Ɛkɔndɔ W’apandjudi A Diolelo
‘Ɛlɛmbɛ Ayɛ Tshɛ Wekɔ Mɛtɛ’
YEMA la ntondo ka nde mvɔ, Mɔsɛ akakɔkɔmiya Ase Isariyɛlɛ dia vɔ kitanyiyaka ɛlɛmbɛ tshɛ wa Jehowa. Nde akawatɛ ate: “Nyulami aui ane tshe wamumunyutela elo l’etema anyu, dia nyu mbatela an’anyu, dia vo nama la ntsha aui tshe w’olembe one. Ne dia dikambu ne kema dikambu dia tshitshe le nyu, dio dieko lumu lanyu.”—Euhwelu k’Elembe 32:46, 47.
L’ɔkɔngɔ w’ɛnɔnyi nkama, omembi w’esambu akayɛnyaka ohomba wa wetshelo tshɛ wa Nzambi lam’akandate ate: “[Jehowa] li, we eko suki, ndu elembe aye tshe weko mete.” (Osambu 119:151) L’eleko ka ntondo, Yeso ndamɛ akɛnya ohomba wa “aui tshe watumba uma l’unyo wa [Jehowa].” (Mateu 4:4) Ndo ɔpɔstɔlɔ Paulo akafunde l’ɛlɔmbwɛlɔ ka Nzambi ate: “Afundelo tshɛ wakasambiyama oma le Nzambi ndo wekɔ ɔlɔlɔ.”—2 Timɔtɛ 3:16, NW.
Mɛtɛ, Jehowa Nzambi nɔmbaka atɛmɔdi ande dia vɔ mbɔsa losango l’otondo lakandatosha l’atei w’akatshi wa Dui diande la nɛmɔ. Ndoko divɛsa ɔtɔi dia lo Bible diele bu ohomba. Ɛmɛnyi wa Jehowa mbɔsaka Dui dia Nzambi lo yoho shɔ, ndo ɔkɔndɔ ɔnɛ w’oma la Mauritius mɛnyaka dikambo sɔ.
Yɔnɛ D—— akadjasɛka lo ngelo kɛmɔtshi kanganyi etale, lɛnɛ akandakambaka oko nsɛtɛdi ka l’otsho. L’edja k’efula, nde akayangaka woho w’ɔlɔlɔ wa tɛmɔla Nzambi l’otema ɔtɔi. L’otsho, lo tena diakandalamaka lokombo, nde akatatɛ mbala Bible. L’edjedja ka wonya, nde akashile la mbala Bible k’otondo. Nde akeye ɔnɛ Nzambi lokombo lande Jehowa—lokombo latanema mbala efula lo Bible kande kakafundama l’ɔtɛkɛta wa Hindi. Nde akɛnyi ɔnɛ dibuku dielɛwɔ Enyelo diekɔ dibuku dia diambo efula diakotola yambalo y’anto.
Ko nde akayambola dia mbeya kana ɔtɛmwɛlɔ ɔmɔtshi wayela Bible k’otondo wekɔ. Nde akɛnyi ɔnɛ ɛtɛmwɛlɔ wakandeyaka wakayelaka paka tenyi dimɔtshi dia Bible to. Ɛtɛmwɛlɔ ɛmɔtshi waketawɔka Afundelo wa lo Hɛbɛru ko wakatonaka Afundelo wa lo Grɛkɛ w’Akristo. Ɛtɛmwɛlɔ ekina kombidjaka Afundelo wa lo Hɛbɛru yimba, wakɔsaka paka Afundelo wa lo Grɛkɛ w’Akristo ato la nɛmɔ.
Lushi lɔmɔtshi, Yɔnɛ. D—— akɛnyi wadi l’omi wayalwɛ mvula, ko nde akawaelɛ dia vɔ ndjokama lo luudu lande. Atshukanyi asɔ waki Ɛmɛnyi wa Jehowa. Wadi akakimɛ dibuku La Révélation: le grand dénouement est proche!a Ko wonya akɔ, Yɔnɛ D—— akâlɔmbɛ dibuku diakɔ. Ɔnangɛso nde la kadiyɛso wakɛnyi ɔnɛ awui w’endana la pɔlɔfɛsi ya lo Enyelo wekɔ wolo efula dia nde mbamana fundo, ko vɔ wakawosha okanda okina. Koko Yɔnɛ D—— akatetemala nɔmba dibuku Révélation.
Lam’akandakondja dibuku diakɔ, nde akadiale esadi esadi. Ko nde akayetawɔ Ɛmɛnyi wa Jehowa mbeka la nde Bible. Kem’edja, nde akambe lo mɛna ɔnɛ Ɛmɛnyi wa Jehowa mbɔsaka Bible k’otondo la nɛmɔ efula. Nde akatatɛ mbɔtɔ lo nsanganya mbala la mbala lo Mbalasa ka Diolelo k’Ɛmɛnyi wa Jehowa, lɛnɛ ekawɔ Afundelo wa lo Hɛbɛru la wa lo Grɛkɛ la yambalo tshɛ. Kakianɛ, nde ekɔ opandjudi wa Diolelo ndo ose etshumanelo k’Akristo lambobatizama.
[Footnote]
a Dibuku diakatondja Watchtower Bible and Tract Society of New York, Inc.
[Caption]
[Notɛ ka l’ɛsɛ ka dikatshi]