Tanyukaki woma, nyu limba la tshitshe l’ekoko”
“Tanyukaki woma, nyu limba la tshitshe l’ekoko, ne dia Shenyu nangaka nyusha diulelu.”—LUKA 12:32.
1. Lande na kakate Yeso ɛtɛkɛta w’ɔnɛ: “Tanyukaki woma, nyu limba la tshitshe l’ekoko”?
“NYOTETEMALE la nyanga diolelo [dia Nzambi].” (Luka 12:31, NW) Etena kakatɛ Yeso ambeki ande ɛtɛkɛta ɛsɔ, nde akɛnya didjango dimɔtshi diakalɔmbɔla tokanyi t’Akristo oma ko nshi yande polo ndo lo nshi yaso nyɛ. Diolelo dia Nzambi pombaka mbɔsa dihole dia ntondo lo nsɛnɔ yaso. (Mateu 6:33) Koko, lo ndjela ɔkɔndɔ wa Luka, Yeso akatetemala mbutɛ djui y’Akristo wa lânde ɛtɛkɛta wolodi la ngandji ndo washa ekeketshelo. Nde akate ate: “Tanyukaki woma, nyu limba la tshitshe l’ekoko, ne dia Shenyu nangaka nyusha diulelu.” (Luka 12:32) Oko wakinde Olami w’Ɔlɔlɔ w’ɛkɔkɔ, Yeso akeyaka ɔnɛ tena di’ofukutanu diakakongɛka ambeki ande wakandalangaka efula. Koko, takiwɔ la dia mboka wɔma naka vɔ tetemala la nyanga Diolelo dia Nzambi. Omalɔkɔ, dako dia Yeso kondjala ɔlɛmbɛ wa mbahɛnyɔla. Diɔ diaki daka diolodi la ngandji diakahombe mbasha ekeketshelo la dihonga.
2. Wa na wakenga lemba la tshitshɛ l’ɛkɔkɔ, ndo lande na kewɔ la diɛsɛ dia lânde na?
2 Yeso akatɛka ambeki ande ɛtɛkɛta ɛsɔ, ndo nde akawaelɛ ɔnɛ: “limba la tshitshe l’ekoko.” Nde akatɛka ndo wanɛ ‘wayolongola diolelo’ oma le Jehowa. Lo mbɛdika l’elui a weke a wanɛ wayoyetawɔ Yeso l’ɔkɔngɔ diko, mɛtɛ djui shɔ yaki l’anto yema tshitshɛ. Vɔ wakɛnama ohomba efula nɛ dia vɔ wakasɔnwama dia tokondja nshi yayaye ya diambo, dia tokamba olimu wa nkumi ya dikanga. Shɛwɔ, Jehowa, Olami a Woke w’ɛkɔkɔ, ekɔ lo mbelɛ lemba la tshitshɛ l’ɛkɔkɔ dia vɔ tolongola sango dia l’olongo di’endana la Diolelo diaki Kristo Mɛsiya.
Lemba la Tshitshɛ l’Ɛkɔkɔ
3. Naa ɛnɛlɔ ka lotombo ka lemba la tshitshɛ l’ɛkɔkɔ kakɛnyi Joani na?
3 Ko wa na wakenga lemba la tshitshɛ l’ɛkɔkɔ wele l’elongamelo ka diambo ka ngasɔ na? Ele ambeki wa Yeso Kristo, wanɛ wakakitama nyuma k’ekila. (Etsha 2:1-4) Lam’akandawaɛnyi l’olongo wemba nkembo, la sɛsɛ l’anya awɔ, ɔpɔstɔlɔ Joani akafunde ate: “Dimi lakendi, menyi ku Ona-Okoko emadi l’Ukungu a Siona, ndu antu nunu lukama la akumi anei la nei waki la lukumbu landi, la lukumbu la Shi lufundami lu fumu yawo. Vo kumunana la amantu, ne dia vo weko uku amantu wa dimuma. Vo mbatuyelaka Ona-Okoko lu ahuli tshe watshondi. Vo wakasumbama uma l’atei w’antu, ne dia ndjala elua wa ntundu le [Nzambi, NW] ndu le Ona-Okoko. Vo kuntana kashi l’enyo awo, ne dia vo kema la kolo.”—Enyelo 14:1, 4, 5.
