Etena k’aha ndala djɔ
“Dieli la lukumu l’ololo nsambishama ntundu lu wedja tshe. . . . Keli one [layokikɛ, “NW”] edja ndu l’ekumelu, ayushimbamela.”—MAKO 13:10, 13.
1. Lande na kahombaso mbikikɛ ndo keketsha otema?
SHO pombaka mbikikɛ—l’atei wa lɔlɔnga laha la mbetawɔ ndo la wɛngɛngɛ! Oma ko 1914, lɔlɔnga lɔmɔtshi l’anto lambolana l’awui wa kɔlɔ efula, oko woho waki lo nshi ya Yeso. Ɛlɔ kɛnɛ nto, akambo wa kɔlɔ wambodiangana l’andja w’otondo. Lo “nshi y’ekumelu” nyɛ, “tena dia wulu” diakalembetshiya ɔpɔstɔlɔ Paulo diekɔ lo mɛnya anto pâ efula. ‘Anto wa kɔlɔ ndo akanga w’akadikadi wekɔ lo taleke sala paka kɔlɔ keto.’ Mɛtɛ, “anja w’otondo weekɔ lo lowanji la Nkanga kɔɔlɔ,” Satana Diabolo, ɔnɛ ladja weolo ande w’ekomelo ɛlɔ kɛnɛ dia nanya nkɛtɛ. Koko, keketsha otema! “Fɔnu ka woke” kayela anto tshɛ walanga akambo w’ɛlɔlɔ ekimanyielo kekɔ lo ndjaye.—2 Timote 3:1-5, 13; 1 Yowanɛ 5:19, Dyookaneelo dy’oyooyo; Enyelo 7:14, NW.
2. Woho akɔna wakakotshama pɔlɔfɛsi lo 1914?
2 Diɛsɛ ko, Jehowa ambahenyaka Nkumadiɔndjɔ Yeso Kristo l’okudi l’elongo, ɔsɔ ekɔ ɛlɔngɔswɛlɔ ka ntondo kakasalema dia shila atunyi wahɛnyahɛnya anto oshiki. (Enyelo 11:15) Oko akakotshama pɔlɔfɛsi kɛmɔtshi ka lo Bible kakafunde Danyɛlɛ lam’akaye Mɛsiya mbala ka ntondo, woho akɔ wâmɛ mbele, l’eleko kaso kɛnɛ, pɔlɔfɛsi kɛmɔtshi ka lɔɔka kakafunde Danyɛlɛ kakakotshama. Lo Danyele 4:16, 17, 32, wekɔ lo totɛ woho wakayonyɛmaka lowandji la losembwe oma la nkɛtɛ lo edja ka “tena esambeli.” L’ekotshamelo kadiɔ koleki woke, tena esambele sɔ mbɛdima l’ɛnɔnyi esambele wa lo Bible wele ɔnɔnyi ɔtɔyi ekɔ la ‘nshi’ 360, kana lo tshɛtshɛ: ɛnɔnyi 2 520.a Ɛnɔnyi ɛsɔ wakatatɛ mbalema oma ko 607 N.T.D., lam’akatatɛ Babilɔna pɔtshahɔtsha diolelo di’Isariyɛlɛ, polo ndo lo 1914 T.D., ɔnɔnyi wakahema Yeso l’okudi l’olongo oko Nkumekanga kasungana mbolɛ anto tshɛ. L’etena kɛsɔ mbakakomɛ “tena diakashikikɛma di’ase wedja.” (Luka 21:24, NW) Koko, wedja wakatone ndjakitshakitsha la tshina dia Diolelo diaki Mɛsiya diakatatɛ la mbolɛ.—Esambu 2:1-6, 10-12; 110:1, 2.
3, 4. (a) Wɛdinyelo akɔna wakoka salema l’asa akambo wa l’eleko ka ntondo la wa nshi nyɛ na? (b) Wembola akɔna w’ohomba wakoka mumbɔma?
