Etenyi ka hende—Angadimu w’osase—Wa weke ndo wa totshitshɛ
“Uma lu usasi aye mbatutenaka usasi.”—OSAMBU 36:9.
1. Weolo akɔna w’efula wakadjama dia mpotɔ akambo wa didjidji wa lo dibuku di’Enyelo na?
DIBUKU di’Enyelo dia lo Bible diakakotola yambalo y’Akristo oma ko nshi ya ntondo. Diɔ mbishaka ɛnyɛlɔ ka dimɛna lo woho wataleke ngamula osase wa mɛtɛ ngamula tshô. Lo 1917, anto wa Jehowa wakalembetshiya akambo amɔtshi wa lo Enyelo lo dibuku diakawatondja dielɛwɔ Le mystère accompli. Diɔ diakatondja munga y’ewandji wa lo Lokristokristo ndo y’ewandji wa pɔlitikɛ lo sɛkɛ la dihonga tshɛ, koko elembetshiyelo efula wa lɔkɔ wakɔsama oma l’ahole efula. Koko, Le mystère accompli akakimanyiya dia pemba kɔlamelo y’Ambeki wa Bible lo dikambo di’ehomɔ kɛnama kakakambaka Jehowa latɔ.
2. Osase akɔna wakangamula sawo diaki l’ɔtɛ a dui “Eotwelo ka Wodja” lo dikambo dia dibuku di’Enyelo na?
2 Dingadimu dimɔtshi dia mamba di’osase diakangadimɔ lo dibuku di’Enyelo lam’akatombe sawo diaki l’ɔtɛ a dui w’ɔnɛ: “Eotwelo ka Wodja” lo Tshoto y’Etangelo ya Asasa a Ndjoko 1, 1925 l’Angɛlɛ (Mam’ɛkɔngɔ la Tange lo Falase). Wakafɔnyama ɔnɛ Enyelo tshapita 12 akakɔndɔla ta dia l’asa Ase Rɔmɔ w’apanganu l’aseka Mupɛ wa la Rɔmɔ, ko ɔna pami aki didjidji dia lowandji la papa ya l’Ɔrɔma. Koko, sawo sɔ diakɛnya ɔnɛ: Enyelo 11:15-18 aki lo nembetshiya Tshapita 12, ɛnya dia yɔ mendanaka la eotwelo ka Diolelo diaki Nzambi.
3. Abuku akɔna wakangamula osase wakayafulanɛka lo dikambo di’Enyelo na?
3 Akambo asɔ tshɛ wakayodiholɛka anto mboka dia vɔ shihodia dibuku di’Enyelo, oshihodielo ɔsɔ wakakondjama lam’akatombe dibuku Lumière l’ekanda ehende lo 1930 (1935 lo Falase). Tokanyi tokina efula takayotombaka lo dibuku “Babylone la Grande est tombée!” Le Royaume de Dieu a commencé son règne! (1963, 1969 lo Falase) la “Alors sera consommé le mystère de Dieu” (1969, 1972 lo Falase). Koko, awui akina efula wa mbeya wakikɔ lo dikambo dia pɔlɔfɛsi ya lo dibuku di’Enyelo. Eelo, osase wa mamba wakangadimɔ lo dikambo dia dibuku diakɔ lam’akatombe dibuku La Révélation: le grand dénouement est proche! lo 1988. Kiɔkɔ yakakimanyiya di’osase wakayayaka yema yema ɔsɔ mɛnama ele ekotshamelo ka pɔlɔfɛsi ya lo Enyelo lo “lushi la Khumadiondjo,” lakatatɛ lo 1914. (Enyelo 1:10) Ɔnkɔnɛ dibuku di’Enyelo diakahombe ndjokɛma dimɛna efula lam’atete lushi lakɔ.
“Mandji Yotangemi” Yambeyama
4, 5. (a) Woho akɔna wakɔsaka Ambeki wa Bible Romo 13:1? (b) Yɛdikɔ yakɔna yɔtɔnɛ l’Afundelo yakayɔsamaka l’ɔkɔngɔ lo dikambo dia “mandji yotangemi” na?