4. Olimu akɔna wakamba lemba la tshitshɛ l’ɛkɔkɔ ɛlɔ kɛnɛ la kɛtɛ na?
4 Oma ko Pɛntɛkɔsta ka l’ɔnɔnyi 33 T.D., akitami asɔ, wanɛ wakotɔ le nyuma wekɔ lo kamba olimu oko akɛndji wa Kristo la kɛtɛ. (2 Koreto 5:20) Ɛlɔ kɛnɛ, paka atshikadi a l’atei awɔ mbekekɔ ndo mbakamba kâmɛ oko olui w’ɔhɔmbɔ wa kɔlamelo ndo wa kɛsɔ. (Mateu 24:45; Enyelo 12:17) Djekoleko, oma ko 1935, vɔ wakasangana “l’ekoko ekina,” mbuta ate: Akristo wele l’elongamelo ka ndjɔsɛna la kɛtɛ, wanɛ wele lofulo lawɔ lambokoma polo ndo lo wa miliyɔ. Anto asɔ sambishaka lokumu l’ɔlɔlɔ lo kɛtɛ k’otondo kâmɛ lawɔ.—Joani 10:16.
5. Ngande wele dionga diaki atshikadi wa l’atei a lemba la tshitshɛ l’ɛkɔkɔ weke la kɛtɛ, ndo lande kahawahombe mboka wɔma na?
5 Naa dionga diele l’atshikadi wa lemba la tshitshɛ l’ɛkɔkɔ wêke lanɛ la kɛtɛ na? Lam’eyawɔ ɔnɛ: vɔ pombaka nongola ‘Diolelo diahasutshasutshamaki pondjo,’ vɔ wekɔ lo kamba olimu awɔ w’ekila la wɔma wa Nzambi ndo la lokomba. (Heberu 12:28) La ndjakitshakitsha tshɛ, vɔ mbeyaka dia vɔ wekɔ la diɛsɛ dia woke efula diawasha ɔngɛnɔngɛnɔ w’ɔtɛkɔya. Vɔ wakatane “lowoko l’ushinga a wulu” lakate Yeso lam’akandatɛkɛtaka dikambo dia Diolelo. (Mateu 13:46) Lam’ele fɔnu ka woke kambosukana, akitami wa Nzambi hawoke ndoko wɔma. Oyadi akambo akɔna tshɛ waya suke la salema le anto wa l’andja w’otondo lo “lushi la Jehowa, lushi la woke ndo la mamba,” vɔ hawoke nshi yayaye wɔma wa kɔlɔ. (Etsha 2:19-21, NW) Lande na kayowohomba mboka wɔma na?
Lofulo Lawɔ Lambokitakita
6, 7. (a) Lande na kayaleke kitakita lofulo la lemba la tshitshɛ l’ɛkɔkɔ wêke lanɛ la kɛtɛ na? (b) Woho akɔna wahomba onto l’onto mbɔsa elongamelo kele lande na?
