Kem’edja, Ndoko Onto Layoyala Ose Wola!

“TANYUKAKI woma. Nyulungi, lambunyela lukumu l’ololo l’ongenongeno a wuki wayuyala le antu tshe.” (Luka 2:10) Elami w’ɛkɔkɔ waki suke la Bɛtɛlɛhɛma l’otsho wakotɔ Yeso wakambe lam’akawoke ɛtɛkɛta ɛsɔ w’ekeketshelo. Lo ndjela ɛtɛkɛta ɛsɔ, Yeso akake epole ɔsɛkɛ lo “lukumu l’ololo” lo nshi yakandasalaka olimu ande lanɛ la kɛtɛ. Ɛlɔ kɛnɛ, lam’ele dia sho kotsha ehomba aso, pombaka sho monga la falanga, wahɔ akɔna wakokaso kondja oma lo lokumu l’ɔlɔlɔ l’endana la Yeso?

Yeso Kristo ‘akasambisha ase wola lokumu l’ɔlɔlɔ.’ (Luka 4:18) Lo ndjela Mateu 9:35: “Jesu akakindula lu esumba tshe ndu lu ngelu. Ndi aketsha antu lu temwelo diawo, akasambisha lukumu l’ololo la diulelu.” Losango lande lakaleke keketsha wanɛ waki la wola wa mamba. “Lam’akandenyi elui w’antu, ndi akawauki ketshi, ne dia vo wakahenyahenyama, ndu kundjala la ekimanyelu, uku ekoko waha la ulami.” (Mateu 9:36) Mɛtɛ, Yeso akate ate: “Nyu la akanga a weula nshi tshe l’atei anyu,” koko hatokoke mbɔsa ɛtɛkɛta ɛsɔ dia mbuta ɔnɛ ndoko elongamelo kele la ase wola. (Joani 12:⁠8) Edja tshɛ kayotshikalaka dikongɛ dia kɔlɔ nɛ, ase wola wayoyalaka, oyadi kakɔna tshɛ kakoka mbasha pâ lo lɔsɛnɔ. Dui dia Nzambi mbeyaka lɔsɛnɔ l’ase wola woho welɔ, koko diɔ hadiɛnya kɔlɔ ka ndjâla wola. Diɔ mbishaka ase wola ekimanyielo woho wa vɔ mbikikɛ ekiyanu wa lo lɔsɛnɔ.

Ekimanyielo le Ase Wola

Lo yoho ya lânde, anto totaka ɔnɛ: “Ndoko wotsho wakoka onto mɛmba woleki wɔnɛ wa mbeya ɔnɛ: ndoko onto layakiyanya dikambo diande ndo lôhokamɛ.” Koko, kânga mbele anto efula kema la kɛtshi, lokumu l’ɔlɔlɔ lekekɔ le ase wola​—⁠oyadi l’etena kɛnɛ kana lo nshi yayaye.

Lonyangu ko, anto efula hawoleke mbidja yimba dia kimanyiya ase wola. Lo ndjela ansiklopedi ɔmɔtshi, The World Book Encyclopedia, anto amɔtshi mbetawɔka ɔnɛ: “anto wa l’atei wa tshunda wekɔ lo susana dia kondja eko ndo . . . anto wa lâdiko mbayala la wolo ndo mbangɔna.” Wanɛ wetawɔ lokanyi lɔsɔ letawɔ ɔnɛ: wetshelo waki Darwin w’endana la lɔsɛnɔ la l’atei w’atshunda w’anto, kokaka mbɔsa ase wola oko akanga w’esuwa ndo akanga a lokoso. Koko mbala efula, akambikambi a dikambɔ, wanɛ weteta dia takambaka elimu, la anto akina, kambaka efula dia ndesha nkumbo yawɔ kânga mbafutamawɔ yema tshitshɛ.

Lo wedja efula, wola ekɔ dikambo diokokane le anto tshɛ. Omalɔkɔ, ase wola​—⁠efula ka l’atei awɔ​—⁠hawoyaoke ɔnɛ vɔ wekɔ anto w’anyanya. Koko, lo wedja wa ngasɔ, ekɔ anto amɔtshi wele la lomombo efula l’atei w’ase wola. Mvudu y’ɛlɔlɔ ndo y’amɛna efula mbikama l’atei wa lokema la totombotombo t’ase wola. Wanɛ wafutawɔ falanga y’efula kɛndjakɛndjaka mituka awɔ w’eshinga wolo lo toshinga tolodi l’ase wola ndo l’anto wele kema l’olimu. Lo wedja wa ngasɔ, asolo w’ase wola kɛtaka efula lam’ɛnawɔ lɔsɛnɔ la pâ lasɛnawɔ. Mɛtɛ, The World Book Encyclopedia mbutaka ɔnɛ: “ase wola wekɔ lo sowa, aha paka oma l’olelo wa kɔlɔ oto, oma lo mvudu ya kɔlɔ, la oma l’esakelo wahasungana, koko ndo oma lo lonyangu l’etete lele lawɔ lo dikambo dia lɔsɛnɔ lawɔ. Oko ahawakoke kondja elimu w’ɔlɔlɔ ndo tshikala lɔkɔ, vɔ shishaka lɔkɛlɛngɛ lawɔ tshɛ ndo nɛmɔ diayashawɔ.” Ko woho akɔna wasala ase wola amɔtshi dia vɔ mbeya sɛna la lɔsɛnɔ lawɔ? Woho akɔna wakoka lokumu l’ɔlɔlɔ l’endana la Yeso kimanyiya onto dia nde mbeya sɛna la lɔsɛnɔ la ngasɔ?

