Wembola w’oma le ambadi

Lo ndjela akambo nganɛ wewɔ, onde otshikitanelo ɔmɔtshi wekɔ l’asa ɛtɛkɛta wa lo Bible ɛnɛ: “ekoko ekina” la “ului a wuki”?

Eelo, koko hatohombe monga la sso dia wolo efula lo dikambo di’ɛtɛkɛta kana ndjakiyanya naka onto ɔmɔtshi ambowatɛkɛta aha la mbatshikitola.

Akristo efula mbekesanɛka l’avɛsa watanaso ɛtɛkɛta ɛsɔ. Ɛnyɛlɔ oko lo Joani 10:16. Lɔkɔ, Yeso akate ate: “Dimi leko la ekoko ekina waha lu lukumbu lone. Dieli la mi dia mbêla ndu vo. Vo wayuka diui diami, wayuyala ului otoi ndu ulami otoi.” Tshɛkɛta kina, “ului a wuki,” tanemaka lo Enyelo 7:⁠9. Sho mbalaka ɔnkɔnɛ: “L’okongo w’akambu aso, dimi lakendi, lakenyi ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe, wemadi la ntundu ka kiti ka diulelu [ndo la ntondo, NW] ka Ona-Okoko, wolotshi [ekutu w’etale, NW] a wema, la wanga w’atuku l’anya awo.”

Totokɔsɛdingola Joani 10:16 ntondo. Wa na wele ɛkɔkɔ? Sho pombaka shihodia ɔnɛ ambeki wa kɔlamelo tshɛ waki Yeso mbelamɛka ɔnɛ: ɛkɔkɔ. Lo Luka 12:​32, nde akelɛ ambeki ande wayotshɔ otsha l’olongo ɔnɛ: “limba la tshitshe.” Lemba la tshitshe la na? Lemba la tshitshɛ l’ɛkɔkɔ. “Ekoko” wa lo “limba la tshitshe” wayonga wa l’atei a Diolelo, l’olongo. Koko, anto akina wekɔ, wanɛ wele l’elongamelo kotshikitanyi, Yeso mbaɔsaka ndo vɔ lawɔ oko ɛkɔkɔ.

Sho kokaka mɛna dikambo sɔ lo Joani tshapita ya dikumi. L’ɔkɔngɔ wa nde tɛkɛta dikambo di’apɔstɔlɔ ande wayondelɛ otsha lo lɔsɛnɔ la l’olongo oko ɛkɔkɔ, Yeso akakotsha lo divɛsa 16 ate: “Dimi leko la ekoko ekina waha lu lukumbu lone. Dieli la mi dia mbêla ndu vo.” Ɛmɛnyi wa Jehowa wôkeyaka ɔnɛ: lo divɛsa sɔ, Yeso aki lo tɛkɛta dikambo di’anto wele l’elongamelo ka lɔsɛnɔ la la kɛtɛ. Anto efula wele akanga wa kɔlamelo, wanɛ wakasɛnaka la ntondo ka Kristo ndja, oko Abarahama, Sara, Nɔa, la Malaki, waki l’elongamelo ka ngasɔ. Ɔnkɔnɛ, sho kokaka mbadja l’ɔlɔlɔ tshɛ l’atei w’“ekoko ekina” wa lo Joani 10:16. L’edja ka Diolelo di’Ɛnɔnyi Kinunu, ɛmɛnyi wa ngasɔ wa kɔlamelo wakasɛnaka la ntondo ka Kristo ndja wayolɔ, ndo wayoyeka akambo w’endana la Kristo Yeso ndo wayoyowetawɔ, ɔsɔku mbayowoyala “ekoko ekina” waki Olami w’Ɛkɔkɔ w’Ɔlɔlɔ.