6 Ɛnɔnyi wetshi ɛnɛ, lofulo la lemba la tshitshɛ l’ɛkɔkɔ wêke lanɛ la kɛtɛ lakakitakita efula. Dikambo sɔ diakɛnama l’alapɔlɔ wa losanganya l’Eohwelo ka nyɔi ka Yeso lakasalema lo 1994. Lo tshumanelo oko 75 000 di’ekambi wa Jehowa wa l’andja w’otondo, paka anto 8 617 ato mbakayaɛnya dia vɔ mbele atɔi wa l’atei w’atshikadi lam’akawale mapa la nɔ vinyɔ. (Mateu 26:26-30) Koko, lofulo l’anto tshɛ wakɔtɔ lo losanganya lakɔ aki 12 288 917. Akristo w’akitami wakakongɛka dikambo sɔ. Jehowa akashikikɛ lofulo lakandasɔnɔla, anto 144 000, dia vɔ kenga lemba la tshitshɛ l’ɛkɔkɔ, ndo nde akatatɛ mbatshumanya oma ko Pɛntɛkɔsta ka l’ɔnɔnyi 33 T.D. Lo mbuta mɛtɛ, leeta la lemba la tshitshɛ l’ɛkɔkɔ layohomba komɛ lam’ayonga lofulo lawɔ suke la koka, ndo mɛnamaka dia otshumanyelo w’anto asɔ tshɛ wakatshɔkwama lo yoho ya lânde wakakomɛ l’ɔnɔnyi 1935. Koko, lo ndjela pɔlɔfɛsi, ɛkɔkɔ ekina wa lo nshi y’ekomelo wakahombe fulanɛ dia vɔ ndjokoma “ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe.” Oma ko 1935, otshumanyelo wakasale Jehowa mendanaka l’olui a woke ɔsɔ, wanɛ wele l’elongamelo ka lɔsɛnɔ la pondjo lo paradiso ka la kɛtɛ.—Enyelo 7:9; 14:15, 16; Osambu 37:29.
7 Efula ka wanɛ wele l’atei a lemba la tshitshɛ l’ɛkɔkɔ wêke lanɛ la kɛtɛ, waya l’ɛnɔnyi 70, 80, kana 90. Amɔtshi wambolekanya ɛnɔnyi 100. Anto asɔ tshɛ, oyadi ɛnɔnyi akɔna wele lawɔ, mbeyaka dia: vɔ wayosangana la Yeso Kristo oma lo tshimbo y’eolwelo k’otsha l’olongo, ndo wayolɛ kâmɛ lande lo Diolelo diande dia lotombo. Anto wa l’olui a woke wayoyala ambolami wa la kɛtɛ waki Kristo, Nkumekanga. Ɔm’ɔmɔ la l’atei aso angɛnɛngɛnɛ lo kɛnɛ kambolamɛ Jehowa wanɛ wawoka ngandji. Aha sho mbahomba sɔnɔla elongamelo kaso. Jehowa mbahomba shikikɛ dikambo sɔ. Elui akɔ ehende kokaka ngɛnangɛna l’elongamelo kawɔ ka monga l’ɔngɛnɔngɛnɔ lo nshi yayaye, oyadi lo Diolelo dia l’olongo kana lo Paradiso ka la kɛtɛ kayɔlɔmbwama oma le Diolelo diakɔ.—Joani 6:44, 65; Efeso 1:17, 18.
8. Lende ambokoma olimu wa mbidja anto 144 000 tolembetelo, ndo kakɔna kayosalema lam’ayoshila olimu ɔsɔ na?
8 Lofulo lɔkasɔnwama l’anto 144 000 wa lemba la tshitshɛ l’ɛkɔkɔ mbele “Isariyele wa [Nzambi, NW],” wakɔshi dihole di’Isariyɛlɛ wa l’emunyi l’asangwelo waki Nzambi. (Ngalatiya 6:16) Ɔnkɔnɛ, atshikadi mbakenga djui y’anto wa komelo wa lo wodja ɔsɔ wa lo nyuma weke lanɛ la kɛtɛ. Atshikadi asɔ wekɔ lo mbidjama tolembetelo dia vɔ mbetawɔma le Jehowa pondjo. Ɔpɔstɔlɔ Joani akɛnyi dikambo sɔ diasalema l’ɛnɛlɔ kande, ko nde akakɔndɔla ate: “Dimi lakenyi ondjelo ukina atambela utsha l’ulungu uma lene atutumbaka unya, ukimedi djimbitelu ya [Nzambi ka, NW] lumu. Ndi akawelela andjelo ako anei, wane wakawasha wulu wa nanya kete ndu ashi a wuki, ata ati: Tanyutshelaki kete kolo, kuyanga ashi a wuki, kuyanga etamba, edja ndu lam’ayutudja ekambi a [Nzambi kaso, NW] tulimbitelu lu fumu yawo. Dimi lakuki okone aki efula ka wane wakadjama tulimbitelu. Wane wakadjama tulimbitelu waki nunu lukama la akumi anei la nei uma lu wauhu tshe w’asi Isariyele [wa lo nyuma].” (Enyelo 7:2-4) Lam’ele olimu wa mbidja Isariyɛlɛ wa lo nyuma tolembetelo ambɛnama dia waya suke la komɛ, sho kokaka kongɛ akambo amɔtshi wa diambo wahomba salema kem’edja. Omalɔkɔ, “fɔnu ka woke” kayonga lam’ayokimwama pɛpɛ nyɛi y’elanyelo oya la kɛtɛ pombaka ndjâla ka suke.—Enyelo 7:14, NW.
