WEKELO 20

Woho wokongɛmi etshumanelo

Okanda wa l'akatshi

Jehowa ekɔ Nzambi kele bu l’ofukutanu. (1 Kɔrɛtɔ 14:33) Laasɔ sho pombaka nongamɛ di’ekambi ande monga anto wokongɛmi. Ko ngande wokongɛmi etshumanelo k’Akristo? Ngande wakokaso mbisha lonya di’akambo nkɛndakɛnda dimɛna lɔkɔ?

1. Ele owandji w’etshumanelo?

“Kristo mbele owandji w’etshumanelo.” (Ɛfɛsɔ 5:23) Oma l’olongo, nde nɔmbɔlaka elimu w’ekambi wa Jehowa wa l’andja w’otondo. Yeso akasɔnɛ “ɔhɔmbɔ wa kɔlamelo ndo kɛsɔ,” mbuta ate djui ya tshitshɛ ya dikumanyi diambohokɔ akambo, djui yelamɛ nto ɔnɛ Olui-walɔmbɔla. (Adia Mateo 24:45-47.) L’ɛnyɛlɔ k’apɔstɔlɔ wa lo ntambe ka ntondo ndo ka dikumanyi dia la Jɛrusalɛma, Olui-walɔmbɔla mbishaka etshumanelo ka l’andja w’otondo ɛlɔmbwɛlɔ. (Etsha 15:2) Koko apami asɔ bu ɛnɔmbɔdi w’okongamelo aso. Vɔ mbadiaka Bible dia mbeya kɛnɛ kalanga Jehowa dia vɔ nsala ndo vɔ ndjelaka ɛlɔmbwɛlɔ kaki Yeso la lolango lawɔ.

2. Naa ɔkɛndɛ wele la dikumanyi?

Dikumanyi wekɔ apami w’Akristo wambotshunda lo nyuma wetsha akambo wa mɛtɛ w’oma lo Afundelo ndo walama ɛkɔkɔ waki Jehowa lo mbaakimanyiya ndo lo mbaakeketsha. Vɔ hawofutama l’ɔtɛ w’olimu ɔsɔ. Koko vɔ kambaka “la lolango la ntondo ka Nzambi; aha la ngandji ka wahɔ lo yoho ya kɔlɔ, koko la wangasanu.” (1 Petero 5:1, 2) Ekambi wakimanyiya kimanyiyaka dikumanyi, ndo l’edjedja ka wonya, vɔ ndjokotshaka kɛnɛ kalɔmbama dia nkamba oko dikumanyi.

Olui-walɔmbɔla sɔnaka dikumanyi dimɔtshi dia monga emendji w’etshimbedi. Vɔ membolaka tshumanelo dia mbasha ɛlɔmbwɛlɔ ndo ekeketshelo. Vɔ sɔnaka dikumanyi ndo ekambi wakimanyiya wahomba nkotsha kɛnɛ kalɔmba Afundelo.—1 Timɔte 3:1-10, 12; Tito 1:5-9.

3. Naa ɔkɛndɛ wele la Ɔmɛnyi wa Jehowa tshɛ?

Ase etshumanelo tshɛ “tombolaka lokombo la Jehowa” lo mbisha kɔmatɛrɛ, asawo, lo nsala wɛnyɛlɔ ndo lo memba lo nsanganya ya l’etshumanelo ndo lo nsambisha lo yɛdikɔ yɛdimi l’akoka awɔ.—Adia Osambo 148:12, 13.

NYOMOTSHIMOLA

Eka dia mbeya woho w’ɔnɔmbɔdi wele Yeso, ndo woho wasala dikumanyi la wolo dia mbokoya ɛnyɛlɔ kande ndo woho wakokaso nkamba kaamɛ la Yeso ndo la dikumanyi.

4. Yeso ekɔ ɔnɔmbɔdi w’ɔlɔlɔ

Yeso ekɔ lo tosha leeta lɔmɔtshi la dimɛna efula. Nyadia Mateo 11:28-30, ndo oma laasɔ nyɔkɛtshanya dimbola nɛ:

Ngande walanga Yeso dia sho ndjaoka lo kɛnɛ kendana l’ɛlɔmbwɛlɔ kande?