Ndo nto, sho mbeyaka ɔnɛ tatɛ oma lam’akakomɛ leeta l’otsha l’olongo, miliyɔ y’anto wakayokoma Akristo wa mɛtɛ. Anto asɔ, ndo vɔ lawɔ mbelamɛka l’ɔlɔlɔ tshɛ ɔnɛ “ekoko ekina,” nɛ dia vɔ kema l’atei wa “limba la tshitshe.” Omalɔkɔ, ɛlɔ kɛnɛ, asolo w’ɛkɔkɔ ekina wekɔ lo ndokɔlokɔ lam’akongɛwɔ dia ndjɔsɛna lo paradiso ka la kɛtɛ.

Kakianɛ, kakɔna kakokaso mbuta lo dikambo di’“ului a wuki” wofundami lo Enyelo 7:9? Tênde divɛsa 13 la dimbola diombwami ɔnɛ: “Wa na wewo? uma lendi uyewo?” Sho kondjaka okadimwelo lo Enyelo 7:14 ɔnɛ: “Vo weli wane wambuya uma lu [fɔnu, NW] ka wuki.” Ɔnkɔnɛ, “ului a wuki” kengama la wanɛ woye mbuta ate wanɛ wamboka, oma lo fɔnu ka woke. Oko wadita divɛsa 17, vɔ ‘wayɔlɔmbwama otsha lo tɛkɔ di’ashi wa lɔsɛnɔ’ lanɛ la kɛtɛ.

Koko, oko wambotodishihodia, di’anto mbika lo fɔnu ka woke kambosukana, vɔ pombaka tâsudi ekutu awɔ w’etale ntondo lo dikila di’Ɔna Ɔkɔkɔ, lo ndjâla atɛmɔdi wa mɛtɛ. Omalɔkɔ, kânga mbakɔndɔla Enyelo 7:9 olui ɔsɔ l’ɔkɔngɔ wa fɔnu, sho kokaka kamba la tshɛkɛta shɔ ya “ului a wuki” dia tɛkɛta dikambo dia wanɛ tshɛ wele l’elongamelo ka la kɛtɛ wakambɛ Jehowa olimu w’ekila kakianɛ, la ntondo ka fɔnu ka woke ndja, fɔnu kayoyelana l’elanyelo k’ɛtɛmwɛlɔ wa kashi oma le wedja.

Lo tshena pe, sho kokaka mbohɔka ɔnɛ: tshɛkɛta “ekoko ekina” yekɔ l’olembetshiyelo woleki woke, nɛ dia yɔ mbidjaka ekambi a Nzambi tshɛ wele l’elongamelo ka sɛna pondjo pondjo la kɛtɛ. L’atei wa tshɛkɛta yakɔ mbatanema ndo lɔlɔnga lokina la tshitshɛ efula, lɔlɔnga l’anto wafɔna l’ɛkɔkɔ ɛlɔ kɛnɛ, wanɛ wele lo tshumanyema oko “ului a wuki” wele l’elongamelo ka panda lo fɔnu ka woke kambosukana. Efula k’Akristo asɔ wa kɔlamelo wasɛna ɛlɔ kɛnɛ wekɔ l’atei w’“ekoko ekina,” ndo vɔ wekɔ atɔi amɔtshi wa l’“olui a wuki.”

Omalɔkɔ, ekɔ ohomba mbohɔka dia, ekɔ ɔlɔlɔ ndjâshikikɛ lo elembetshiyelo ɛsɔ, koko ndoko ohomba le Okristo dia nde monga la sso dia wolo efula lo dikambo di’ɛtɛkɛta​—⁠ko ndjoyala oko onto latadjana tamu lo dikambo di’ɛtɛkɛta. Paulo akatewola lo dikambo di’anto amɔtshi ‘wayambiya’ ndo ‘wadjana tamu lo dikambo di’ɛtɛkɛta.’ (1 Timote 6:⁠4) Naka shoamɛ mbeyaka etshikitanu ɛmɔtshi wele l’asa ɛtɛkɛta ɛmɔtshi, kete ekɔ dimɛna. Koko, oyadi l’ɛtɛkɛta aso kana lo tokanyi taso, hatohombe mɔnyɔlaka onto ɔmɔtshi lahakoke tɛkɛta ɛtɛkɛta wa lo Bible l’eshikikelo tshɛ.