4 Dingadimu dimɔtshi dia mamba di’osase diakɛnama lo 1962 lo dikambo dia Rɔma 13:1, diata ɔnɛ: “Untu tshɛ alɛmbɛke mandji yotangemi [“emboledi wa lâdiko,” Ekadimwelo k’Andja w’Oyoyo lo Angɛlɛ].” (DIKELEMBA DI’OYUYU diaki MGR J. HAGENDORENS) Ambeki wa ntondo wa Bible wakahotɔ ɔnɛ “mandji yotangemi” yakatɛkɛtama lanɛ, emboledi w’andja ɔnɛ mbewɔ.” Vɔ wakakanyiyaka ɔnɛ: lo ndjela divɛsa nɛ, naka Okristo ambɔtɔ l’olimu w’ɔsɔlɔyi lo nshi ya ta, kete nde ayohomba ndɔta ahɔndɔ w’asuda, mɛmba ekoma, ndo ntshɔ la ntondo ka ta, polo ndo l’afuku watotshimamaka dia ndɔ ta. Wakafɔnyama ɔnɛ: lam’ele Okristo hakoke ndjaka onyande onto, nde ayohomba kanda kiyɔngɛ kande l’olongo naka aya k’ɛngɛnɔ.a
5 Tshoto y’Etangelo ya Tshaka Fudu 15 la Diɛla Woke 1, 1962 l’Angɛlɛ (Asasa a Ndjoko 1 la 15, 1963 lo Falase) akangamula osase lo dikambo diakataka Yeso lo Mateu 22:21 ate: “Nyusha Kayisa diango dia Kayisa; nyusha [Nzambi, NW] diango dia [Nzambi, NW].” Ɛtɛkɛta w’apɔstɔlɔ wa lo Etsha 5:29 ɛnɛ waki l’olembetshiyelo a dimɛna: “Dieli la su dia nkitanyia aui wa [Nzambi, oko owandji, NW], aha aui w’antu atu.” Akristo nɛmbɛka Kayisa—“mandji yotangemi”—edja tshɛ kele dui sɔ halɔmbɛ Okristo dia nde pindola ɛlɛmbɛ wa Nzambi. Akokɛma ɔnɛ pombaka nɛmbɛ Kayisa l’awui amɔtshi ato, koko aha l’akambo tshɛ. Akristo futaka Kayisa mbo yande paka l’etena kele dikambo sɔ hadiɔlɔshana l’ɛlɛmbɛ wa Nzambi. Ande ɔngɛnɔngɛnɔ wakawoke dia monga l’osase w’ɔlɔlɔ lo dikambo sɔ lee!
Angadimu w’Osase lo Akambo w’Ɔlɔngɔswamelo
6. (a) Di’aha mbokoya diahɔnelo dia lowandji oko asalemadiɔ l’atei a Lokristokristo, tɛdikɔ takɔna takɔsama? (b) Kakɔna kakayɛnamaka l’ɔkɔngɔ oko yoho y’ɔlɔlɔ ya sɔna emendji wa tshumanelo na?
6 Dikambo dia mbeya wa na akɔna wakahombe kamba oko dikumanyi ndo oko wa diakɛlɛ l’atei wa tshumanelo diakatombe. Dia mbewɔ woho w’aha ndjokita lo lowandji oko wahɔnalɔ l’atei a Lokristokristo, yɛdikɔ yakɔsama di’anto asɔ sɔnama oma lo vɔtɛ yakahombe ase tshumanelo tshɛ sala oko alangawɔ. Koko, osase wa lo Tshoto y’Etangelo ya Lovula 1 la Kɔlɛkɔlɛ 15, 1932 (Tshaka Fudu la Diɛla Woke lo Falase), wakayangamulaka paka ngamula tsho akɛnya dia Afundelo hawetawɔ awui wa sala vɔtɛ ya sɔna dikumanyi. Omalɔkɔ, anto asɔ wakayɔhɛnyamaka la kɔmite k’olimu, ndo ɔnɔmbɔdi w’olimu wakasɔnama oma le la Société.