Ntondotondo, ohɔ dia wola kokaka ndekɔnya oma lo mbekelo ya kanga enginya. Tɔ̂shi diɛnyɛlɔ dimɔtshi. Valdecir ekɔ lo suya dia, etena kakahombaka wadiɛnde la an’ande diangɔ dia ndɛ, nde akamanaka falanga lo sɛna yoho ya lɔsɛnɔ la mindo. Nde ekɔ lo mbuta ate: “Kânga mbakimi l’olimu, ndoko dikuta diakamelaka la ngelo, koko nshi tshɛ, lakakondjaka akuta wa somba tokatshikatshi dia tôka owale.” L’ɔtɛ wakandanɔka wanu la fɔka lo tshambandeko, Milton akashisha olimu ande kâmɛ l’ase olimu 23. Nde ekɔ lo mbuta ate: “Lakalalaka lo toshinga, dimi kokokaka kalola la ngelo, ndo nkumbo kami kakasowe heyama l’ɔtɛ ami.”

Ndo João nto akamanaka falanga yakandalongolaka lo ditshelo dia kɔlɔ. “Dimi kondalaka lakami. Kɛnɛ tshɛ kakamalongolaka kokokaka le mi dia dimi ntsha ditshelo diami dia kɔlɔ l’akambo ami. Lɔsɛnɔ lami lakayolanaka woho wahakoke ndo onto mbikikɛ ko wadiɛmi akayolangaka kakitɔna lami.” Ekakatanu ekina wakikɔ nto lâdiko di’ekakatanu ande w’awui a falanga la wa lo diwala. Nde ekɔ lo mbuta ate: “Laki l’ekakatanu l’ewotɔ ami ndo l’asukanyi ami, ndo dimi lakaleke ndjâla l’okakatanu l’olimu. Diɔ diakɔ diakamatetemalaka pomba olimu.” Júlio aki ɔnɔshi wa mamba wa didjoyadjoya (drogue). Koko, nde ekɔ lo nembetshiya ate: “Lam’akamɛnyi dia difuto diami hadioyokoka kimanyiyami dia nɔ̂ka didjoyadjoya, lakatatɛ la sondjaka didjoyadjoya nte kele aha dimi mongaka l’ohomba w’akuta wa disombaka.”

Oko wakandodiama l’atei wa nkumbo k’ase wola k’ana enanɛi, José akalangaka ndjakondjɛ yangɔ mɔtshi ndamɛmɛ. Lam’akandakanyiyaka ɔnɛ ndoko dikambo dia kɔlɔ diayowokomɛ lo lɔsɛnɔ lande, nde akɔtɔ l’ɔnɔngɔ w’ɛlɔngɔlɔngɔ ekina, ko akatatɛ la mbiva diangɔ diakana. Oko wakinde kondjala ndoko l’elongamelo, ɔlɔngɔlɔngɔ ɔmɔtshi akayɔtɔ l’olui ɔmɔtshi welɛwɔ ɔnɛ: Dengalenga. Nde ekɔ lo nembetshiya ate: “Lam’ele efula ka l’atei aso taki ase wola wa mamba, takangɛnangɛnaka yema lo mbivaka diangɔ di’anto ndo lo mbahɛnyahɛnyaka.”

Koko ɛlɔ kɛnɛ, anto asɔ ndo nkumbo yawɔ hawoyosowa nto oma lo wola w’efula kana oma l’ekiyanu la tokumbɛkumbɛ. Vɔ waya l’ekimanyielo kana l’elongamelo. Lande na kayawɔ ngasɔ? Nɛ dia vɔ wakeke lokumu l’ɔlɔlɔ lakasambisha Yeso. Vɔ wakayele alako wa lo Bible ndo wakɔtɔnɛ l’anto wa lo tshumanelo di’Ɛmɛnyi wa Jehowa wele la tokanyi ta woho ɔsɔ. Ndo, vɔ wakeke akambo amɔtshi w’ohomba efula w’endana l’ɔngɔnyi ndo la wola.