3 Etena kakayasukanaka lomingu la 70 l’ɛnɔnyi (29-36 T.D.), ndo nto lam’akasukana ɔnɔnyi 1914, anto wakokaka Nzambi wɔma wakalongamɛka oyelo waki Mɛsiya. Ko nde akaye mɛtɛ! Koko, lo wedi akɔ ehende, woho wakandahombe mɛnama akatshikitana la woho wakawalongamɛka. Lo wedi akɔ ehende nto, lo menda yema ya nshi yakete, “lolonga” la kɔlɔ lakayodiɛnɛka lam’akawalongola dilanya diakâfundɛ Nzambi.—Mateu 24:34.
4 Lo sawo diaso dietshi, takalembetɛ woho wakakomɛ lɔlɔnga la kɔlɔ l’Ase Juda lakadiake Yeso. Ko ahombaso mbuta dikambo dia lɔlɔnga la kɔlɔ l’anto watetemala la ndɔshana lande ndo wahawodje yimba ɛlɔ kɛnɛ na? Etena kakɔna kayolanyema lɔlɔnga laha la mbetawɔ lɔnɛ?
“Tanyolalake Djɔ”!
5. (a) Lo dikambo di’ɔkɔkɔ akɔna w’ɔlɔlɔ wahatahombe nyanga dia mbeya etena kayokoka ‘lushi la wonya’ waki Jehowa? (b) Lo ndjela Mako, la dako diakɔna di’ohomba diakadihiya Yeso pɔlɔfɛsi kande na?
5 Oma lâdiko wa nde mbuta akambo wayêla “[fɔnu ka woke, NW],” Yeso akakotsha ate: “Keli nduku untu leya lushi lako kana unya ako, kuyanga andjelo wa l’ulungu, kuyanga Ona, paka Papa ndame.” (Mateu 24:3-36; Mako 13:3-32) Sho kema l’ohomba wa mbeya wonya shikaa wayosalema akambo asɔ. Koko, sho pombaka mangemɛ di’aha ndala djɔ, monga la mbetawɔ ka nge, ndo tetemalaka sala olimu waki Jehowa—koko aha lo kambaka akumi wa mbeya datɛ diakɔ. Yeso akadihiya pɔlɔfɛsi kande ka woke ata ate: “Nyewo, [tanyolalake djɔ, NW], ne dia nyu hanyeya lam’ayukuka etena kako. . . . [Tanyolalake djɔ, NW] . . . Diui diunyutedimi ne, antu tshe mbaditelami nti: [Tanyolalake djɔ, NW].” (Mako 13:33-37) Wâle wekɔ lo mbɔlama lo andja wele lo wodjima ɔnɛ. Tatolalake djɔ!—Romo 13:11-13.
6. (a) Lo na ahombaso shikikɛ mbetawɔ kaso? (b) Woho akɔna wakokaso “mbala nshi yasu”? (c) Kakɔna kakalange Yeso nembetshiya mɛtɛ mɛtɛ oma lo tshɛkɛta “lolonga” na?
6 Sho hatohombe mbidjaka yimba paka lo pɔlɔfɛsi tsho yakasambiyama y’endana la nshi nyɛ y’ekomelo ka dikongɛ nɛ dia kɔlɔ, koko, sho pombaka ntondotondo monga la mbetawɔ lo olambo w’ohomba efula wakakimɔ Kristo Yeso ndo l’alaka wa mamba waki Nzambi wotumbi oma l’olambo akɔ. (Heberu 6:17-19; 9:14; 1 Petero 1:18, 19; 2 Petero 1:16-19) Oko walomɔlɔmɔwɔ dia mɛna ekomelo ka dikongɛ nɛ dia kɔlɔ, anto waki Jehowa wekɔ lo tɛkɛta efula lo dikambo di’etena kayoya “fɔnu ka woke,” wakiɔtɔnganyiya ndo l’akumi wakambawɔ wa mbeya ɛnɔnyi engana waya la lɔlɔnga lakatatɛ oma ko 1914. Koko, sho ‘ndjâlaka l’etema wa lomba,’ aha lo kanyiyaka tsho dikambo di’ɛnɔnyi engana kana nshi ngana yele la lɔlɔnga ɔtɔi, koko lo kana yimba dikambo dia woho wahombaso “mbala nshi yasu” dia tombolaka Jehowa l’ɔngɛnɔngɛnɔ. (Osambu 90:12) Lo dihole dia mbidja ɔlɛmbɛ ɔmɔtshi wa mbɛdikolaka tena, tshɛkɛta “lolonga” oko akakambe Yeso layɔ olimu mendanaka efula paka l’anto wasɛna l’etena kɛmɔtshi ka l’ɔkɔndɔ w’anto kâmɛ la akambo wâtshikitanya l’anto akina.b
7. Kakɔna kakafunde ombetsha ɔmɔtshi walakanya ɛkɔndɔ w’anto lo dikambo dia “lɔlɔnga la 1914,” ndo woho akɔna wɔtɔnɛ dui sɔ la pɔlɔfɛsi ka Yeso na?
