Wembola w’oma le ambadi
Lo Filipi 2:9, Paulo akate lo dikambo dia Yeso ate: “[Nzambi, “NW”] akawumbiya otekoya, akawole lukumbu leli ladiku dia kumbu [kina, “NW”] tshe.” Naa lokombo lakɔ lɔsɔ l’oyoyo na? Ndo endaka Jehowa ndeka Yeso, woho akɔna wele lokombo la Yeso lâdiko dia nkombo kina tshɛ na?
Lo Filipi 2:8, 9, sho mbalaka ɔnkɔnɛ: “Lam’akandayala [Yeso] uku untu, ndi akayakitshakitsha, akayala la ukitanyia edja ndu lu nyoi, ee, nyoi ka l’utamba [w’asui, NW]. Ndu uma lu dikambu so, [Nzambi, NW] akawumbiya otekoya, akawole lukumbu leli ladiku dia kumbu [kina, NW] tshe.”
Divɛsa sɔ hadiolembetshiya ɔnɛ lam’ele paka Jehowa oto mbele la lokombo lele mɛtɛ lâdiko dia nkombo kina tshɛ, kete lâsɔ Yeso pombaka ndjâla onto lɛdimi la Jehowa. Oko wadiɛnya avɛsa wofundami lasuke la divɛsa sɔ lo tshapita ya hende ya Filipi, Yeso akɔlamɛ lokombo la lâdiko lɔsɔ l’ɔkɔngɔ wa eolwelo kande. La ntondo ka eolwelo, nde kondjala la lokombo lɔsɔ. Lo wedi okina, nshi tshɛ Jehowa okôngaka lâdiko dia tshɛ, ndo dihole diande hadiotshikitanaka pondjo. Dikambo di’ɔnɛ Yeso akɔlamɛ lokombo loleki lɔnɛ laki lande la ntondo k’olimu ande lanɛ la nkɛtɛ mɛnyaka ɔnɛ nde hɛdimi la Jehowa. Lam’akate Paulo ɔnɛ Yeso akɔlamɛ lokombo lele lâdiko dia nkombo kina tshɛ, nde akalange nembetshiya ɔnɛ kakianɛ Yeso aya la lokombo loleki nkombo ya ditongami tshɛ diaki Nzambi.
Naa lokombo laki Yeso la lâdiko lɔsɔ na? Isaya 9:6 tokimanyiyaka dia kadimola lo dimbola sɔ. Lam’akandatatshi di’oyelo wa Mɛsiya, Yeso, divɛsa sɔ mbutaka ɔnɛ: “Ne dia wambututela ona, wambutusha ona pami. Diulelu diayuyala lu aheka andi. [Wayowetaka, “NW”] vati: Undaki a Mamba, [Nzambi ka, NW] Wulu, Shesu ka Pundju, Uwandji wa Ki.” Lanɛ, wakɔlɛ Yeso “lukumbu” lo menda dihole diande dia lâdiko ndo lowandji lande, lo woho akɔ ɔsɔ mbahotɔsɔ “lukumbu leli ladiku dia kumbu tshe” latawɔ lo Filipi 2:9. Adwe tshɛ pombaka kusamɛ Yeso lo mandola dihole dia lâdiko dia lowandji lakawosha Jehowa—dihole dia lowandji la woke efula loleki lɔnɛ lakandasha etongami kekina tshɛ. Tshɛkɛta “kina” l’ekadimwelo kɛnɛ hɛnyama mbala kakɔ ɔtɔi l’ɛse ka afundelo wa lo Ngirika, koko yɔ nemanɛka la eokelo ka divɛsa. “Lukumbu” laki Yeso kema lâdiko dia lokombo lande hita koko lekɔ lâdiko dia nkombo ya ditongami dikina tshɛ.
Ande ɔlɔ wele laso dia sangana l’andjelo tshɛ wa kɔlamelo ndo l’anto akina lo mbika adwe lo mandola lokombo laki Yeso lee! Sho salaka dikambo sɔ lo ndjakitshakitsha la tshina dia Yeso lo dihole dia lâdiko ndo dia nkudu diakawosha Jehowa—“ne dia lutumbu la [Nzambi, NW] Shi.”—Filipi 2:11; Mateu 28:18.