7. Ɛlɔngɔswɛlɔ akɔna wakɛnama oma l’ekimanyielo k’angadimu w’osase lo dikambo di’ɔsɔnwɛlɔ w’emedji wa tshumanelo na?
7 Tshoto y’Etangelo ya Mam’ɛkɔngɔ la Tange 1 la 15, 1938 (Loseketanya 1 la 15 lo Falase) aki l’angadimu w’osase wakɛnyaka ɔnɛ: ekambi wa l’etshumanelo wakahombe sɔnama lɔsɔnama koko aha oma lo vɔtɛ, mbuta ate: sɔnama oma lo Teokrasi. Lo 1971, dingadimu dikina di’osase diakɛnya ɔnɛ: etshumanelo tshɛ hahombe nɔmbwama oma le okambi ɔtɔi w’etshumanelo. Koko, tshumanelo tshɛ pombaka ndjâla l’olui wa dikumanyi, kana emendji, wɔsɔnami oma le Olui Walɔmbɔla w’Ɛmɛnyi wa Jehowa. Omalɔkɔ, lam’akayangamulaka osase ngamula tsho lo edja k’ɛnɔnyi 40, akayɛnamaka dia, dikumanyi, kâmɛ la wa diakɛlɛ, wanɛ w’etama akambi w’olimu ɛlɔ kɛnɛ, wakahombe sɔnama oma le “ɔhɔmbɔ wa kɔlamelo ndo wa kɛsɔ,” oma lo tshimbo ya Olui awɔ Walɔmbɔla. (Mateo 24:45-47, NW) Dui sɔ diakɔtɔnɛka la kɛnɛ kakasalemaka lo nshi y’apɔstɔlɔ. Anto amɔtshi, oko Timɔtɛ la Tito wakasɔnama oko dikumanyi oma le olui walɔmbɔla wa l’eleko ka ntondo. (1 Timote 3:1-7; 5:22; Tito 1:5-9) Etshikitanelo ɛsɔ tshɛ wekɔ ekotshamelo ka mamba ka Isaya 60:17: “Dimi layukela paunyi lu dihuli di’ohotela, Fesa lu dihuli dia luwulu, ohotela lu dihuli di’utamba, Ndu luwulu lu dihuli di’ave. Dimi layete elombodi aye ki, La ambuledi aye antu w’ololo.”
8. (a) Etshikitanelo akɔna wakɛnama lo woho wakalɔmbwamaka la Société oma lo tshimbo y’akambo wa mɛtɛ wakayahamaka tshô na? (b) Olui Walɔmbɔla ekɔ la kɔmite ngana ndo elimu akɔna wandawɔ kana walamawɔ na?
8 Dikambo dikina diakendanaka la woho walɔmbwama la Société Watch Tower. Lo edja k’ɛnɔnyi efula, Olui Walɔmbɔla w’Ɛmɛnyi wa Jehowa kotshikitana la tshunda di’ɛlɔmbɔdi diaki Watch Tower Bible and Tract Society of Pennsylvania, ndo suke l’akambo tshɛ waki paka l’anya w’ɔnɔmbɔdi awɔ. Oko akadiɛnyama lo Annuaire des Témoins de Jéhovah 1977 (lɛkɛ 258 polo 260): lo 1976, Olui Walɔmbɔla akatatɛ kɛndakɛnda l’ekimanyielo ka kɔmite shamalo, ɔm’ɔmɔ akakondja ɔkɛndɛ wa mendaka awui amɔtshi w’olimu wa l’andja w’otondo. Kɔmite k’Ase Olimu mendanaka l’akambo w’ase olimu, kâmɛ ndo ehomba a wanɛ tshɛ wakamba lo nkumbo ya Betɛlɛ ya l’andja w’otondo. Kɔmite k’Afundji, kandolaka ekakatanu tshɛ wa l’emunyi ndo wa mbolamatadi w’endana l’olimu, ɛnyɛlɔ oko akambo wa mvudu ndo wa taandjo t’ofundelo (imprimerie). Kɔmite k’Olimu mendanaka l’olimu w’esambishelo ndo la nkɛndɔ y’emendji