7 Lo ndjela kɛnɛ komiso la mbuta, Robert Wohl, ombetsha ɔmɔtshi walakanya ɛkɔndɔ w’anto, akafunde lo dibuku diande The Generation of 1914 (Lɔlɔnga la 1914) ate: “Hawolembetshiya lɔlɔnga lɔmɔtshi la l’ɔkɔndɔ w’anto oma lo wɛdikelo w’adatɛ amɔtshi . . . Lɔ halolembetshiyama oma l’adatɛ amɔtshi.” Koko, nde akashikikɛ ɔnɛ: Ta dia Ntondo di’Andja w’Otondo diakatonge “okakitɔnelo waheyama shimba nto l’asa nshi nyɛ la ya ntondo,” ndo nde akakotsha ate: “Wanɛ wakake lo ta hawohɛki pondjo dia andja ɔmɔtshi akakomɛ ndo okina wakatatɛ lo ngɔndɔ ka Loseketanya 1914.” Ande dui sɔ mɛtɛ kediɔ lee! Dui sɔ diambonda etshina ka dikambo diakɔ mɛtɛ. Oma ko 1914, “lolonga lone” lambɛna etshikitanelo wa wɔma efula. Lɔ lakɛnyi nkɛtɛ kalɔwanɛ l’akila wa miliyɔ y’anto. Ata a wɔma efula, oshilelo wa dibila di’anto oshiki, odiakatanelo, akambo wa ngala, ndo ɛɔnywɛlɔ k’ɛlɛmbɛ, akambo asɔ wekɔ lo salema l’andja w’otondo. Ndjala, hemɔ ndo loseka la monanyi lekɔ lo salema lo nkɛtɛ k’otondo. Yeso akatatshi ate: “Osoku ndu nyu [ambeki ande], lam’ayunyena akambu ane wambuyala, nyayeya nyati: Diulelu dia [Nzambi, NW] diaya suki. Mete kanyutelami nti: Wa lu lolonga lone hawushila, tshikima akambu ane tshe wambushidiyama.”—Luka 21:31, 32.
8. Woho akɔna watɛtɛ amvutshi waki Jehowa lo dikambo di’ohomba w’aha ndala djɔ na?
8 Eelo, etena ka Diolelo diaki Mɛsiya mbidja otshumba wa pondjo kaya ka onyɔ! Onde sho kokaka kondja ɛngɔ kɛmɔtshi oma l’oyango wa mbeya adatɛ kana lo fɔnyaka tsho lo dikambo di’edja ka lɔsɛnɔ la “lolonga” ɔtɔi oka? Atonga na! Habakuka 2:3 mbutaka l’ɔlɔlɔ tshɛ ɔnɛ: “Enelo kene keko ne dia etena kakasonwama. To kutsha nkuma lu ekumelu kato, to huta kashi. Kuyanga to kayutshimbatshimba, nyukikungeli. To kayuya mete, hakiutshimbatshimba.” Lushi la wokoyelo laki Jehowa lekɔ lo ndjasamanya shamanya tsho.—Jeremiya 25:31-33; Malaki 4:1.