9. Woho akɔna wɔsa lemba la tshitshɛ l’ɛkɔkɔ ohamelo wa lofulo l’olui a woke na?
9 Anto wa l’olui a woke wamboshilaka tshumanyema polo ndo lo wa miliyɔ. Ande woho wasalangana etema w’atshikadi oma lo dikambo sɔ lee! Kânga mbatatetemala kitakita lofulo l’ase lemba la tshitshɛ l’ɛkɔkɔ lêke lanɛ la kɛtɛ, vɔ wekɔ lo ndowanya ndo wekɔ lo nɔngɔsɔla apami wakoka wa l’atei w’olui a woke dia vɔ mɛmba ɛkɛndɛ w’endana l’ohamelo w’ɔlɔngɔswamelo waki Jehowa wa la kɛtɛ. (Isaya 61:5) Oko wakadiɛnya Yeso, anto amɔtshi wayoka lo fɔnu ka woke.—Mateu 24:22.
“Tanyukaki Woma”
10. (a) Ɔsɔmbwɛlɔ akɔna wahomba komɛ ekambi wa Nzambi, ndo lende ayotodihɛ dikambo sɔ na? (b) Wembola akɔna wambwama le ɔm’ɔmɔ la l’atei aso na?
10 Satana nde l’ɛdiɛngɛ ande wakaholoyama oya l’ahole wosukanyi la kɛtɛ. Nde l’ekambi ande wekɔ lo ndjalɔngɔsɔla la wolo awɔ tshɛ dia sɔmbwɛ ekambi wa Jehowa. Ɔsɔmbwɛlɔ ɔsɔ, wakakɔndwama lo Bible oko ɔsɔmbwɛlɔ w’oma le Ngɔngɔ ka la Mangɔngɔ. Le wa na waleka Satana tɔlɔnganya ɔsɔmbwɛlɔ ande na? Onde aha le atɔi wa komelo wa l’atei a lemba la tshitshɛ l’ɛkɔkɔ, Isariyɛlɛ wa lo nyuma waki Nzambi, wanɛ wodjashi la wɔladi l’“atei a kete”? (Ezekiyele 38:1-12) Eelo, koko atshikadi wa l’olui w’akitami wa kɔlamelo, kâmɛ l’anyawɔ wa kɔlamelo, ɛkɔkɔ ekina, wayɛna ɔsɔmbwɛlɔ waki Satana akongotola dikambo dia diambo diayosala Jehowa Nzambi dia nde mbekɛ lonya lande woho wa shimbela anto ande, ndo dikambo sɔ diayɔkɔhɔtɔla etatelo ka “lushi la woke ndo la wɔma laki Jehowa.” (Joele 2:31, NW) Ɛlɔ kɛnɛ, ɔhɔmbɔ wa kɔlamelo ndo wa kɛsɔ ekɔ lo kamba olimu w’ohomba efula, olimu wa shimbɛ nsɛnɔ y’anto: lo mbaewoya ɔnɛ Jehowa aya suke la mbekɛ lonya lande. (Malaki 4:5; 1 Timote 4:16) Onde wɛ ekɔ lo sukɛ olimu akɔ ɔsɔ l’ohetoheto tshɛ, lo sambisha lokumu l’ɔlɔlɔ la Diolelo diaki Jehowa? Onde wɛ ayotetemala la kamba olimu ɔsɔ, lo sambisha Diolelo aha la mboka wɔma oka?
