‘Onde Lekɔ Ohomba Lo Asho Wa Nzambi?’

“ONDE Lekɔ Ohomba? Onde Nzambi Ambidjakɔ Yimba?” Ɔsɔku mbalema ɔtɛ a dui wa sawo dimɔtshi diele lo Christianity Today (Lokristo Ɛlɔ Kɛnɛ). Philip Yancey ofundji wa sawo diakɔ sɔ akate ate: “Akambo efula wa l’olimu ami w’ofundji w’abuku tshimbaka paka lo dikambo dia shɔkɔ, lekɔ lo kalola l’akambo akɔ wâmɛ ato oma la funda ko funda oko onto letshetsha lohita lo pota k’edjedja kahakɔnɔ. Lakoke awui oma le ambadi w’abuku ami, ndo ɛkɔndɔ awɔ wa lonyangu shikikɛka tâmu tami.”

Ondo ndo wɛ lawɔ toyambolaka lo kɛnɛ k’endana la woho wayasha Nzambi lo lɔsɛnɔ layɛ. Ondo wɛ mbeyaka hwe kɛnɛ katama lo Joani 3:16 ɔnɛ: “[Nzambi, NW] akalangi wa la kete utamanya, mbakandawasha On’andi etoi lakanduti.” Kana ondo wɛ ambalaka lo Mateu 20:​28, lɛnɛ atama ɔnɛ Yeso akaye: “dia mbakimwela lumu landi uku [tshungo dikambo dia, NW] antu efula.” Ondo wɛ ekɔ lo tetemala ndjambola ɔnɛ: ‘Onde Nzambi mbidjakami yimba? Onde nde kanɛkami oko onto oka?’ Ɛkɔkɔ w’eshika wekɔ wɛnya ɔnɛ nde kodjaka yimba, oko ayotɛna.