9. Akambo akɔna wɛnya oma ko 1914 ɔnɛ wonya waya ka suke?
9 Etena kakatatɛ mbolɛ Diolelo diaki Kristo lo 1914, Satana akatshanyema oya la nkɛtɛ. Mbuta ate aki “lokolo l’ɛngɛnɔ lee nkɛtɛ . . . dikambo dyaabolo amboholɔ oya leenyu ndo nde ambolola la nkɛlɛ, dikambo nde mbewaka dya amboocikalɛɛ cenyi ya onya coo.” (Oshweelo 12:12, Dyookaneelo dy’oyooyo; sho mbɛnganyisha alɛta ango) Mɛtɛ, etena kakɔ kekɔ tshenyi lo kiɛdika l’ɛnɔnyi nunu nkama wa lowandji laki Satana. Diolelo diaya ka onyɔ, woho akɔ wâmɛ mbele ndo lushi la wonya wayolanya Jehowa lɔlɔnga lɔnɛ la kɔlɔ!—Tukedi 3:25; 10:24, 25.
“Lolonga” Layoshila
10. Woho akɔna wafɔna “lolonga lone” la lâki lo nshi ya Nɔa na?
10 Tɔsɛdingole l’ɔlɔlɔ tshɛ awui wakate Yeso watanema lo Mateu 24:34, 35 ɔnɛ: “Mete kanyutelami nti: antu wa lolonga lone hawushila, tshikima akambu aso tshe wambushidiyama. Ulungu la kete wayushila, keli aui ami hawushila.” (Sho mbɛnganyisha alɛta ango.) Ɛtɛkɛta a Yeso wayela ɛnɛ mɛnyaka ɔnɛ: ‘Ndoko onto leya lushi kânga wonya akɔ.’ Kɛnɛ koleki ohomba ele, nde akɛnya ɔnɛ sho pombaka mbewɔ tolonga tele l’emamu aso lo lɔlɔnga lɔnɛ. Yeso akakotsha ate: “Uku aki lu nshi ya Noa, mbayuyala [wôngelo wa, NW] On’a untu. Lu nshi yako, la ntundu ka elula atayi, antu wakalekaka, wakanokaka, wakatshukanaka, wakatshukamaka, edja ndu lushi lakoto Noa lu watu a luudu. Vo kumbeya, edja ndu lam’akayi elula, akawakhumela tshe. Osoku mbayuyala [wôngelo wa, NW] On’a untu.” (Mateu 24:36-39) Lanɛ, Yeso akɛdinyaka lɔlɔnga la lo nshi yande la lɔnɛ la lo nshi ya Nɔa.—Etatelu 6:5, 9.
11. Wɛdinyelo akɔna wakasale Yeso la tshɛkɛta ‘lɔlɔnga’ oko akakɔndɔla Mateu la Luka?
11 Ɔsɔ komonga mbala ka ntondo le apɔstɔlɔ dia vɔ mboka Yeso ɛdinya ‘nɔnga’ woho ɔsɔ nɛ dia, nshi mɔtshi la ntondo, nde akate lo dikambo diande ndamɛ ate: “Ɔn’onto . . . la dya ntaasowi efula ndo ntonama lee lɔlɔnga lɔnɛ. Oko ɔnkɔɔnɛ wakacaama lo nshi ya Nɔwɛ, ɔnkɔɔnɛ akɔ mbayooyaala lo nshi y’Ɔn’onto.” (Luka 17:24-26, Dyookaneelo dy’oyooyo; sho mbɛnganyisha alɛta ango) Woho akɔ wa wɛdinyelo ɔsɔ mbasala Mateu tshapita 24 la Luka tshapita 17. Lo nshi ya Nɔa, “[onto tshɛ [l]akalanya mboka kande la nkɛtɛ, NW]” ndo lakalanyema lo Mvula k’Elola aki “lolonga lone.” Lo nshi ya Yeso, Ase Juda wakatakɔ mbetawɔ la wanɛ waki kombetawɔ Yeso waki “lolonga lone.”—Etatelu 6:11, 12; 7:1.
12, 13. (a) Ɛlɔ kɛnɛ, ele “lolonga lone” lahomba shila na? (b) Woho akɔna walɔshana anto wa Jehowa la “lɔlɔnga lɔnɛ la kɔlɔ la wɛngɛngɛ”?
