSHA BIBLE: “Ɔlɛmiya shɔ la nyɔ.” (Ɛfɛsɔ 6:2) Oyadi ɛnɔnyi akɔna waya la yɛ, wɛ pombaka nɛmiya ambutshi ayɛ ndo mbakitanyiya. Eya nto dia oko wele olonganyi ayɛ nde lawɔ ekɔ ɔna, nde pombaka nɛmiya ambutshi ande ndo mbakitanyiya. Lam’ele “ngandji bu la kandjema,” tookake olonganyi ayɛ kandjema l’ɔtɛ wa diɔtɔnganelo diele lam’asande l’ase nkumbo kande.—1 Kɔrɛtɔ 13:4; Ngalatiya 5:26.

KƐNƐ KAKOKAYƐ NSALA:

• Ewɔ ɛtɛkɛta wele oko: “Nkumbo kayɛ nyangiyakami nshi tshɛ” kana ɔnɛ: “Mama kayɛ hangɛnangɛnaka pondjo kɛnɛ kasalami”

• Sala la wolo dia monga l’ekanelo k’ɔlɔlɔ lo kɛnɛ kasala olonganyi ayɛ

2 ƆSA YƐDIKƆ YA WOLO ETENA KELE DUI SƆ OHOMBA

KƐNƐ KETSHA BIBLE: ‘Pami ayotshika she la nyango ndo ayomamatana la wadɛnde, ko vɔ ahende wayoyala demba ɔtɔi.’ (Etatelu 2:24) Etena katshukananyu, ambutshi anyu koka mfɔnya dia vɔ pombaka ntetemala nyɛnya kɛnɛ kahombanyu nsala, ndo vɔ koka nsala dia ndjatambiya efula lo diwala dianyu.

Diakɔ diele, nyu pombaka mbokana elelo wahombanyu mbadjɛ ndo mbatɛwɔ la ngandji tshɛ. Nyu koka mbatɛ akambo hwe hwe, aha la nkamba l’ɛtɛkɛta wa kɔlɔ. (Tukedi 15:1) Okitshakitsha, memakana ndo solo dia lotutsha ayonyokimanyiya dia monga la diɔtɔnganelo dia dimɛna lam’asanyu l’ewotɔ anyu ndo ntetemala “[mbi]kikanɛ onto la wonyande lo ngandji.”—Ɛfɛsɔ 4:2.

KƐNƐ KAKOKAYƐ NSALA:

• Naka yoho yayatambiya ase nkumbo k’olonganyi ayɛ lo diwala dianyu kokiyanyaka, kete nkɛtshanya la nde dui sɔ etena kenyu lo wɔlamu

• Nyookane kaamɛ woho wakokanyu nkandola akambo asɔ