w’eteta, y’ambatshi mboka, ndo olimu w’apandjudi wa lo tshumanelo. Kɔmite ka Wetshelo ekɔ l’ɔkɛndɛ wa sanganya ya lo tshumanelo, sanganya yotshikitanyi ya lushi ɔtɔi, sanganya y’etshimbedi, ndo sanganya ya distrikɛ kâmɛ ndo ya wedja efula la weoho wa kalasa tshɛ yasalema dikambo dia wetshelo wa lo nyuma w’anto a Nzambi. Kɔmite k’Ofundelo nɔmbɔlaka ɔlɔngɔswɛlɔ ndo okadimwelo w’ekanda lo weoho tshɛ, ndo ndjashikikɛka dia kana yangɔ tshɛ mbɔtɔnɛka l’Afundelo. Kɔmite k’Ɔnɔmbɔdi ndowanyaka akambo a wanyandja.b Ndo nto, l’ɛnɔnyi wa 1970 mbakayotatɛka nɔmbwama filialɛ ya la Société Watch Tower oma le kɔmite kɛmɔtshi lo dihole dia nɔmbwama oma le tshɔi y’omendji.
Osase w’Endana la Lɔkɛwɔ l’Akristo
9. Woho akɔna wakendanaka angadimu w’osase la diokanelo diahomba ndjâla l’asa Akristo la mandji ya l’andja ɔnɛ na?
9 Angadimu efula w’osase wakendanaka la lɔkɛwɔ l’Akristo. Ɛnyɛlɔ, tênde yema dikambo dia lomangemange. Dingadimu dimɔtshi dia lânde di’osase diakangamula lo dikambo sɔ lo sawo diaki l’ɔtɛ a dui w’ɔnɛ: “Neutralité,” diakatombe lo Tshoto y’Etangelo ya Tshaka Fudu 1, 1939 (Tshango 1940 lo Falase). Ande woho wakatombe sawo sɔ la wonya wasungana l’ɔkɔngɔ wa Ta dia Hende di’Andja w’otondo tatɛ paka yema tshitshɛ tshô lee! Sawo diakɔ diakalembetshiya ɔnkɔnɛ wele lomangemange ndo diakɛnya ɔnɛ Akristo hawohombe mbɔtɔ l’akambo wa pɔlɔtikɛ kana l’ekakatanu wa l’asa wedja la wedja. (Mika 4:3, 5; Joani 17:14, 16) Ɔsɔ ekɔ kiɔkɔ mɔtshi ya lohetsho lahetshamawɔ oma le wedja tshɛ. (Mateu 24:9) Ata wakalɔkaka Ase Isariyɛlɛ w’edjedja kondjala ɛnyɛlɔ k’Akristo ndjela oko akadilembetshiya Yeso lo Mateu 26:52. Lâdiko dia lâsɔ, ndoko wodja wa pɔlitikɛ wayela Teokrasi ɛlɔ kɛnɛ, mbuta ate: walɔmbwama oma le Nzambi oko waki Isariyɛlɛ w’edjedja.
10. Kakɔna kakakɛnɛmɔla angadimu w’osase lo woho wahomba Akristo mbɔsa dikila na?
10 Osase wakangadimɔ nto lo dikambo di’ekila ka dikila. Ambeki wa Bible wakafɔnya ɔnɛ osekelo w’aha ndɛ dikila watama lo Etsha 15:28, 29 akahembetɛ paka le Akristo w’Ase Juda. Koko, Etsha 21:25 ekɔ lo mɛnya ɔnɛ: lo nshi y’apɔstɔlɔ, ɔlɛmbɛ ɔnɛ wakahombe namema ndo le ase wedja wakakomaka ambetawudi. Omalɔkɔ, Akristo tshɛ pombaka sɛka dikila oko wakɛnyama dikambo diakɔ lo Tshoto y’Etangelo ya Lotena Eduwa 1, 1945 (lo Angɛlɛ). Aha ɔnɛ paka kila olelo wa dikila dia nyama tô, dikila dia lokate, koko sɛka ndo dikila di’anto, oko lo dikambo di’okaloyelo wa dikila lo demba.