12 Lâsɔ, l’ekotshamelo k’ekomelo ka pɔlɔfɛsi ka Yeso ɛlɔ kɛnɛ, mɛnamaka dia “lolonga lone” mendanaka l’anto wa la nkɛtɛ wɛna djembetelo ya wôngelo waki Kristo koko watona nɔngɔsɔla mboka yawɔ. Otshikitanyi lawɔ, oko weso ambeki wa Yeso, sho tonaka mbokoya yoho ya lɔsɛnɔ lasɛna “lolonga lone.” Kânga mbeso l’andja ɔnɛ, hatohombe ndjatambiya l’akambo wa lɔkɔ, “dikambo etena kakawashikikɛ dy’akambo asɔ cɛɛ kaya nsuke.” (Oshweelo 1:3, Dyookaneelo dy’oyooyo; Joani 17:16,) Ɔpɔstɔlɔ Paulo akatɔkɔkɔmiya ate: “Ñotshake akambo tshɛ aha l’engunungunu la tamu, kele ñongake ñaha la mɔñɔ la onungu, ana wa Nsambi waha la diwadi l’atei wa lɔlɔnga lɔnɛ la kɔlɔ la wɛngɛngɛ. Dikambo l’atei w’anɛ ñu ngadimɔka oko tɔtɔ l’andja.”—Ase Filipi 2:14, 15, Dikelemba di’oyuyu; Kolosai 3:5-10, 1 Joani 2:15-17.
13 ‘Ongadimwelo aso oko tɔɔtɔ’ hate dia paka sho mɛnya lɔkɛwɔ la lonto laso la pudipudi l’Okristo loto, koko, lâdiko di’akambo asɔ tshɛ, sho pombaka kotsha olimu wakatosha Yeso ɔnɛ: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Ndoko onto lakoka mbuta etena kayonga ekomelo kakɔ, koko, sho mbeyaka ɔnɛ ekomelo ka “lolonga lone” l’anto wa kɔlɔ kayoya naka esambishelo kambosalema lo yɛdikɔ yangɛnyangɛnya Nzambi “edja ndu [lo tokoma ta, NW] kete.”—Etsha 1:8.
“Lushi Lako la Unya Ako”
14. Dako diakɔna diakasha Yeso nde la Paulo lo dikambo dia “tena la deku,” ndo ngande ahombaso sala?
14 Naka olimu w’esambishelo ambokambema l’ahole tshɛ lo ndjela yɛdikɔ yakakongɛ Jehowa, kete lâsɔ mbayokoka ‘lushi la wonya’ ande dia nde nanya dikongɛ di’andja ɔnɛ. Sho kema l’ohomba wa mbeya datɛ diakɔ la ntondo. Ɔnkɔnɛ, lo ndjela ɛnyɛlɔ kaki Yeso, ɔpɔstɔlɔ Paulo akatolake ate: “Anyasu, lu dikambu dia tena la deku, nyu hanyuhumbi untu nyufundela. Ne dia nyame nyambushihudia ololo nyati: Lushi la [Jehowa] layuya uku atuyakaka uvi l’utshu. Lam’ata antu vati: Eko ki la lutui tshitshi, ku elanyelu ka shashimuya kayuya le wo, uku atuyakaka lono le umuntu leli la diemi; vo hawuhanda nduku yema.” Lembetɛ kɛnɛ katɛtɛ Paulo ate: ‘Ayonga lam’ayowota vɔate.’ Mɛtɛ; lam’ayowɔtɛkɛta dikambo dia “ki la lutui tshitshi,” elombwelo ka Nzambi kayoya la shashimoya l’etena kahawakikongɛ. Ande woho wasungana dako diaki Paulo nɛ: “Okone tatulalaki djo uku akina, keli tosene, tuyali ki”!—1 Tesalonika 5:1-3, 6; enda nto ndo lo divɛsa 7-11; Etsha 1:7.
15, 16. (a) Lande na kahatahombe fɔnya ɔnɛ Armagɛdɔ eke etale efula otshikitanyi la woho wakatakanaka ntondo? (b) Woho akɔna wayomba tombwama lowandji laki Jehowa kem’edja nto na?