Ekimanyielo dia Wɛ Ntokomɛ Wola

Ntondotondo, vɔ wakeke ɔnɛ: naka vɔ kitanyiya adjango wa lo Bible, kete etombelo wa kɔlɔ w’oma lo wola kokaka kitakita. Bible hetawɔ ditshelo dia mindo, wodjwelo a wanu, tɔkɛnyɔ ta falanga, ndo ɔnwɛlɔ wa didjoyadjoya. (1 Koreto 6:​9, 10) Diangɔ dia ngasɔ oshinga wolo efula. Diɔ kokaka kɔsha kanga ɔngɔnyi, ndo mbetɛ ose wola wola wambɔtɛkɔnya. Lam’ayoyotshika ditshelo dia kɔlɔ dia ngasɔ ndo dikina dia woho ɔsɔ, wɛ ayokokoka ndowanya ekondjelo ka falanga ka nkumbo kayɛ.

Dikambo dia hende ele, vɔ wakashola ɔnɛ: akambo efula w’ohomba wekɔ woleki ɔngɔnyi lo lɔsɛnɔ. Kanyi y’ɔlɔlɔ yambɛnyama l’ɛtɛkɛta ɛnɛ wakasambiyama oma le Nzambi: “[Lomba latokokɛka onto oko woho watokɛka falanga onto, NW]. Waho wa ewu eli dia yimba nama untu leli la yo.” (Undaki 7:12) Eelo, falanga yekɔ ohomba efula. Koko, lomba lotumbi oma lo Bible la ewo k’asangwelo a Nzambi ndeka ohomba efula. Mɛtɛ, le onto lele kema la lomba, monga la falanga efula kokaka monga wotsho efula oleki monga la yema tshitshɛ. Ofundji ɔmɔtshi wa Bible akalɔmbɛ la lomba tshɛ ate: “Tumbeteki usi wula kana kanga ongonyi. Umbishaki diango dia nde dieli uhumba le mi. Dimi ntukuluta, ku ndjukanguna, La mumbula nti: Akona eli [Jehowa]? Kana dimi ntukuyala usi wula, ku dimi ndjuva, [ko ndjɔ̂nyɔla lokombo la Nzambi kami, NW].”​—⁠Tukedi 30:​8, 9.

Dikambo dia sato ele, vɔ wakashola ɔnɛ: naka onto ɔmɔtshi sɛna lo ndjela lokumu l’ɔlɔlɔ lakasambisha Yeso, kete nde hayaokaki pondjo oko onto lambokalema. Lokumu l’ɔlɔlɔ mendanaka la Diolelo diaki Nzambi. Losango lɔsɔ mbelamɛka ɔnɛ: ‘lokumu l’ɔlɔlɔ la diolelo,’ ndo lo nshi yaso nyɛ, lɔ lekɔ lo tasambishama lo kɛtɛ k’otondo. (Mateu 24:14) Yeso akatotɛ ɔnɛ tayokondja osukɔ naka sho kitsha elongamelo kaso lo Diolelo sɔ. Nde akate ate: “Keli ntundu nyutayangi diulelu la ololo wa [Nzambi], ku diango so tshe diayuyala dianyu.” (Mateu 6:33) Nzambi hatolake mituka w’eshinga wolo kana mvudu y’amɛna efula. Yeso aki lo tɛkɛta dikambo di’ehomba wa lo lɔsɛnɔ, oko diangɔ dia ndɛ la ahɔndɔ wa ndɔta. (Mateu 6:31) Koko, miliyɔ y’anto ɛlɔ kɛnɛ kokaka mbetawɔ ɔnɛ ɛtɛkɛta wa Yeso wekɔ mɛtɛ. Onto ɔmɔtshi, oyadi wola akɔna wende, hakokaki kalema naka nde mbidja Diolelo lo dihole dia ntondo.

Dikambo dia nɛi ele, vɔ wakɛnyi dia, ɔnɛ ladja Diolelo diaki Nzambi lo dihole dia ntondo hayakiyanya l’ɔtɛ w’ekakatanu w’akambo w’ekundji. Eelo, ose wola pombaka kamba la wolo efula. Koko, naka nde ekɔ lo kambɛ Nzambi, kete nde ekɔ la diɛsɛ dia monga la diokanelo nde l’Otungi ande, ɔnɛ lata Bible ɔnɛ: “Ndi kema la dionyo kuyanga wononyi lu asui w’usuyami; ndi hatusheka elundji kandi uma le ndi, keli ndi atuwukelaka lam’atundûlelelaka.” (Osambu 22:24) Lâdiko dia lâsɔ, ose wola ekɔ l’ekimanyielo ka nde mbeya sɛna l’ekakatanu wa lo lɔsɛnɔ. Nde ekɔ la lɔngɛnyi l’ɔlɔlɔ lam’asande l’anyande Akristo ndo mbeyaka lolango laki Nzambi lakashwama ndo ekɔ la wɛkamu lɔkɔ. Akambo wa ngasɔ ‘ndeka paunyi oshinga wolo, ɛɛ, vɔ ndeka paunyi ya lutshula oshinga wolo.’​—⁠Osambu 19:⁠10.