11. Lande na kele ndjâla la dihonga ekɔ ohomba efula ɛlɔ kɛnɛ na?
11 Lo menda akambo wa l’andja ɔnɛ, sunganaka dia lemba la tshitshɛ l’ɛkɔkɔ mbidja yimba l’ɛtɛkɛta wakawatɛ Yeso ɔnɛ: “Tanyukaki woma, nyu limba la tshitshe l’ekoko!” Ndjâla la dihonga dia ngasɔ ekɔ ohomba lo menda kɛnɛ tshɛ kasalema etena kɛnɛ lo ndjela sangwelo dia Jehowa. Ɔm’ɔmɔ la l’atei a lemba la tshitshɛ l’ɛkɔkɔ mbeyaka dia nde pombaka tetemala polo ndo l’ekomelo. (Luka 21:19) Oko Yeso Kristo, Nkumadiɔndjɔ ndo Owandji wa lemba la tshitshɛ l’ɛkɔkɔ, ɔnɛ lakatetamala ndo lakɛnya kɔlamelo yande polo ndo l’ekomelo ka lɔsɛnɔ lande la la kɛtɛ, woho akɔ wâmɛ mbele ɔm’ɔmɔ la l’atei a lemba la tshitshɛ l’ɛkɔkɔ pombaka tetemala ndo mɛnya kɔlamelo yande.—Heberu 12:1, 2.
12. Lo ndjela ɛnyɛlɔ ka Yeso, woho akɔna wakalake Paulo Akristo w’akitami di’aha vɔ mboka wɔma na?
12 Akristo w’akitami tshɛ pombaka monga la kanyi yaki l’ɔpɔstɔlɔ Paulo. Oko wakinde okitami, opandjudi a lo sɛkɛ wa dikambo di’eolwelo, tolembete woho wɔtɔnganɛ ɛtɛkɛta ande la dako dia Yeso di’aha mboka wɔma. Paulo akafunde ate: “Uho Jesu Kristu, lakulo uma lu nyoi, leli kanula ya Davidi, uku wata lukumu l’ololo lami. Dia dikambu dialo, mbasuwami ndu lu kanu uku utshi w’akambu wa kolo. Keli diui dia [Nzambi, NW] hadiukelekama. Okone dimi lambetawo akambu tshe ne dia esonami, dia vo walunguli panda uma le Kristu Jesu, ndu lutumbu la pundju. Diui dia kolamelu ne ati: Naka shu tambuvo kame la ndi, Keti tayuyala kame la ndi la lumu. Naka shu tayutetemala, Ku shu tayulela la ndi. Naka tayuwanguna, Ndu ndi ayutanguna. Naka shu kema la kolamelu, Ndi atuyalaka la kolamelu—Ne dia ndi heyi ndjanguna.”—2 Timote 2:8-13.
13. Eshikikelo kakɔna kele l’anto wa l’atei a lemba la tshitshɛ l’ɛkɔkɔ, ndo dikambo sɔ mbatshutshuyaka dia vɔ sala na?
13 Lo ndjela ɛnyɛlɔ kaki ɔpɔstɔlɔ Paulo, atshikadi wa l’atei a lemba la tshitshɛ l’ɛkɔkɔ nangaka tetemala la mbikikɛ asui etena katawasanya losango la wolo latanema lo Dui dia Nzambi. Eshikikelo kawɔ kekɔ nge nɛ dia vɔ wekɔ lo tetemala la ndjaɛkɛ l’alaka a Nzambi wawasha eshikikelo k’ɔnɛ vɔ wayokondja panda ndo wayokondja “dembo dia kusu dia lumu” naka vɔ mɛnya kɔlamelo yawɔ polo ndo lo nyɔi. (Enyelo 2:10) Lam’ayowolɔ ndo lam’ayowokadimɔ esadi eto, vɔ wayosangana la Kristo dia mbolɛ kâmɛ lande oko nkumi ya dikanga. Ande otshumba wayowodja lo lowango lawɔ la kɔlamelo oko anto wambodja andja ɔnɛ otshumba lee!—1 Joani 5:3, 4.