15 Onde tokanyi tɔsɔ t’eshika t’endana la “lolonga lone” mɛnyaka ɔnɛ Armagɛdɔ eke etale efula otshikitanyi la woho wakatakanaka? Atonga na! Kânga mbahateye “lushi lako la unya ako,” Jehowa okolieyaka nshi tshɛ, ndo nde hatshikitana. (Malaki 3:6) Mɛtɛ, andja wekɔ lo tadinde dinda tsho otsha l’elanyelo ka pondjo. Ohomba w’aha ndala djɔ wambotamanya tomba sɛkɛ oleki nshi ya ntondo. Jehowa akatɛnya “kɛnɛ kele la dya ncaama esadi etoo,” ndo sho pombaka mbɔsa tɛdikɔ la nkum’otema kaso tshɛ aha la tshimbatshimba.—Oshweelo 1:1; 11:18; 16:14, 16, Dyookaneelo dy’oyooyo.
16 Oko ayasukana nshi, tatolalake djɔ dikambo Jehowa ayanga nanya dikongɛ di’otondo diaki Satana nɛ! (Jeremiya 25:29-31) Jehowa ekɔ lo mbuta ate: “Dimi layenya wedja efula wuki ami la ekila kami. Dimi layuyaenya le wo, ku vo wayeya vati: Dimi keli [Jehowa].” (Ezekiyele 38:23) “Lushi la [Jehowa]” la woke lɔsɔ laya suke!—Joele 1:15; 2:1, 2; Amose 5:18-20; Zefaniya 2:2, 3.
‘Olongo w’Oyoyo wa Losembwe la Nkɛtɛ k’Oyoyo’ ka Losembwe
17, 18. (a) Lo ndjela Yeso nde la Petero, woho akɔna wayoshila “lolonga lone” na? (b) Lande na kahombaso mendaka lo dikambo dia lɔkɛwɔ laso la di’etsha aso sho anto wamamema Nzambi na?
17 Lo dikambo ‘di’akambo asɔ tshɛ wahomba ndja,’ Yeso akate ate: “Ulungu la kete wayushila, keli aui ami hawushila.” (Mateu 24:34, 35) Aha la tamu, lo lomba lande, Yeso akataka dikambo dia “ulungu la kete”—embuledi la wanɛ wôlɛwɔ—wa lo “lolonga lone.” Ɔpɔstɔlɔ Petero akakambe olimu la weoho akɔ w’ɛtɛkɛta lam’akandataka dikambo dia “olongo la nkɛtɛ ya nshi nyɛ,” ‘wambolamema dikambo dia tshumbama la dja ndo dia lushi l’elombwelo la l’elanyelo k’anto wa kɔlɔ.’ Oma lâsɔ ko nde ndjolembetshiya woho wele “loshi la [Jehowa] layooya oko nkanga ovi. Loshi lɔsɔ, olongo [mandji yalɔmbɔla] wayooshishɔ” kâmɛ la “nkɛtɛ” mbuta ate tshunda di’anto wasala akambo wa kɔlɔ, l’elimu awɔ wa kɔlɔ. L’ɔkɔngɔ diko, ɔpɔstɔlɔ amboyotɔkɔkɔmiya dia sho ‘monga la lɔkɛwɔ ndo l’etsha w’ekila wɛnya ɔnɛ sho mamemaka Nzambi, [lam’eso] lo konga ndo lo nama lo timba taso oyelo wa lushi la Jehowa, lushi layohandjɔ olongo la dja ndo layɔlɛlɔ diangɔ dia lɔkɔ la lowawadi la dja!’ Kakɔna kayoyela na? Petero ambokotola yambalo yaso oya lo ‘olongo w’oyoyo la nkɛtɛ k’oyoyo lɛnɛ ayoka losembwe ngelo.’—2 Petro 3:7, 10-13, Dyookaneelo dy’oyooyo.c
18 “Olongo w’oyooyo” ɔsɔ, Diolelo dialɔmbwama oma le Kristo Yeso la nkumi ya dikanga yosanganyi lande, ayohongolɛ “nkɛtɛ k’oyooyo,” mbuta ate: tshunda di’anto ɛtshɔkɔ. Onde wɛ ekɔ ɔtɔi ɔmɔtshi layonga l’atei wa tshunda diakɔ sɔ? Naka ɔsɔku mbediɔ, kete wɛ ekɔ l’ɛkɔkɔ wa ngɛnangɛna lo dikambo dia nshi yayaye ya mamba yatokongɛ shɔ!—Isaya 65:17-19; Oshweelo 21:1-5, Dyookaneelo dy’oyooyo.