11. Kakɔna kakokɛma lo dikambo dia lɔkɛwɔ lahomba Akristo monga alɔ lo dikambo dia fɔka na?
11 Etombelo wakɛnama oma lo edelo k’osase ko, mbekelo yakashimbamaka tshô la ntondo yakayɛnama l’ɔkɔngɔ ɔnɛ yekɔ munga ya mamba. Ɛnyɛlɔ kɛmɔtshi ka dikambo sɔ akendanaka l’ɔnwɛlɔ wa fɔka. Lo Tshoto y’Etangelo ya Loseketanya 1, 1895 (l’Angɛlɛ), Ɔnangɛso Russell akakotola yambalo y’anto lo 1 Koreto 10:31 la 2 Koreto 7:1 ndo akafunde ate: “Halɛnyi lo na okoki ɔnwɛlɔ wa fɔka lo weoho atɔ tshɛ kokaka tombola Nzambi kana ndjâla dui di’ɔlɔlɔ le Okristo ndamɛ.” Tatɛ oma ko 1973, dui sɔ diakokɛma l’ɔlɔlɔ tshɛ ɔnɛ: onto tshɛ lanɔ fɔka hakoke ndjâla Ɔmɛnyi wa Jehowa. Lo 1976, olembetshiyelo w’ɔlɔlɔ wakashama ɔnɛ: ndoko Ɔmɛnyi kânga ɔtɔi wahomba kamba olimu lo atshunda watɔwɔ owale ko nde nama dihole diande l’atei w’etshumanelo.
Etshikitanelo Ekina
12. (a) Kakɔna kakakɛnɛmɔla dingadimu dimɔtshi di’osase lo dikambo dia sapi ya Diolelo yakawasha Petero na? (b) Lo akambo akɔna wakayakimanyiya Petero la sapi yakɔ ɔtɔi ɔtɔi na?
12 Osase okina wakayangamulaka tsho lo dikambo dia lofulo la sapi ya didjidji yakasha Yeso Petero. Ambeki wa Bible wakafɔnyaka ɔnɛ: Petero akalongola sapi hiende yakakimanyiyaka anto dia ndjâla ekitɔ wa Diolelo—kɛmɔtshi lo dikambo di’Ase Juda, kɛnɛ kakakambema olimu lo Pɛntɛkɔsta ka l’ɔnɔnyi 33 T.D., ndo kekina lo dikambo di’Ase Wedja, kakakambema olimu mbala ka ntondo l’ɔnɔnyi 36 T.D. lam’akasambisha Petero Kɔnɛliyo. (Etsha 2:14-41; 10:34-48) L’edjedja ka wonya, akɛnama ɔnɛ: olui okina wa sato wakendanaka la dikambo sɔ—Ase Samariya. Petero akakambe olimu la sapi ka hende lam’akandawasha diaaso dia vɔ mbɔtɔ lo Diolelo. (Etsha 8:14-17) Ɔnkɔnɛ sapi ka sato kakakambema olimu lam’akasambisha Petero Kɔnɛliyo.—Tshoto y’Etangelo ya Kɔlɛkɔlɛ 1, 1979 (l’Angɛlɛ), (Tshango 1, 1980 lo Falase) lɛkɛ 16 polo 22, 26.
13. Kakɔna kakakɛnɛmɔla angadimu w’osase lo dikambo dia nkoto y’ɛkɔkɔ yatɛkɛtama lo Joani tshapita 10 na?
13 Oma l’ekimanyielo k’owa okina w’osase, akokɛma ɔnɛ Yeso kɔtɛkɛta dikambo dia nkoto hiende y’ɛkɔkɔ tshô koko dia koto shato. (Joani tshapita 10) Nkoto yakɔ shɔ yɔ nyɛ: (1) lokoto l’Ase Juda laki Joani Obatizanyi onami awɔ wa soko, (2) lokoto l’akitami, ekitɔ wa Diolelo, ndo (3) lokoto l’“ekoko ekina,” wanɛ wele l’elongamelo ka lɔsɛnɔ la la kɛtɛ.—Joani 10:2, 3, 15, 16; Tshoto y’Etangelo ya Yâta Afusa 15, 1984 (l’Angɛlɛ) lɛkɛ 10-20 (Yitshu 15, 1984, lɛkɛ 9-18 lo Falase).