Ngande wokoya dikumanyi ɛnyɛlɔ ka Yeso? Nyende VIDƐO.

VIDƐO: Ekimanyielo kakasha dikumanyi la Népal l’ɔkɔngɔ wa didimu dia nkɛtɛ (4:56)

Bible mbetshaka hwe woho wahomba dikumanyi nkamba olimu awɔ.

Nyadia Isaya 32:2 ndo 1 Petero 5:1-3, ndo oma laasɔ, nyɔkɛtshanya ambola anɛ:

Ngande wayaokayɛ lo mbeya dia l’ɛnyɛlɔ ka Yeso, dikumanyi salaka la wolo dia nkeketsha anto akina?
Naa toho tokina tokoya dikumanyi Yeso?

5. Dikumanyi mbetshaka oma lo ɛnyɛlɔ kawɔ

Ngande walanga Yeso dia dikumanyi mbɔsa ɔkɛndɛ awɔ? Nyende VIDƐO.

VIDƐO: Dikumanyi mbishaka ɛnyɛlɔ! (7:39)

Yeso akasha wanɛ walɔmbɔla etshumanelo ɛnyɛlɔ ka vɔ ndjela. Nyadia Mateo 23:8-12, ndo oma laasɔ, nyɔkɛtshanya dimbola nɛ:

Kakɔna kakambiya lo kɛnɛ kendana la otshikitanu wele lam’asa atɔndɔ wa lo Bible wendana la dikumanyi la kɛnɛ kɛnayɛ ewandji w’ɛtɛmwɛlɔ wasala?

A. Esato womamatanyi: Ekumanyi kɛmɔtshi akotsha ehomba ande wa lo nyuma ndo wa nkumbo kande. 1. Nde ekɔ lo nɔmba la ntondo ka nsala wekelo ande wa Bible. 2. Nde ekɔ lo mbetsha yana yande ya yimato awui wendana la Bible ndo wadɛnde ekɔ lo mbookimanyiya.

B. Ekumanyi kakɔ kaamɛ la wadɛnde wambotshɔ lo lopitadi dia tenda kadiyɛwɔ kɛmɔtshi ka l’etshumanelo kele la hemɔ.

Dikumanyi salaka dia vɔ la nkumbo yawɔ ntetemala monga nge lo nyuma
Dikumanyi kokɛka ase etshumanelo tshɛ
Dikumanyi sambishaka mbala la mbala
Dikumanyi wekɔ embetsha. Vɔ kimanyiyaka nto l’osolelo wa mbalasa ndo l’elimu ekina

6. Sho koka nkamba kaamɛ la dikumanyi

Bible toshaka ɔkɔkɔ ɔmɔtshi w’ohomba wahombaso nkamba kaamɛ la dikumanyi. Nyadia Hɛbɛru 13:17, ndo oma laasɔ, nyɔkɛtshanya ambola anɛ:

Onde ekɔ dui dia dimɛna dia Bible tokeketsha dia sho monga l’okitanyiya ndo mbetawɔ awui wa wanɛ watɔlɔmbɔla? Naa kanyi yayɛ lo dikambo sɔ?

Nyadia Luka 16:10, ndo oma laasɔ, nyɔkɛtshanya dimbola nɛ:

Lande na kele ekɔ ohomba sho nkamba kaamɛ la dikumanyi kaanga l’akambo wɛnama dia vɔ bu ohomba efula?

ANTO AMƆTSHI MBUTAKA ƆNƐ: “Bu ohomba wɛ monga l’ɔtɛmwɛlɔ ɔmɔtshi wokongɛmi.”

Naa ɛlɔlɔ wafɔnyayɛ wakoka nkondja onto latɛmɔla Nzambi kaamɛ la etshumanelo?

LO TSHENA PE

Yeso ekɔ owandji w’etshumanelo. Sho ngɛnangɛnaka dia nkamba kaamɛ la dikumanyi diakamba l’ɛsɛ k’ɛlɔmbwɛlɔ kande nɛ dia vɔ tokeketshaka ndo tetshaka oma lo ɛnyɛlɔ kawɔ.