19. Diɛsɛ diakɔna dia woke diakokaso kondja ɛlɔ kɛnɛ na?
19 Eelo, “lolonga” l’anto wa losembwe lekɔ lo sanganyema polo nd’ɛlɔ kɛnɛ. Ɛlɔ kɛnɛ, “ɔhɔmbɔ wa kɔlamelo ndo wa kɛsɔ” wokitami ekɔ lo mbisha wetshelo wa Nzambi lo ndjela kɛnɛ kata Osambu 78:1, 4 ɔnɛ: “Nyu [anto ami, NW], nyuhukami olembe ami. Nyuhuke atui lu aui watumba uma l’unyo ami . . . , [nyɔkɔndɔlɛke, NW] lolonga layayi dia lutumbu la [Jehowa], wulu andi, ndu akambu wa mamba wakandatshaka.” (Mateu 24:45-47, NW) Lo ngɔndɔ ka Mɔmbi 14 k’ɔnɔnyi ɔnɛ, l’atei wa tshumanelo oleki 75 500 ndo l’atei a wedja oleki 230, anto ndekana 12 000 000 wa lo nkɛtɛ k’otondo wakɔtɔ lo losanganya la Eohwelo ka Nyɔi ka Kristo. Onde ndo wɛ mbaki l’atei awɔ? Onga la mbetawɔ le Kristo Yeso ndo ‘tɛndɛ lokombo la Jehowa woho wa kondja panda.’—Romo 10:11-13.
20. Lam’ele “nshi yaya ka nshila,” lande na ahatahombe ndala djɔ, ndo elongamelo kakɔna kahombaso nama lo yimba?
20 Ɔpɔstɔlɔ Paulo akate ate: “Nshi yaya ka nshila.” Omalɔkɔ, ɔnɛ ekɔ etena ka salaka olimu waki Jehowa nshi tshɛ ndo k’aha ndala djɔ lam’akikɛso asui la lohetsho l’oma le anto wa lo lɔlɔnga lɔnɛ la kɔlɔ. (1 Koreto 7:29; Mateu 10:22; 24:13, 14) Tatolalake djɔ, tolamake akambo tshɛ wakawatatshi lo Bible ɔnɛ wayokomɛ “lolonga lone.” (Luka 21:31-33) Oma lo mbewɔ weoho w’akambo asɔ tshɛ ndo lo monga la kiongamu y’etawɔma le Nzambi la ntondo k’Ɔna onto, sho mbeyaka ndjokondja difuto dia lɔsɛnɔ la pondjo l’ɔkɔngɔ diko.
[Footnotes]
a Dia wɛ mbeya akambo akina efula w’endana la “tena esambeli,” enda lo “Que ton royaume vienne!,” dibuku diakatondja Watchtower Bible and Tract Society of New York, Inc., lɛkɛ 127-40, 186-9.
b Enda lo Volume 1 ya dibuku Insight on the Scriptures diakatondja Watchtower Bible and Tract Society of New York, Inc., lɛkɛ 918.
c Enda nto lo lɛkɛ 152-6 la 180-1 la dibuku Le futur gouvernement universel — le Royaume de Dieu, diakatondja Watchtower Bible and Tract Society of New York, Inc.
Wembola w’Ovuswelo:
◻ Lam’ele tambolembetɛ ekotshamelo ka Danyele 4:32, lande na ‘ahatahombe ndala djɔ’ ɛlɔ kɛnɛ na?
◻ Woho akɔna walembetshiyama “lolonga lone” lo ndjela Evanjiliɔ wa Mateu la wa Luka?
◻ Lam’ele tekɔ lo konga “lushi lako la unya ako,” kakɔna kɛnaso, ndo ahombaso ntsha?
◻ Elongamelo k’“olongo w’oyooyo la nkɛtɛ k’oyooyo” kayaye tokeketshaka dia sho sala na?
[Caption]
Asui wa l’andja ɔnɛ wayoshila etena kayeta lɔlɔnga lɔnɛ la ngala ndo la kɔlɔ
“Olongo w’oyooyo la nkɛtɛ k’oyooyo” ka lotombo lo ndjaye lo dikambo dia weoho tshɛ w’anto