14. Woho akɔna wakahotola angadimu w’osase akambo w’endana l’etatelo ka Difɛstɔ dia didjidji di’ɛnɔnyi akumi atanu tshɛ na?
14 Oshihodielo ɔmɔtshi wakashama lo dikambo dia Difɛstɔ dia didjidji diakasalemaka l’ɔkɔngɔ w’ɛnɔnyi akumi atanu tshɛ. La tshina di’Ɛlɛmbɛ, Difɛstɔ dia woke efula diakasalemaka l’ɔkɔngɔ w’ɛnɔnyi 50 tshɛ, l’etena kakɔ, diangɔ diakakaloyamaka le akanga a diɔ wa mɛtɛ mɛtɛ. (Akambu w’Asi Lewi 25:10) Wakafɔnyaka edja k’efula ɔnɛ: dui sɔ diaki didjidji dia Diolelo diaki Kristo di’Ɛnɔnyi Kinunu. Koko, atonge edja, akayɛnamaka ɔnɛ Difɛstɔ diakɔ dia didjidji sɔ diakatatɛ lo Pɛntɛkɔsta ka l’ɔnɔnyi 33 T.D. lam’akatshungɔ wanɛ wakatshulwamɛ nyuma k’ekila oma la tshina dia sheke y’Ɛlɛmbɛ.—Tshoto y’Etangelo ya Tshango 1, 1987 (lo Falase), lɛkɛ 18-28.
Ehamelo k’Osase l’Akambo wa Wetelo
15. Osase akɔna wakangadimɔ lo dikambo di’okambelo w’olimu la wotelo “sangoya” na?
15 “Undaki akayangi aui w’amena, akafundi aui wa mete la utema w’usimbwi.” (Undaki 12:10) Awui asɔ kokaka mendana la sawo di’eso lo sawola lanɛ, nɛ dia osase kongamula paka lo weoho w’akambo w’ohomba wa ngasɔ wele oko wetshelo la lɔkɛwɔ, koko ndo lo wetelo w’Akristo kâmɛ l’elembetshiyelo awɔ w’eshika. Ɛnyɛlɔ, l’atei w’Ambeki wa Bible, dibuku dimɔtshi diakawaleke nanga efula aki okanda wa ntondo wa l’atei a wɛnɛ wakawelɛka Études des Écritures, dibuku diaki l’ɔtɛ a dui: Le divin plan des âges. Koko, l’edjedja ka wonya, akayeyamaka dia, Dui dia Nzambi tɛkɛtaka paka dikambo di’anto ɔnɛ vɔ mbasangoya. (Tukedi 19:21) Ndoko edie kata Afundelo ɔnɛ Nzambi sangoyaka. Nde kema l’ohomba wa sangoya dikambo. Kɛnɛ tshɛ kakanyiyande, nde kikotshaka mɛtɛ oma l’ekimanyielo ka lomba la wolo ande w’aha l’ekomelo, oko akokaso mbala lo Ɛfɛsɔ 1:9, 10 (NW) ɔnɛ: “Ele oma l’ɔngɛnɔngɛnɔ wakandayakanɛ ndamɛmɛ lo dikambo di’ɛlɔmbwɛlɔ l’ekomelo ka deko diakandashikikɛ.” Omalɔkɔ, akɛnama yema yema ɔnɛ: “sangwelo” ekɔ wotelo wasungana efula lam’atɛkɛtama dikambo dia Jehowa.