Elongamelo ka Lânde
14, 15. Lo na ele elongamelo k’eolwelo kaki lemba la tshitshɛ l’ɛkɔkɔ elongamelo ka lânde na?
14 Elongamelo k’eolwelo kele la lemba la tshitshɛ l’ɛkɔkɔ kekɔ elongamelo ka lânde. Lo yoho yakɔna na? Nɛ dia tɔ mbeta la ntondo k’eolwelo “k’antu w’ololo la antu wa kolo.” (Etsha 24:15) Mɛtɛ, eolwelo k’akitami fundama l’ɔnɔngɔ ɔmɔtshi w’ohomba, oko wɛnyamidiɔ hwe l’ɛtɛkɛta wele lo 1 Koreto 15:20, 23: “Kristu ambulwama uma lu nyoi, ndi keli olonga a wane wakavu. Keli untu l’untu lu dihuli diandi: Kristu olonga a ntundu; l’okongo, wa wane weli wa Kristu lam’ayunduya.” Lam’ewɔ la woho w’etetemalo ndo wa mbetawɔ kakɛnya Yeso, lemba la tshitshɛ l’ɛkɔkɔ mbeyaka kɛnɛ kambowalamɛ lam’ayowoshidiya lowango lawɔ la la kɛtɛ, djekoleko oma k’etena kakaye Nkumadiɔndjɔ ka mɛtɛ l’ɔnɔnyi 1918 dia ndjolomboya.—Malaki 3:1.
15 Paulo ekɔ lo tosha ɔkɔkɔ okina wahombaso mbɔsa eolwelo kɛsɔ oko eolwelo ka lânde. Oko wɔkɔndwamidiɔ lo 1 Koreto 15:51-53, nde akafunde ate: “Nyulungi, dimi lambunyutela [sheke y’ekila, NW]! Shu tshe hatulala djo lu nyoi, keli shu tshe tayukadimo, esadi, uku kamula ka su, lam’ayuda pungi ka ndjihelu. . . . Ne dia dieli la kene k’ehondelo dia ndota kene kahahonde, dieli la kene ka nyoi dia ndota kene kaha la nyoi.” Ɛtɛkɛta ɛsɔ kotshamaka le anto wa l’atei a lemba la tshitshɛ l’ɛkɔkɔ wavɔ lo nshi ya wôngelo wa Kristo. Aha la ndala djɔ ya nyɔi l’etena k’otale efula, vɔ watɔlɔtaka kɛnɛ kahahɔndɛ, “esadi, uku kamula ka su.”
16, 17. Lo kɛnɛ k’endana l’elongamelo kawɔ k’eolwelo, woho akɔna wambɔtshɔkwama Akristo w’akitami lo yohɔ ya lânde ɛlɔ kɛnɛ na?
16 Lo ndjela dikambo sɔ diambotomana fundo, sho kokaka shihodia kitshimudi y’ɛtɛkɛta waki ɔpɔstɔlɔ Joani wofundami l’Enyelo 14:12, 13. Nde akafunde ate: “Lan’eli etetemalu k’ekilami, wane watukitanyiaka elembe a [Nzambi, NW] la mbetawo ka Jesu. Dimi lakuki diui uma l’ulungu diata ati: Ufundi wati: Wane wavo le Khumadiondjo weko la otshoko kakiane ndu pundju. Nyuma kata ati: Vo wayumuya uma l’elimu awo, ne dia etsha awo wambayela!”