L’Etena Kɛsɔ, Ndoko Onto Layoyala Ose Wola!

L’ɔkɔngɔ diko, anto wahokɛ lotui lo lokumu l’ɔlɔlɔ mbeyaka ɔnɛ Jehowa Nzambi akasangoya dia kandola ekakatanu wa wola mbala kakɔ ɔtɔi ndo pondjo pondjo oma lo tshimbo ya Diolelo diande. Bible ekɔ lo mbisha daka nɛ: “[Ose wola, NW] huhamela pundju. Elungamelu k’usi wula hayala uyalayala pundju.” (Osambu 9:18) Diolelo diekɔ lowandji la mɛtɛ, lakashikikɛma l’elongo, Yeso Kristo mbele Owandji wa lɔkɔ. Kem’edja, Diolelo sɔ diayɔhɛna mandji y’anto lo kɛnɛ k’endana l’ɛlɔmbwɛlɔ k’akambo w’anto. (Danyele 2:44) L’etena kɛsɔ, oko wayondonga Nkumekanga kambahema l’okudi, Yeso ‘ayoka amɛnyi fɔnu la ase wola kɛtshi, ndo nde ayoshimbela anima w’ase wola. Nde ayotshungola anima awɔ oma l’ɔhɛnyɔhɛnyɔ ndo oma l’akambo a ngala, ndo dikila diawɔ diayoyala oshinga wolo lo asho ande.’​—⁠Osambu 72:​13, 14.

Lam’akandakongɛka etena kɛsɔ l’ɔngɛnɔngɛnɔ tshɛ, Mika 4:​3, 4 akate ɔnɛ: “Vo wayudjase, untu l’untu la tshina di’okodi andi wa vinyo, Ndu la tshina dia utamba andi wa fingu. Ku nduku untu ayuwautsha woma, Ne dia unyo wa [Jehowa] Kanga lulimbilimbi wakati dikambu diako.” Dikambo di’anto akɔna watɛkɛtawɔ lanɛ? Ele dikambo dia wanɛ tshɛ wayakitshakitsha la tshina dia Diolelo diaki Nzambi. Diolelo sɔ diayokandola ekakatanu tshɛ wahɛnyahɛnya anto​—⁠kânga ekakatanu wa hemɔ la wa nyɔi. “[Nde ayonya, NW] nyoi pundju. Ndi ayukitula asoi tshe uma lu ashu awo, ndi ayunya wudja andi uma lu sonyi tshe ka la kete; ne dia osoku mbata [Jehowa].” (Isaya 25:8; 33:24) Ande andja wotshikitanyi l’andja ɔnɛ wayoyala lee! Ndo, ohɔ dia, sho kokaka mbetawɔ alaka asɔ nɛ dia vɔ wakasambiyama oma le Nzambi ndamɛ. Nde ekɔ lo mbuta ate: “Wudja ami wayudjase lu dihuli dia lutui tshitshi, Edjaselu kaha la ohenyohenyo, lu edjaselu ka ki.”​—⁠Isaya 32:⁠18.

Kitsha wɛkamu lo Diolelo diaki Nzambi kimanyiyaka onto di’aha nde ndjaɔnyɔla l’ɔtɛ wa wola wele lande. Okristo wele ose wola mbeyaka ɔnɛ nde ekɔ ohomba lo asho wa Nzambi oko wele Okristo wele kanga ɔngɔnyi. Nzambi mbaokaka ngandji popo, ndo vɔ akɔ ahende wekɔ l’elongamelo kâmɛ. Vɔ akɔ ahende wekɔ lo kongɛ etena kele, lo Diolelo diaki Nzambi, wola ayoyala dikambo diakete. Ande etena ka lotombo kayoyala lee! L’etena kɛsɔ, ndoko onto layoyala ose wola!

[Caption]

Lande na kalanyayɛ falanga yayɛ lo tɔkɛnyɔ ta falanga, l’ɔnwɛlɔ a wanu wa tshambandeko, l’ɔnwɛlɔ a didjoyadjoya, kana lo yoho ya lɔsɛnɔ la mindo?

Jehowa Nzambi ayokandola ekakatanu wa wola w’anto oma lo tshimbo ya Diolelo diande