16. Woho akɔna akayokɛmaka yema yema olembetshiyelo w’ɔlɔlɔ wa Luka 2:14 na?
16 L’ɔkɔngɔ diko, dikambo dia mpotɔ kɛnɛ katama lo Luka 2:14 akayotombaka sɛkɛ. Lo ndjela kɛnɛ kata ekadimwelo ka l’Angɛlɛ ka King James Version, sho mbalaka ɔnkɔnɛ: “Lokumu le Nzambi l’olongo, wɔladi la kɛtɛ ndo ɔlɔlɔ le anto.” Akɛnama ɔnɛ: okadimwelo ɔsɔ kɔmɔmbɔla lokanyi lɔsɔ dimɛna nɛ dia, ɔlɔlɔ wa Nzambi hɛnyama otsha le anto wa kɔlɔ. Koko, Ɛmɛnyi waketawɔ kitshimudi y’ɔnɛ: ɔsɔ ekɔ dikambo dia wɔladi le anto waki l’otema w’ɔlɔlɔ otsha le Nzambi. Omalɔkɔ, vɔ wakatetemala la tɛkɛta dikambo dia wanɛ wakayashaka lo Bible oko anto w’ɔlɔlɔ. Koko, vɔ wakayohotɔka ɔnɛ: aha dikambo di’ɔlɔlɔ w’anto mbakama epole ɔsɛkɛ lanɛ, koko di’ɔlɔlɔ w’oma le Nzambi. Ɔsɔku mbata Ekadimwelo k’Andja w’Oyoyo (l’Angɛlɛ) kele l’awui wofundami l’ɛsɛ ka dikatshi lo dikambo dia Luka 2:14 ɔnɛ: “anto wetawɔma le nde [Nzambi].” Akristo tshɛ walama dɔkɔlɔkɔ dia ndjakimɔ diakawatshibe lo lɔsɛnɔ lawɔ mbetawɔmaka le Nzambi.
17, 18. Kakɔna kayoyindja Jehowa, ndo kakɔna kayondotombola?
17 Woho akɔ wâmɛ mbele, edja k’efula, Ɛmɛnyi wakatɛkɛtaka dikambo di’oyindjelo wa lokombo la Jehowa. Ko onde, Satana akadjɛ lokombo la Jehowa tɔfɔɛfɔɛ oka? Lo menda dui sɔ, onde okambi ɔmɔtshi waki Satana akadje lokombo lakɔ l’ehemba wate kana oko Jehowa kondjala la lɔkɛlɛngɛ la mbetawɔ lo lokombo lɔsɔ oka? Kema, aha ɔsɔku mɛ. Aha lokombo la Jehowa mbakɔtɔ l’ehemba ko lɔ lakahombe nyindjama. Diɔ diakɔ diele, ekanda waki la Société Watch Tower weke ka tomba hawɔtɛkɛta dia lokombo laki Jehowa oko lamboyindjama. Vɔ mbutaka dikambo di’oyindjelo wa lowandji laki Jehowa ndo dia otombwelo wa lokombo lande. Dui sɔ mbɔtɔnɛka la kɛnɛ kakatotɛ Yeso dia sho nɔmbaka ɔnɛ: “Lokombo lakɛ latumbɔme.” (Mateo 6:9, DIKELEMBA DI’OYUYU diaki MGR J. HAGENDORENS.) Mbala la mbala, Jehowa akate dia nde aki suke dia sala woho wa lokombo lande tombwama, lokombo lakɔnyɔla Ase Isariyɛlɛ koko aha lakawadje tɔfɔɛfɔɛ (sho mbɛnganyisha alɛta ango).—Ezekiyele 20:9, 14, 22; 36:23.
18 Dikambo dia diambo ko lo 1971 (1974 lo Falase), dibuku “Les Nations sauront que je suis Jéhovah”—Comment? akasha otshikitanelo ɔnɛ: “Yeso Kristo ekɔ lo ndɔsha . . . dikambo di’oyindjelo wa lowandji l’andja w’otondo laki Jehowa ndo dia lotombo la lokombo lande.” (Lɛkɛ 365) Lo 1973 (1975 lo Falase), dibuku Le Royaume millénaire de Dieu s’est approché diakate ɔnɛ: “Etena ka ‘fɔnu ka woke’ ayoyala etena kayoyindja Jehowa, Kanga-Wolo-Tshɛ, lowandji lande l’andja w’otondo ndo kayondotombola lokombo lande.” (Lɛkɛ 407) L’ekomelo, lo 1975 (1979 lo Falase), dibuku Fin prochaine de la détresse mondiale diakate ɔnɛ: “Dikambo dioleki woke l’ɔkɔndɔ w’andja w’otondo diayokotshama: oyindjelo wa lowandji laki Jehowa l’andja w’otondo ndo otombwelo a lokombo lande l’ekila.”—Lɛkɛ 280.