17 Ande difuto dia lânde diambowolamɛ atshikadi wa l’atei a lemba la tshitshɛ l’ɛkɔkɔ lee! Eolwelo kawɔ kayosalema esadi esadi, l’ɔkɔngɔ a vɔ ndala djɔ lo nyɔi. Ande otshikitanelo wa diambo wayonga lawɔ lam’ayowokondja olimu awɔ l’olongo lee! Lo menda otombwelo wa ngasɔ wa lemba la tshitshɛ l’ɛkɔkɔ ndo lo menda woho wamboleka sukana ekotshamelo ka pɔlɔfɛsi ya weke ya lo Bible, mɛtɛ, atshikadi wa l’atei a lemba la tshithɛ l’ɛkɔkɔ hawohombe ‘mboka wɔma.’ Ndo, woho wahawoke wɔma keketshaka Akristo wa l’olui a woke, wanɛ wahomba ndjâla la woho akɔ wâmɛ wa dionga, di’aha vɔ mboka wɔma lam’akongɛwɔ dia tshungɔ l’etena k’ofukutanu koleki woke kahatongaka ndoko lushi lanɛ la kɛtɛ.
18, 19. (a) Lande na kele etena kasɛnaso kɛnɛ kekɔ etena ka mbɔsa tɛdikɔ na? (b) Lande na kahahombe Akristo w’akitami kana ɛkɔkɔ ekina mboka wɔma na?
18 Ɔkɔndɔ w’elimu wa lemba la tshitshɛ l’ɛkɔkɔ mbatshutshuyaka vɔamɛ ndo tshutshuyaka olui a woke dia vɔ tetemala la mboka Nzambi ka mɛtɛ wɔma. Etena kande k’elombweko kambokoka, ndo etena k’ɔlɔlɔ kambotshikala kekɔ ohomba efula. Eelo, etena kambotshikala yema tshitshɛ le anto akina dia vɔ mbasasa. Koko, sho hatoke wɔma w’ɔnɛ sangwelo dia Nzambi diayokita tatala. Diɔ diayokotshama mɛtɛ!
19 Awui a wolo wa l’olongo wamboshilaka mbokɛma ɔnɛ: “Diulelu dia la kete nye diambuyala dia Khumesu, la dia Kristu kandi. Ndi ayulela pundju pundju.” (Enyelo 11:15) Mɛtɛ, Jehowa, Olami a Woke w’ɛkɔkɔ, ekɔ lo nɔmbɔla ekɔkɔ ande tshɛ “lu mbuka [ya losembwe, NW] Ne dia lukumbu landi.” (Osambu 23:3) Lemba la tshitshɛ l’ɛkɔkɔ lekɔ lo nɔmbwama l’eshikikelo tshɛ otsha lo difuto diawɔ dia l’olongo. Ndo, ɛkɔkɔ ekina wayoshimbamela oma lo fɔnu ka woke dia vɔ ndjokondja lɔsɛnɔ la pondjo la kɛtɛ kayɔlɔmbwama oma le Diolelo dia Nzambi dia lotombo diayolɛ Yeso Kristo. Omalɔkɔ, kânga mbele ɛtɛkɛta wa Yeso ɛsɔ mendanaka la lemba la tshitshɛ l’ɛkɔkɔ, mɛtɛ, ekambi tshɛ waki Nzambi kokaka nonga ɛtɛkɛta ande w’ɔnɛ: “Tanyukaki woma.”
Onde Wɛ Kokaka Nembetshiya?
◻ Lande na kahombaso nongamɛ dia lofulo l’atshikadi wa l’atei a lemba la tshitshɛ l’ɛkɔkɔ kitakita na?
◻ Ngande wele eongelo k’atshikadi w’Akristo w’akitami ɛlɔ kɛnɛ na?
◻ Lande na kahahombe Akristo mboka wɔma, kânga mbambosukana ɔsɔmbwɛlɔ w’oma le Ngɔngɔ ka la Mangɔngɔ na?
◻ Lande na kele elongamelo k’eolwelo kele l’anto 144 000 kekɔ elongamelo ka lânde, djekoleko ɛlɔ kɛnɛ na?