19, 20. Woho akɔna akokaso mɛnya lowando laso lo dikambo di’angadimu w’osase wa lo nyuma na?
19 Ande ɔtshɔkɔ le anto wa Jehowa dia vɔ takadimɔka l’atei w’osase wa lo nyuma wa ngasɔ lee! Lo woho wotshikitanyi, wotelo ɔmɔtshi wɛnya woho akɔna wele ewandji wa l’atei a Lokristokristo wekɔ lo wodjima wa lo nyuma ambotomba sɛkɛ oma lo kɛnɛ kakate owandji ɔmɔtshi w’ɔtɛmwɛlɔ ate: “Lande na kele pɛkato? Lande na kele asui? Lande na kele diabolo? Ɔsɔ kele wembola walangami tombola Nkumadiɔndjɔ lam’ayomotshɔ l’olongo.” Koko, Ɛmɛnyi wa Jehowa kokaka mbotela lande na: Nɛ dia lowandji laki Jehowa l’andja w’otondo akadjama tamu, ndo nto, ele dia shikikɛ kana anto kokaka nama kɔlamelo yawɔ otsha le Nzambi oyadi ehemba akɔna wayowokondja oma le Satana.
20 L’edja k’ɛnɔnyi, angadimu w’osase, oyadi wa weke kana wa totshitshɛ, wakangamula vioka y’ekambi wa Jehowa wakayakimɔ. Dui sɔ diakasalema oma l’ekotshamelo k’avɛsa wele oko Osambu 97:11 la Tukedi 4:18. Koko, tatohɛke kânga yema dia, kɛndakɛnda l’osase kɛdikɛdi mandola woho wayaleke ngamula osase akɔ ndo monga la lɔsɛnɔ lo ndjaɔtɔnganyiya lawɔ. Oko wambotodiɛna, osase wayangamula paka ngamula tshô ɔsɔ mendanaka la lɔkɛwɔ laso ndo l’olimu aso wa sambisha.
[Footnotes]
a Lo ndɔshana la lokanyi lɔsɔ, Tshoto y’Etangelo ya Mam’ɛkɔngɔ la Tange 1 la 15, 1929 l’Angɛlɛ (Loseketanya la Lovula lo Falase) akate ɔnɛ “mandji yotangemi” kɛdikɛdi Jehowa Nzambi la Yeso Kristo. Kanyi shɔ mbakalɔngɔswama ntondotondo lo 1962.
b Tshoto y’Etangelo ya Mɔmbi 15, 1992 (lo Falase) akewoya di’anangɛso amɔtshi wakasɔnama oma l’atei w’“ekoko ekina” wakakondja ɛkɛndɛ wa kimanyiya kɔmite y’Olui Walɔmbɔla, lo ndjela ɛnyɛlɔ wa Netenimɛ ya lo nshi y’Ɛzɛra.—Joani 10:16; Ezera 2:58.
Onde Wɛ Mbohɔka?
◻ Osase akɔna wakangadimɔ lo dikambo dia nɛmbɛ “mandji yotangemi” na?
◻ Oma l’ekimanyielo k’angadimu w’osase, etshikitanelo akɔna wakɔtɔ l’akambo w’endana l’ɔlɔngɔswamelo na?
◻ Osase akɔna wakayangamulaka ngamula tshô lo dikambo dia lɔkɛwɔ l’Akristo na?
◻ Etshikitanelo akɔna wasalema oma lo tshimbo y’osase wa lo nyuma ndo ya eokelo k’akambo amɔtshi wa l’Afundelo na?